Den no ben meki barinen gi densrefi
BIJBEL no e kari a nen foe den bowman foe a toren foe Babel di ben kisi takroenen. A tori e taki: „Now den ben taki: ’Oen kon! Meki wi bow wan foto gi wisrefi èn so srefi wan toren di e doro te na hemel, èn kon meki wi meki barinen gi wisrefi, so taki wi no sa panja na ala sei foe grontapoe.’ ” — Genesis 11:4.
Soema ben de „den”? A sani disi pasa so wan 200 jari baka a Froedoe. Na a ten dati, Noa, di ben abi 800 jari, ben libi na mindri doesoendoesoen foe en bakapikin. Den alamala ben taki a srefi tongo èn den ben libi nanga makandra na ini a bigi kontren pe en nanga en manpikin ben go libi baka a Froedoe (Genesis 11:1). Wan ten ben doro, taki wan pisi foe a pipel disi di ben kon bigi, ben froisi go na owstoesei èn „ben kon feni wan lagi opopresi na ini a kondre Sinear”. — Genesis 11:2.
Den no ben man doe en kwetikweti
A ben de na ini a lagipresi disi taki a groepoe ben bosroiti foe meki oproeroe kontrari Gado. Fa so? We, Jehovah Gado ben taki san a ben abi na prakseri di a ben gi a fosi libisma paar a komando foe „meki pikin èn kon foeroe èn foeroe grontapoe” (Genesis 1:28). Baka a Froedoe, Gado ben taigi Noa nanga den manpikin foe en a sani disi ete wan leisi. Gado ben taigi den: „Èn oenoe, meki pikin èn kon tron foeroe, meki grontapoe lai nanga oenoe èn kon tron foeroe na en tapoe” (Genesis 9:7). Foe gens a tiri di Jehovah ben gi, a pipel ben bow wan foto so taki den no ben o „panja na ala sei foe grontapoe”.
A pipel disi ben bigin bow wan toren toe, foe di den ben abi na prakseri foe meki „barinen” gi densrefi. Ma tra fasi leki san den ben froewakti, den no ben kaba bow a toren. A bijbel tori e sori taki Jehovah ben broeja a tongo foe den, so taki den no ben man froestan makandra. „Na so”, a tori e taki di skrifi na ondro krakti foe santa jeje, „Jehovah ben panja den go na ala sei foe grontapoe, èn safrisafri den ben tapoe foe bow a foto.” — Genesis 11:7, 8.
Taki den bowman noiti no ben kisi „barinen”, noso biginen, na wan sani di e tjari kon na krin taki den no ben man kaba a wroko disi kwetikweti. Foe taki en leti, sma no sabi a nen foe den èn den no de foe feni na ini a historia foe libisma. Ma fa a de nanga Nimrod, na afopikin foe Noa? A no ben de a sma di ben teki fesi na ini na oproeroe disi di sma ben meki kontrari Gado? A no kisi biginen dan?
Nimrod — Wan oproeroeman sondro lespeki
Sondro tweifri, Nimrod ben de a moro prenspari fesiman. Na a bigin foe Genesis kapitel 10 den e kari en „wan makti ontiman teige Jehovah” (Genesis 10:9). Den Boekoe foe bijbel e taki toe dati „a ben bigin tron wan trangaman na grontapoe” (Genesis 10:8). Nimrod ben de wan fetiman, wan man di ben doe ogri nanga tranga. Baka a Froedoe, a ben tron a fosi libisma tiriman di ben meki ensrefi kon tron kownoe. Nimrod ben de wan bowman toe. Bijbel e taki dati na en ben de a setiman foe aiti foto, so srefi foe Babel. — Genesis 10:10-12.
Foe dati ede, tweifri no de taki Nimrod — wan gensman foe Gado, wan kownoe foe Babel, èn wan bowman foe foto — ben teki prati na a bow foe a toren foe Babel. A no ben meki barinen gi ensrefi? E. F. C. Rosenmüller, wan sabiman tapoe a kontren foe den tongo nanga den boekoe foe den sma na Owstoesei, ben skrifi foe a nen Nimrod: „Nimrod ben kisi a nen san kon foe [ma·radhʹ], ’a ben meki oproeroe’, ’a ben fadon gowe’, akroederi san disi wani taki na ini Hebrewtongo.” Dan Rosenmüller e tjari kon na krin taki „nofotron den sma na Owstoesei gwenti kari den heihei man foe den na wan nen di den kisi baka te den dede, san meki taki son leisi wan bigi kroederi de na mindri den nen èn na mindri den sani di sma doe.”
Difrenti sabiman e prakseri toe taki a nen Nimrod no ben de wan nen di a ben kisi di en mama meki en. Na presi foe dati, den denki taki a de wan nen di a ben kisi baka ten di a ben kon na krin taki a ben lobi meki oproeroe. Foe eksempre, C. F. Keil e taki: „A nen srefi, Nimrod foe [ma·radhʹ], ’wi sa meki oproeroe’, e sori go na a gens di sma ben gens Gado nanga tranga. A de so wan aparti sani taki, soso den sma di ben libi na ini en ten ben kan gi en a nen, èn na so fasi a ben kon de wan nen di ben fiti en.” Na ini wan foetoewortoe, Keil skrifi den wortoe di historia skrifiman Jacob Perizonius ben taki: „Mi denki taki a man disi [Nimrod], leki wan ogri-ati ontiman di ben abi wan groepoe kompe fetiman nanga en, èn di ben wani taki tra sma moesoe meki oproeroe toe, ala ten ben taki a wortoe ’nimrod, nimrod’ toe tron, san wani taki ’Kon wi meki oproeroe! Kon wi meki oproeroe!’ Baka ten foe dati ede, trawan, ija, srefi Moses, ben sori go na en nanga a wortoe dati leki wan nen di ben fiti en.”
A de krin, taki Nimrod no ben meki barinen gi ensrefi. Soleki fa a sori, dan sma no sabi a nen di a ben kisi di en mama meki en. A no de foe feni na ini a historia, neleki san pasa nanga den nen foe den sma di ben waka na en baka. A no ben abi no wan bakapikin srefi di ben kan tjari en nen. Na presi taki a kisi glori nanga barinen, a kisi takroenen. Foe ala ten, a nen Nimrod e sori go na en leki wan oproeroeman di ben de sondro lespeki, èn di ben de so don foe tjalensi Jehovah Gado.