Nownowde na a ten foe wiki!

„NO MEKI no wan fowtoe foe a pisi ten pe wi e libi na ini; now kaba na a ten gi wi foe wiki foe a sribi di wi e sribi” (Romesma 13:11, Knox). Na apostel Paulus ben skrifi den wortoe dati gi den kresten na Rome so wan 14 jari fosi wan rampoe ben tjari wan kaba kon na a djoe seti foe sani na ini 70 G.T. Foe di den ben de na ai na jejefasi, dati meki den djoe kresten no ben de na Jerusalem na a prenspari moeilek ten dati, na so den ben kan lowe gowe foe no dede noso foe no go na ini katibo. Ma fa den ben sabi taki den ben moesoe gowe èn taki den no ben moesoe go baka na ini a foto?

Jesus Krestes ben warskow taki feanti ben sa lontoe Jerusalem èn taki den ben sa naki den sma trowe na gron di ben e libi na ini a foto (Lukas 19:43, 44). Baka dati, Jesus ben gi den getrow bakaman foe en wan marki di meki foe difrenti pisi èn di no ben moeilek foe si (Lukas 21:7-24). Gi den kresten dati di ben e libi na Jerusalem, gowe libi a foto ben wani taki gowe libi den oso nanga a wroko foe den. Ma tokoe, a de di den ben de na ai èn a lowe di den ben lowe gowe, ben jepi den foe tan na libi.

Di Jesus ben taki na fesi taki Jerusalem ben o kisi pori, dan den disipel foe en ben aksi: „O ten den sani disi sa de, èn san sa de a marki foe joe denoja èn foe a bosroiti foe a seti foe sani?” (Mateus 24:3) Foe piki den, Jesus ben teki a denoja foe en na ini a ten di ben o kon, gersi nanga a ten di ben de fosi a Froedoe di kon na heri grontapoe na ini den dei foe Noa. Jesus ben sori taki a Froedoe ben sibi ala den ogri sma poeroe (Mateus 24:21, 37-39). Na so a ben sori taki Gado ben sa kon na ini den afersi foe libisma baka. O fara? We, so fara dati A sa poeroe wan heri ogri grontapoe noso seti foe sani! (Teki gersi 2 Petrus 3:5, 6.) A sani dati ben sa kan pasa na ini wi ten?

Ala sani de a srefi ete?

A no foeroe fosi jarihondro djoe ben prakseri oiti taki a santa foto foe den, Jerusalem, ben sa kisi pori. Foeroetron wan srefi sortoe fasi foe no bribi de na mindri sma di e libi krosibei foe wan vulkaan ma di noiti no si fa wan vulkaan soetoe faja kon na doro. „No na ini mi libiten”, na so foeroe foe den e taki te trawan e warskow den. „Dorodoro den vulkaan e soetoe faja kon na doro, baka ibri toe noso dri jarihondro”, na so Lionel Wilson, wan vulkanoloog e tjari kon na krin. „Joe e broko joe ede efoe a vulkaan ben soetoe faja kon na doro di joe papa nanga mama ben de na libi. Ma efoe dati ben pasa na ini a ten foe joe granpapa nanga granmama, dan dati no wani taki foeroe moro.”

Ma soifri bodoi kan jepi wi foe si marki di kan de wan kefar èn foe no spotoe nanga dati. Foe den man di ben lowe gowe foe Mount Pelée, wán foe den ben sabi sani foe vulkaan èn ben froestan den marki di ben sori taki kefar de. Sma ben froestan den sortoe marki disi boen toe, sjatoe bifo a Mount Pinatubo soetoe en faja kon na doro. Den vulkanoloog di ben ondrosoekoe den krakti di sma no man si na inisei foe a bergi, ben overtoigi den sma drape taki den ben moesoe gowe libi a kontren.

A no de foe taki dati ala ten wan toe sma sa poti den marki di e sori taki kefar de na wan sei, èn den sa tan taki dati noti sa pasa. Kande den e lafoe den sma srefi di teki a bosroiti foe doe wan sani. Na apostel Petrus ben taki na fesi dati so wan fasi foe si sani ben sa de gewoon na ini a ten foe wi. „Ini a fosi presi oenoe sabi disi,” a ben taki, „taki na ini den lasti dei spotoeman sa kon nanga den spotoe foe den, di sa doe sani akroederi den eigi lostoe èn den e taki: ’Pe a denoja disi foe en de di den ben pramisi? Bika sensi den dei di den afo foe wi fadon na sribi ini dede, ala den sani ben tan soifri leki fa a ben de sensi di Gado bigin kria sani.’ ” — 2 Petrus 3:3, 4.

Joe e bribi taki wi e libi na ini „den lasti dei”? Na ini The Columbia History of the World, John A. Garraty nanga Peter Gay e aksi: „Wi e si taki wi libimakandra e go na baka?” Dan den historiaman disi e ondrosoekoe den problema foe lanti tirimakti. Den e ondrosoekoe moro fara taki ogridoe e gro na heri grontapoe èn taki borgoe no e gi jesi na tirimakti, taki osofamiri libi e go na baka, sabidensi nanga technologie e misi foe loesoe den problema foe a libimakandra, fa sani moeilek nanga den tirimakti, èn boen gwenti nanga wet nanga relisi e go na baka na heri grontapoe. Den e kon na a bosroiti: „Efoe den sani disi no de den marki foe wan kaba di de fasti, dan seiker den gersi leki marki foe wan kaba.”

Wi abi boen reide foe bribi taki wan „kaba” de krosibei srefisrefi. Nôno, wi no abi foe frede wan kaba foe grontapoe srefi, bika bijbel srefi e taki dati Gado „seti grontapoe na en spesroetoe presi; gi ten di no skotoe, noso foe têgo, a no sa seki” (Psalm 104:5). Tokoe, wi moesoe froewakti taki esi-esi wan kaba sa kon na a ogri seti foe sani disi di ben tjari someni kwinsi kon gi a libismafamiri. Foe san ede wi moesoe froewakti dati? Foe di wi kan si foeroe boeweisi di e sori taki wi e libi na ini den lasti dei foe a seti foe sani disi soleki fa Jesus Krestes ben taki foe dati. (Loekoe a boksoe „Wan toe sani foe den lasti dei”.) Foe san ede joe no ben sa teki den wortoe foe Jesus gersi nanga den sani di e pasa na grontapoe? Efoe joe e doe dati, dan dati kan jepi joe foe teki koni bosroiti gi joesrefi èn gi joe osofamiri. Ma foe san ede joe moesoe doe wan sani nownowde?

A de fanowdoe troetroe foe tan na ai

Ala di sabidensiman kan sabi o krosibei a ten de foe wan vulkaan soetoe en faja kon na doro, tokoe den no kan taki soifri o ten dati sa pasa. Na so toe, Jesus ben taki foe a kaba foe a seti foe sani disi: „A dei nanga a joeroe dati no wan sma no sabi, no den engel foe hemel, no a Manpikin, ma soso a Tata” (Mateus 24:36). Foe di wi no sabi soifri o ten a kaba foe a seti foe sani disi sa kon, dati meki Jesus ben gi wi a warskow disi: „Sabi wán sani, taki efoe na ososma ben sabi na sortoe joeroe a foefoeroeman ben o kon, dan a ben o tan na ai èn a no ben o gi pasi taki sma broko kon na ini en oso. Foe dati ede oenoe so srefi moesoe sori taki oenoe de srekasreka, bika a Manpikin foe libisma [Jesus] e kon na wan joeroe di oenoe no ben prakseri.” — Mateus 24:43, 44.

Den wortoe foe Jesus e sori taki a rampoe foe a kaba foe a seti foe sani disi, sa kon te a grontapoe disi no sa froewakti dati. Srefi efoe wi de bakaman foe Jesus, wi moesoe ’sori taki wi de srekasreka’. Wi kan gersi a situwâsi foe wi nanga wan ososma di no ben de srekasreka, foe di a no sabi o ten wan foefoeroeman sa broko kon foefoeroe na ini en oso.

Na so a de toe, taki na apostel Paulus ben taigi kresten na Tesalonika: „Oensrefi sabi heri boen taki a dei foe Jehovah e kon soifri leki wan foefoeroeman na neti. . . . Brada, oenoe no de na doengroe, so taki a dei dati kisi oenoe neleki nanga foefoeroeman.” Paulus ben gi tranga toe: „No meki wi sribi go doro soleki fa den trawan e doe, ma meki wi tan na ai èn hori wisrefi” (1 Tesalonikasma 5:2, 4, 6, foetoewortoe). San dati wani taki foe „tan na ai èn hori wisrefi”?

Den fosi jarihondro kresten ben abi foe lowe komoto foe Jerusalem, ma wi no abi foe lowe komoto foe wan spesroetoe foto. Baka di Paulus ben froemane den kompe bribiman foe en foe wiki foe a sribi foe den, dan a ben gi den tranga foe „poeroe den wroko di de foe doengroe” èn foe „weri Masra Jesus Krestes” (Romesma 13:12, 14). Te wi e waka soifri na ini den foetoestap foe Jesus, dan wi sa sori taki wi de na ai gi a ten pe wi e libi na ini; a de di wi de na ai na jejefasi so, sa meki taki wi sa man kisi kibri foe Gado te na ogri seti foe sani disi sa kon na wan kaba. — 1 Petrus 2:21.

Den wan di e waka baka Jesus Krestes e njan boen foe libi di wani taki wan sani èn di e gi satisfaksi. Miljoenmiljoen Jehovah Kotoigi kon si taki a tjatjari foe kresten disipel wroko na wan safoe tjatjari èn wan tjatjari di e gi kowroe-ati (Mateus 11:29, 30, foetoewortoe). A fosi stap di wan sma moesoe teki foe tron wan disipel na foe ’teki sabi na ini en foe Gado èn foe en di A seni kon, Jesus Krestes’ (Johanes 17:3). Den Kotoigi e fisiti miljoenmiljoen oso ibri wiki so taki den kan jepi sma kisi „wan soifri sabi foe waarheid” (1 Timoteus 2:4). Den ben sa breiti foe hori wan bijbelstudie nanga joe na joe oso sondro foe joe pai foe dati. Èn te joe e gro na ini a sabi foe Gado Wortoe, dan sondro tweifri joe toe sa abi na overtoigi taki a ten foe wi de tra fasi. Foe troe, nownowde na a ten foe wiki foe a sribi di joe e sribi!

[Faki/Prenki na tapoe bladzijde 7]

WAN TOE SANI FOE DEN LASTI DEI

„Nâsi so opo go feti nanga nâsi”; ’vrede sa poeroe foe grontapoe’. (Mateus 24:7; Openbaring 6:4)

Den toe grontapoefeti foe a jarihondro disi, makandra nanga foeroe tra feti, teki a vrede poeroe foe grontapoe. „A Fosi — èn so srefi a di foe Toe — Grontapoefeti ben de tra fasi leki ala feti di ben feti fosi dati,” na so historiaman Johanes Keegan e skrifi, „den ben de tra fasi na ini o bigi den ben de, o hebi den ben de, o meni kondre ben de, èn omeni den ben kostoe èn omeni sma ben lasi libi. . . . Den Grontapoefeti ben kiri moro sma, ben njan moro goedoe èn ben meki moro sma pina na moro presi foe grontapoe, moro leki iniwan tra feti di ben feti fosi den feti dati.” Den feti di e feti now e pina oemasma nanga pikin-nengre moro leki den e pina den sroedati. Na UNICEF e bereken taki na ini den lasti tin jari, toe miljoen pikin-nengre lasi den libi na ini den feti di ben feti.

„Mankeri foe njanjan” (Mateus 24:7; Openbaring 6:5, 6, 8)

Na ini 1996 a moni di ben moesoe pai foe bai tarwe nanga karoe, ben go na loktoe srefisrefi. Foe san ede? San ben tan ete foe den sortoe njanjan disi na grontapoe ben kon lagi so kefalek taki 50 dei nomo ben libi ete dan ala ben sa kaba, èn dati ben de a moro lagi nomroe di den ben skrifi. A go di den prijs foe bai den fondamenti njanjan e go na loktoe wani taki dati hondrohondro miljoen sma di e kon pôti na grontapoe — foeroe foe den na pikin-nengre — e go sribi nanga angri.

„Na a wan presi baka a trawan . . . gronseki sa de” (Mateus 24:7)

Na ini den 2500 jari di pasa, soso neigi gronseki ben de di ibriwan foe den ben kiri moro leki 100.000 sma. Sensi 1914 fo foe den sortoe gronseki disi feni presi.

„Kroektoedoe sa kon moro foeroe” (Mateus 24:12)

Now di a di foe 20 jarihondro e doro en kaba, kroektoedoe noso a hori di sma no e hori densrefi na wet, kon panja na ala sei. Na mindri den hati sani di e pasa na ini den ogri lasti dei disi, joe abi a feti di terrorist e go feti nanga borgoe, a kiri di sma di no e sori pikinso firi srefisrefi e kiri trawan, èn a kiri foe ipi-ipi sma.

„Na a wan presi baka a trawan pestsiki” (Lukas 21:11)

Na ini den jari sjatoe baka 1990 soleki fa a sori, dan so wan 30 miljoen sma sa dede foe tuberculose. Den dresi di meki foe tapoe den bakteria di e tjari siki kon, moro nanga moro no man tapoe den bakteria moro. Malaria, wan tra siki di e kiri sma, e kisi so wan 300 te go miti 500 miljoen sma ibri jari, èn so wan 2 miljoen sma e dede foe dati. Te wi doro a jari 2000, dan sma e froewakti taki AIDS sa kiri 1,8 miljoen sma na ini wan jari. „Na ini a ten disi, libisma e ondrofeni wan bigin foe siki di e panja go na ala sei”, na so a State of the World 1996 e taki.

„A boen njoensoe disi foe a kownoekondre sa preiki na heri grontapoe pe sma e libi” (Mateus 24:14)

Na ini 1997, Jehovah Kotoigi ben teki moro leki wán miljard joeroe foe preiki a boen njoensoe foe a Kownoekondre. Moro leki feifi miljoen Kotoigi e tjari a boskopoe disi go ala ten na sma na ini 232 kondre.

[Sma di abi a reti foe den prenki]

FAO photo/B. Imevbore

U.S. Coast Guard photo

[Prenki na tapoe bladzijde 4, 5]

Kresten ben lowe gowe foe Jerusalem foe di den ben de na ai na jejefasi