Joe e memre disi ete?

Joe poti prakseri finifini na tapoe den eksemplaar foe A Waktitoren foe no so langa pasa? Efoe dati de so, dan joe sa feni en moi foe memre den sani disi:

◻ Foe san ede a kerkileri, taki sani bepaal kaba na fesi no de logis?

Efoe Gado ben sabi èn ben bepaal srefi na fesi kaba, taki Adam ben sa sondoe, dan Jehovah ben sa tron a sma di meki sondoe di a ben meki libisma, èn foe dati ede a ben sa de frantiwortoe gi ala ogridoe nanga pina foe libisma. Disi no man kroederi nanga a troe tori, taki Jehovah na wan Gado foe lobi nanga retidoe di no wani si godelowsoefasi na ai (Psalm 33:5; Odo 15:9; 1 Johanes 4:8). — 15/4, bladzijde 7, 8.

◻ Leki kontroe foe Jesaja 2:2-4, san den sma foe foeroe kondre e doe?

Te den e lon kon na a oso foe na anbegi foe Jehovah, den kaba foe ’leri orlokoe’ toe bika den e froetrow na tapoe a kibri di Gado en hemel legre e gi, di de klariklari foe pori ala feanti foe vrede. — 15/4, bladzijde 30.

◻ Soema na den tranga man foe Jehovah di den e taki foe den na Joèl 3:10, 11?

So wan 280 leisi na ini bijbel, den e kari a troe Gado „Jehovah foe den legre” (2 Kownoe 3:14). Den legre disi na den makti engel legre foe hemel di de srekasreka foe doe san Jehovah taigi den foe doe. — 1/5, bladzijde 23.

◻ Sortoe lès wi kan leri foe na aksi di Jehovah ben e aksi Job foe begi gi den sma di ben sondoe teige en? (Job 42:8)

Bifo Job ben kon gosontoe baka, Jehovah ben aksi foe en taki a moesoe begi gi den wan di ben sondoe teige en. Disi e sori taki Jehovah e aksi foe wi taki wi e gi pardon na den sma di e sondoe teige wi, bifo wi kan kisi pardon foe wi sondoe (Mateus 6:12; Efeisesma 4:32). — 1/5, bladzijde 31.

◻ San Jakobus ben wani taki di a ben taki: „Meki a horidoro tjari en wroko kon na wan kaba?” (Jakobus 1:4)

Horidoro abi wan „wroko” foe doe. A wroko di a abi foe doe na foe meki wi kon boen na ala fasi. So boen, te wi e meki den tesi e go leki fa den wani, sondro taki wi e doe sani di no de akroederi den Boekoe foe bijbel foe tapoe den tesi esi-esi dan a bribi foe wi e kisi tesi èn e kon moro boen. — 15/5, bladzijde 16.

◻ Foe san ede Gado wakti so langa bifo a e loesoe den problema foe libisma?

A fasi fa Jehovah e prakseri foe ten, e difrenti nanga di foe wi. Gi a têgo Gado, a pisi ten di Adam ben kria te go miti now no doro wán wiki ete (2 Petrus 3:8). Ma awansi fa wi e prakseri foe ten, ibri dei di e pasa e tjari wi kon moro krosibei foe a dei te Jehovah sa regtfardiki ensrefi. — 1/6, bladzijde 5, 6.

◻ San e boeweigi Jehovah Kotoigi?

A leri foe Jehovah meki wan aparti sortoe pipel, di kisi leri foe lobi makandra èn den sma na den sei leki densrefi (Jesaja 54:13). A leri foe Jehovah meki wan aparti sortoe pipel, di kisi leri foe lobi makandra èn den sma na den sei leki densrefi. Lobi e boeweigi Jehovah Kotoigi foe go doro nanga a preikiwroko, awansi den e ondrofeni mi-no-ke fasi noso gens foe a poebliki (Mateus 22:36-40; 1 Korentesma 13:1-8). — 15/6, bladzijde 20.

◻ San den wortoe foe Jesus wani taki: „Span oensrefi boen tranga foe pasa a smara doro go na inisei? (Lukas 13:24)

Den wortoe foe Jesus wani taki dati wi moesoe meki foeroe moeiti, wroko nanga ala krakti di wi abi. Den wortoe foe en e gi a prakseri toe taki son sma ben o kon soekoe ’foe pasa a doro foe go na inisei’ soleki fa a fiti gi den nomo, na wan makriki fasi soleki fa den e feni en boen. Ibriwan foe wi kan aksi wisrefi: ’Mi e gi misrefi nanga faja èn de aktief doronomo?’ — 15/6, bladzijde 31.

◻ Fa den sma di sa opo baka sa „kisi kroetoe tapoe a gron foe den sani di ben skrifi na ini den boekoelolo, akroederi den doe foe den”? (Openbaring 20:12)

Den boekoelolo disi a no tori di skrifi foe den fositen sani di den ben doe; di den ben dede den ben kon fri foe den sondoe foe den di den ben doe di den ben de na libi ete (Romesma 6:7, 23). Ma den sma di kisi wan opobaka sa de na ondro a sondoe foe Adam ete. A moesoe de na a ten dati dan taki den boekoelolo disi sa gi moro foe Gado, di ala sma moesoe waka na baka so taki den kan abi wini dorodoro foe na ofrandi foe Jesus Krestes. — 1/7, bladzijde 22.

◻ Sortoe lès de na ini na agersitori foe Jesus foe a Samariasma di ben lobi sma na en sei? (Lukas 10:30-37)

Na agersitori foe Jesus e sori taki wan troe opregti sma na wan sma di no wawan e hori ensrefi na Gado wet, ma di e waka na baka den eigifasi foe Gado (Efeisesma 5:1). A e sori toe taki a lobi di wi lobi den sma na wi sei sa moesoe poeroe den skotoe di e kon foe di wan sma de foe wan tra kondre, koeltoeroe, nanga relisi. — Galasiasma 6:10. — 1/7, bladzijde 31.

◻ San na dri kontren pe joe ben sa kan kon sabi joe pikin èn gi den tiri leki papa nanga mama?

(1) Jepi joe pikin foe teki wan grontapoe wroko di fiti den; (2) sreka den so taki den sa man handri nanga stress na emotioneel sei na skoro èn na wrokope; (3) sori den fa den kan sorgoe gi den jeje nowtoe foe den. — 15/7, bladzijde 4.

◻ Foe san ede Gado ben rostoe tapoe „a di foe seibi dei”?

Gado no ben rostoe foe di a ben weri. Na presi foe dati, a ben tapoe nanga a wroko foe kria tra sani na grontapoe, so taki a wroko foe en eigi anoe ben kan gro te leki a kisi ala en glori. — 15/7, bladzijde 18.

◻ San na dri fasi fa wi kan doe retidoe?

Na a fosi presi, wi moesoe hori wisrefi na den moreel markitiki foe Gado (Jesaja 1:17). Na a di foe toe presi, wi e sori retidoe te wi e handri nanga tra sma na fasi fa wi wani taki Jehovah moesoe handri nanga wi (Psalm 130:3, 4). Na a di foe dri presi, wi e sori a retidoe foe Gado te wi abi fajafaja foe doe nanga a preikiwroko (Odo 3:27). — 1/8, bladzijde 14, 15.