Den ben doe a wani foe Jehovah

A bribi foe papa nanga mama e kisi pai

A BEN de wan bigi prisiri gi den Israèlsma, te wan manpikin ben gebore. Disi ben wani taki dati a geslaktilin ben o go doro èn taki na okasi foe kisi gron, ben o tan na ini a famiri. Ma na ini a jari 1593 b.G.T., gi den Hebrewsma a ben gersi moro leki wan floekoe kande, leki a ben gersi wan blesi te den kisi wan manpikin. Foe san ede? Foe di a Farao foe Egipti, di ben kon si nanga frede na ati taki a djoe pipel ben e gro so esi-esi na ini a kontren di a ben tiri, ben gi a komando taki den ben moesoe kiri ala den njoenjoen-pikin foe den di ben de boi. — Exodus 1:12, 15-22.

A ben de na ini a pisi ten disi di den ben proeberi na wan ogri-atifasi foe kiri ipi-ipi sma foe wan ras poeroe, taki Amram nanga Jokebed, wan Hebrew trowpaar, ben tron papa nanga mama foe wan moi beibi, di ben de wan boi. A makriki foe prakseri fa frede pori a prisiri foe den kande, te den ben prakseri a komando foe Farao. Ma tokoe, di Amram nanga Jokebed ben loekoe a beibi foe den, di ben de wan boi, den ben abi a fasti bosroiti foe no drai den baka gi en, awansi san den bakapisi ben o de. — Exodus 2:1, 2; 6:20.

Doe wan sani foe bribi ede

Dri moen langa, Amram nanga Jokebed ben kibri a beibi foe den (Exodus 2:2). Ma disi ben de kefalek, foe di den Hebrewsma nanga den Egiptisma ben libi krosibei foe makandra. Soleki fa a sori, dan iniwan sma di ben proeberi foe komoto na ondro a komando foe Farao, ben o kisi dedestrafoe — èn a beibi ben o dede toe. San a lobi papa nanga mama disi ben kan doe foe meki a manpikin foe den èn densrefi, tan na libi dan?

Jokebed ben tjari wan toe taki papirus kon na wán. Papirus na wan tranga sortoe grasi, di gersi bamboesi, èn a abi wan drikanti tiki di deki leki wan finga. A kan hei so wan siksi meter. Den Egiptisma ben gebroiki a prani disi foe meki papira, matamata, seiridoekoe, sandaal, nanga lekti boto.

Foe den tiki Jokebed ben meki wan manki di ben bigi nofo foe hori a beibi foe en. Dan a ben poti asfalt nanga tara na disi tapoe foe hori a manki na makandra èn foe no meki watra kon na ini. Baka dati Jokebed ben poti a beibi foe en na ini a manki èn ben poti en na mindri den hei grasi na a sjoro foe a Nijl liba. — Exodus 2:3.

Den e feni a beibi

Miriam, na oemapikin foe Jokebed, ben go tanapoe krosibei so taki a ben kan si san ben o pasa baka dati. Now na oemapikin foe Farao ben kon wasi na ini a Nijl.a Kande Jokebed ben sabi taki na oemapikin foe kownoe ben e kon foeroefoeroe na a pisi disi foe a Nijl èn foe espresi a ben poti a manki pe den ben sa man feni en makriki. Awansi fa a no fa, no langa baka dati na oemapikin foe Farao ben si a manki di ben de kibrikibri na mindri den hei grasi, èn a ben kari wan foe den foetoeboi foe en foe go teki en. Di a ben si a pikin na ini di ben e krei, a ben kon firi sari. A ben si taki disi ben de wan Hebrew beibi. Ma fa a ben kan meki den kiri so wan moi pikin? Boiti taki na oemapikin foe Farao ben abi a boen-atifasi di libisma abi, kande a pôpi prakseri foe den Egiptisma ben abi krakti na en tapoe, taki efoe wan sma ben wani go na hemel, dan a ben moesoe doe wan boen sani na ini a libiten foe en.b — Exodus 2:5, 6.

Miriam, di ben tanapoe pikinso moro fara e loekoe, ben go na a oemapikin foe Farao. „Mi sa go èn kari spesroetoe gi joe wan Hebrew oema di e gi pikin bobi, so taki a kan gi a pikin bobi gi joe?” a ben aksi. Na oemapikin foe kownoe ben piki: „Go!” Miriam ben lon go na en mama. Sjatoe baka dati, Jokebed ben e tanapoe na fesi na oemapikin foe Farao. „Teki a pikin disi nanga joe èn gi en bobi gi mi,” na oemapikin foe kownoe ben taigi en, „èn misrefi sa pai joe.” A kan taki na oemapikin foe Farao ben froestan now taki Jokebed ben de a mama foe a beibi. — Exodus 2:7-9.

Jokebed ben hori a pikin foe en te leki a no ben soigi bobi moro.c Disi ben gi Jokebed foeroe moi okasi foe leri a boi foe a troe Gado, Jehovah. Baka dati Jokebed ben tjari a pikin go baka na a oemapikin foe Farao, di ben kari a boi Moses, san wani taki „komopo na watra”. — Exodus 2:10.

Wan sani di wi kan leri

Amram nanga Jokebed ben gebroiki a sjatoe okasi di den ben abi, boen, foe leri a manpikin foe den den gronprakseri foe a soifri anbegi. Papa nanga mama na ini a ten disi moesoe doe a srefi sani. Ija, a de toemoesi prenspari taki den e doe disi. Satan Didibri „e waka lontoe leki wan krasi lew, di e soekoe foe njan wan sma” (1 Petrus 5:8). A ben sa lobi en foe kisi warti jongoesma leki stimofo — boi nanga oemapikin — di abi a howpoe foe tron boen foetoeboi foe Jehovah. A no abi sari-ati nanga den jongoe jari foe den! Foe di disi de so, dan koni papa nanga mama e leri den jongoe pikin foe den foe frede a troe Gado, Jehovah. — Odo 22:6; 2 Timoteus 3:14, 15.

Na Hebrewsma 11:23, den skrifi taki a moeiti di Amram nanga Jokebed ben doe foe kibri a beibi foe den na ini den fosi dri moen foe en libi, na wan sani di doe foe bribi ede. A papa nanga a mama di ben abi frede gi Gado ben sori taki den ben froetrow tapoe a makti di Jehovah abi foe kibri sma, foe di den ben weigri foe drai den baka gi a pikin foe den, èn foe a sani disi ede den ben kisi blesi. Wi so srefi moesoe sori taki wi e hori wisrefi steifi na den wet nanga gronprakseri foe Jehovah, foe di wi e froetrow taki awansi sortoe sani Jehovah e gi pasi foe a kon na wi tapoe, baka ten disi sa abi boen bakapisi gi wi têgo boen nanga kolokoe. — Romesma 8:28.

[Foetoewortoe]