Mi de nanga tangi taki mi kisi wan bigi kresten goedoe

SOLEKI FA GWEN GOOCH BEN FROETERI

Na skoro mi ben singi wan pokoe nanga den wortoe: ’a Bigi Jehovah e sidon tapoe en kownoestoeroe na ini en glori’. Nofotron mi ben aksi misrefi: ’Soema na a Jehovah disi?

MI GRANPAPA NANGA GRANMAMA ben abi frede gi Gado. Na a bigin foe a jarihondro disi, den ben moksi densrefi nanga den Bijbel Ondrosoekoeman, soleki fa sma ben sabi Jehovah Kotoigi na a ten dati. Mi papa ben de wan boen bisnisman, ma ini a bigin a no ben gi den dri pikin foe en a kresten goedoe di en ben kisi.

Ma na di papa ben gi mi brada Douglas, nanga mi sisa Anne nanga mi den pikin boekoe di ben nen His Works (Den wroko foe en) èn Who Is God? (Soema na Gado?), mi ben kon sabi taki Jehovah na a nen foe a troe Gado (Psalm 83:18). Mi ben breiti troetroe! Ma san meki papa ben kisi belangstelling baka?

Na ini 1938, di a ben si taki den nâsi ben sreka densrefi gi na orlokoe, papa ben froestan taki moro sani ben o de fanowdoe leki a moeiti di libisma e doe foe poeroe den problema foe grontapoe. Granmama ben gi en a boekoe Enemies (Feanti) di Jehovah Kotoigi ben tjari kon na doro. Di a ben leisi en a ben kon si taki a troetroe feanti foe libisma na Satan Didibri èn taki Gado Kownoekondre wawan kan tjari vrede kon na grontapoe.a — Danièl 2:44; 2 Korentesma 4:4.

Di orlokoe ben de foe doro, na osofamiri foe wi ben bigin go na den konmakandra na ini a Kownoekondre zaal foe Jehovah Kotoigi na Wood Green, Noordsei Londen. Na ini juni 1939 wi ben go na Alexandra Palace di ben de krosibei, foe arki a poeblikitaki „Tirimakti èn vrede” di Joseph F. Rutherford, di na a ten dati ben de presidenti foe a Waktitoren Genootschap, ben hori. A lezing di Rutherford ben hori na ini Madison Square Garden na New York ben de foe jere na tapoe radio na ini Londen èn na ini tra bigi foto. Wi ben kan jere a lezing so krin taki di wan groepoe oproeroe sma na New York ben tjari broeja kon, mi ben loekoe lontoe foe si efoe a ben e pasa na ini a zaal foe wi!

A faja di papa ben abi gi bijbel waarheid

Papa ben wani taki ibri satraneti a heri osofamiri foe wi ben moesoe teki prati na wan bijbelstudie. A studie foe wi ben taki foenamkoe foe a bijbeltori na ini A Waktitoren di ben de na tapoe schema foe loekoe dati a dei na baka. A sani di e sori sortoe krakti den studie disi ben abi na taki te leki now mi man memre krinkrin a tori foe Josua èn a wini di den ben wini a foto Ai, soleki fa den ben taki foe dati na ini The Watchtower foe 1 mei 1939. A tori dati ben hari mi prakseri someni taki mi ben soekoe ala den tekst di e taki foe a tori, na ini mi eigi bijbel. Mi ben lobi doe a sortoe ondrosoekoewroko dati — èn te now dati de so.

A prati di wi ben prati den sani di wi ben e leri nanga trawan, ben meki taki bijbel-leri ben go sidon dipi na ini mi ati. Wan dei, papa ben gi mi wan apparaat foe drai plaat na tapoe, makandra nanga wan plaat nanga bijbel lezing na tapoe, wan pikin boekoe di wi ben gebroiki foe hori wan bijbelstudie, nanga na adres foe wan owroe oema. Dan a ben aksi mi foe go na a oema.

„San mi o taki, èn san mi o doe?”, mi ben aksi.

„Joe abi ala sani kaba”, papa ben piki. „Drai a plaat nomo, leisi den aksi, meki na ososma leisi den piki, èn leisi den bijbeltekst.”

Mi ben doe san a ben taigi mi, èn na a fasi disi mi ben leri foe hori wan bijbelstudie. Foe di mi ben gebroiki den bijbeltekst na ini mi diniwroko na a fasi disi, meki mi ben kon froestan den moro betre.

A tjalensi foe den jari foe orlokoe

A di foe Toe Grontapoefeti ben bigin na ini 1939, èn a jari baka dati mi ben dopoe foe sori taki mi ben gi misrefi abra foe dini Jehovah. Mi ben abi 13 jari nomo. Baka dati mi ben teki a bosroiti foe tron wan pionier, soleki fa den e kari foeroeten dinari. Mi ben gowe libi skoro na ini 1941 èn na a kongres na Leicester mi ben go makandra nanga Douglas na ini a foeroeten preikiwroko.

A jari baka dati, papa ben go na strafoe-oso foe di en konsensi ben piki en foe no teki prati na orlokoe. Wi leki pikin, ben kon makandra foe jepi wi mama foe sorgoe gi wi oso na ini a moeilek ten dati foe orlokoe. Baka dati, no langa baka di den ben loesoe papa foe strafoe-oso, den ben kari Douglas foe go na ini a legre. Wan edeprakseri na ini wan koranti ben taki: „Foe san ede a manpikin bosroiti foe go na strafoe-oso neleki en papa.” Wan boen kotoigi ben gi foe dati, foe di okasi ben de foe tjari kon na krin foe san ede troe kresten no e teki prati na a kiri foe den kompe libisma foe den. — Johanes 13:35; 1 Johanes 3:10-12.

Na ini den jari dati foe orlokoe, foeroe Kotoigi di ben de na ini a foeroeten diniwroko ben kon fisiti wi oso doronomo, èn noiti mi no sa frigiti den takimakandra foe den di ben bow mi èn di ben abi den gron tapoe bijbel. Na mindri den getrow kresten brada disi joe ben abi John Barr nanga Albert Schroeder, di de memre now foe a Tiri Skin foe Jehovah Kotoigi. Mi papa nanga mama ben lobi troetroe foe ontfanga sma boen, èn den ben leri wi foe doe a srefi sani. — Hebrewsma 13:2.

De klariklari foe gi wan piki

No langa baka di mi ben bigin pionier, mi ben miti Hilda na ini na oso-foe-oso diniwroko. Na wan atibron fasi a ben taki: „Mi masra go feti gi den sortoe sma leki joe! Foe san ede joe no e doe wan sani gi den afersi foe na orlokoe?”

„Omeni joe sabi foe san mi e doe?”, mi ben aksi. „Joe sabi foe san ede mi kon na joe?”

„We,” a ben piki, „moro betre joe kon na inisei èn froeteri mi.”

Mi ben man tjari kon na krin taki wi e gi troe howpoe na sma di e pina foe den takroe sani di sma ben e doe — nofotron na ini a nen foe Gado. Hilda ben arki nanga warderi, èn a ben tron mi fosi fasti bijbel studenti. A de wan fajafaja Kotoigi now moro leki 55 jari kaba.

Na a kaba foe na orlokoe, mi ben kisi wan njoen pionier toewijzing na Dorchester, wan foto zuidsei foe Ingrisikondre. Disi ben de a fosi leisi taki mi ben gowe libi oso. A pikin gemeente foe wi ben kon makandra na ini wan restaurant, wan oso foe a di foe 16 jarihondro di sma ben kari „Na owroe te-oso”. Gi ibri konmakandra foe wi, wi ben abi foe seti den tafra nanga den stoeroe tra fasi baka. A ben de heri tra fasi leki a Kownoekondre zaal di mi ben gwenti. Ma tokoe a srefi jeje njanjan èn a lobi-ati demakandra foe den kresten brada nanga sisa ben de drape.

Disiten, mi papa nanga mama ben froisi go na Tunbridge Wells, zuidsei foe Londen. Mi ben drai go baka na oso so taki papa, Anne nanga mi ben kan pionier makandra. Heri esi, a gemeente foe wi ben gro foe 12 kon tron 70 Kotoigi, so taki den ben aksi na osofamiri foe wi foe froisi go na Brighton na a zuidsei sesjoro, pe a nowtoe gi Kownoekondre preikiman ben de moro bigi. Foeroe sma ben doe a preikiwroko fajafaja makandra nanga a pionier-osofamiri foe wi, èn wi ben si fa Jehovah ben blesi a wroko foe wi troetroe. Heri esi, a wán gemeente ben tron dri gemeente!

Wan kari di mi no ben froewakti

Na ini a zomer foe 1950, na osofamiri foe wi ben de na mindri den 850 sma foe Ingrisikondre di ben go na a Toename der Theocratie internationaal kongres na New York, Yankee Stadion. Foeroe pionier foe tra kondre di ben o kon na a kongres, ben kisi wan formulier foe go na a Waktitoren Bijbelskoro Gilead, di ben de krosibei foe South Lansing, New York. Douglas, Anne nanga mi ben de na mindri den! Mi e memre taki di mi ben poti a formulier di mi ben vul in, na ini a brifiboksoe, taki mi ben e prakseri: ’Now mi doe en troetroe! Fa mi libi sa waka now?’ Ma tokoe a fasti bosroiti foe mi ben de: „Dja mi de! Seni mi” (Jesaja 6:8). Mi ben breiti di mi ben kisi wan kari foe tan baka a kongres so taki mi ben kan go na a di foe 16 Gileadklas, makandra nanga Douglas nanga Anne. Wi alamala ben sabi heri boen taki den ben kan seni wi leki zendeling go na iniwan presi na grontapoe.

Baka di wi ben njan boen foe a kongres makandra leki osofamiri, a ten ben doro taki wi papa nanga mama ben moesoe go baka na Ingrisikondre — sondro wi. Oen dri, ben bari den adjosi di den ben teki a sipi Mauritania foe go na oso baka. A ten dati foe teki adjosi ben de troetroe wan sari sani!

Zending toewijzing

A di foe 16 Gileadklas ben abi 120 studenti foe ala presi foe grontapoe, so srefi son wan di ben ondrofeni pina na ini den Nazi strafoeman kampoe. Foe di den ben leri a klas foe wi Spanjoro, meki wi ben froewakti taki wi ben o kisi a toewijzing foe go na wan Zuidamerkan kondre pe den e taki Spanjoro. Joe kan froestan taki a ben kon leki wan onfroewakti sani gi wi tapoe a graduatie dei di wi ben kon sabi taki Douglas ben kisi Japan leki toewijzing èn Anne nanga mi ben o go na Siria. Dati meki Anne nanga mi ben abi foe leri Arabiatongo, èn disi ben tan so, srefi di a toewijzing foe wi ben kenki kon tron Libanon. A pisi ten di wi ben e wakti foe kisi wi visum, George Shakashiri, a sma di ben wroko gi a Waktitoren Genootschap leki a typesetter foe na Arabiatongo Waktitoren, ben leri wi Arabiatongo toe tron wan wiki.

A ben de wan prisiri sani srefisrefi taki wi ben o go na wan bijbel kondre foe san wi ben leri wan sani na ini wi klas! Keith nanga Joyce Chew, Edna Stackhouse, Olive Turner, Doreen Warburton, nanga Doris Wood ben kon nanga wi toe. Foe troe wi ben tron wan kolokoe zendeling-osofamiri! Wan Kotoigi foe a presi drape ben fisiti wi zending-oso foe jepi wi foe leri a tongo moro fara. Na ini den lès di wi ben kisi ala dei, wi ben e oefen wan sjatoe pristeri, èn baka dati wi ben e go na ini a preikiwroko èn ben e gebroiki a pristeri.

Den fosi jari wi ben wroko na ini Tripoli, pe wan gemeente ben opo. Joyce, Edna, Olive, Doreen, Doris, Anne, nanga mi ben jepi den wefi nanga den oemapikin foe den Kotoigi drape foe teki prati na den konmakandra so srefi na a poebliki diniwroko. Te nanga a ten dati, den kresten brada nanga sisa foe wi ben hori densrefi na den gwenti foe a kondre èn den no ben sidon makandra na den konmakandra, èn pikinmoro noiti den kresten sisa ben teki prati na a oso-foe-oso diniwroko. Den ben moesoe jepi wi nanga a tongo na ini wi poebliki preikiwroko, èn wi ben gi den deki-ati foe meki den srefi teki prati na a wroko disi.

Baka dati Anne nanga mi ben kisi a toewijzing foe jepi a pikin groepoe Kotoigi na ini na owroeten foto Sidon. No langa baka dati, den ben aksi wi foe kon baka na a gran-foto Beirut. Siri foe bijbel waarheid ben sai na mindri den sma drape di ben taki Armeniatongo, dati meki wi ben leri a tongo dati foe jepi den.

Mi e kisi wan tra toewijzing

Mi ben miti Wilfred Gooch fosi mi ben gowe libi Ingrisikondre. A ben de wan fajafaja, safri-ati brada di ben dini na Bethel na Londen. Wilf ben de wan memre foe a di foe 15 Gileadklas, di ben kisi en diploma na tapoe wan kongres foe 1950 na ini a Yankee Stadion. A zending toewijzing foe en ben de a bijkantoro foe a Waktitoren Genootschap na Nigeria, èn wan pisi ten wi ben skrifi makandra brifi kaba. Na ini 1955 wi ala toe ben go na a „Zegevierend Koninkrijk”-kongres na Londen, èn sjatoe baka dati wi ben meki mofo foe trow. A jari baka dati wi ben trow na Gana, èn mi ben go makandra nanga Wilf na ini en zending toewijzing na Lagos, Nigeria.

Baka di mi ben gowe libi Anne na Libanon, a ben trow wan switi kresten brada di ben leri bijbel waarheid na Jerusalem. Mi papa nanga mama no ben man kon na den trow foe wi, foe di Douglas, Anne, nanga mi ben trow na difrenti presi foe grontapoe. Ma tokoe den ben de tevrede foe sabi taki wi alamala ben dini wi Gado, Jehovah, nanga boen bakapisi.

Wroko na Nigeria

Na a bijkantoro na Lagos, mi ben kisi a toewijzing foe krin den kamra foe den aiti memre foe wi bijkantoro so srefi foe sreka a njanjan foe den èn wasi den krosi. Gi mi a ben gersi leki mi no ben kisi wan masra wawan, ma ini wán leisi nomo mi ben kisi wan heri osofamiri toe!

Wilf nanga mi ben leri sjatoe bijbel pristeri na ini a Yoruba tongo, èn den moeiti foe wi ben kisi pai. Wan jongoe studenti di wi ben miti, abi wan manpikin nanga wan oemapikin now di e dini na a bigi Bethelfamiri foe Nigeria di abi so wan 400 memre.

Na ini 1963, Wilf ben kisi wan kari foe go teki spesroetoe leri tin moen langa na Brooklyn, New York. Baka di a ben kaba nanga dati, a ben kisi na onfroewakti toewijzing foe go na Ingrisikondre baka. Mi ben tan na Nigeria èn mi ben kisi soso 14 dei foe miti Wilf baka na Londen. Mi ben gowe nanga prisiri na ati na a wan sei, ma nanga wan sari ati na a tra sei, foe di Nigeria ben de so wan switi toewijzing. Baka di mi ben dini 14 jari na ini wan tra kondre, a ben teki ten foe gwenti a libi baka na Ingrisikondre. Ma wi ben de nanga tangi taki wi ben de krosibei na wi owroe papa nanga mama baka èn taki wi ben man jepi sorgoe den.

A howpoe foe wi ben jepi wi

Foe sensi 1980, mi ben kisi a grani foe go makandra nanga Wilf te a ben e rèis go na foeroe kondre leki zone opziener. Mi ben prisiri spesroetoe te wi ben fisiti Nigeria baka. Baka ten wi ben go so srefi na Skandinafia, den Kribisi kondre, nanga Mindri-Owstoe — so srefi Libanon. A ben prisiri mi spesroetoe foe prakseri den switi ten baka èn foe si den sma di mi ben sabi leki jongoe tini, e dini leki kresten owroeman.

Na wan sari taki mi lobi masra dede bakajari 1992. A ben abi soso 69 jari. A ben hati mi srefisrefi foe di a ben pasa wantronso. Baka di mi ben trow 35 jari langa, a teki ten foe gwenti taki mi de wan weduwe now. Ma mi kisi foeroe jepi nanga lobi foe mi kresten famiri di de na heri grontapoe. Mi abi someni prisiri ondrofenitori di mi kan prakseri baka foe dati.

Mi papa nanga mi mama ben de wan heri boen eksempre ini a tori foe soifri retifasi. Mama dede na ini 1981 èn papa na ini 1986. Douglas nanga Anne e dini Jehovah getrow ete. Douglas nanga en wefi Kam kon na Londen baka, pe den ben tan baka di den ben sorgoe papa. Anne nanga en osofamiri de na Amerkankondre. Wi alamala e warderi troetroe a howpoe nanga a goedoe di Gado gi wi. Wi e tan „sori taki [wi] e wakti en”, ala di wi e loekoe nanga prisiri go na a ten pe den libiwan makandra nanga den lobiwan foe den di kisi opobaka, sa dini nanga makandra leki memre foe Jehovah en famiri na grontapoe foe têgo. — Kragisingi 3:24.

[Foetoewortoe]

[Prenki na tapoe bladzijde 23]

Bigin na a kroektoe-anoesei saka go na ondro na a leti-anoesei.

Gwen di a ben abi 13 jari, e demo wan bijbelstudie na a Kownoekondre zaal foe Enfield

A zendeling-osofamiri na Tripoli na ini Libanon, 1951

Gwen nanga en masra Wilf, di dede