Warderi den kresten konmakandra
„Meki wi poti ai na makandra, foe gi makandra deki-ati foe sori lobi èn doe boen wroko, foe no libi a kon di wi e kon makandra.” — HEBREWSMA 10:24, 25.
1, 2. (a) Foe san ede a de wan grani foe de na wan konmakandra foe troe kresten? (b) Na sortoe fasi Jesus de na den konmakandra foe den bakaman foe en?
A DE troetroe wan grani foe de na wan kresten konmakandra, awansi moro mendri leki tin noso doesoendoesoen anbegiman foe Jehovah de na a konmakandra, bika Jesus ben taki: „Pe toe noso dri sma e kon makandra na ini mi nen, na drape mi de na den mindri”! (Mateus 18:20) A troe taki, di Jesus ben gi a pramisi dati, a ben e taki foe kroetoe afersi di den wan di e teki fesi ini a gemeente moesoe loekoe na wan joisti fasi (Mateus 18:15-19). Ma foe taki en leti, wi kan gebroiki den wortoe foe Jesus so srefi gi ala kresten konmakandra di e bigin èn e tapoe nanga begi na ini en nen? Ija. Memre taki, di Jesus ben gi den bakaman foe en a komando foe doe a wroko foe meki disipel, dan a ben pramisi: „Loekoe! mi de nanga oenoe ala den dei te na a kaba foe a seti foe sani.” — Mateus 28:20.
2 Tweifri no kan de taki na Edeman foe a kresten gemeente, Masra Jesus Krestes, abi fajafaja belangstelling gi ala den konmakandra foe den getrow bakaman foe en. Boiti dati, wi kan de seiker taki a de nanga den nanga jepi foe a santa jeje foe Gado (Tori foe den Apostel 2:33; Openbaring 5:6). Jehovah Gado abi belangstelling toe gi a kon di wi e kon makandra. A moro prenspari marki foe den sortoe konmakandra dati na foe prèise Gado „na mindri den ipi sma di kon makandra” (Psalm 26:12). A de di wi de na den gemeente konmakandra na wan boeweisi foe a lobi di wi abi gi en.
3. Foe sortoe prenspari reide ede wi e warderi den kresten konmakandra?
3 Tra boen reide de foe san ede wi e warderi den kresten konmakandra. Bifo Jesus Krestes ben gowe libi grontapoe, a ben poti den salfoe disipel foe en na wroko foe handri leki wan „getrow èn koni srafoe” foe gi na osofamiri foe bribi njanjan na jejefasi na a joisti ten (Mateus 24:45). Wan prenspari fasi fa den e gi a njanjan dati na jejefasi, na nanga jepi foe den kresten konmakandra èn so srefi nanga jepi foe den moro bigi konmakandra — bigi konmakandra nanga kongres. Masra Jesus Krestes e tiri a getrow srafoe disi foe gi prenspari bodoi na den sortoe konmakandra dati na ala sma di wani pasa a kaba foe a godelowsoe seti disi libilibi èn kisi libi na ini a regtfardiki njoen grontapoe foe Gado.
4. Sortoe takroe „gwenti” kari na ini bijbel, èn san sa jepi wi foe no abi a gwenti dati?
4 Foe dati ede, no wan kresten kan gi pasi foe kweki a takroe gwenti di na apostel Paulus ben taki foe en di a ben skrifi: „Meki wi poti ai na makandra, foe gi makandra deki-ati foe sori lobi èn doe boen wroko, foe no libi a kon di wi e kon makandra, soleki fa son wan abi a gwenti foe doe, ma foe gi makandra deki-ati, èn dati moro foeroe, foe di oenoe e si a dei e kon krosibei” (Hebrewsma 10:24, 25). Te wi e prakseri dipi foe a grani di wi abi nanga den winimarki di wi e kisi foe de na den kresten konmakandra, dan dati sa jepi wi foe horibaka gi den sortoe konmakandra dati nanga wi heri ati èn na wan loyaal fasi.
Konmakandra di e bow sma
5. (a) Sortoe krakti den sani di wi e taki moesoe abi na den konmakandra? (b) Foe san ede wi no moesoe draidrai foe gi sma di abi belangstelling wan kari foe go na den konmakandra?
5 Foe di kresten e begi foe a santa jeje foe Jehovah abi krakti tapoe den kresten konmakandra, meki ibri sma di de na den konmakandra moesoe doe ala san a man foe wroko akroederi a jeje èn „no meki a santa jeje foe Gado firi sari” (Efeisesma 4:30). Di na apostel Paulus ben skrifi den wortoe dati na ondro a krakti foe a santa jeje, dan a ben taki dati wi moesoe gebroiki den wortoe di wi e taki, na wan joisti fasi. Ala ten wi moesoe gebroiki den sani di wi e taki „foe bow tra sma pe a de fanowdoe, so taki nanga dati den arkiman kan kisi wan sani foe jere di boen” (Efeisesma 4:29). A sani disi de spesroetoe prenspari na den kresten konmakandra. Na ini en brifi gi den Korentesma, Paulus ben poti krakti tapoe a de di a de fanowdoe taki den konmakandra moesoe e bow sma, e leri sma wan sani èn gi sma deki-ati (1 Korentesma 14:5, 12, 19, 26, 31). Ala sma di de na den konmakandra e kisi wini foe den sortoe konmakandra dati, so srefi den njoen sma di de drape, di kande e kon na a bosroiti: „Gado de troetroe na oen mindri” (1 Korentesma 14:25). Foe a reide disi ede, meki wi no moesoe draidrai foe gi njoen sma di abi belangstelling wan kari foe kon makandra nanga wi, bika te wi e doe dati, dan dati sa meki taki den e gro esi na jejefasi.
6. San na wan toe sani di e jepi foe meki taki wan konmakandra e bow sma?
6 Ala den sma di e kisi wan toewijzing foe hori lezing, interview noso demonstrâsi na wan kresten konmakandra, wani de seiker dati den sani di den e taki, e bow sma èn e kroederi nanga a Wortoe foe Gado di skrifi, bijbel. Boiti taki wi e taki wortoe di soifri, wi moesoe sori den firi di e kroederi nanga den lobi eigifasi foe Gado nanga Krestes. Efoe ala den sma di abi wan prati na wan konmakandra programa, sabi taki den moesoe sori ’a froktoe foe a jeje foe Gado’, soleki prisiri, langa pasensi nanga bribi, dan ala sma di de na a konmakandra seiker sa firi taki a konmakandra e bow den. — Galasiasma 5:22, 23.
7. Fa ala sma di de na wan konmakandra kan jepi foe meki taki a konmakandra e bow den?
7 Ala di kande wan toe sma nomo abi wan prati na a programa na den gemeente konmakandra, tokoe ala sma kan jepi foe meki taki wan konmakandra e bow sma. Foeroetron okasi de gi den arkiman foe gi piki tapoe aksi. Den okasi disi na okasi foe meki a bribi foe wi bekènti na poebliki (Romesma 10:9). Noiti wi no moesoe gebroiki den okasi disi leki wan okasi foe horibaka gi den idea foe wi, foe skepi foe den sani di wi doro, noso foe kroetoe wan kompe bribiman. A sani dati no ben sa meki a santa jeje foe Gado firi sari? A moro boen foe loesoe kesekese di wi abi nanga kompe bribiman te wi de nanga den wawan ini wan jeje foe lobi. Bijbel e taki: „Tron sma di abi switifasi gi makandra, di abi safoe sari-atifasi, èn di e gi makandra pardon na wan fri fasi, neleki fa Gado ben gi oenoe pardon toe na wan fri fasi nanga jepi foe Krestes” (Efeisesma 4:32). Den kresten konmakandra e gi wi toemoesi moi okasi troetroe foe gebroiki a moi rai disi! Foe man sori switifasi gi trawan, dan foeroe brada nanga sisa e kon froekoe na den konmakandra èn e tan moro langa baka te a konmakandra kaba. A sani disi e jepi so srefi den njoen sma di abi belangstelling èn di abi en spesroetoe fanowdoe foe firi taki wi e gi den wan switi kon. Dati meki ala kresten di gi densrefi abra na Gado, e prei wan ròl foe meki taki den konmakandra e bow sma foe di den ’e poti ai na makandra èn e gi makandra deki-ati foe sori lobi èn doe boen wroko’.
Sreka boen gi den konmakandra
8. (a) Sortoe òfer di warti foe kisi prèise, son sma e tjari foe go na konmakandra? (b) Sortoe eksempre Jehovah e poti leki wan skapoeman?
8 Ala di a kan de makriki gi son sma foe go na den kresten konmakandra te wi e teki den gersi trawan, tokoe trawan moesoe tjari òfer doronomo. Foe eksempre, wan kresten mama di moesoe doe grontapoewroko foe jepi sorgoe gi den sani di en osofamiri abi fanowdoe foe tan na libi, foeroetron e weri te a komoto na wroko èn e kon na oso. Dan a moesoe sreka wan njanjan kande èn jepi den pikin foe en foe sreka gi a konmakandra. Tra kresten moesoe rèis fara kande foe go na den konmakandra, noso kande den no man go foe siki noso owroedei ede. Wi de seiker taki Jehovah Gado e froestan a situwâsi foe ibri sma di e go getrow na den konmakandra, neleki fa wan lobi-ati skapoeman e froestan den spesroetoe sani di ibri skapoe na ini en ipi abi fanowdoe. „Leki wan skapoeman”, bijbel e taki, „[Jehovah] sa wei en eigi ipi. Nanga en anoe a sa tjari den pikin skapoe kon na makandra, èn na en borsoe a sa tjari den. Den wan di de na bobi, a sa tjari nanga koni.” — Jesaja 40:11.
9, 10. Fa wi kan kisi a moro boen wini foe den konmakandra?
9 Den wan di moesoe tjari bigi òfer kon foe man de doronomo na den konmakandra, kande no abi foeroe ten foe sreka a materiaal di den sa loekoe na a konmakandra. Te wi e hori wisrefi na a alawiki schema foe leisi bijbel, dan dati sa meki taki wi sa kisi moro wini te wi de na a theokrasia diniwroko-skoro. Na a srefi fasi a de so, taki te wi e sreka na fesi gi den tra konmakandra, soleki a Waktitoren-studie nanga a gemeente boekoestudie, dan den konmakandra disi e gi moro winimarki. Te wi e leisi a studie materiaal na fesi èn e poti prakseri tapoe wan toe foe den bijbeltekst di skrifi, dan den wan di abi frantiwortoe na ini na osofamiri di e teki foeroe ten, sa firi moro foe abi wan boen prati na den prenspari bijbel takimakandra disi.
10 Trawan, di de na ini wan situwâsi pe den abi moro ten, kan gebroiki moro ten foe sreka gi den konmakandra. Foe eksempre, den kan go ondrosoekoe den tekst di kari, ma di den wortoe no skrifi poti. Na so wan fasi ala sma kan de srekasreka foe teki ala wini di den kan kisi foe den konmakandra èn abi wan moi prati na ini foe bow a gemeente nanga den lezing èn nanga den komentaar foe den. Te den owroeman nanga den dinari ini a diniwroko e sreka boen, dan den sa poti wan boen eksempre foe gi sjatoe, ma krin piki. Foe lespeki ede gi den sani di Jehovah seti, meki den wan di de na den konmakandra no sa doe iniwan sani di e poeroe a prakseri foe sma te den konmakandra e hori ete. — 1 Petrus 5:3.
11. Foe san ede a de fanowdoe foe dwengi wisrefi èn foe doe moeiti foe sreka wisrefi gi den konmakandra?
11 Aktiviteit nanga prisiriten di no de prenspari gi a gosontoe foe wi na jejefasi, kan teki toemoesi foeroe ten foe wi. Efoe dati de so, dan wi moesoe ondrosoekoe wisrefi èn „stòp foe de onreidelek” ini a tori foe a fasi fa wi e gebroiki wi ten (Efeisesma 5:17). A marki foe wi moesoe de foe ’bai a ten’ foe afersi di no de so prenspari, so taki wi kan gebroiki moro ten gi persoonlijk studie èn foe sreka wisrefi gi den konmakandra, so srefi foe doe a Kownoekondre diniwroko (Efeisesma 5:16). Wi moesoe erken taki a sani dati no makriki ala ten èn a e aksi taki wi dwengi wisrefi èn doe moeiti foe doe dati. Jongoe sma di e gebroiki a ten foe den na wan koni fasi, e poti wan moi fondamenti foe go na fesi na ini a ten di e kon. Paulus ben skrifi en moro jongoe kompe Timoteus: „Denki dipi foe den sani disi [a rai di Paulus ben gi Timoteus], teki den na ini joe, so taki ala sma kan si taki joe e go na fesi.” — 1 Timoteus 4:15.
Eksempre di de na ini a Wortoe foe Gado
12. Sortoe kefalek boen eksempre na osofamiri foe Samuèl ben poti?
12 Loekoe a moi eksempre di na osofamiri foe Samuèl ben poti, di doronomo ben teki prati na ini den sani di ben seti foe kon makandra nanga kompe anbegiman, di a tabernakel foe Gado ben de na Silo. Soso mansma ben moesoe go ala jari na den fesa di den ben hori. Ma a papa foe Samuèl, Elkana, ben tjari en heri osofamiri nanga en, te „ala jari [a] ben komoto na en foto foe trowe ensrefi na gron gi Jehovah foe den legre na Silo” (1 Samuèl 1:3-5). Ramata-im-Sofim, a foto pe Samuèl ben kweki, kande ben de krosibei na a sjoro foe a disiten Rentis, na den pikin bergi na a foetoe foe „a bergi kontren foe Efra-im” (1 Samuèl 1:1). So boen, a rèis go na Silo ben de wan waka foe so wan 30 kilometer, èn na ini a ten dati a ben de wan waka di ben meki sma weri srefisrefi. Dati na san na osofamiri foe Elkana ben doe na wan loyaal fasi „ala jari, so foeroetron leki [den] ben go na a oso foe Jehovah”. — 1 Samuèl 1:7.
13. Sortoe eksempre getrow djoe ben poti na a ten di Jesus ben de na grontapoe?
13 Jesus ben gro leki wan memre foe wan bigi osofamiri toe. Ibri jari na osofamiri ben rèis foe Nasaret wan sani foe 100 kilometer go na zuidsei foe go na a Paskafesa na Jerusalem. Toe pasi de di den ben kan teki. Na a pasi di ben tjari den langalanga go, den ben moesoe saka go na ini a lagipresi foe Megido èn dan kren so wan 600 meter pasa a kontren foe Samaria èn dan go doro na Jerusalem. A tra pasi di foeroe sma ben teki, ben de a pasi di Jesus ben teki na en lasti waka go na Jerusalem na ini 33 G.T. A ben de wan waka pe a ben moesoe saka go na a lagipresi foe a Jordan te moro lagi leki a se srefi, te leki a ben doro na „den grèns foe Judea . . . na abrasei foe a Jordan” (Markus 10:1). Foe a presi disi, „a pasi di e go na Jerusalem” na so wan 30 kilometer, pe a ben moesoe kren moro leki 1100 meter (Markus 10:32). Doronomo, ipi-ipi sma di ben hori den fesa na wan getrow fasi, ben meki a moeilek rèis foe Galilea go na Jerusalem (Lukas 2:44). Dati na troetroe wan moi eksempre gi den foetoeboi foe Jehovah di e libi na ini goedoe kondre na ini a ten disi pe foeroe foe den kan go makriki na den kresten konmakandra, te joe teki den gersi trawan, foe di den abi den disiten fasi foe vervoer!
14, 15. (a) Sortoe eksempre Ana ben poti? (b) Sortoe sani wi kan leri foe a moi jejefasi di son njoen sma di kon na den konmakandra, e sori?
14 Wan tra eksempre na di foe a weduwe Ana, di ben abi 84 jari. Bijbel e taki dati „noiti [a] no ben misi na ini a tempel” (Lukas 2:37). Boiti dati, Ana ben sori taki a ben abi belangstelling gi tra sma na wan lobi-ati fasi. Di a ben si a beibi Jesus èn ben kon sabi taki en ben de a pramisi Mesias, san a ben doe? A ben gi Gado tangi èn ben bigin „taki foe a pikin nanga ala den sma di e froewakti a froeloesoe foe Jerusalem” (Lukas 2:38). Dati na troetroe wan moi fasi foe denki, wan model gi kresten na ini a ten disi!
15 Ija, a moesoe de so wan prisiri sani foe de na den konmakandra èn foe teki prati na den, taki neleki Ana, noiti wi no wani misi den konmakandra. Foeroe njoen sma abi a srefi warderi disi gi den konmakandra. Foe di den komoto na ini a doengroe èn kon na ini a toemoesi moi leti foe Gado, meki den wani leri ala sani di den man, èn foeroe foe den e sori taki den abi faja srefisrefi gi den kresten konmakandra. Na a tra sei, den wan di de moro langa ini a waarheid moesoe de na ai foe no ’gowe libi a lobi di den ben abi fosi’ (Openbaring 2:4). Serjoesoe problema na gosontoe sei nanga tra sani di wan sma no man basi, kan meki taki son tron a sma no kan go na den konmakandra. Ma noiti wi no moesoe gi pasi meki a lobi gi materia goedoe, ontspanning noso a mankeri foe belangstelling e meki taki wi de sma di de na den konmakandra sondro foe sreka wisrefi gi den èn abi wan mi-no-ke fasi noso de sma di e misi den konmakandra. — Lukas 8:14.
A moro boen eksempre
16, 17. (a) Sortoe fasi Jesus ben abi gi den konmakandra pe den ben gi leri na jejefasi? (b) Baka sortoe boen gwenti ala kresten moesoe proeberi foe waka?
16 Jesus ben poti wan kefalek boen eksempre ini a sori di a ben sori warderi gi den konmakandra pe a ben kisi leri na jejefasi. Di a ben jongoe ete èn ben abi 12 jari, dan a ben sori a lobi di a ben abi gi na oso foe Gado na Jerusalem. En papa nanga mama no ben sabi pe a ben de, ma te foe kaba den ben feni en ala di a ben e taki foe a Wortoe foe Gado nanga leriman na ini a tempel. Jesus ben doe wan sani tapoe a broko-ede di en papa nanga mama ben sori èn a ben aksi na wan lespeki fasi: „Oenoe no ben sabi taki mi moesoe de na ini na oso foe mi Tata?” (Lukas 2:49) A jongoe Jesus ben saka ensrefi na ondro en papa nanga mama èn ben drai go baka nanga den na Nasaret. Drape a ben tan sori a lobi di a ben abi gi den konmakandra foe anbegi, foe di a ben de doronomo na a snoga. Foe dati ede, di a ben bigin nanga en diniwroko, bijbel e froeteri: „A ben kon na Nasaret, pe a ben kweki, èn soleki fa a ben gwenti na a sabadei, a ben go na ini a snoga èn a ben opo tanapoe foe go leisi.” Baka di Jesus leisi Jesaja 61:1, 2 èn tjari en kon na krin, den arkiman bigin „froewondroe foe den moi wortoe di ben komoto na en mofo”. — Lukas 4:16, 22.
17 Den kresten konmakandra na ini a ten disi e waka baka a srefi prenspari eksempre disi. Baka te a konmakandra opo nanga wan prèisesingi èn nanga wan begi, dan den e leisi den vers komoto na ini bijbel (noso den vers di skrifi poti na ini a bijbel studie materiaal) èn e tjari den kon na krin. Troe kresten de froeplekti foe waka baka a boen gwenti foe Jesus Krestes. So fara leki a situwâsi foe den e gi pasi foe doe dati, den e feni prisiri foe de doronomo na den kresten konmakandra.
Eksempre na ini a ten disi
18, 19. Sortoe kefalek boen eksempre den brada na ini kondre di no de so goedoe, poti ini a tori foe konmakandra, bigi konmakandra nanga kongres?
18 Na den presi foe grontapoe di no de so goedoe, foeroe foe den brada nanga sisa foe wi e poti wan moi eksempre ini a warderi di den abi gi den kresten konmakandra. Na Mosambik, a ben teki 45 joeroe langa foe wan distriktopziener, Orlando, nanga en wefi, Amélia, foe waka so wan 90 kilometer abra wan hei bergi foe man hori wan bigi konmakandra. Den ben moesoe waka a srefi pasi go baka foe hori a tra bigi konmakandra. Orlando e froeteri na wan bescheiden fasi: „Wi ben feni taki wi no ben doe noti te wi e teki wisrefi gersi den brada foe gemeente Bawa. Den ben moesoe waka so wan 400 kilometer siksi dei langa foe go na a bigi konmakandra èn foe go baka na den oso foe den, èn wan brada di abi 60 jari ben de na den mindri!”
19 Fa a de nanga a warderi gi den alawiki gemeente konmakandra? Kashwashwa Njamba na wan swaki sisa di abi moro leki 70 jari. A e libi na Kaisososi, wan pikin dorpoe di de so wan feifi kilometer foe a Kownoekondre zaal na ini a dorpoe Rundu, Namibia. Foe man go na den konmakandra, dan a e waka pasa na ini wan boesi tin kilometer go-kon. Den foefoeroe trawan na a pasi disi, ma Kashwashwa e tan kon. Foeroe foe den konmakandra e hori na ini tongo di a no e froestan. Dan fa a e kisi wini te a de na den konmakandra? „Foe di mi e poti prakseri tapoe den tekst,” na so Kashwashwa e taki, „dan mi e proeberi foe kon sabi foe sortoe tori a lezing e taki.” Ma a no man leisi èn skrifi, dan fa a e poti prakseri tapoe den tekst? „Mi e arki den tekst di mi sabi na ede”, a e piki. Èn na ini ala den jari, a hori foeroe tekst na ede. Foe man go na fesi ini a man di a man gebroiki bijbel, dan a e go na wan leri leisi èn skrifi skoro, di de wan seti foe a gemeente. „Mi lobi foe de na den konmakandra”, a e taki. „Ala ten njoen sani de foe leri. Mi lobi foe de makandra nanga den brada nanga sisa. Ala di mi no kan taki nanga den alamala, tokoe ala ten den e kon taki mi odi. Èn a moro prenspari sani de, taki mi sabi dati mi e prisiri na ati foe Jehovah te mi e go na den konmakandra.”
20. Foe san ede wi no moesoe libi den kresten konmakandra foe wi?
20 Neleki Kashwashwa, miljoenmiljoen anbegiman foe Jehovah na heri grontapoe e sori warderi gi den kresten konmakandra èn den warti foe kisi prèise. Ala di a grontapoe foe Satan e go na a pori foe en, wi no kan libi a kon di wi e kon makandra. Na presi foe dati, meki wi tan de na ai na jejefasi èn sori dipi warderi gi den konmakandra, bigi konmakandra nanga kongres. Dati no sa meki na ati foe Jehovah breiti wawan, ma a sa gi wi foeroe winimarki te wi e teki a leri foe Gado di e tjari wi go na têgo libi. — Odo 27:11; Jesaja 48:17, 18; Markus 13:35-37.
Aksi foe loekoe sani sjatoe baka
◻ Foe san ede a de wan grani foe de na den kresten konmakandra?
◻ Fa ala sma di de na wan konmakandra kan jepi foe meki taki a konmakandra e bow den?
◻ Sortoe toemoesi boen eksempre Jesus Krestes ben poti?
◻ Sortoe sani wi kan leri foe den brada di e libi na ini den kondre di no de so goedoe?
[Faki na tapoe bladzijde 17]
Den e warderi den alawiki konmakandra
Miljoenmiljoen sma e libi na ini foto di abi foeroe pôtifasi nanga ogridoe. Ala di den sortoe situwâsi dati de, tokoe troe kresten di de na mindri den sma dati, e sori warderi gi den kresten konmakandra èn dati warti foe kisi prèise. Wan owroeman di e dini ini wan foe den gemeente foe Soweto foe a distrikt Gauteng, Zuid-Afrika, e froeteri: „Ini wan gemeente nanga 60 Kotoigi nanga preikiman di no dopoe ete, wi abi na mindri 70 nanga 80 sma di e kon na den konmakandra foe wi, èn sontron moro sma e kon srefi. Ala di den brada nanga sisa no e rèis fara foe go na den konmakandra, tokoe a situwâsi na a pisi disi foe Soweto abi foeroe ogridoe. Den ben djoekoe wan brada na ini en baka, di a ben e waka go na wan konmakandra. Den ben graboe no moro mendri leki toe sisa foe proeberi foe foefoeroe den. Ma a sani dati no ben tapoe den foe kon. Tapoe den sonde, baka te wi tapoe a konmakandra nanga begi, dan so wan 15 miniti langa wi e oefen foe singi Kownoekondre singi. No moro mendri leki 95 procent foe wi gwenti foe tan na baka èn e singi ala den singi di wi sa gebroiki a wiki na baka. A sani dati e jepi den njoen sma di kisi belangstelling, foe leri den singi èn foe singi toe.”
Sma di e libi na den boitipresi abi tra problema, soleki a rèis di den moesoe rèis fara foe go na den konmakandra dri tron wan wiki. Wan trowpaar di ben abi belangstelling, e libi 15 kilometer foe a Kownoekondre zaal na Lobatse, Botswana. A jari di pasa, den go na den konmakandra doronomo nanga den toe pikin foe den. A masra e meki soesoe kon boen baka foe sorgoe gi na osofamiri. A wefi e seri pikinpikin sani foe jepi na osofamiri abi moro moni, so taki den kan pai gi vervoer foe man go na den konmakandra èn kon baka.
Na wan zomer neti no so langa pasa, baka wan konmakandra nanga a kring-opziener, na osofamiri disi no ben man feni bus èn ben de na wan bushalte ete neigi joeroe na neti. Den bus ben tapoe froekoe foe takroe weer ede. Wan skowtoe ben stòp en wagi èn a ben aksi san den ben e doe. Di a ben jere foe a moeilek situwâsi foe den, dan a ben sari den èn a ben rèi 15 kilometer foe tjari den go na oso. A wefi, di ben de wan preikiman di no dopoe ete, ben taigi en masra: „Joe si, efoe wi e poti den konmakandra na a fosi presi, dan ala ten Jehovah e sorgoe gi wi.” Now a masra taki dati a wani tron wan preikiman foe a boen njoensoe toe.
[Prenki na tapoe bladzijde 18]
Kotoigi soleki den wan disi na Romania e poti wan moi eksempre ini a warderi di den abi gi den kresten konmakandra