Meki wi hori fasti na a warti bribi foe wi!
„Gi den wan di kisi wan bribi, di abi a srefi grani leki di foe wi.” — 2 PETRUS 1:1.
1. San Jesus ben taki foe warskow den apostel foe en, ma foe sortoe sani Petrus ben djaf tokoe?
A NETI bifo Jesus dede, a ben taki dati ala den apostel foe en ben o gowe libi en. Wan foe den, Petrus, ben djaf: „Awansi ala den trawan e naki foetoe fadon foe joe ede, noiti mi sa naki foetoe fadon!” (Mateus 26:33) Ma Jesus ben sabi taki disi no ben o de so. Dati meki a ben taigi Petrus na a srefi okasi dati: „Mi begi tranga gi joe taki joe no ben sa lasi a bribi foe joe; èn joe foe joe sei, so esi leki joe drai kon baka, tranga den brada foe joe.” — Lukas 22:32.
2. Sortoe sani di Petrus ben doe, ben sori taki a bribi foe en ben swaki, ala di a ben de toemoesi seiker foe ensrefi?
2 A srefi neti dati, Petrus, di ben kon de toemoesi seiker foe a bribi foe en, ben taki dati a no ben abi noti foe doe nanga Jesus. Dri leisi a ben taki srefi dati a no ben sabi Krestes! (Mateus 26:69-75) A ben moesoe de so, taki di a ben „drai kon baka”, den wortoe foe a Masra foe en, foe „tranga den brada foe joe”, ben kon na ini en prakseri ibritron baka. A froemane dati ben abi foeroe krakti na tapoe a libi foe Petrus baka ten, soleki dati e kon na krin na ini den toe brifi di a ben skrifi, èn di kibri na ini bijbel.
Foe san ede Petrus ben skrifi den brifi foe en
3. Foe san ede Petrus ben skrifi en fosi brifi?
3 So wan 30 jari baka a dede foe Jesus, Petrus ben skrifi en fosi brifi, èn a ben skrifi en gi den brada foe en na ini Pontus, Galasia, Kapadosia, Asia, nanga Bitania, kontren di de now a noordsei nanga westsei pisi foe Torkoekondre (1 Petrus 1:1). Tweifri no de taki djoe, di sonwan foe den ben tron kresten na a Pinksterfesa foe 33 G.T. kande, ben de na mindri den sma di Petrus ben skrifi (Tori foe den Apostel 2:1, 7-9). Foeroe foe den ben de heidensma di ben ondrofeni hebi tesi foe a sei foe den gensman (1 Petrus 1:6, 7; 2:12, 19, 20; 3:13-17; 4:12-14). Dati meki Petrus ben skrifi den brada disi foe gi den deki-ati. A ben abi na prakseri foe jepi den kisi „a kaba foe a bribi foe [den], a froeloesoe foe a sili foe [den]”. So boen, ini a lasti froemane foe en, a ben gi den tranga: „Kakafoetoe gi [Didibri], hori fasti na a bribi.” — 1 Petrus 1:9; 5:8-10.
4. Foe san ede Petrus ben skrifi en di foe toe brifi?
4 Baka ten, Petrus ben skrifi den kresten disi wan di foe toe brifi (2 Petrus 3:1). Foe san ede? Foe di wan moro bigi kefar ben de srefi. Sma di ben abi wan hoeroedoe fasi foe libi, ben o proeberi foe panja a doti fasi fa den ben tjari densrefi, na ondro bribisma èn den ben o kori sonwan foe den! (2 Petrus 2:1-3) Boiti dati, Petrus ben warskow gi spotoeman. A ben skrifi na ini en fosi brifi taki „a kaba foe ala sani kon krosibei”, èn a sori taki son sma ben skempi nanga a prakseri dati now (1 Petrus 4:7; 2 Petrus 3:3, 4). Kon meki wi ondrosoekoe a di foe toe brifi foe Petrus èn loekoe fa disi ben tranga den brada so taki den ben kan tanapoe kánkan na ini a bribi. Na ini a fosi artikel disi wi sa loekoe 2 Petrus kapitel 1.
A marki foe kapitel 1
5. Fa Petrus e sreka den leisiman foe a brifi foe en gi a taki di a sa taki foe problema?
5 Petrus no e taki wantewante foe den serjoesoe problema. Na presi foe dati, a e bow a warderi di den leisiman foe a brifi foe en abi gi den sani di den ben kisi na a ten di den ben tron kresten, èn nanga dati a e sreka a pasi gi a taki di a sa taki foe den problema disi. A e memre den na den toemoesi moi pramisi foe Gado èn na a froetrow di den kan froetrow tapoe bijbel profeititori. A e doe disi foe di a e taki foe a transfigurâsi, a fisjoen di ensrefi ben kisi foe Krestes na ini Kownoekondre makti. — Mateus 17:1-8; 2 Petrus 1:3, 4, 11, 16-21.
6, 7. (a) Sortoe sani wi kan leri foe den biginwortoe foe a brifi foe Petrus? (b) Sortoe sani di wisrefi moesoe erken son leisi, ben sa kan de wan jepi te wi e gi rai?
6 Wi kan leri wan sani foe den biginwortoe foe Petrus? A no de so, taki sma di e kisi rai e teki a rai disi moro esi te wi e loekoe fosi nanga den, san na den sani di abi foe doe nanga a toemoesi moi Kownoekondre howpoe di wi alamala abi? Èn fa a de te wi e gebroiki wan ondrofenitori foe wisrefi? Kande, baka a dede foe Jesus, Petrus ben taki foeroe leisi foe a fisjoen di a ben si foe Krestes na ini Kownoekondre glori. — Mateus 17:9.
7 Memre toe taki a kan, dati na a ten di Petrus ben skrifi en di foe toe brifi, na Evangelietori foe Mateus nanga a brifi di na apostel Paulus ben skrifi gi den Galasiasma, ben panja na ala sei kaba. Dati meki sma di ben libi na ini a ten foe en, kande ben sabi heri boen foe den fowtoe di Petrus ben meki leki libisma èn foe a fasi fa a ben sori a bribi foe en (Mateus 16:21-23; Galasiasma 2:11-14). Ma disi no ben meki a lasi en fri fasi foe taki. Ija, kande den sma di ben sabi den eigi swakifasi, ben lobi a brifi foe en moro. Foe dati ede, te wi e jepi sma di abi problema, dan a no ben sa kan de wan boen sani te wi erken taki wi e meki fowtoe so srefi? — Romesma 3:23; Galasiasma 6:1.
Wan odi di e gi tranga
8. Na sortoe fasi Petrus ben gebroiki a wortoe „bribi” kande?
8 Now, loekoe na odi foe Petrus. Wantewante a e taki foe a tori di abi foe doe nanga bribi, èn a e kari den leisiman foe a brifi foe en „den wan di kisi wan bribi, di abi a srefi grani leki di foe wi” (2 Petrus 1:1). Djaso den wortoe „wan bribi” wani taki kande „tranga overtoigi” èn a e sori go na ala den kresten bribi noso leri makandra, di bijbel e kari „waarheid” son leisi (Galasiasma 5:7; 2 Petrus 2:2; 2 Johanes 1). Den e gebroiki a wortoe „bribi” moro foeroe na a fasi disi, na presi leki den e gebroiki en na wan algemeen fasi di e gi froetrow tapoe noso bribi ini wan sma noso wan sani. — Tori foe den Apostel 6:7; 2 Korentesma 13:5; Galasiasma 6:10; Efeisesma 4:5; Judas 3.
9. Foe san ede na odi foe Petrus ben moesoe de so wan switi sani, spesroetoe gi den heidensma?
9 Na odi foe Petrus ben moesoe sori wan switi sani, spesroetoe gi den heiden leisiman. Djoe no ben abi noti foe doe nanga heidensma, ija, den ben wisiwasi den srefi, èn a desko di den ben desko den heidensma ben de so ete na ondro djoe di ben tron kresten (Lukas 10:29-37; Johanes 4:9; Tori foe den Apostel 10:28). Tokoe Petrus, di ben de wan djoe sensi di en mama meki en èn wan apostel foe Jesus Krestes, ben taki dati den leisiman foe a brifi foe en — djoe nanga heidensma — ben abi a srefi bribi èn den ben abi a srefi grani leki di foe en.
10. Sortoe sani wi kan leri foe na odi foe Petrus?
10 Prakseri foe den moi sani di na odi foe Petrus e leri wi na ini a ten disi. Gado no e teki sma partèi; a no lobi a wán ras noso nationaliteit moro a trawan (Tori foe den Apostel 10:34, 35; 11:1, 17; 15:3-9). Soleki fa Jesus srefi ben leri, dan ala kresten na brada, èn no wan foe wi moesoe si ensrefi moro hei leki wan trawan. Na odi foe Petrus e tjari kon na krin moro fara, taki troetroe wi de wan bradafasi na heri grontapoe, di abi „a srefi grani” leki a bribi di Petrus nanga den kompe apostel foe en ben abi. — Mateus 23:8; 1 Petrus 5:9.
Sabi nanga den pramisi foe Gado
11. Na tapoe sortoe prenspari sani Petrus e poti krakti, baka di a gi odi?
11 Baka di Petrus gi odi, a e skrifi: „Meki oenoe kisi moro no-froedini boen-atifasi nanga vrede.” Fa wi kan kisi moro no-froedini boen-atifasi nanga vrede? „Nanga jepi foe wan soifri sabi foe Gado èn foe Jesus, wi Masra”, Petrus e piki. Dan a e taki: „Na wan fri fasi, . . . gado krakti foe en gi wi ala den sani di de fanowdoe gi a libi èn gi a gi di wi gi wisrefi ini a dini foe Gado.” Ma fa wi e kisi den toemoesi prenspari sani disi? „Nanga jepi foe a soifri sabi foe a sma di ben kari wi nanga jepi foe glori nanga boenfasi.” So boen, toe leisi Petrus e poti krakti na tapoe taki a de prenspari foe abi wan soifri sabi foe Gado nanga en Manpikin. — 2 Petrus 1:2, 3; Johanes 17:3.
12. (a) Foe san ede Petrus e poti krakti na tapoe a prenspari di a de prenspari foe abi soifri sabi? (b) San wi ben moesoe doe fosi efoe wi wani njan boen foe den pramisi foe Gado?
12 Den „falsi leriman” di Petrus e warskow gi na ini kapitel 2, e gebroiki „leitori” foe kori kresten. Na a fasi disi den e proeberi foe kori kresten meki den go doe hoeroedoe baka di den ben kon fri foe disi. A de wan sari bakapisi te wan sma di kisi froeloesoe nanga jepi foe „wan soifri sabi foe a Masra èn Froeloesoeman Jesus Krestes”, e broko kindi baka ten gi a fasi dati fa sma kori en (2 Petrus 2:1-3, 20). Kande foe di Petrus ben abi na prakseri foe taki foe a problema disi baka ten, meki na a bigin foe en brifi kaba, a e poti prakseri na tapoe fa soifri sabi abi foe doe nanga a tan di wan sma moesoe tan abi wan krin posisi na fesi Gado. Petrus e taki dati Gado „gi wi na wan fri fasi den warti èn kefalek bigi pramisi, so taki nanga dati oenoe kan tron sma di abi prati na ini a natoeroe foe Gado”. Ma tokoe, efoe wi wani njan boen foe den pramisi disi, di de wan prenspari pisi foe a bribi foe wi, na so Petrus e taki, dan wi moesoe „lowe [fosi] foe a pori di de na grontapoe foe a lostoe ede”. — 2 Petrus 1:4.
13. Sortoe sani den salfoe kresten nanga den „tra skapoe” abi a fasti bosroiti foe hori fasti na dati?
13 Fa joe e si den pramisi foe Gado? Joe e si den na a fasi fa a fikapisi foe salfoe kresten e si den? Na ini 1991, Frederick Franz, di na a ten dati ben de presidenti foe a Watch Tower Bible and Tract Society, èn di ben horidoro na ini a foeroeten diniwroko moro leki 75 jari, ben taki foe den firi foe den sma di e howpoe foe tiri nanga Krestes: „Wi e hori fasti te na a lasti joeroe disi, èn wi sa tan hori fasti te leki Gado sori troetroe taki a e hori ensrefi na den ’warti èn kefalek bigi pramisi’ foe en.” Brada Franz ben tan froetrow tapoe a pramisi di Gado ben pramisi foe gi sma wan opobaka na hemel, èn a ben hori fasti na a bribi te leki a dede na wan libimarki foe 99 jari (1 Korentesma 15:42-44; Filipisma 3:13, 14; 2 Timoteus 2:10-12). Na so, miljoenmiljoen sma e hori fasti na a bribi, èn den e poti den prakseri na tapoe a pramisi di Gado pramisi wan paradijs na grontapoe pe sma sa libi foe têgo na ini kolokoe. Joe na wan foe den sma disi? — Lukas 23:43; 2 Petrus 3:13; Openbaring 21:3, 4.
Doe wan sani na tapoe den pramisi foe Gado
14. Foe san ede Petrus e kari boenfasi leki a fosi eigifasi di moesoe moksi nanga bribi?
14 Wi de nanga tangi foe den sani di Gado pramisi? Efoe dati de so, na so Petrus e taki, dan wi moesoe sori disi. „Ija, foe a reide disi ede” (bika Gado gi wi toemoesi warti pramisi), meki wi moesoe doe troetroe moeiti foe de aktief ini a bribi. Wi no kan de tevrede nomo taki wi de na ini a bribi noso taki wi sabi bijbel waarheid nomo. Dati no nofo! Kande a ben de so na ini a ten foe Petrus, taki son sma na ini den gemeente ben taki foeroe foe bribi, ma den ben go libi na ini hoeroedoe. Den ben moesoe tjari densrefi na wan boen fasi èn foe dati ede Petrus ben gi tranga: „Moksi na oen bribi, boenfasi.” — 2 Petrus 1:5; Jakobus 2:14-17.
15. (a) Foe san ede den e kari sabi baka boenfasi leki wan eigifasi di moesoe moksi nanga bribi? (b) Sortoe tra eigifasi sa meki wi hori fasti na a bribi?
15 Baka di Petrus taki foe boenfasi, a e kari ete siksi eigifasi di moesoe moksi, noso poti, na a bribi foe wi. Ibriwan foe den de fanowdoe efoe wi moesoe „tanapoe kánkan na ini a bribi” (1 Korentesma 16:13). Foe di den sma di ben fadon komoto na bribi ben ’e drai den Boekoe foe bijbel’ èn ben kon nanga „bedrigi leri”, meki Petrus e kari sabi leki wan prenspari sani now, taki: „[Moksi] sabi nanga oen boenfasi.” Dan a e go doro: „[Poti] na oen sabi, a dwengi di oenoe man dwengi oensrefi, na a dwengi di oenoe man dwengi oensrefi horidoro, na a horidoro foe oenoe a gi di oenoe e gi oensrefi ini a dini foe Gado, na a gi di oenoe e gi oensrefi ini a dini foe Gado brada firi foe lobi, na oen brada firi foe lobi, lobi.” — 2 Petrus 1:5-7; 2:12, 13; 3:16.
16. San sa pasa efoe wi e moksi den eigifasi di Petrus kari, nanga bribi, ma san sa pasa efoe wi no e doe dati?
16 San sa pasa efoe wi e moksi den seibi sani disi nanga a bribi foe wi? „Efoe den sani disi de na ini oenoe èn den de pasa marki,” na so Petrus e piki, „dan den sa tapoe oenoe foe no de inaktief noso foe no tjari froktoe di no abi foe doe nanga a soifri sabi foe wi Masra Jesus Krestes” (2 Petrus 1:8). Na a tra sei, Petrus e taki: „Efoe den sani disi no de na ini iniwan sma, dan a breni, a e tapoe en ai gi a leti, èn a kon frigiti taki a ben kon krin foe den sondoe di a ben doe someni langa pasa” (2 Petrus 1:9). Loekoe taki Petrus e go foe „oenoe” nanga „wi” abra na tapoe „wan sma”, „a”, nanga „en”. Ma ala di a de wan sari taki son sma breni, e frigiti sani, èn no de krin, tokoe Petrus de so boen foe no e taki dati a leisiman na wan foe den sma disi. — 2 Petrus 2:2.
A e Tranga den brada foe en
17. San kande meki taki na wan switi fasi Petrus aksi foe doe „den sani disi”?
17 Kande foe di Petrus ben si taki trawan ben kan kori den njoen wan spesroetoe, meki a ben gi den deki-ati na wan switi fasi: „Foe a reide disi ede, brada, doe moro moeiti srefi foe meki a kari di oenoe kisi èn a froekisi di den froekisi oenoe kon de seiker gi oensrefi; bika efoe oenoe e tan doe den sani disi, dan noiti oenoe no sa misi kwetikweti” (2 Petrus 1:10; 2:18). Salfoe kresten di e moksi den seibi sani disi na a bribi foe den, sa kisi wan bigi pai, soleki fa Petrus e taki: „Pasi sa opo bradi gi oenoe, so taki oenoe kan go na ini a têgo kownoekondre foe wi Masra nanga Froeloesoeman Jesus Krestes” (2 Petrus 1:11). Den „tra skapoe” sa kisi wan têgo goedoe na ini a grontapoe kontren foe Gado Kownoekondre. — Johanes 10:16; Mateus 25:33, 34.
18. Foe san ede Petrus de klariklari „foe memre [den brada foe en] ala ten na den sani disi”?
18 Petrus wani troetroe taki den brada foe en e kisi so wan bigi paiman. „Foe a reide disi ede”, na so a e skrifi, „meki mi sa de klariklari foe memre oenoe ala ten na den sani disi, ala di oenoe sabi den èn oenoe e tanapoe kánkan ini a waarheid” (2 Petrus 1:12). Petrus e gebroiki a Griki wortoe ste·riʹzo, di vertaal dja nanga „e tanapoe kánkan”, ma di den vertaal nanga „tranga” na ini a froemane di Jesus ben gi Petrus na wan tra ten na fesi: „Tranga den brada foe joe” (Lukas 22:32). A gebroiki di Petrus e gebroiki a wortoe dati, wani taki kande dati a e memre a krakti froemane di a ben kisi foe a Masra foe en. Petrus e taki now: „Mi e si en leki wan joisti sani, so langa mi de na ini a tenti [libisma skin] disi, foe wiki oenoe opo, foe di mi e memre oenoe na den sani disi, bika mi sabi taki a poeroe di mi o poeroe a tenti foe mi, sa pasa heri esi.” — 2 Petrus 1:13, 14.
19. Sortoe jepi wi abi fanowdoe na ini a ten disi?
19 Ala di Petrus e taki na wan switi fasi taki den leisiman foe a brifi foe en e „tanapoe kánkan ini a waarheid”, tokoe a e froestan taki den kan lasi a bribi foe den (1 Timoteus 1:19). Foe di a sabi taki a sa dede heri esi, meki a e tranga den brada foe en foe di a e taki foe sani di den kan tjari kon na ini den prakseri baka ten foe meki den tan tranga na jejefasi (2 Petrus 1:15; 3:12, 13). So srefi, a de fanowdoe foe memre wi na ini a ten disi doronomo taki wi moesoe tan tranga na ini a bribi. Awansi soema wi de noso o langa wi de na ini waarheid, tokoe wi no kan misi foe leisi bijbel doronomo, foe doe persoonlijk studie, èn foe go na den gemeente konmakandra. Son sma e kon nanga reide so taki den no abi foe go na den konmakandra, èn den e taki dati den weri toemoesi noso taki ibritron baka den srefi sani e taki na den konmakandra noso taki den konmakandra no e hori na wan fasi di e hori sma belangstelling, ma Petrus ben sabi o esi iniwan foe wi kan lasi wi bribi efoe wi de toemoesi seiker foe wisrefi. — Markus 14:66-72; 1 Korentesma 10:12; Hebrewsma 10:25.
Wan tranga fondamenti gi a bribi foe wi
20, 21. Fa a transfigurâsi ben tranga a bribi foe Petrus nanga den leisiman foe den brifi foe en, èn so srefi wi na ini a ten disi?
20 A bribi foe wi abi en fondamenti tapoe moi anansitori nomo di sma sidon prakseri? „Nôno,” Petrus e piki na wan krakti fasi, „di wi ben meki oenoe kon sabi a krakti nanga a denoja foe wi Masra Jesus Krestes, wi no ben waka baka leitori di sma froeteri na wan koni fasi, ma foe di wi ben si en bigi glori nanga wi eigi ai.” Petrus, Jakobus, nanga Johanes ben de drape nanga Jesus di den ben si wan fisjoen foe en na ini Kownoekondre makti. Petrus e tjari kon na krin: „Gado, a Tata, ben gi en grani nanga glori, di a ben taigi en wortoe leki den wan disi nanga bigi glori: ’Disi na mi manpikin, mi lobiwan, di misrefi feni boen.’ Ija, wi ben jere den wortoe disi komoto na hemel di wi ben de nanga en na tapoe a santa bergi.” — 2 Petrus 1:16-18.
21 Di Petrus, Jakobus, nanga Johanes ben si a fisjoen dati, dan foe troe a Kownoekondre ben tron wan troetroe sani gi den! „Foe dati ede”, na so Petrus e taki, „a profeitiwortoe meki kon moro fasti gi wi; èn a ben sa boen te oenoe e poti prakseri na en tapoe.” Ija, leisiman foe a brifi foe Petrus, so srefi wi na ini a ten disi, abi krakti reide foe poti prakseri tapoe den profeititori foe Gado Kownoekondre. Na sortoe fasi wi moesoe poti prakseri? Petrus e piki: „Neleki na tapoe wan lampoe di e skèin na ini wan doengroe presi, te leki deibroko èn wan deistari e opo kon, na ini oen ati.” — 2 Petrus 1:19; Danièl 7:13, 14; Jesaja 9:6, 7.
22. (a) Gi sortoe sani wi ati moesoe tan de wikiwiki? (b) Fa wi e poti prakseri tapoe a profeitiwortoe?
22 Wi ati ben o doengroe sondro a leti foe a profeitiwortoe. Ma foe di kresten e poti prakseri na en tapoe, meki na ati foe den ben de wikiwiki te leki a deibroko foe a dei te a „deistari,” Jesus Krestes, e opo kon na ini Kownoekondre glori (Openbaring 22:16). Fa wi na ini a ten disi e poti prakseri na tapoe a profeitiwortoe? Foe di wi e studeri bijbel, foe di wi e sreka wisrefi gi den konmakandra èn e teki prati na den, èn foe di wi e ’denki dipi foe den sani disi, èn e teki den na ini wi’ (1 Timoteus 4:15). Efoe a profeitiwortoe moesoe de leki wan lampoe di e skèin na ini wan „doengroe presi” (wi ati), dan wi moesoe meki disi abi foeroe krakti na wi tapoe — na tapoe den lostoe foe wi, den firi foe wi, den sani di e boeweigi wi, èn den marki di wi abi na prakseri. Wi moesoe de bijbelstudenti, bika Petrus e bosroiti kapitel 1: „No wan profeititori foe den Boekoe foe bijbel e kon foe di sma srefi ben tjari en kon na krin. Bika noiti profeititori ben kon de foe libisma ede, ma Gado ben meki libisma taki soleki fa santa jeje ben tjari den.” — 2 Petrus 1:20, 21.
23. Gi sortoe sani a fosi kapitel foe 2 Petrus ben sreka den leisiman?
23 Na ini a fosi kapitel foe en di foe toe brifi, Petrus ben gi wi boen reide foe hori fasti na a warti bribi foe wi. Wi de srekasreka now foe loekoe den serjoesoe tori di e kon now. A tra artikel sa taki foe kapitel 2 foe 2 Petrus, pe na apostel e taki foe a tjalensi foe a krakti di hoeroedoe abi èn di ben boro kon na ini den gemeente.
Joe e memre disi ete?
◻ Foe san ede Petrus e poti krakti na tapoe a prenspari di a de prenspari foe abi soifri sabi?
◻ San kan de a reide taki boenfasi kari leki a fosi eigifasi di wi moesoe poti na bribi?
◻ Foe san ede Petrus de klariklari foe memre den brada foe en ala ten na den sani disi?
◻ Sortoe tranga fondamenti Petrus e gi foe a bribi foe wi?
[Prenki na tapoe bladzijde 9]
Den fowtoe di Petrus ben meki no ben meki taki a ben libi a bribi foe en