Krestendom abi krakti na mindri foe broeja
ALA den problema ben bigin wantronso wan dei na ini april 1994. Wan opolani ben fadon èn ben kiri den presidenti foe Boeroendi nanga Rwanda di ben sidon na ini. Baka wan toe joeroe kefalek bigi ogri di den ben doe nanga tranga ben lai na ini Rwanda. Na ini pikinso moro leki dri moen, moro leki 500.000 sma foe Rwanda — mansma, oemasma, nanga pikin-nengre — dede. Son sma e taki foe a pisi ten dati leki „a kiri poeroe foe wan ras”.
Afoe foe den 7.500.000 sma di e libi na Rwanda ben moesoe lowe. Den 2.400.000 sma di ben soekoe kibri na den birti kondre ben de na ini a nomroe dati toe. A gowe di sma ben lowe gowe foe a kondre, ben de a moro bigiwan èn wán di ben pasa moro gaw na ini a disiten historia. Esi-esi den ben seti loweman kampoe na Zaire (now Demokrasia Republiek foe Kongo), Tansania, nanga Boeroendi. Son wan foe den kampoe disi — den moro bigiwan na grontapoe — ben gi kibri na 200.000 sma.
Foeroe Kotoigi foe Jehovah, wan pipel di lobi vrede èn di e gebroiki bijbel gronprakseri na ini den libi, ben de na mindri den loweman. Awansi na ini sortoe kondre den e libi, den e tan neutraal krinkrin èn e gebroiki a gronprakseri di de na ini den wortoe disi foe Jesaja 2:4: „Den sa moesoe naki den feti-owroe foe den kon tron proegoe èn den lansri foe den kon tron grasi-nefi. Nâsi no sa opo feti-owroe teige nâsi, so srefi den no sa leri orlokoe moro.” Sma na ala sei e erken taki Jehovah Kotoigi na wan relisi groepoe di no ben teki prati na ini a kiri poeroe foe wan ras na Rwanda.
Jesus Krestes ben taki dati den bakaman foe en „no de wan pisi foe grontapoe”. Ma bika den de „na grontapoe”, meki a no ala ten den kan lon gi a broeja foe den nâsi (Johanes 17:11, 14). Na ini a ten di den ben kiri wan ras poeroe na Rwanda, so wan 400 Kotoigi ben lasi den libi. So wan 2000 Kotoigi nanga sma di ben abi belangstelling gi a Kownoekondre boskopoe, ben tron loweman.
A de di den Kotoigi foe Jehovah no de wan pisi foe grontapoe wani taki dati den e doe noti te rampoe e miti den? Nôno. A Wortoe foe Gado e taki: „Efoe wan brada noso wan sisa no abi notinoti na en skin èn a no abi nofo njanjan foe a dei, ma wan foe oenoe e taigi den: ’Go ini vrede, tan waran èn njan boen’, ma oenoe no e gi den san den abi fanowdoe gi den skin, sortoe boen disi e doe dan? Dati meki bribi foe en srefi, efoe a no abi wroko, dede” (Jakobus 2:15-17). Lobi gi a sma na den sei e boeweigi den Kotoigi toe foe jepi den wan di abi tra relisi bribi. — Mateus 22:37-40.
Ala di Jehovah Kotoigi na heri grontapoe ben wani fajafaja foe jepi den kompe bribiman foe den di ben kisi foe doe nanga a takroe situwâsi na Rwanda, tokoe West-Europa ben kisi a wroko foe orga a wroko foe gi jepi. Na ini a zomer foe 1994, wan groepoe foe friwani wrokoman foe Europa di de Kotoigi ben go esi-esi foe jepi den kresten brada nanga sisa foe den na Afrika. Kampoe di ben orga boen nanga pisiten ati-oso ben seti gi den loweman foe Rwanda. Kefalek foeroe krosi, deken, njanjan nanga bijbel lektuur ben tjari go gi den nanga opolani noso ben seni go gi den na tra sortoe fasi. Moro leki 7000 sma di ben pina — pikinmoro dri tron a nomroe foe Jehovah Kotoigi na Rwanda na a ten dati — ben njan boen foe a wroko disi foe jepi den. Na ini december foe a jari 1994, doesoendoesoen loweman, so srefi moro foeroe foe den wan di ben de Jehovah Kotoigi, ben drai go baka na Rwanda foe seti a libi foe den baka.
Feti na Kongo
Na ini 1996, feti ben broko na a owstoesei kontren foe a Demokrasia Republiek foe Kongo. A kontren disi de na a grens foe Rwanda nanga Boeroendi. A didon di sma ben didon na oemasma nanga tranga foe abi seks, nanga a kiri di sma ben kiri trawan ben pasa baka. Sma ben lowe foe no lasi den libi foe den na mindri koegroe di ben frei pasa, nanga dorpoe di ben e bron. Jehovah Kotoigi ben kon de na ini a broeja toe, èn so wan 50 foe den dede. Koegroe di ben lasi pasi ben kiri wan toe foe den. Trawan den ben kiri foe di den ben de foe wan spesroetoe etnis groepoe noso den ben denki taki den ben de feanti. Faja ben pori wan dorpoe pe 150 Kotoigi ben libi. Na tra dorpoe, den ben bron wan lo oso nanga wan toe Kownoekondre zaal. Foe di den Kotoigi no ben abi oso nanga goedoe, meki den ben lowe go na tra kontren èn ben kisi jepi foe kompe anbegiman drape.
Angri na a bakapisi foe feti, bika den sani di sma prani e pori, sma e teki a njanjan di de ete nanga tranga, èn njanjan nanga tra jepisani no e doro a presi pe den abi dati tranga fanowdoe. Njanjan di de foe kisi, diri. Na Kisangani, na a bigin foe mei 1997, wán kilo patata ben kostoe wan sani foe dri Amerkan dala, wan prijs di moro foeroe foe den sma no ben man pai. A moro bigi pisi foe den sma ben man njan soso wán leisi wan dei. A no de foe taki dati siki e kon leki wan bakapisi foe a mankeri di njanjan e mankeri. A njan di sma no e njan boen e swaki a skin foe man feti nanga malaria, loesoebere, nanga problema di abi foe doe nanga a njanjansaka. Spesroetoe pikin-nengre e pina èn e dede.
Loekoe san de fanowdoe
Jehovah Kotoigi na Europa ben handri esi-esi baka na tapoe den sani di ben de fanowdoe. Na ini april 1997, wan groepoe Kotoigi di ben gi jepi, èn di ben abi toe datra na ini toe, ben frei kon nanga opolani nanga dresi èn nanga moni. Na Goma, den Kotoigi foe a foto ben orga jepi-komte kaba foe loekoe a situwâsi, so taki den ben kan gi jepi wantewante. A groepoe ben ondrosoekoe a foto nanga den kontren lontoe a foto. Den ben seni boskopoeman go foe tjari verslag kon foe presi di ben de moro fara. Den ben kisi bodoi toe foe Kisangani, di ben de moro leki 1000 kilometer fara na westsei foe Goma. Brada foe a foto ben jepi foe orga a wroko foe gi jepi na Goma, pe so wan 700 Kotoigi e libi.
Wan foe den kresten owroeman na Goma ben taki: „A ben naki wi ati srefisrefi foe si den brada foe wi di ben kon foe so fara foe jepi wi. Bifo den ben kon, wi ben jepi makandra. Den brada ben moesoe lowe foe a boitipresi go na Goma. Son wan foe den ben lasi den oso, èn den ben gowe libi den gron foe den. Wi ben teki den na ini wi oso èn wi ben prati wi krosi nanga a pikinso njanjan di wi ben abi nanga den. San wi foe a foto ben kan doe no ben foeroe. Son wan foe wi ben pina foe di njanjan no ben nofo.
Ma den brada foe Europa ben tjari moni kon, so taki wi ben man bai njanjan, di no ben de foeroe èn di ben diri srefisrefi. A njanjan ben kon na wan prenspari ten, foe di foeroe sma no ben abi noti foe njan na den oso. Wi ben prati a njanjan gi den Kotoigi èn so srefi gi den sma di no de Kotoigi. Efoe a jepi no ben kon na a ten di a ben moesoe kon, moro foeroe sma ben o dede, spesroetoe pikin-nengre. Jehovah ben kibri en pipel. A ben naki na ati foe sma srefisrefi di no de Kotoigi. Foeroe foe den ben taki foe a wánfasi nanga lobi foe wi. Son wan ben erken taki a relisi foe wi na a troe relisi.”
Ala di den ben bai a njanjan na ini a foto èn den ben gi dresi, tokoe moro ben de fanowdoe. Krosi nanga deken ben de fanowdoe, èn so srefi moro foeroe njanjan nanga dresi. Den ben abi jepi fanowdoe toe foe bow den oso baka, di sma ben pori.
Sma ben gi pasa marki
Den brada na Europa ben de fajafaja baka foe jepi. A bijkantoro foe Jehovah Kotoigi na Louviers, Fransikondre, ben taigi den gemeente na ini a kontren foe Rhône Valley èn so srefi den wan foe Normandia, nanga wan toe gemeente na Parijs, foe a jepi di ben de fanowdoe. Djaso den ben gebroiki wan tra bijbel gronprakseri: „A sma di e sai pikinso, sa koti pikinso toe; èn a sma di e sai pasa marki, sa koti pasa marki toe. Meki ibriwan sma doe soleki fa a bosroiti na ini en ati, no nanga a firi foe no wani doe en noso na ondro dwengi, bika Gado lobi wan sma di e gi nanga prisiri.” — 2 Korentesma 9:6, 7.
Doesoendoesoen sma nanga prisiri ben teki na okasi foe gi. Dosoe nanga saka di ben abi krosi, soesoe nanga tra sani na ini ben tjari kon na ini den Kownoekondre zaal èn baka dati den ben tjari den go na a bijkantoro foe Jehovah Kotoigi na Fransikondre. Drape 400 friwani wrokoman ben de srekasreka foe teki prati na ini a tra stap foe a wroko foe „Jepi Zaire”. Ala di den sani di sma ben gi ben kon inisei, dan den friwani wrokoman disi ben e piki den krosi, ben e fow den èn ben e paki den na ini den boksoe di den ben poti 30 foe den na tapoe ibri pallet. Den pikin-nengre ben prakseri den jongoe brada nanga sisa foe den na Afrika èn ben seni preisani go gi den — brenki oto, tonki, popki, nanga beer. Den ben paki den sani disi makandra nanga den sani di de fanowdoe foe tan na libi. Ala nanga ala, den ben foeroe neigi container foe 12 meter èn ben seni den go na Kongo.
Omeni jepi seni go na Centraal-Afrika nanga a jepi foe doesoendoesoen Kotoigi na Belgia, Fransikondre nanga Switserland? Na ini juni 1997, ala nanga ala den ben seni 500 kilo dresi, 10.000 kilo boeskoetoe di abi foeroe eiwit, 20.000 kilo tra sortoe njanjan, 90.000 kilo krosi, 18.500 paar soesoe nanga 1000 deken. Den ben seni bijbel lektuur nanga opolani toe. Den ben warderi ala den sani disi srefisrefi, èn den ben de wan trowstoe gi den loweman èn ben e jepi den foe horidoro na ondro den tesi di den kisi. Ala nanga ala den sani ben kostoe pikinmoro 1.000.000 Amerkan dala. Den sortoe bijdrage dati ben de boeweisi foe a bradafasi nanga a lobi di de na mindri den wan di e dini Jehovah.
Prati den sani na Kongo
Di den sani ben bigin doro na Kongo, toe brada nanga wan sisa ben kon foe Fransikondre foe wroko nanga den jepi-komte foe a kondre. Joselin ben taki foe a warderi di den Kotoigi foe Kongo ben sori: „Wi ben kisi foeroe brifi foe sori a warderi di den ben abi. Wan pôti sisa ben gi mi wan moimoi-sani foe malachiet ston. Trawan ben gi wi fowtow foe densrefi. Di wi ben e gowe, den sisa ben bosi mi, den ben brasa mi èn den ben krei. Mi ben krei toe. Foeroe foe den ben taki sani leki disi: ’Jehovah boen. Jehovah e prakseri wi.’ So boen, den ben erken taki a grani foe a gi disi sma ben gi sani, de foe Gado. Di wi ben e prati a njanjan, den brada nanga sisa ben prèise Jehovah nanga Kownoekondre singi. A ben naki wi ati srefisrefi.”
Wan datra di nen Loic, ben de wan memre foe a groepoe. Foeroe sma ben kon na ini a Kownoekondre zaal èn ben wakti a beurt foe den nanga pasensi foe soekoe datra jepi na en. Wan sisa foe Kongo ben wani doe wan sani toe, èn a ben baka so wan 40 boroe èn ben prati den gi den sma di ben e wakti foe go na a datra. Foe di so wan 80 sma ben e wakti, dan ibri sma ben kisi wan afoe boroe.
Jepi gi den sma di no de Kotoigi
A fasi disi foe jepi libisma no ben de gi den Kotoigi foe Jehovah wawan. Tra sma di no de Kotoigi ben kisi wini toe, neleki fa foeroe sma di no ben de Kotoigi ben kisi wini na ini 1994. A sani dati e kroederi nanga Galasiasma 6:10, di e taki: „We dan, so langa a ten boen gi wi ete, meki wi doe boen gi ala sma, ma spesroetoe gi den wan di de na ini a srefi bribi leki wi.”
Den Kotoigi ben prati dresi nanga krosi gi difrenti lagi skoro nanga wan weisi-oso krosibei foe Goma. A weisi-oso abi 85 pikin-nengre. Na wan rèis di a groepoe di e gi jepi, ben meki moro na fesi foe ondrosoekoe a situwâsi, den ben fisiti a weisi-oso èn ben pramisi foe gi den 50 dosoe boeskoetoe di abi foeroe eiwit, dosoe nanga krosi, 100 deken, dresi nanga preisani. Den pikin ben kon makandra na ini a fesi djari èn ben singi gi den fisitiman. Baka dati den ben aksi wan spesroetoe sani — den ben sa kan kisi wan bal so taki den ben kan prei foetoebal?
Wan toe wiki baka dati, a groepoe di e gi jepi ben meki a pramisi foe den kon troe foe tjari sani kon. A lobi di den Kotoigi ben lobi gi sani, nanga den sani di a driktoro foe a weisi-oso ben leisi na ini den bijbel lektuur di a ben kisi, ben naki en ati na so wan fasi dati a ben taki dati a ben o tron wan foe den Kotoigi foe Jehovah. Èn den pikin-nengre ben kisi wan bal? „Nôno”, Claude, na orgaman foe a groepoe di e gi jepi foe Fransikondre ben piki. „Wi ben gi den toe bal.”
Loweman kampoe
A no Kongo wawan ben kisi jepi. Doesoendoesoen loweman ben lowe foe a presi pe den ben feti, go na wan krosibei kondre pe esi-esi den ben seti dri loweman kampoe. Kotoigi ben rèis go drape toe, so taki den ben kan si san den ben kan doe. Di wi ben sreka a verslag disi, den kampoe ben gi 211.000 loweman wan presi foe tan, moro foeroe sma foe Kongo. So wan 800 ben de Kotoigi nanga den pikin foe den nanga sma di ben abi belangstelling gi a boen njoensoe foe a Kownoekondre. Wan problema di den ben kisi wantewante na ini den kampoe ben de a mankeri foe njanjan. Na ini wán kampoe, nofo njanjan ben de gi soso dri dei èn so srefi bonki di owroe dri jari kaba.
Ma tokoe den Kotoigi ben abi wan boen jejefasi. Ala di den no ben abi nofo bijbel lektuur, tokoe doronomo den ben hori konmakandra na dorosei foe bow densrefi na jeje sei. Den ben abi foeroe foe doe toe foe preiki a boen njoensoe foe Gado en Kownoekondre gi tra sma na ini den kampoe. — Mateus 24:14; Hebrewsma 10:24, 25.
Wan datra ben de so srefi na ini a groepoe Kotoigi di ben ondrosoekoe san den brada ben abi fanowdoe. Ala di den tirimakti ben gi den pasi foe tan soso wan toe dei na ini ibri kampoe, tokoe a groepoe ben gi datra jepi. Den ben libi dresi nanga moni gi den kresten owroeman. Na so wan fasi den brada ben man tan na libi. A groepoe ben howpoe toe taki heri esi den Kotoigi di de na ini den kampoe ben kan go na a mamakondre foe den baka.
Fa a de nanga a tamara? Jesus Krestes ben taki na fesi dati a ten foe wi ben sa de wan ten foe bigi broeja, wan ten pe feti nanga mankeri foe njanjan ben sa de foe si (Mateus 24:7). Jehovah Kotoigi sabi taki a Kownoekondre foe Gado wawan sa tjari wan kaba kon na a pina di de nownow na grontapoe. Na ondro a tiri foe a Kownoekondre dati, a grontapoe oso foe wi sa tron wan paradijs foe vrede, pe bogobogo sani sa de, èn pe a libisma famiri di e gi jesi sa de kolokoe foe têgo (Psalm 72:1, 3, 16). Na a srefi ten, den Kotoigi sa meki a boen njoensoe foe a hemel Kownoekondre dati bekènti èn sa go doro toe foe jepi kompe anbegiman nanga tra sma na ini ten foe nowtoe.
[Prenspari pisi na tapoe bladzijde 4]
Sensi 1994, Jehovah Kotoigi na Europa wawan seni moro leki 190.000 kilo njanjan, krosi, dresi nanga tra sani foe gi jepi na a kontren foe den Bigi Se foe Afrika
[Faki na tapoe bladzijde 6]
Den e sori kresten lobi
Ruth Danner ben de na mindri den wan di ben teki prati fajafaja na ini a „Jepi Zaire” projekt na Fransikondre. Di a ben de wan pikin-nengre ete, dan den ben poti en na ini den Nazi strafoeman kampoe foe en kresten bribi ede. A ben taki: „Wi ben prisiri srefisrefi foe doe wan sani gi den brada nanga sisa foe wi na Afrika! Ma wan sani ben de di ben meki mi prisiri moro. Na ini 1945, di mi nanga mi famiri ben drai go na oso baka komoto foe Doisrikondre, wi no ben abi noti-noti. Srefi den krosi di wi ben weri, wi ben leni foe sma. Ma no langa baka dati, wi ben kisi jepi na materia sei foe wi brada nanga sisa na jejefasi foe Amerkankondre. Dati meki a wroko disi foe jepi sma na Afrika ben meki taki mi ben man sori a switifasi baka, di den ben sori gi wi so langa pasa kaba. Fa a de wan grani foe de wan pisi foe so wan bigi famiri foe brada di e sori kresten lobi nanga den doe foe den!” — Johanes 13:34, 35.
[Prenki na tapoe bladzijde 7]
Djonsro — Wan paradijs na grontapoe nanga bogobogo sani gi ala sma