Konsensi — Wan hebi, noso wan wini?

’MI KONSENSI e fon mi!’ Wanwan leisi, pikinmoro wi alamala e ondrofeni konsensi-fonfon. Den sortoe firi disi kan de nomo wan froeferi firi te go miti wan hebi sari. Konsensi fonfon kan meki wan sma firi depressief srefi noso a kan meki wan sma abi a tranga firi taki a meki fowtoe.

Te joe e loekoe en na a fasi disi, dan a no de so dan taki a konsensi na wan hebi? Son sma e firi kande taki a de wan hebi. Fositen, foeroe koeltoeroe ben si a konsensi foeroetron leki wan sani di sma abi foe sensi den geborte. Foeroe sma ben denki taki a ben de wan sani di Gado srefi ben gi wi foe tiri wi na moreel sei. Foe dati ede, sma kari a konsensi „Gado na ini libisma”, „a fosi persoonlijkheid foe wi”, èn srefi „a sten foe Gado”.

Ma na ini den jari di pasa no so langa ete, a kon de pôpi taki sma e froeklari taki a konsensi de moro foeroe wan sani di wan sma e kisi — a bakapisi foe a krakti di papa nanga mama èn a libimakandra abi na tapoe wan sma. Foe eksempre, wan toe psycholoog e taki dati wan pikin e leri foe no tjari ensrefi na wan fasi di no boen, moro foeroe foe di a frede gi strafoe, èn den e bribi taki a konsensi na nomo a kisi di wi e kisi den persoonlijk markitiki nanga idea foe wi papa nanga mama. Tra sma e sori go na a ròl di a libimakandra moro foeroe e plèi foe gi sani di sma e si leki warti sani èn foe gi markitiki. Son sma e si konsensi-fonfon leki nomo a strei na mindri den sani di wi ben sa wani doe èn den sani di wan libimakandra di e kwinsi wi e dwengi wi foe doe!

Awansi sortoe idea de, foeroetron sma tanapoe kánkan teige den papa nanga mama, den famiri, nanga heri libimakandra, foe di den konsensi foe den ben taigi den foe doe so. Son wan wani srefi foe òfer a libi foe den soso foe abi wan boen konsensi! Èn ala di bigi difrenti de na mindri den koeltoeroe foe grontapoe, tokoe den sani soleki kiri, foefoeroe, soetadoe, lei, èn seks demakandra nanga eigi famiri, sma e si den pikinmoro na heri grontapoe leki sani di fowtoe. Disi no ben sa boeweisi taki wi kisi a konsensi na wi geborte?

Konsensi — A fasi fa bijbel e si en

A troetroe sabiman na ini a tori disi, na Jehovah Gado. Foe di „na en [Gado] meki wi, èn a no wi meki wisrefi” (Psalm 100:3). A e froestan heri boen fa wi de. A Wortoe foe Gado, bijbel, e froeklari taki sma ben meki na a „prenki” foe Gado (Genesis 1:26). Gado ben kria sma nanga wan firi foe sabi san boen èn san fowtoe; na a bigin kaba, a konsensi ben de wan sani di libisma abi leki wan pisi foe en. — Teki gersi Genesis 2:16, 17.

Na apostel Paulus e froeklari disi toe na ini en brifi gi den Romesma, di a ben e skrifi: „Ibri leisi te sma foe den nâsi di no abi [Gado] wet, e doe den sani foe a wet, foe densrefi, dan den sma disi, ala di den no abi wet, de wan wet gi densrefi. Den na joisti den sma di e sori taki san de na ini a wet, skrifi na ini den ati, ala di a konsensi foe den e gi kotoigi nanga den èn den eigi prakseri na ini den, e gi den a fowtoe noso e regtfardiki den” (Romesma 2:14, 15). Loekoe taki foeroe foe den sma di no ben gro na ondro a Wet foe Gado di a ben gi den djoe, tokoe ben waka na baka son wan foe den gronprakseri foe a wet foe Gado, no foe di a libimakandra ben dwengi den, ma „foe densrefi”!

So boen, na presi foe de wan hebi, a konsensi na wan presenti foe Gado, wan wini. A troe, a kan gi wi pen. Ma te wi e arki en na wan joisti fasi, dan a kan gi wi so srefi foeroe satisfaksi èn vrede nanga wisrefi. A kan tiri wi, kibri wi, èn boeweigi wi foe doe sani. The Interpreter’s Bible e froeklari: „Wan sma kan tan hori en gosontoe na froestan sei nanga na emotioneel sei, soso te a sma e proeberi foe poeroe a difrenti di de na mindri den sani di a e doe èn den sani di a e firi taki a moesoe doe.” Fa wan sma kan poeroe a difrenti dati? A kan taki wi man abi krakti na tapoe wi konsensi èn foe oefen en? Wi sa loekoe den aksi disi na ini na artikel di e kon now.