Na pori a planeiti grontapoe moesoe pori krinkrin?

A KABA foe a di foe 20 jarihondro e kon krosibei, èn a di foe 21 jarihondro tanapoe na mofodoro. Nanga disi na prakseri, moro nanga moro sma di fosi no ben sa poti foeroe noso no wan prakseri srefisrefi na tapoe sani di ben taki na fesi foe pori di o kon, e aksi densrefi efoe wan bigi sani di ben kan pori grontapoe sa feni presi na ini a krosibei tamara.

Kande joe si koranti èn tijdschrift artikel di e taki foe disi — srefi heri boekoe di e taki foe a tori. Wi moesoe wakti foe si sortoe sani sa pasa na a bigin foe a di foe 21 jarihondro. Son sma e sori na tapoe taki a doro di wi e doro a kaba foe a jari 2000 na soso a kenki foe a wan jari go na a trawan (noso foe a wan miniti, foe 2000 go na 2001) èn kande prenspari sani no sa pasa. Wan sani di e gi foeroe sma moro bigi broko-ede, na a farawe tamara foe a planeiti foe wi.

Wan sani di ben taki na fesi di e opo kon moro foeroe ini a prakseri foe sma na ini a ten disi, na taki wan momenti o kon — a kan de na a krosibei tamara noso a farawe tamara — taki planeiti Grontapoe moesoe pori krinkrin. Loekoe wan toe foe den sortoe takroe tori disi nomo di taki na fesi èn di no e gi howpoe.

Ini a boekoe foe Johanes Leslie, skrifiman nanga filosofiaman, The End of the World — The Science and Ethics of Human Extinction (A kaba foe grontapoe — A sabidensi nanga ethiek foe a pori di libisma o kisi pori) di kon na doro a fosi tron na ini l996, a e sori dri fasi fa a libi foe libisma na grontapoe ben sa kan kon na wan kaba. Fosi a e aksi: „Wan doronomo orlokoe nanga nucleair fetisani ben sa wani taki a kaba foe a libisma ras?” Baka dati a e taki moro fara: „Wan situwâsi . . . di sori leki dati sa man pori sma moro srefi ben sa kan de den bakapisi foe bestraling: kanker, a swaki di na immuniteitsistema e kon swaki so taki infektie-siki kan panja srefisrefi, noso heri ipi beibi di gebore sikisiki. Den mikro-organisme, di de prenspari gi a gosontoe foe a kontren pe sma e libi, ben sa kan dede toe.” Wan di foe dri sani di Mr. Leslie e tjari kon na fesi di kan pasa na taki wan komeiti noso wan asteroïde ben sa kan toeka nanga grontapoe: „Den komeiti nanga asteroïde di abi wan pasi di den e waka di e sori leki wan dei den ben sa kan naki grontapoe, a sori leki so wan toe doesoen de di bigi wán kilometer te tin kilometer efoe joe marki den na mindribere. Ma wan moro pikin nomroe de toe (efoe wi ben sa wani bereken en a ben sa de soso rai di wi ben o rai) foe moro bigi wan, èn wan moro bigi nomroe foe moro pikin wan.”

Wan krinkrin fasi foe taki foe a „Kroetoedei”

Noso loekoe wan tra sabiman, Paul Davies, profesor na a Universiteit foe Adelaida, Australia. A Washington Times ben taki foe en leki „a moro boen sabidensi skrifiman di sma sabi na ala sei foe grontapoe”. Na ini 1994 a ben skrifi The Last Three Minutes (Den lasti dri miniti), wan boekoe di den kari „a mama foe ala kroetoedei boekoe”. A fosi kapitel foe a boekoe disi nen „Kroetoedei”, èn a e taki foe wan situwâsi di a abi na prakseri foe san ben sa kan pasa efoe wan komeiti ben sa toeka nanga planeiti Grontapoe. Leisi wan pisi foe sani di a skrifiman taki di e meki joe skin gro:

„A planeiti e seki nanga a krakti di de a srefi leki tin doesoen gronseki. Wan hebi druk foe faja loktoe di soetoe komoto foe pe a ben de, e sibi pasa abra a gron foe grontapoe, e plata ala sani di meki, e masi ala sani kon finifini di de na en pasi. A gron di meki kon plata èn di de lontoe a presi pe a [komeiti] fadon e poesoe go na loktoe ini wan cirkel foe ston di smèlter kon tron pikin bergi di hei foeroe kilometer, ala di a e meki den inibere foe grontapoe kon de foe si ini wan bigi olo ini a gron di bradi 150 kilometer . . . Wan deki wolkoe kolon foe doti nanga sani di masi pisipisi e frei lontoe na ini na atmosfeer, èn e tapoe a leti foe a son lontoe a heri planeiti. Now a tranga leti di e koti faja èn di e gi sma frede, foe wan miljard meteoor kon na ini a presi foe a leti foe a son, èn e bron a gron na ondrosei, nanga a faja foe den di e drei sani, ala di sani di poeroe na den presi e fadon komoto foe a kontren foe na universum kon baka na ini na atmosfeer foe grontapoe.”

Profesor Davies e go doro foe sori taki a situwâsi disi di a abi na prakseri abi foe doe nanga a sani di taki na fesi, taki komeiti Swift-Tuttle ben sa naki grontapoe. A e gi a warskow ete taki ala di so wan sani di moesoe pasa kande no sa pasa heri esi, soleki fa en e denki, dan „wan leisi Swift-Tuttle, noso wan sani di de leki en, sa naki Grontapoe”. A denki foe en, gron na tapoe a bereken di sma bereken taki 10.000 sani di bigi so wan afoe kilometer noso moro, te den marki den foe mindribere te na a lanki, e frei pasa koti den pasi di grontapoe e waka.

Joe e bribi taki so wan froewakti di gi sma frede, de troetroe? Wan heri ipi sma di wi no ben froewakti e bribi dati. Ma den e poeroe ala broko-ede foe den na den prakseri foe di den e gi densrefi a djaranti taki a no sa pasa na ini den libiten. Foe san ede, planeiti Grontapoe moesoe pori oiti — awinsi heri esi noso wan toe doesoendoesoen jari baka ten? Foe troe, a no grontapoe srefi di de a moro prenspari roetoe foe den problema gi den sani di e libi na en tapoe, libisma noso meti. Na presi foe dati, a no libisma srefi de frantiwortoe foe moro foeroe foe den problema foe a di foe 20 jarihondro, so srefi taki kande den „pori grontapoe” krinkrin? — Openbaring 11:18.

Kenki na ini a fowtoe fasi fa libisma e tiri grontapoe

Fa foe a moro bigi sani di kan, taki libisma srefi kan broko noso pori grontapoe dorodoro foe di a e tiri en na wan fowtoe fasi èn foe gridi ede? A no de foe tweifri taki bigi pori foe son kontren foe grontapoe feni presi kaba foe di sma e kapoe boesi pasa marki, e doti a loktoe foe na atmosfeer, èn e doti watra. A sani disi den skrifiman Barbara Ward nanga René Dubos ben taki heri boen so wan 25 jari pasa na ini a boekoe foe den Only One Earth (Wán grontapoe nomo): „Den dri bigi kontren foe a doti di sani e doti di wi moesoe ondrosoekoe — loktoe, watra nanga gron — a no de foe taki, dati den de den dri moro prenspari bowston foe a libi foe wi tapoe a planeiti.” Èn te joe loekoe en finifini, a situwâsi no kon moro betre sensi a ten dati, a no so?

Te wi e loekoe a sani di kan taki libisma kan broko noso pori grontapoe foe en eigi donfasi ede, dan wi kan kisi deki-ati foe di wi e poti prakseri tapoe a heri moi krakti di grontapoe abi foe meki sani kon boen baka èn foe meki sani baka. Te René Dubos e taki foe a heri moi krakti disi foe meki sani kon boen baka, dan a e skrifi den sani disi di a si èn di e gi deki-ati na ini wan tra boekoe, The Resilience of Ecosystems (A kon boen baka foe eko-sistema):

„Foeroe sma e frede taki a kisi di sma kon kisi densrefi taki a kontren e go na baka kon toemoesi lati, bika foeroe foe a pori di doe na den eko-sistema no man drai kon boen baka. Gi mi, a negatief fasi disi foe denki no abi no wan gron, bika eko-sistema abi bigi krakti foe kon boen baka, baka te den kisi boen hebi slag.

Eko-sistema abi difrenti teknik foe dresi densrefi. . . . Den e meki eko-sistema man wini a bakapisi foe sani di broeja den, soso foe di safrisafri den e meki na ekologis balansi kon de baka soleki fa a ben de fosi.”

A kan doe

Wan heri moi eksempre foe a sani disi na ini den jari di pasa no so langa ete, na a safrisafri krin wroko foe a barinen liba foe London, a Thames liba. A boekoe The Thames Transformed (A Thames kon kenki), di Jeffery Harrison nanga Peter Grant skrifi, e taki foe a heri moi sani disi di sma doro èn di e sori san kan doe te sma e wroko makandra gi a boen foe a heri libimakandra. A Hertog foe Edinburgh foe Ingrisikondre ben skrifi ini wan wortoe a fesi foe a boekoe: „Dja wi abi te foe kaba wan tori di abi so boen bigi bakapisi taki a warti foe skrifi foe en, srefi nanga a risiko taki a ben sa kan gi son sma deki-ati foe denki taki den problema di de na a sei foe tan hori san wi abi, no de so takroe leki fa sma ben wani meki den bribi. . . . Den alamala kan teki deki-ati foe a sani di sma doro nanga a Thames. A boen njoensoe de taki a kan doe èn den plan foe den kan waka boen toe.”

Na ini a kapitel “The Great Clean-Up” (A bigi krin wroko), Harrison nanga Grant e skrifi fajafaja foe san sma doro na ini den 50 jari di pasa: „Fosi tron na grontapoe, wan troetroe doti liba di den ben e gebroiki foeroe, kon so boen baka taki watrafowroe nanga fisi ben kon de bogobogo drape agen. Taki so wan sortoe kenki feni presi so gaw, na ini wan situwâsi di biginbigin ben sori leki howpoe no ben de srefisrefi, a e gi deki-ati srefi na a sma di e feti foe boesimeti no lasi gowe, èn di e lasi ala howpoe.”

Dan den skrifiman e taki fa a kenki ben waka: „A situwâsi foe a liba ben go na baka safrisafri na ini den jari di pasa èn kande, a sani di ben de a lasti naki gi en, ben de na a di foe Toe Grontapoefeti, di prenspari dotiwatra sistema nanga peipi ben broko noso ben kisi pori. Na ini a ten foe den jari l940 te nanga 1959, a gosontoe foe a Thames ben doro en moro lagi penti. A liba ben kan teki gersi nanga wan opo dotiwatra peipi; a watra ben abi wan blaka kloroe, a no ben abi zuurstof, èn na ini den zomer moen a tingi smeri di ben komoto foe a Thames ben de foe smeri foe fara. . . . Den fisi di ben de so bogobogo drape ben jagi gowe komoto te foe kaba, boiti wan toe logologo di ben man tan na libi bika den man hari bro langalanga foe a loktoe na tapoe a watra. Den fowroe foe a pisi foe a liba, foe a heri kontren pe oso bow na mindri London nanga Woolwich, ben kon so weiniki taki joe ben kan teri den boesi doksi nanga knobbel zwaan tapoe joe finga, èn den ben tan na libi foe di den ben njan den siri-njanjan di ben fadon foe den haven, na presi foe den feni njanjan soleki fa den moesoe feni dati na ini a natoeroe. . . . Soema ben sa kan prakseri dan taki so wan bigi kenki ben de foe feni presi? Na ini tin jari, a srefi pisi dati foe a liba ben o kenki foe wan sokari fowroe kontren di ben leigi, ini wan kibripresi foe foeroe sortoe watrafowroe, so srefi toe wan bigi groepoe foe werdri fowroe di doro so wan 10.000 nanga 12.000 tjontjon sortoe, di e kon pasa a winter.”

A no de foe taki, dati disi e taki foe soso wán kenki ini wan pikin oekoe foe grontapoe. Tokoe wi kan leri lès foe na eksempre disi. A e sori taki planeiti Grontapoe no moesoe foe pori krinkrin foe di libisma e tiri grontapoe na wan fowtoe fasi, foe gridi ede èn foe a doe foe sani sondro foe prakseri. Joisti leri èn a span di sma e span anoe makandra foe a boen foe a libisma famiri kan jepi grontapoe foe meki srefi bigi ogri di doe na en ekologi, en kontren èn en gron kan kon boen baka. Ma fa foe pori di kan kon foe dorosei krakti kande, soleki wan komeiti di e frei lontoe noso wan asteroïde?

Na artikel di e kon now abi a sroto foe wan piki di e gi satisfaksi tapoe so wan dangra aksi.

[Prenki na tapoe bladzijde 5]

A gi foe leri èn a span di sma e span anoe makandra kan jepi grontapoe foe meki srefi bigi ogri di doe na en kon boen baka.