Joe go na ini a rostoe foe Gado?
„A sma di go na ini a rostoe foe Gado, ensrefi rostoe toe foe en eigi wroko.” — HEBREWSMA 4:10.
1. Foe san ede rostoe na wan sani di sma wani srefisrefi?
ROSTOE. Fa dati na wan switi èn moi wortoe! Foe di wi e libi na ini wan grontapoe pe ala sani moesoe pasa esi-esi èn pe sani broeja, meki moro foeroe foe wi ben sa agri taki wan pikinso rostoe na wan sani di wi kan gebroiki heri boen. Efoe wi jongoe noso owroe, trow noso no trow, tokoe wi kan abi foeroe broko-ede èn e weri soso foe a dei-foe-dei libi. Gi den wan di a skin foe den no man doe ala sani leki fa tra sma e doe, noso di siki, ibri dei na wan tjalensi. Soleki fa den Boekoe foe bijbel e taki: „Te nanga now a heri kriatoeroe makandra e tan geme èn abi pen makandra.” (Romesma 8:22) Wan sma di e rostoe no abi foe de wan lesiman. Rostoe na wan sani di ala libisma abi fanowdoe.
2. Sensi o ten Jehovah ben e rostoe?
2 Jehovah Gado srefi e rostoe. Na ini a boekoe Genesis, wi e leisi: „Hemel nanga grontapoe nanga ala den legre foe den ben doro kaba. Èn na a di foe seibi dei Gado ben kaba nanga en wroko di a ben meki, èn a ben go rostoe tapoe a di foe seibi dei foe ala en wroko di a ben meki.” Jehovah ben meki „a di foe seibi dei” de wan spesroetoe sani, bika a tori di skrifi nanga jepi foe santa jeje, e taki moro fara: „Gado ben blesi a di foe seibi dei èn a ben santa en.” — Genesis 2:1-3.
Gado ben rostoe foe en wroko
3. San no ben kan de a reide foe san ede Gado ben rostoe?
3 Foe san ede Gado ben rostoe tapoe „a di foe seibi dei”? A no de foe taki, dati a no ben rostoe foe di a ben weri. Jehovah abi wan „dinamik krakti pasa marki” èn a „no e weri noso en skin no e kon hebi” (Jesaja 40:26, 28). Èn so srefi toe Gado no ben go rostoe foe di a ben abi wan rostoe fanowdoe noso a moesoe teki en moro slow, bika Jesus ben taigi wi: „Mi Tata tan wroko te now ete, èn mi e tan wroko.” (Johanes 5:17) Awansi fa a no fa, „Gado na wan Jeje” èn a no tai na den sani di e pasa na skinfasi èn na den fanowdoe foe den kriatoeroe di sma kan si. — Johanes 4:24.
4. Na sortoe fasi „a di foe seibi dei” ben difrenti foe den siksi „dei” di ben waka na en fesi?
4 Fa wi kan kisi pikinso koni foe man si foe san ede Gado ben rostoe na „a di foe seibi dei”? Foe di wi e loekoe taki ala di Gado ben plisi srefisrefi nanga den sani di a ben doe na ini a langa pisi ten bifo den siksi „dei” foe kria, dan tokoe a ben blesi spesroetoe „a di foe seibi dei” èn ben kari a dei dati „santa”. The Concise Oxford Dictionary e taki foe a wortoe „santa” leki „a gi di wan sma e gi ensrefi abra (na wan gado noso gi wan relisi marki) wawan noso na wan fasi di fiti”. So boen, a blesi di Jehovah blesi „a di foe seibi dei” èn a kari di A ben kari a dei dati santa, e sori taki a dei dati nanga a „rostoe” foe Jehovah moesoe abi foe doe nanga a santa wani foe En èn den sani di A abi na prakseri, na presi foe a dei dati de wan sani di Jehovah abi fanowdoe. Nanga san a dei dati abi foe doe?
5. San Gado ben sreka na ini den fosi siksi „dei” foe kria?
5 Na ini a pisi ten bifo, tapoe den siksi „dei” foe kria, Gado ben meki èn seti ala den sani di e meki grontapoe drai èn ala den wet di e meki a grontapoe wroko nanga ala den sani di de lontoe grontapoe. Now sabidensiman e leri o moi den sani disi meki. Na a kaba foe a „di foe siksi dei”, Gado ben kria a fosi libisma paar èn a ben poti den na ini „wan djari na ini Eden, na a owstoesei”. Te foe kaba, Gado ben taki san a ben abi na prakseri nanga a libisma famiri èn nanga grontapoe, di a ben taki den profeiti wortoe disi: „Oen meki pikin èn kon foeroe èn foeroe grontapoe èn poti en na oen ondro, èn abi na oen ondro den fisi foe se nanga den kriatoeroe foe hemel di e frei, nanga ibri libi kriatoeroe di e kroipi na grontapoe.” — Genesis 1:28, 31; 2:8.
6. (a) Na a kaba foe a „di foe siksi dei”, fa Gado ben firi foe ala den sani di a ben kria? (b) Fa „a di foe seibi dei” de santa?
6 Di a „di foe siksi dei” foe a kria di sani ben kria ben doro en kaba, dan a verslag e froeteri wi: „Gado ben si ala san a ben meki èn loekoe! a ben de heri boen.” (Genesis 1:31) Gado ben de tevrede nanga ala sani di a ben meki. So boen a ben rostoe, noso a ben tapoe nanga wroko foe kria tra sani na grontapoe. Ala di a paradijs djari ben de volmaakti èn ben moi, tokoe a ben de soso wan pikin kontren foe grontapoe, èn na soso toe libisma ben de na grontapoe. A ben sa teki ten foe grontapoe èn a libisma famiri foe doro a fasi di Gado ben abi na prakseri gi den. Foe dati ede, a ben poti wan „di foe seibi dei” di ben sa gi pasi meki ala den sani di A ben kria na ini den siksi „dei” na fesi ben sa kan gro kon foe de akroederi a santa wani foe En. (Teki gersi Efeisesma 1:11.) Now di „a di foe seibi dei” e doro en kaba, a heri grontapoe sa tron wan paradijs pe volmaakti libisma sa libi na ini foe têgo (Jesaja 45:18). „A di foe seibi dei” poti na wan sei, noso gi abra, foe kaba a wani foe Gado èn foe meki a wani foe Gado kon troe ini a tori foe grontapoe nanga a libisma famiri. Na a fasi dati a dei de „santa”.
7. (a) Fa wi kan taki dati Gado ben rostoe na „a di foe seibi dei”? (b) Fa ala sani sa de te „a di foe seibi dei” e kon na en kaba?
7 So boen Gado ben rostoe foe en wroko foe kria sani na „a di foe seibi dei”. A de neleki a ben stòp wroko èn a ben meki den sani pasa soleki fa a ben seti den foe pasa. A abi na overtoigi dorodoro, taki te „a di foe seibi dei” e doro en kaba, dan ala sani sa de soifri leki fa a ben abi dati na prakseri. Srefi efoe wan toe problema sa de, a sa loesoe den. Ala libisma di e gi jesi sa kisi winimarki te a wani foe Gado e tron wan troetroe sani foe troe. No wan sani sa man tapoe a sani disi foe pasa, bika a blesi foe Gado de na tapoe „a di foe seibi dei”, èn a ben meki a dei dati „santa”. Dati na wan kefalek moi sani di libisma di e gi jesi, kan froewakti!
Israèl no ben man foe go na ini a rostoe foe Gado
8. O ten èn fa den Israèlsma ben bigin foe hori a Sabadei?
8 A nâsi Israèl ben kisi wini foe sani di Jehovah ben seti foe wroko èn foe rostoe. Srefi bifo Gado ben gi den Israèlsma a Wet na a bergi Sinai, A ben taigi den nanga jepi foe Moses: „Loekoe taki Jehovah gi oenoe a sabadei. Foe dati ede na a di foe siksi dei a e gi oenoe brede gi toe dei. Ibriwan sma moesoe tan na en eigi presi. No meki no wan sma gowe libi en presi na a di foe seibi dei.” A bakapisi ben de taki „a pipel ben hori a sabadei na tapoe a di foe seibi dei”. — Exodus 16:22-30.
9. Foe san ede a wet gi a Sabadei, sondro tweifri ben de wan kenki di ben prisiri den Israèlsma srefisrefi?
9 A seti disi ben njoen gi den Israèlsma di didjonsro ben komoto foe katibo na Egipti. Ala di den Egipti sma nanga tra nâsi ben marki a ten na ini pisi ten foe feifi te go miti tin dei, tokoe a no gersi taki den Israèlsma di ben de srafoe, ben kisi wan dei foe rostoe. (Teki gersi Exodus 5:1-9.) Foe dati ede a de reidelek foe kon na a bosroiti taki a pipel foe Israèl ben prisiri nanga a kenki disi. Na presi foe si den sani di a Sabadei ben aksi foe den leki wan hebi noso wan sani di e tapoe den, den ben moesoe breiti foe hori densrefi na a sabadei. Foe taki en leti, baka ten Gado ben taigi den taki a Sabadei ben dini leki wan sani foe memre den taki den ben de na ini katibo na Egipti èn taki En ben froeloesoe den. — Deuteronomium 5:15.
10, 11. (a) Efoe den Israèlsma ben gi jesi, dan foe san den ben kan froewakti taki den ben o njan boen foe dati? (b) Foe san ede den Israèlsma no ben man foe go na ini a rostoe foe Gado?
10 Efoe den Israèlsma di ben komoto nanga Moses foe Egipti ben gi jesi, dan den ben sa kisi a grani foe go na ini a pramisi „kondre pe merki nanga oni e lon” (Exodus 3:8). Drape den ben sa njan boen foe troetroe rostoe, no wawan na tapoe a Sabadei ma den heri libi langa (Deuteronomium 12:9, 10). Ma a no so a sani ben pasa. Na apostel Paulus ben skrifi foe den: „Bika soema ben de den sma di ben jere ma tokoe ben meki bita atibron kon? Foe taki en leti, a no ben de alamala di Moses ben tjari komoto na Egipti? Boiti dati, foe soema Gado ben kon tegoe fotenti jari langa? A no ben de foe den wan di ben doe sondoe, èn di a dedeskin foe den ben fadon na ini a gran sabana? Ma gi soema a ben sweri taki den no ben sa go na ini en rostoe, boiti den wan di no ben gi jesi? Na so wi e si taki den no ben kan go na ini, bika den ben de sondro bribi.” — Hebrewsma 3:16-19.
11 Dati na wan krakti lès gi wi srefisrefi! Foe di a geslakti dati ben de sondro bribi na ini Jehovah, dati meki den no ben kisi a rostoe di A ben pramisi den. Na presi foe dati, den ben lasi gowe na ini a gran sabana. Den ben misi foe si taki leki bakapikin foe Abraham, den ben de krosibei foe a wani foe Gado foe gi blesi na ala den nâsi foe grontapoe (Genesis 17:7, 8; 22:18). Na presi foe wroko na ini wánfasi nanga a wani foe Gado, den ben meki den sani foe a grontapoe disi nanga a denki di den ben denki den eigi lostoe nomo, poeroe ala den prakseri. No meki wi fadon noiti na ini so wan fasi foe libi! — 1 Korentesma 10:6, 10.
Wan rostoe e tan abra
12. Sortoe froewakti ben de ete gi den fosi jarihondro kresten, èn fa den ben kan kisi dati?
12 Baka di Paulus ben sori taki Israèl no ben man go na ini a rostoe foe Gado foe di den ben de sondro bribi, a e poti prakseri na tapoe den kompe bribiman foe en. Soleki fa a skrifi na Hebrewsma 4:1-5, Paulus e gi den ete wan tron a djaranti taki „wan pramisi tan abra foe go na ini a rostoe [foe Gado]”. Paulus e gi den a tranga foe sori bribi na ini a „boen njoensoe”, bika „wi di sori bribi, e go na ini a rostoe”. Foe di a Wet ben poeroe na pasi kaba nanga jepi foe a froeloesoe-ofrandi foe Jesus, dati meki Paulus no ben e sori djaso go na a rostoe di den ben rostoe a skin na tapoe a sabadei (Kolosesma 2:13, 14). Paulus ben gi den Hebrew kresten tranga foe go na ini a rostoe foe Gado foe di a ben kari den wortoe foe Genesis 2:2 nanga Psalm 95:11.
13. Di Paulus ben kari Psalm 95, foe san ede a ben poti prakseri tapoe a wortoe „tide”?
13 A man di den Hebrew kresten ben sa man go na ini a rostoe foe Gado ben sa moesoe de „boen njoensoe” gi den, neleki fa a rostoe foe a sabadei ben moesoe de „boen njoensoe” gi den Israèlsma bifo den. So boen, Paulus ben gi en kompe bribiman tranga foe no meki a srefi fowtoe di Israèl ben meki na ini a gran sabana. Di Paulus ben kari san de now Psalm 95:7, 8, a ben poti prakseri na tapoe a wortoe „tide”, ala di a ben so langa kaba di Gado ben rostoe foe kria sani (Hebrewsma 4:6, 7). San Paulus ben wani tjari kon na fesi? Dati na, taki „a di foe seibi dei” di Gado ben poti na wan sei foe meki ala sani pasa soifri leki fa a ben abi na prakseri gi grontapoe èn a libisma famiri, a dei dati ben waka ete. Foe dati ede, a ben de tranga fanowdoe gi den kompe kresten foe en foe wroko makandra nanga a prakseri dati na presi foe feti baka den eigi sani nomonomo. Ete wan tron a e meki den jere a warskow: „No tranga oen ati.”
14. Fa Paulus ben sori taki a „rostoe” foe Gado tan abra ete?
14 Na tapoe foe dati, Paulus ben sori taki a pramisi „rostoe” no ben de soso wan afersi foe a seti di den ben o seti den libi na ini a Pramisi Kondre na ondro a fesimanwroko foe Josua (Josua 21:44). „Foe di efoe Josua ben tjari den go na ini wan presi foe rostoe”, na so Paulus e taki nanga den, „dan Gado no ben sa taki baka ten foe wan tra dei.” Nanga a sani dati na prakseri, Paulus ben taki moro fara: „Foe dati ede wan sabadei rostoe libi abra ete gi a pipel foe Gado.” (Hebrewsma 4:8, 9) San na a „sabadei rostoe” dati?
Go na ini a rostoe foe Gado
15, 16. (a) San den wortoe „sabadei rostoe” wani taki? (b) San a wani taki foe ’rostoe foe joe eigi wroko’?
15 Den wortoe „sabadei rostoe” vertaal komoto foe wan Griki wortoe di wani taki „e hori a sabadei” (Kingdom Interlinear). Profesor William Lane e taki: „A wortoe disi, kon de a bodoi di ben gi foe a Sabadei di ben tjari kon na krin na ini a Djoe-bribi tapoe a gron foe Exod 20:8-10, pe krakti ben poti na tapoe taki rostoe nanga prèise e go makandra . . . [A] e poti krakti na tapoe a spesroetoe fasi foe hori fesa nanga prisiri, di sma e sori na ini na anbegi nanga a prèise foe Gado.” So boen, a pramisi rostoe no de soso no wroko moro. A de wan kenki di wan sma e kenki foe wroko di e weri wan sma èn di no abi wan troetroe marki, kon doe prisiri diniwroko di e gi Gado grani.
16 Paulus e taki disi nanga den wortoe foe en di e kon now: „Bika a sma di go na ini a rostoe foe Gado, ensrefi rostoe toe foe en eigi wroko, neleki fa Gado ben rostoe foe di foe en.” (Hebrewsma 4:10) Gado no ben rostoe na a di foe seibi kria dei, foe di a ben weri. Na presi foe dati, a ben tapoe nanga a kria wroko foe meki grontapoe, so taki a wroko foe en eigi anoe ben kan gro te leki a kisi ala en glori, foe a prèise nanga grani foe en. Leki pisi foe a kriatoeroe foe Gado, wi moesoe fiti toe na ini a seti dati. Wi moesoe ’rostoe toe foe wi eigi wroko’, dati wani taki, wi moesoe stòp foe proeberi foe regtfardiki wisrefi bifo Gado te wi wani kisi froeloesoe. Na presi foe dati, wi moesoe bribi taki a froeloesoe foe wi e anga foe a froeloesoe-ofrandi foe Jesus Krestes, a sani di sa meki ala sani kon agen na ini wánfasi nanga a prakseri foe Gado. — Efeisesma 1:8-14; Kolosesma 1:19, 20.
Gado Wortoe abi krakti
17. Foe sortoe fasi foe libi di den Israèlsma na skinfasi ben feti na baka wi moesoe tan farawe?
17 Den Israèlsma no ben man foe go na ini Gado en pramisi rostoe foe di den no ben gi jesi èn no ben abi bribi. Foe dati ede, Paulus ben gi den Hebrew kresten tranga: „Foe dati ede, meki wi doe ala moeiti foe go na ini a rostoe dati, so taki no wan sma fadon go na ini a srefi eksempre foe trangajesi.” (Hebrewsma 4:11) Moro foeroe foe den fosi jarihondro djoe no ben sori bribi na ini Jesus, èn foeroe foe den ben pina srefisrefi di a djoe seti foe sani ben kon na en kaba na ini 70 G.T. A de toemoesi prenspari srefisrefi taki wi abi bribi na ini Gado Wortoe foe pramisi na ini a ten disi!
18. (a) Sortoe reide Paulus ben gi foe sori bribi na ini Gado wortoe? (b) Fa a wortoe foe Gado „srapoe moro leki iniwan feti-owroe di e koti na toe sei”?
18 Wi abi boen reide foe sori bribi na ini Jehovah wortoe. Paulus ben skrifi: „A wortoe foe Gado de libilibi èn a abi krakti èn a srapoe moro leki iniwan feti-owroe di e koti na toe sei, èn a e boro go srefi so dipi taki a e prati sili nanga jeje, èn den skroefoe foe a skin nanga a fatoe na ini den bonjo foe den, èn a man foe si krin san na ati e denki èn abi na prakseri.” (Hebrewsma 4:12) Ija, Gado wortoe, noso boskopoe, „srapoe moro leki iniwan feti-owroe di e koti na toe sei”. Den Hebrew kresten ben moesoe memre san ben pasa nanga den fositen tata foe den. Foe di no ben e ke nanga Jehovah kroetoe taki den ben o lasi gowe na ini a gran sabana, meki den ben proeberi foe go na ini a Pramisi Kondre. Ma Moses ben warskow den: „Den Amalekietsma nanga den Kanansma de drape fosi oenoe; èn seiker oenoe sa fadon nanga jepi foe a feti-owroe.” Di den Israèlsma ben tranga-jesi èn tokoe ben poesoe go na fesi, „den Amalekietsma nanga den Kanansma di ben libi na tapoe a bergi dati, ben saka kon na ondro èn ben naki den trowe èn ben jagi den poeroe foe makandra te na Horma” (Numeri 14:39-45). A wortoe foe Jehovah srapoe moro leki iniwan feti-owroe di e koti na toe sei, èn ibriwan sma di foe espresi no e ke nanga dati seiker sa koti den bakapisi foe dati. — Galasiasma 6:7-9.
19. Nanga o foeroe krakti a wortoe foe Gado ’e boro go srefi so dipi’, èn foe san ede wi moesoe erken taki wi moesoe gi frantiwortoe na Gado?
19 Troetroe fa a wortoe foe Gado „e boro go srefi so dipi taki a e prati sili nanga jeje, èn den skroefoe foe a skin nanga a fatoe na ini den bonjo foe den”! A Wortoe e go dipi na ini den prakseri foe sma èn den sani di e boeweigi sma, èn na wan agersi fasi a e boro go krinkrin na ini a fatoe na ini den bonjo te na ini den moro inisei presi foe den bonjo! Ala di den Israèlsma di ben kon fri foe katibo na Egipti, ben agri taki den ben o hori a Wet, tokoe Jehovah ben sabi taki dipi na ini den ati den no ben warderi den sani di A ben gi èn den sani di a ben aksi foe den (Psalm 95:7-11). Na presi foe doe a wani foe Gado, den ben broko den ede nanga a plisi di den ben wani plisi den lostoe foe a skin foe den. Foe dati ede, den no ben go na ini a rostoe di Gado ben pramisi, ma den ben lasi den libi na ini a gran sabana. Wi moesoe teki dati na ati, bika „no wan kriatoeroe no de di [Gado] ai no man si, ma ala sani de opo-opo èn krin foe si na ini den ai foe a sma di wi moesoe gi frantiwortoe” (Hebrewsma 4:13). Foe dati ede, meki wi hori wisrefi na a gi di wi gi wisrefi abra na Jehovah èn no ’drai baka èn kisi pori’. — Hebrewsma 10:39.
20. San de na wi fesi, èn san wi moesoe doe now foe go na ini a rostoe foe Gado?
20 Ala di „a di foe seibi dei” — Gado en dei foe rostoe — e go doro ete, Gado de na ai foe sorgoe taki a klari en wroko akroederi ala sani di a abi na prakseri nanga grontapoe èn nanga a libisma famiri. Heri esi a Mesian Kownoe, Jesus Krestes, sa doe sani foe meki grontapoe kon fri foe ala den sma di e gens a wani foe Gado, so srefi Satan Didibri a sa poeroe. Na ini a Doesoen Jari Tiri foe Krestes, Jesus nanga den 144.000 kompe tiriman foe en sa meki grontapoe nanga a libisma famiri kon tron soifri leki fa Gado ben abi na prakseri (Openbaring 14:1; 20:1-6). Now na a ten gi wi foe boeweisi taki a libi foe wi e drai lontoe a wani foe Jehovah Gado. Na presi foe soekoe foe regtfardiki wisrefi na fesi Gado èn meki wi eigi afersi go na fesi, dan now na a ten foe wi ’rostoe foe wi eigi wroko’ èn sorgoe nanga wi heri ati gi den belang foe a Kownoekondre. Te wi e doe dati èn te wi e tan getrow na wi hemel Tata Jehovah, dan wi sa abi a grani foe njan boen foe den winimarki foe a rostoe foe Gado now èn foe têgo.
Joe kan tjari disi kon na krin?
◻ Foe san ede Gado ben rostoe tapoe „a di foe seibi dei”?
◻ Sortoe rostoe den Israèlsma ben kan njan boen foe en, ma foe san ede den no ben man foe go na ini?
◻ San wi moesoe doe foe go na ini a rostoe foe Gado?
◻ Fa a wortoe foe Gado de libilibi, abi krakti, èn srapoe moro leki iniwan feti-owroe di e koti na toe sei?
[Prenki na tapoe bladzijde 16, 17]
Den Israèlsma ben hori a Sabadei, ma den no ben go na ini a rostoe foe Gado. Joe sabi foe san ede?