Wan regtfardiki grontapoe a no wan dren!
„LIBISMA na grontapoe abi boen foeroe belangstelling gi retidoe,” na so Daniel Webster, wan tiriman foe Amerkankondre ben taki. Èn bijbel e taki: „Jehovah na wan sma di lobi retidoe” (Psalm 37:28). A fosi libisma trowpaar, di ben meki soleki fa Gado de, ben abi den eigifasi foe Gado, so srefi wan firi gi retidoe. — Genesis 1:26, 27.
Den Boekoe foe bijbel e taki toe foe ’sma foe den nâsi di no abi wet, èn di e doe den sani foe a wet, foe densrefi’. Na so fasi den „e sori taki san de na ini a wet, skrifi na ini den ati, ala di a konsensi foe den e gi kotoigi nanga den èn den eigi prakseri na ini den, e gi den a fowtoe noso e regtfardiki den” (Romesma 2:14, 15). Ija, libisma meki nanga na eigifasi foe gebroiki wan konsensi — wan firi na ini den foe san boen èn san no boen. A de krin, taki libisma e gebore nanga a firi foe wani retidoe.
San abi foeroe foe doe nanga a firi di sma abi foe wani retidoe, na a soekoe di libisma e soekoe kolokoe, bika Psalm 106:3 e froeklari: „Kolokoe foe den sma di e hori densrefi na retidoe, di e tjari densrefi na wan regtfardiki fasi ala ten.” Ma foe san ede libisma no ben man seti wan regtfardiki grontapoe?
Foe san ede libisma no ben man?
Wan prenspari sani foe san ede sma no ben man tjari wan regtfardiki grontapoe kon, na a flaka di wi kisi foe wi fosi papa nanga mama, Adam nanga Eva. Bijbel e tjari kon na krin: „Nanga wán man, sondoe ben kon na grontapoe èn nanga sondoe dede kon, èn na so dede panja go na ala libisma, foe di den alamala ben sondoe” (Romesma 5:12). A flaka na sondoe. Ala di Gado ben kria Adam nanga Eva sondro fowtoe, tokoe den ben bosroiti foe meki oproeroe kontrari Gado èn na so fasi den ben meki densrefi kon tron sondari (Genesis 2:16, 17; 3:1-6). Foe disi ede, meki den ben libi sondoe firi di no boen, na baka gi den pikin foe den.
A no den eigifasi disi foe libisma leki gridifasi nanga a desko di sma e desko makandra, na den bakapisi foe sondoe firi? Èn a no den eigifasi disi e meki moro onregtfardikifasi kon na grontapoe? Ija, foe gridifasi ede meki sma e pori a kontren di den e libi na ini foe espresi, èn e kwinsi makandra na ekonomia sei. A troe taki a desko di sma e desko makandra na foe san ede sma foe difrenti ras e feti nanga makandra èn taki onregtfardikifasi foe sma foe difrenti ras de. Den eigifasi dati so srefi e meki taki sma e foefoeroe, e bedrigi trawan, èn e handri na wan fasi taki den e doe trawan ogri.
Srefi den moro boen moeiti di sma e meki foe tjari retidoe kon èn foe doe boen gi trawan, nofotron no e wroko foe den sondoe firi foe wi ede. Na apostel Paulus srefi ben erken: „A boen di mi wani doe, mi no e doe, ma na ogri di mi no wani doe, na dati mi e doe.” A e go doro foe tjari a strei kon na krin, taki: „Mi e prisiri troetroe foe a wet foe Gado akroederi a sma di mi de na inisei, ma na ini den memre foe mi skin mi e si wan tra wet e feti nanga a wet foe mi froestan èn di e tjari mi go na ini katibo foe a wet foe a sondoe di de na ini den memre foe mi skin” (Romesma 7:19-23). Èn a kan, taki wi na ini a ten disi abi a srefi problema dati. Dati meki someni onregtfardikifasi de.
A fasi fa libisma e tiri, meki toe taki onregtfardikifasi de na grontapoe. Na ibri kondre wet de, so srefi den sma di moesoe sorgoe taki sma e hori densrefi na den wet. Èn a no de foe taki, dati joe abi kroetoebakra nanga kroetoebangi. A de seiker taki son man di hori densrefi na gronprakseri, proeberi foe hori den reti foe libisma hei èn foe sorgoe taki gi ala sma a srefi retidoe de. Ma tokoe, moro foeroe foe den moeiti di den doe, no ben abi boen bakapisi. Foe san ede? Nanga wan toe wortoe nomo, Jeremia 10:23 e taki san na den difrenti reide foe san ede den no man èn a e tjari kon na krin: „Mi sabi heri boen, o Jehovah, taki a no de na a sma foe grontapoe foe a bepaal en pasi. A no de na wan man di e waka srefi foe bepaal pe foe poti en foetoe na pasi.” Foe di sma hari densrefi poeroe foe Gado, meki den no man seti wan regtfardiki grontapoe kwetikweti. — Odo 14:12; Preikiman 8:9.
Wan sani di e hendri libisma srefisrefi na ini a moeiti di den e doe foe meki wan regtfardiki grontapoe, na Satan Didibri. Bijbel e taki krin dati na oproeroe engel Satan na a fosi „kiriman” nanga „leiman” èn taki “heri grontapoe e didon na ini a makti foe a godelowsoe wan” (Johanes 8:44; 1 Johanes 5:19). Na apostel Paulus e meki sma kon sabi Satan leki „a gado foe a seti foe sani disi” (2 Korentesma 4:3, 4). Foe di Satan na wan sma di no wani si regtfardikifasi na ai, meki a e doe ala san a man foe horibaka gi godelowsoefasi. So langa a e tiri grontapoe, ala sortoe onregtfardikifasi èn den heloe di e kon foe dati, sa abi libisma na ini den makti.
Ala den sani disi wani taki, dati noiti wi no man wai pasi gi onregtfardikifasi na ini libisma libimakandra? Wan regtfardiki grontapoe na wan dren di no kan kon troe?
Wan regtfardiki grontapoe na wan sani di kan kon troetroe — Fa?
Foe meki a howpoe gi so wan regtfardiki grontapoe kon troe, libisma moesoe loekoe go na wan fonten di kan poeroe den reide taki onregtfardikifasi de, krinkrin. Ma soema kan poeroe sondoe krinkrin èn wai Satan nanga a tirimakti foe en gowe? A de krin, taki no wan libisma noso wan libisma organisâsi kan doe so wan bigi wroko. Soso Jehovah Gado kan doe dati! Bijbel e taki foe en: „A Klipston, volmaakti en wroko de, bika ala den pasi foe en na retidoe. Wan Gado foe getrowfasi, di na en no wan onregtfardikifasi de; regtfardiki èn opregti a de” (Deuteronomium 32:4). Èn foe di Jehovah na „wan sma di lobi retidoe” meki a wani taki libisma e prisiri foe a libi na ini wan regtfardiki grontapoe. — Psalm 37:28.
Na apostel Petrus di e taki foe a sani di Gado seti foe tjari wan regtfardiki grontapoe kon, e skrifi: „Njoen hemel nanga wan njoen grontapoe de di wi e froewakti akroederi en pramisi, èn na ini den disi, regtfardikifasi sa de” (2 Petrus 3:13). Den „njoen hemel” a no njoen hemel di wi kan si. Na wan volmaakti fasi, Gado ben meki a hemel di wi kan si èn a hemel e gi en glori (Psalm 8:3; 19:1, 2). Den „njoen hemel” na wan njoen tirimakti tapoe grontapoe. Den „hemel” foe now na tiri di libisma meki. Heri esi, na ini Gado en orlokoe foe Armagedon, den disi sa moesoe meki presi gi den „njoen hemel” — en hemel Kownoekondre, noso tiri (Openbaring 16:14-16). A Kownoe foe a Kownoekondre dati na Krestes. Foe di a sa tjari wan têgo kaba kon na a tirimakti foe libisma, meki a tiri disi sa de te ten di no skotoe. — Danièl 2:44.
San na a „njoen grontapoe” dan? A no wan njoen planeiti, bika Gado ben meki grontapoe heri boen foe libisma kan libi na tapoe, èn a de en wani taki a e tan foe têgo (Psalm 104:5). A „njoen grontapoe” e sori go na wan njoen libimakandra foe sma (Genesis 11:1; Psalm 96:1). A „grontapoe” di sa kisi pori sa de den sma di e meki densrefi de wan pisi foe a godelowsoe seti foe sani disi (2 Petrus 3:7). A „njoen grontapoe” di e kon na ini a presi foe den, sa de den troe foetoeboi foe Gado, di no wani si godelowsoe fasi na ai èn di lobi regtfardikifasi nanga retidoe (Psalm 37:10, 11). So boen, Satan grontapoe no sa de moro.
Ma san sa pasa nanga Satan? Na apostel Johanes ben taki na fesi: „A [Krestes Jesus] ben graboe a draak hori, a fosi sneki, di de Didibri nanga Satan, èn ben tai en wan doesoen jari langa. Èn a ben fringi en go na ini a dipi peti èn ben tapoe en èn a ben sroto en boen na en tapoe, so taki a no ben sa kori den nâsi moro” (Openbaring 20:1-3). A makti di Satan, di tai nanga keti, sa abi na tapoe a libisma famiri sa de a srefi leki di foe wan strafoeman na ini wan strafoe-oso di de dipi na ondrogron. Fa dati sa de wan froelekti gi a libisma famiri, di sa de leki a bigin foe wan regtfardiki grontapoe! Èn na a kaba foe den doesoen jari, Satan sa kisi pori so taki a no sa de moro. — Openbaring 20:7-10.
Ma fa a de nanga sondoe di wi kisi foe wi papa nanga mama? Jehovah sorgoe kaba gi wan fondamenti foe poeroe sondoe krinkrin. ’A Manpikin foe libisma [Jesus Krestes] ben kon . . . foe gi en sili leki wan loesoe-paiman ini a presi foe foeroe sma’ (Mateus 20:28). A wortoe „loesoe-paiman” wani taki a prijs di de fanowdoe foe froeloesoe sma di de na ini katibo. Jesus ben pai a prijs foe en volmaakti libisma libi leki wan loesoe-paiman foe froeloesoe a libisma famiri. — 2 Korentesma 5:14; 1 Petrus 1:18, 19.
Nownow kaba Jesus froeloesoe-ofrandi kan tjari wini kon gi wi. Efoe wi e sori bribi na ini en, dan wi kan abi wan krin posisi na fesi foe Gado (Tori foe den Apostel 10:43; 1 Korentesma 6:11). Na ondro a tiri foe Gado Kownoekondre, a loesoe-paiman sa meki taki a libisma famiri sa kon betre baka foe sondoe krinkrin. A lasti boekoe foe bijbel e taki foe wan agersi „liba foe libi watra” di e komoto na a kownoestoeroe foe Gado, èn na den sjoro foe en joe abi agersi froktoebon nanga wiwiri „foe dresi den nâsi” (Openbaring 22:1, 2). San bijbel e prenki dja, e sori na tapoe a toemoesi moi sani di a Kriaman seti foe meki a libisma famiri kon betre baka foe sondoe na tapoe a fondamenti foe Jesus froeloesoe-ofrandi. Te a seti disi sa gebroiki dorodoro, dan dati sa fri den libisma di e gi jesi, foe sondoe nanga dede.
Libi na ini wan regtfardiki grontapoe
Prakseri fa a libi sa de na ondro a Kownoekondre tiri. Takroedoe nanga ogri di doe nanga tranga sa de fositen sani (Odo 2:21, 22). Onregtfardikifasi na ekonomia sei no sa de moro (Psalm 37:6; 72:12, 13; Jesaja 65:21-23). Ala sani di abi foe doe nanga a desko di sma e desko trawan na sociaal sei, foe ras, èn foe lo ede, sa poeroe na pasi (Tori foe den Apostel 10:34, 35). Orlokoe nanga fetisani foe feti orlokoe no sa de moro (Psalm 46:9). Miljoenmiljoen dedesma sa kon na libi baka na ini wan grontapoe sondro onregtfardikifasi (Tori foe den Apostel 24:15). Ala sma sa abi wan volmaakti èn tranga gosontoe (Job 33:25; Openbaring 21:3, 4). „Na ini troe fasi,” na a djaranti di bijbel e gi wi, „[Jesus Krestes] sa tjari retidoe kon.” — Jesaja 42:3.
Disiten, wi kan kisi foe doe nanga onregtfardikifasi, ma meki wi noiti pai sma baka nanga onregtfardikifasi (Mika 6:8). Srefi te wi moesoe horidoro na ondro onregtfardikifasi, meki wi tan positief. Heri esi a pramisi regtfardiki grontapoe sa tron wan sani di de troetroe (2 Timoteus 3:1-5; 2 Petrus 3:11-13). Na Almakti Gado gi wi en wortoe, èn a „sa sori foe de” (Jesaja 55:10, 11). Now a de a ten foe sreka wisrefi gi a libi na ini a regtfardiki grontapoe dati, foe di wi e leri san Gado e aksi foe wi. — Johanes 17:3; 2 Timoteus 3:16, 17.
[Prenki na tapoe bladzijde 7]
Ala sani di abi foe doe nanga onregtfardikifasi sa poeroe na pasi na ini a njoen grontapoe di Gado pramisi