„Den dedewan sa kisi wan opobaka”

„Bika a trompeti sa bari, èn den dedewan sa kisi wan opobaka sondro foe man pori, èn wi sa kenki.” — 1 KORENTESMA 15:52.

1, 2. (a) Sortoe pramisi di de wan trowstoe ben gi nanga jepi foe a profeiti Hosea? (b) Fa wi sabi taki Gado wani tjari den dedesma kon na libi baka?

OITI joe lasi wan lobiwan na ini dede? Dan joe sabi a pen di dede kan tjari kon. Ma tokoe kresten e kisi trowstoe nanga a pramisi di Gado ben gi nanga jepi foe a profeiti Hosea: „Foe na anoe foe Sjeol mi sa froeloesoe den; foe dede mi sa poeroe den. Pe joe maka de, o Dede? Pe a krakti foe joe de di e pori sani, o Sjeol?” — Hosea 13:14.

² Na idea taki den dedewan kan kon na libi baka de wan law sani gi den sma di e tweifri. Ma Gado na Almaktiwan seiker abi a krakti foe doe so wan wondroe! A troetroe penti na efoe Jehovah wani foe tjari den dedewan kon na libi baka. A regtfardiki man Job ben aksi: „Efoe wan man di gosontoe èn tranga na skinfasi dede, a kan libi baka?” Dan a ben gi a piki disi di ben gi froetrow baka: „Joe sa kari, èn misrefi sa piki joe. Joe sa angri foe doe a wroko foe joe anoe” (Job 14:14, 15). A wortoe „angri” e sori taki a e froewakti noso angri serjoesoe. (Teki gersi Psalm 84:2.) Ija, Jehovah e wakti na opobaka fajafaja — a e angri foe si den getrow wan baka di dede, èn di de na libi na ini en prakseri. — Mateus 22:31, 32.

Jesus e skèin leti na tapoe na opobaka

3, 4. (a) Sortoe leti Jesus ben skèin na tapoe a howpoe foe na opobaka? (b) Foe san ede Jesus ben opobaka leki wan jeje, èn no na ini libisma skin?

³ Man foe owroeten di ben abi bribi, leki Job, ben froestan wan pisi nomo foe na opobaka. A ben de Jesus Krestes di ben skèin foeroe leti na tapoe a toemoesi moi howpoe disi. A ben sori a prenspari ròl di ensrefi e plèi di a ben taki: „A sma di e sori bribi na ini a Manpikin, abi têgo libi” (Johanes 3:36). Pe wi sa njanboen foe a libi dati? Gi a moro bigi pisi foe den sma di e sori bribi, a sa de na grontapoe (Psalm 37:11). Ma Jesus ben taigi den disipel foe en: „No frede, pikin ipi, bika oen Tata feni en boen foe gi oenoe a kownoekondre” (Lukas 12:32). Gado Kownoekondre de na ini hemel. So boen, a pramisi disi wani taki dati wan „pikin ipi” sa de nanga Jesus na ini hemel leki jeje kriatoeroe (Johanes 14:2, 3; 1 Petrus 1:3, 4). Dati na wan toemoesi moi froewakti! Jesus ben tjari moro fara kon na krin gi na apostel Johanes taki a „pikin ipi” disi ben sa de 144.000 sma nomo. — Openbaring 14:1.

⁴ Ma fa den 144.000 sma ben sa go na ini hemel glori? Jesus „skèin leti na tapoe a libi èn a pori di sma no man pori, nanga jepi foe a boen njoensoe”. Nanga jepi foe en broedoe a ben opo „wan njoen èn libi pasi” go na ini hemel (2 Timoteus 1:10; Hebrewsma 10:19, 20). Na a fosi presi, a dede, neleki fa bijbel ben taki na fesi (Jesaja 53:12). Baka dati, soleki na apostel Petrus ben froeklari baka ten, „a Jesus disi, Gado ben gi wan opobaka” (Tori foe den Apostel 2:32). Ma Jesus no ben opobaka leki wan libisma. A ben taki: „A brede di mi sa gi, na mi skin foe a boen foe a libi foe grontapoe” (Johanes 6:51). Te a ben sa teki en skin baka dan dati ben sa meki na ofrandi lasi en krakti. Foe dati ede ’den ben kiri Jesus „ini skin, ma . . . a kon na libi na ini jeje’ ” (1 Petrus 3:18). So boen, Jesus „ben kisi wan têgo froeloesoe gi wi”, namkoe a „pikin ipi” (Hebrewsma 9:12). A ben gi Gado a waarde foe en volmaakti libisma libi leki wan loesoe-paiman gi a sondoe libisma famiri, èn den 144.000 ben de den fosiwan di ben kisi wini foe disi.

5. Sortoe howpoe ben gi na den fosi jarihondro bakaman foe Jesus?

⁵ Jesus no ben sa de a wan-enkri wan di ben kisi wan opobaka foe libi na hemel. Paulus ben taigi den kompe kresten na ini Rome taki den ben salfoe nanga santa jeje foe de manpikin foe Gado èn kompe erfgenaam nanga Krestes, efoe den ben sa boeweisi taki den salfoe te den ben horidoro na a kaba (Romesma 8:16, 17). Paulus ben froeklari toe: „Efoe wi kon de ini wánfasi nanga en na a fasi fa a dede, dan foe troe wi sa kon de ini wánfasi nanga en na a fasi foe na opobaka foe en.” — Romesma 6:5.

Taki gi a boen foe na opobaka howpoe

6. Foe san ede a bribi na ini na opobaka ben kisi gens na ini Korente, èn san na apostel Paulus ben taki foe dati?

⁶ Na opobaka de wan pisi foe a „fondamenti leri” foe krestendom (Hebrewsma 6:1, 2). Tokoe a leri ben kisi gens na ini Korente. Son sma na ini a gemeente, na ondro krakti foe a Griki filosofia, soleki fa a sori, ben e taki: „Wan opobaka foe den dedewan no de” (1 Korentesma 15:12). Di njoensoe foe disi ben doro na apostel Paulus, dan a ben taki gi a boen foe na opobaka howpoe, spesroetoe a howpoe foe den salfoe kresten. Meki wi ondrosoekoe den wortoe foe Paulus soleki fa a skrifi na ini 1 Korentesma kapitel 15. Joe sa si taki a sa jepi joe te joe joe leisi a heri kapitel soleki fa wi ben rikomanderi dati na ini na artikel na fesi.

7. (a) Na tapoe sortoe prenspari tori Paulus ben poti prakseri? (b) Soema ben si Jesus baka di a ben kisi wan opobaka?

⁷ Na ini den fosi toe vers foe 1 Korentesma kapitel 15, Paulus e gi a thema foe a takimakandra foe en: „Mi meki oenoe sabi, brada, a boen njoensoe di mi ben froeklari oenoe, èn di oenoe kisi toe, pe oenoe e tanapoe na ini toe, nanga san oenoe kisi froeloesoe toe, . . . boiti, foe taki en leti, oenoe ben tron bribiman sondro wan marki.” Efoe den Korentesma no ben tanapoe kánkan na ini a boen njoensoe, dan den ben teki a waarheid foe soso. Paulus ben taki moro fara: „Wan foe den fosi sani di mi ben gi oenoe, di mi ben kisi toe, na taki Krestes dede gi den sondoe foe wi akroederi den Boekoe foe bijbel, èn taki den beri en, ija, taki a kisi wan opobaka na tapoe a di foe dri dei akroederi den Boekoe foe bijbel, èn taki a ben sori ensrefi na Cefas, baka dati na den twarfoe. Baka dati a ben sori ensrefi na moro leki feifi hondro brada na a srefi ten, èn foeroe foe den tan te now ete, ma son wan foe den go sribi kaba na ini dede. Baka dati, a ben sori ensrefi na Jakobus, dan na ala den apostel; ma leki lastiwan foe alamala a ben sori ensrefi na mi toe, leki wan sma di gebore toemoesi froekoe.” — 1 Korentesma 15:3-8.

8, 9. (a) O prenspari a bribi na ini na opobaka de? (b) Soleki fa a sori, na sortoe okasi Jesus ben sori ensrefi na „moro leki feifi hondro brada”?

⁸ Gi den sma di ben teki a boen njoensoe, a bribi na ini na opobaka foe Jesus no ben de wan sani di den ben kan bribi noso no ben kan bribi. Foeroe kotoigi di ben si nanga den eigi ai ben de foe erken taki „Krestes dede gi den sondoe foe wi” èn taki a ben kisi wan opobaka. Wan foe den ben de Cefas, noso Petrus, soleki fa sma sabi en moro betre. Baka di Petrus ben froeklari taki a no sabi Jesus, na tapoe a neti di sma ben kori Jesus èn ben aresteri en, dan a ben moesoe gi en foeroe trowstoe di Jesus ben sori ensrefi na en. „Den twarfoe”, den apostel leki wan groepoe, ben kisi wan kari toe foe Jesus di ben opobaka — wan ondrofeni di seiker ben jepi den foe wini a frede foe den èn foe tron deki-ati kotoigi foe na opobaka foe Jesus. — Johanes 20:19-23; Tori foe den Apostel 2:32.

⁹ Krestes ben sori ensrefi toe na wan bigi groepoe sma, „moro leki feifi hondro brada”. Foe di na ini Galilea wawan a ben abi so foeroe bakaman, meki disi kande ben feni presi na a okasi di skrifi na Mateus 28:16-20, di Jesus ben gi a komando foe meki disipel. Den sma disi ben kan gi wan krakti kotoigi! Wan toe foe den ben de na libi ete na ini a jari 55 G.T. di Paulus ben skrifi en fosi brifi gi den Korentesma. Ma loekoe taki a ben taki leki den sma di dede ben e „sribi na ini dede”. Den no ben kisi wan opobaka ete foe kisi a hemel paiman foe den.

10. (a) San ben de a bakapisi foe a lasti konmakandra di Jesus ben abi nanga den disipel foe en? (b) Fa Jesus ben sori ensrefi na Paulus „leki wan sma di gebore toemoesi froekoe”?

¹⁰ Wan tra toemoesi aparti kotoigi foe na opobaka foe Jesus ben de Jakobus, a manpikin foe Josef nanga Maria, Jesus en mama. Soleki fa a sori, bifo na opobaka, Jakobus no ben de wan bribiman ete (Johanes 7:5). Ma baka di Jesus ben sori ensrefi na en, dan Jakobus ben tron wan bribiman èn kande ben plèi wan ròl foe bekeer den tra brada foe en (Tori foe den Apostel 1:13, 14). Na a lasti konmakandra foe en nanga den disipel foe en, na a okasi di a ben opo go na hemel, Jesus ben komanderi den foe „de kotoigi . . . na a moro farawe pisi foe grontapoe” (Tori foe den Apostel 1:6-11). Baka ten, a ben sori ensrefi na Saulus foe Tarsus, wan sma di ben froefolgoe den kresten (Tori foe den Apostel 22:6-8). Jesus ben sori ensrefi na Saulus „leki wan sma di gebore toemoesi froekoe”. A ben gersi leki Saulus ben kisi wan opobaka kaba gi wan jeje libi èn ben man si masra di ben kisi glori foeroe jarihondro bifo na opobaka foe den salfoewan ben o pasa. Na ondrofeni disi ben tapoe Saulus wantewante foe no go doro foe gens a kresten gemeente nanga a kiri di a ben e kiri den, èn a ben tjari wan bigi kenki kon na ini Saulus (Tori foe den Apostel 9:3-9, 17-19). Saulus ben tron na apostel Paulus, wan foe den moro prenspari sma di ben taki gi a boen foe a kresten bribi. — 1 Korentesma 15:9, 10.

Bribi na ini na opobaka de toemoesi prenspari

11. Fa Paulus ben sori a bedrigifasi te sma e taki: ’Wan opobaka no de’?

¹¹ Foe dati ede na opobaka foe Jesus ben de wan troetori di ben abi kotoigi. „Now efoe sma e preiki taki Krestes opo baka na dede”, Paulus e taki, „dan fa a doe kon taki son wan foe oenoe e taki dati wan opobaka foe den dedewan no de?” (1 Korentesma 15:12) Den sma disi no ben e tweifri nomo, noso ben e abi aksi foe na opobaka wawan, ma den ben e taki krinkrin taki den no e bribi na ini en. So boen, Paulus e tjari a fowtoe denki foe den kon na krin. A e taki dati efoe Krestes no ben kisi wan opobaka, dan a kresten boskopoe ben de wan lei, èn den sma di ben kotoigi taki Krestes ben opo baka, ben de „falsi kotoigi foe Gado”. Efoe Krestes no ben kisi wan opobaka, dan no wan loesoe-paiman ben pai na Gado; den kresten ben de na ’ini a sondoe foe den ete’ (1 Korentesma 15:13-19; Romesma 3:23, 24; Hebrewsma 9:11-14). Èn den kresten di ben „sribi na ini dede”, èn na ini son kefal foe di den no ben wani libi a bribi foe den, ben dede sondro wan troetroe howpoe. Den kresten ben sa de na ini wan sari situwâsi srefisrefi efoe a libi disi ben de a wan-enkri sani di den ben kan froewakti! A pina foe den ben sa de foe soso.

12. (a) San a wani taki te den e kari Krestes „a fosi froktoe foe den wan di sribi na ini dede”? (b) Fa Krestes ben meki na opobaka kon de?

¹² Ma dati no ben de so. Paulus e go doro: „Krestes opo baka na dede.” Moro fara, a de „a fosi froktoe foe den wan di go sribi na ini dede” (1 Korentesma 15:20). Te den Israèlsma ben e gi jesi na Jehovah foe gi den fosi froktoe foe den sani di den ben koti, dan Jehovah ben e blesi den nanga wan bigi koti (Exodus 22:29, 30; 23:19; Odo 3:9, 10). Foe di a ben e kari Krestes „a fosi froktoe”, dan Paulus e sori taki ete wan kotiwroko foe sma ben sa opo baka foe libi na ini hemel. „Foe di nanga jepi foe wan man dede kon”, Paulus e taki, „na so na opobaka na dede de so srefi nanga jepi foe wan man. Bika neleki fa na ini Adam ala sma e dede, na so ala sma sa tjari kon na libi na ini Krestes” (1 Korentesma 15:21, 22). Jesus ben meki na opobaka kon de, di a ben gi en volmaakti libisma libi leki wan loesoe-paiman èn ben opo a pasi gi libisma foe kon fri foe katibo na sondoe nanga dede. — Galasiasma 1:4; 1 Petrus 1:18, 19.a

13. (a) O ten a hemel opobaka e feni presi? (b) Fa a kan taki wan toe foe den salfoewan no sa „sribi na ini dede”?

¹³ Paulus e go doro: „Ma ibriwan na ini en eigi posisi: Krestes a fosiwan, baka dati, den wan di de foe Krestes na a ten foe en denoja” (1 Korentesma 15:23). Krestes ben kisi wan opobaka na ini 33 G.T. Ma den salfoe bakaman foe en — „den wan di de foe Krestes” — ben sa abi foe wakti sjatoe baka te Jesus ben bigin en Kownoekondre denoja, di bijbel profeititori e sori taki a ben pasa na ini 1914 (1 Tesalonikasma 4:14-16; Openbaring 11:18). Fa a de nanga den wan di ben sa de na libi na a ten foe en denoja? Paulus e taki: „Loekoe! Mi e froeteri oenoe wan santa kibritori: Wi alamala no sa sribi ini dede, ma wi alamala sa kenki, ini wan momenti, ini wan pingi foe wan ai, na ini a ten foe a lasti trompeti. Bika a trompeti sa bari èn den dedewan sa kisi wan opobaka sondro foe man pori, èn wi sa kenki” (1 Korentesma 15:51, 52). A de krin taki, a no ala den salfoewan e sribi na ini a grebi èn e wakti wan opobaka. Den wan di e dede na a pisi ten foe a denoja foe Krestes sa kenki wantewante. — Openbaring 14:13.

14. Fa den salfoewan „dopoe nanga a marki foe de dede sma”?

¹⁴ „Noso”, Paulus e aksi, „san den wan di dopoe nanga a marki foe de dedewan sa doe dan? Efoe den dedewan no sa kisi wan opobaka kwetikweti, dan foe san ede den e dopoe nanga a marki dati foe de so? Foe san ede dan wi toe de ibri joeroe ini kefar?” (1 Korentesma 15:29, 30) Paulus no ben taki dati sma di de na libi ben dopoe gi a boen foe den wan di dede, soleki fa son bijbel vertaling e meki a gersi. Boiti dati, dopoe abi foe doe nanga a de di wan sma de wan kresten disipel, èn dede sili no man de disipel (Johanes 4:1). Na presi foe dati, Paulus ben e taki foe kresten di de na libi, èn foeroe foe den, neleki Paulus srefi, ben de „ibri joeroe ini kefar”. Den salfoe kresten ben ’dopoe na ini a dede foe Krestes’ (Romesma 6:3). Sensi di den ben salfoe, den ben e „dopoe”, foe taki en so, na wan pasi di ben sa tjari dede kon gi den neleki di foe Krestes (Markus 10:35-40). Den sa dede nanga a howpoe gi wan glori opobaka foe go na hemel. — 1 Korentesma 6:14; Filipisma 3:10, 11.

15. Sortoe kefar Paulus ondrofeni kande, èn fa a bribi na ini na opobaka ben plei wan ròl taki a ben horidoro na ondro den kefar?

¹⁵ Paulus e froeklari now taki ensrefi ben miti kefar na so wan fasi taki a ben kan taki: „Ibri dei mi e miti nanga dede.” Foe di Paulus e frede taki son sma ben o kroetoe en taki a e meki bigi, meki a e taki moro fara: „Disi mi e djaranti oenoe bika foe a bigi prisiri gi oenoe, brada, di mi abi na ini Krestes Jesus, wi Masra.” The Jerusalem Bible e vertaal a vers disi: „Mi e miti nanga dede ibri dei, brada, èn mi kan sweri dati nanga a prodo di mi e prodo nanga oenoe na ini Krestes Jesus, wi masra.” Leki wan eksempre foe den kefar di a ben miti, Paulus e taki na ini vers 32 foe a ’feti di a ben e feti nanga werdri meti na Efeise’. Nofotron den Romesma ben e kiri den ogriman foe di den ben e trowe den gi den werdri meti na ini den preigron. Efoe Paulus ben feti wan feti nanga troetroe werdri meti, dan a ben kan tan na libi soso nanga a jepi foe Jehovah. Sondro a howpoe foe na opobaka, a ben sa de wan troetroe don sani foe libi wan libi di ben kan tjari en kon na ini so wan kefar. Sondro a howpoe gi wan libi na ini a ten di e kon a no ben sa warti srefisrefi foe horidoro na ondro problema èn foe tjari den òfer di abi foe doe nanga a dini di wi e dini Gado. „Efoe den dedewan no o kisi wan opobaka,” Paulus e taki, ’ ”dan meki wi njan èn dringi, bika tamara wi o dede.’ ” — 1 Korentesma 15:31, 32; loekoe 2 Korentesma 1:8, 9; 11:23-27.

16. (a) Foe pe den wortoe „Meki wi njan èn dringi, bika tamara wi o dede” komoto kande? (b) San ben de den kefar te wan sma ben sa teki a denki disi?

¹⁶ Kande Paulus skrifi baka san ben skrifi kaba na ini Jesaja 22:13, di e taki foe den trangajesi sma di e libi na ini Jerusalem èn di e bribi na ini a lòt foe sma. Noso kande a ben prakseri a bribi foe den Epikuriasma di ben wisiwasi iniwan howpoe foe libi baka dede èn ben bribi taki prisiri na skinfasi ben de a moro prenspari boen na ini a libi. Awansi fa a ben de, a filosofia foe „njan èn dringi” ben de wan godelowsoe filosofia. Foe dati ede Paulus e warskow: „No kori oensrefi. Takroe kompe e pori boen gwenti” (1 Korentesma 15:33). A kan de leki vergif te wi abi demakandra nanga den sma di no e erken na opobaka. A sortoe demakandra disi kande plèi wan ròl na ini den problema di Paulus ben moesoe loesoe na ini a gemeente foe Korente, soleki seks hoeroedoe, pratifasi, a tjari di den e tjari makandra go na kroetoe, èn a abi di den no ben abi lespeki gi na Avondmaal foe Masra. — 1 Korentesma 1:11; 5:1; 6:1; 11:20-22.

17. (a) Sortoe froemane Paulus ben gi den Korentesma? (b) Sortoe aksi moesoe kisi piki ete?

¹⁷ Foe dati ede Paulus e gi den Korentesma a positief froemane disi: „Oenoe wiki èn kon de na ai na wan regtfardiki fasi èn no tan doe sondoe, bika son wan de sondro sabi foe Gado. Mi e taki foe boeweigi oenoe foe firi sjen” (1 Korentesma 15:34). Wan negatief denki foe na opobaka ben meki son sma no man denki na jejefasi, neleki den droengoe. Den ben moesoe wiki èn ben moesoe tan na ai. Den salfoe kresten na ini a ten disi moesoe tan wiki toe na jejefasi, èn den no moesoe meki a negatief denki foe grontapoe abi krakti na den tapoe. Den moesoe tai hori steifi na a howpoe foe den gi wan hemel opobaka. Ma tokoe aksi de ete — gi den Korentesma na ini a ten dati èn gi wi na ini a ten disi. Foe eksempre: Na ini sortoe skin den 144.000 sma sa opo go na hemel? Èn fa a de nanga den foeroe miljoen tra sma di de na ini a grebi ete èn di no abi wan hemel howpoe? San na opobaka sa wani taki gi den sortoe sma disi? Na ini a tra artikel foe wi, wi sa ondrosoekoe a lasti pisi foe Paulus en takimakandra foe na opobaka.

[Foetoewortoe]

Joe e memre disi ete?

◻ Sortoe leti Jesus ben skèin na tapoe na opobaka?

◻ Soema ben de wan toe foe den kotoigi foe na opobaka foe Krestes?

◻ Foe san ede sma ben tjalensi a leri foe na opobaka, èn san ben de a piki foe Paulus?

◻ Foe san ede bribi na ini na opobaka ben de prenspari gi den salfoe kresten?

[Prenki na tapoe bladzijde 15]

Na oemapikin foe Ja-irus ben kon de wan boeweisi taki na opobaka kan pasa

[Prenki na tapoe bladzijde 16, 17

Sondro a howpoe foe na opobaka, a pina di den getrow kresten ben pina foe di den no ben wani libi a bribi foe den ben sa de foe soso