Teki a frantiwortoe foe sorgoe na osofamiri

„PAPA, no tanteri den pikin foe oenoe, ma tan kweki den na ini a tranga leri èn a serjoesoe froemane foe Jehovah” (Efeisesma 6:4). Nanga den wortoe disi di sma skrifi nanga jepi foe Gado en santa jeje, na apostel Paulus ben poti a frantiwortoe foe sorgoe na osofamiri krinkrin pe a moesoe de — na tapoe den skowroe foe a papa.

Na ini moro foeroe osofamiri a papa no de en wawan foe sorgoe gi den pikin foe en. En wefi, a mama foe den pikin foe en, e tjari a lai disi nanga en na ini prisiri. Foe dati ede, Kownoe Salomo ben froeklari: „Arki, mi manpikin, a tranga leri foe joe papa, èn no gowe libi a wet foe joe mama.” — Odo 1:8.

Sorgoe gi sani na skinfasi èn na jejefasi

Papa nanga mama di lobi den pikin foe den no e froewarlowsoe den pikin foe espresi. Ija, efoe kresten ben sa doe dati dan a ben sa de a srefi leki den ben sa gowe libi a bribi foe den, soleki fa wi kan froestan foe den wortoe foe Paulus gi Timoteus: „Ija, efoe wan sma no e sorgoe gi den sma foe en, èn spesroetoe gi den wan di de memre foe en osofamiri, dan a drai en baka gi a bribi èn a moro takroe leki wan sma sondro bribi” (1 Timoteus 5:8). Kresten e froestan taki a kweki di den pikin moesoe kweki na ini „a tranga leri èn a serjoesoe froemane foe Jehovah” e aksi moro foeroe leki foe sorgoe gi den na skinfasi nomo.

Loekoe a froemane foe Moses gi a nâsi Israèl di den ben meki den kampoe na den lagipresi foe Moab, leti bifo den ben go na ini a Pramisi Kondre. Drape a ben taki a wet foe Gado ete wan tron gi den èn ben leri den: „Oenoe moesoe poti den wortoe disi foe mi na ini oen ati èn na ini oen sili” (Deuteronomium 11:18). Moro na fesi a ben memre den taki den moesoe lobi Jehovah nanga den heri ati, sili, nanga den krakti, di a ben taki moro fara: „Den wortoe disi di mi e komanderi joe tide, moesoe sori foe de na tapoe joe ati” (Deuteronomium 6:5, 6). A ben de toemoesi prenspari taki den papa nanga mama di ben de Israèlsma ben moesoe meki den wortoe foe a Wet foe Gado saka go dipi na ini na ati foe den. Nanga ati di foeroe nanga warderi gi jeje sani, den papa nanga mama di ben de Israèlsma ben kan gi jesi boen na den wortoe foe Moses di e kon now: „Joe moesoe poti den [den wortoe foe a Wet foe Gado] dipi go na ini a manpikin foe joe èn taki foe den te joe e sidon na ini joe oso èn te joe e waka na pasi èn te joe e go didon èn te joe e opo.” — Deuteronomium 6:7; 11:19; teki gersi Mateus 12:34, 35.

Loekoe taki den papa ben moesoe „poti” den wortoe dati „dipi go” na ini den pikin foe den èn den ben moesoe „taki foe den”. Merriam-Webster’s Collegiate Dictionary e taki dati „poti dipi go” wani taki „foe leri èn foe naki na ati, te den e taki sani noso e gi froemane ibritron baka”. Te papa nanga mama ben e taki foe a Wet foe Gado ibri dei — mamanten, bakadina, nanga neti — dan disi ben e gi den pikin foe den foeroe leri. Te den jongoewan ben e firi a lobi di den papa nanga mama ben abi gi a Wet foe Gado, dan densrefi ben kisi a firi foe kweki wan krosibei banti nanga Jehovah (Deuteronomium 6:24, 25). A de prenspari foe si taki Moses ben taigi den papa krinkrin foe leri den pikin foe den ’te den e sidon na ini den oso’. Den sortoe leri disi ben de wan pisi foe a sorgoe di papa moesoe sorgoe gi na osofamiri. Ma fa a de na ini a ten disi?

„Te joe e sidon na ini joe oso”

„A no makriki”, Janet, wan kresten mama foe fo pikin, e froeklari.a „Joe moesoe horidoro”, Paul, en masra, e agri. Leki foeroe tra Kotoigi papa nanga mama, Paul nanga Janet e doe moeiti foe studeri bijbel nanga den pikin foe den no moro mendri leki wán leisi wan wiki. „Wi e proeberi foe abi wi osofamiri bijbel takimakandra ibri moende-neti na a srefi fasti ten”, Paul e froeklari, èn e erken: „Ma a no e go so ala ten.” Leki wan owroeman na ini en gemeente, den ben kari en sontron foe go handri serjoesoe afersi. Den toe moro owroe pikin foe en e dini leki foeroeten bedinari. Den e feni taki neti na boen ten foe miti sma na ini a diniwroko. Foe dati ede, leki wan osofamiri, den kenki a ten foe den foe doe osofamiri studie foe den. „Sontron wi abi wi studie wantewante na baka wi neti njanjan”, Paul e froeklari.

Ala di papa nanga mama e sori na wan koni fasi taki den kan hori na osofamiri studie foe den sondro toemoesi foeroe moeiti na wan tra ten, tokoe den e proeberi foe tan hori en doronomo. „Efoe a ten te wi e studeri moesoe kenki”, na so na oemapikin Clare e taki, „dan ala ten papa e poti a njoen ten na a doro foe na ijskasi, so taki wi alamala sabi o ten a sa de.”

Foe kon makandra gi wan doronomo osofamiri bijbelstudie e gi wan moi okasi toe gi den jongoe memre foe na osofamiri foe taki nanga den papa nanga mama foe den foe sani di e broko den ede èn den problema foe den. So wan studie e tjari boen bakapisi kon te a no strak so taki den jongoewan e leisi den piki tapoe den aksi nomo na ini a bijbel leriboekoe di den e gebroiki. „Na osofamiri studie foe wi na wan presi pe wi e takimakandra”, na so Martin di abi toe manpikin e froeklari. „Te joe e kon makandra wán leisi wan wiki foe taki foe wan bijbel tori, dan joe e kon sabi fa joe osofamiri e doe en na jejefasi”, a e taki. „Wi e kon sabi difrenti sani na a takimakandra. Joe e kon sabi san e pasa na skoro, èn moro prenspari, joe e kon sabi sortoe denki den pikin foe joe e kisi.” En wefi, Sandra, e agri nanga dati èn a e firi taki en toe e leri foeroe foe na osofamiri studie. „Te mi masra e hori a studie”, a e froeteri, „mi e leri foeroe foe di mi e arki a fasi fa den manpikin foe mi e piki den aksi foe en.” Dan Sandra e fiti den piki foe en foe jepi den boi foe en. A e njanboen foe a studie moro bika a abi wan fajafaja prati na a studie. Ija, den osofamiri studie e gi papa nanga mama koni foe kon sabi san den pikin foe den e denki. — Odo 16:23; 20:5.

Fiti joesrefi na sani èn horidoro

Te a ten doro foe hori joe osofamiri studie, dan joe kan si taki wán pikin de na ai èn abi belangstelling, ala di wan trawan abi deki-ati fanowdoe foe poti en prakseri na a studie èn foe teki wini foe a studie. Wán kresten mama e taki: „Na so na osofamiri libi de! Joe sabi san joe moesoe doe leki wan papa noso mama. So boen, te joe e horidoro foe hori a studie, dan Jehovah e gi jepi èn e meki boen bakapisi kon.”

A prakseri di wan jongoewan e poti na a studie e difrenti foeroe akroederi a jari di a abi. A papa noso mama di abi koni e hori disi na prakseri. Wan trowpaar abi feifi pikin, di abi wan libimarki na mindri 6 te nanga 29 jari. A papa, Michael, e taki: „Gi a moro jongoe pikin na okasi foe piki den aksi fosi. Dan meki den moro owroe pikin taki moro finifini foe a penti èn meki den taki foe sani di den sreka kaba.” A fasi disi foe handri nanga koni nanga den pikin foe den e jepi papa nanga mama foe leri den a waarde foe hori tra sma na prakseri. „Wan foe den manpikin foe wi kan froestan a penti”, Martin e taki, „ma a tra boi abi moro jepi fanowdoe foe froestan a penti. Mi feni taki a studie e tron wan presi foe oefen foe sori kresten pasensi èn den tra froktoe foe a jeje.” — Galasiasma 5:22, 23; Filipisma 2:4.

De klariklari foe fiti joesrefi na den difrenti sani di den pikin foe joe man doe èn na den difrenti jari di den abi. Simon nanga Mark, di de tini now, ben feni taki di den ben moro jongoe, den ben lobi srefisrefi foe studeri a boekoe A moro bigi man di oiti ben libi nanga den papa nanga mama. „Wi papa ben meki wi doe den difrenti pisi leki wan prei”, den e memre. A papa foe den e memre taki a ben saka go tapoe en anoe nanga en kindi foe doe nanga en manpikin na agersitori foe a Samariaman di ben lobi en kompe (Lukas 10:30-35). „A ben sori fa sani ben de troetroe èn a ben switi.”

Foeroe pikin e gens a gwenti foe wan osofamiri studie. Disi moesoe stòp den papa nanga mama foe hori a studie di den ben wani hori? Nôno, kwetikweti. „Lawfasi tai na a ati foe wan boi [noso, wan meisje]”, Odo 22:15 e erken. Wán mama di no abi patna ben prakseri taki a no ben man hori na osofamiri studie te, na foeroe okasi, froeferi sani ben sori foe broeja a studie. Ma a ben horidoro. Now den pikin foe en abi foeroe lespeki gi en èn den kon warderi a lobi èn a sorgoe di a ben sori foe di a ben horidoro foe hori na osofamiri studie doronomo.

Jepi den boi nanga meisje „di no abi papa”

Kresten owroeman moesoe „wei na ipi foe Gado” (1 Petrus 5:2, 3). Doronomo fisiti di den owroeman e tjari na den osofamiri na ini den gemeente e gi den okasi foe prèise den papa nanga mama di e tjari a kresten frantiwortoe foe den. Soema abi a frantiwortoe foe leri den pikin foe den papa noso mama di no abi patna? Noiti no frigiti taki a frantiwortoe foe leri den pikin e didon na a papa noso a mama.

Na inzicht foe wan kresten sa jepi den owroeman foe no kon na ini situwâsi di ben kan meki den e skeki, efoe den ben sa wani teki a ròl foe a papa di no de. Ala di toe brada kan fisiti wan kresten sisa di de wan mama sondro patna, tokoe ala ten den sa de fersektiki nanga den sani di den e sreka foe horibaka gi na osofamiri studie. Wanwan leisi, na owroeman kan aksi den pikin (èn, seiker, a papa noso mama di de en wawan) foe kon na a osofamiri studie foe en, èn dati kan gi den deki-ati èn a kan de praktis gi den. Ma noiti no frigiti taki Jehovah na wi bigi hemel Tata. A de seiker drape foe tiri èn jepi a mama te a e hori wan studie nanga den pikin foe en, ala di a e doe dati en wawan.

Fa a de te wan jongoe sma abi jejefasi, ma en papa nanga mama no e broko den ede nanga a frantiwortoe na jejefasi foe den? Noiti den getrow foetoeboi foe Jehovah abi foe lasi-ati. „Na joe [Jehovah Gado] a sma di no abi en so boen, a boi di no abi papa, sa gi ensrefi,” a psalm singiman ben singi. „Joesrefi tron en jepiman” (Psalm 10:14). Foe den sei, den lobi-ati owroeman na ini a gemeente sa doe ala san den man foe gi den papa nanga mama deki-ati te den e sorgoe gi den pikin foe den. Den kan gi den na idea foe abi wan takimakandra nanga na osofamiri èn baka dati den kan go na a takimakandra foe gi wan toe praktis idea foe sori den fa den kan studeri nanga makandra. A no de foe taki, dati den no sa teki a frantiwortoe foe den papa nanga mama, foe di a frantiwortoe e didon na a papa nanga mama, soleki fa bijbel e sori.

Den pikin di den papa nanga mama no e teki a waarheid abi foeroe jepi fanowdoe. Foe teki den na ini joe osofamiri studie kan sori foe de boen gi den, efoe den papa nanga mama foe den e feni dati boen. Robert, di de wan bigisma now nanga en eigi osofamiri, ben fisiti den kresten konmakandra nanga en papa nanga mama di a ben de dri jari nomo. A ben memre moi sani foe den konmakandra dati, srefi di en papa nanga mama ben stòp foe abi demakandra nanga a kresten gemeente. Di a ben abi tin jari, a ben miti wan Kotoigi boi di ben e tjari en go na den konmakandra. A papa nanga mama foe a Kotoigi boi ben breiti foe sorgoe gi Robert leki wan boi di no ben abi papa nanga mama na jejefasi èn baka ten den ben studeri nanga en. Foe di a ben kisi a lobi-ati sorgoe disi, meki a ben gro esi-esi èn now a e dini leki wan owroeman na ini a gemeente.

Srefi te den papa nanga mama e gens a gro di den pikin foe den e gro, tokoe den pikin no de den wawan. Jehovah e tan wan getrow hemel Tata. „Wan tata foe den boi di no abi papa . . . Gado de na ini en santa tanpresi”, Psalm 68:5 e froeklari. Boi nanga meisje di no abi papa na jejefasi sabi taki den kan go na En na ini begi, èn a sa horibaka gi den (Psalm 55:22; 146:9). Na organisâsi foe Jehovah di de leki wan mama e doe en frantiwortoe na wan jeje fasi foe sreka switi njanjan na jejefasi di a e gi nanga den poeblikâsi foe en na tapoe den konmakandra foe den moro leki 85.000 kresten gemeente na heri grontapoe. So boen, nanga a jeje jepi foe wi Tata, Jehovah, èn en organisâsi di de leki wan mama, srefi den wan di „no abi papa” sa studeri bijbel.

Kresten papa nanga mama di e hori den osofamiri studie doronomo nanga den pikin moesoe kisi prèise. Papa noso mama di de den wawan èn di e horidoro foe leri den jongoewan foe den na ini den pasi foe Jehovah e froedini spesroetoe belangstelling èn prèise gi den moeiti di den e doe (Odo 22:6). Ala sma di e broko den ede gi den pikin di no abi papa na jejefasi, sabi taki disi e plisi wi hemel Tata, Jehovah. A de wan hebi frantiwortoe foe sorgoe gi den sani di wan osofamiri abi fanowdoe na jejefasi. Ma ’no tapoe, bika na a reti ten joe sa koti efoe joe no e kon weri’. — Galasiasma 6:9.

[Foetoewortoe]

[Prenki na tapoe bladzijde 23]

Wan osofamiri studie e gi wan moi okasi na den moro jongoe memre, foe taki nanga den papa nanga mama foe den, foe den sani di e gi den broko-ede

[Sma di abi a reti foe a prenki na tapoe bladzijde 20]

Harper’s