Joe e si Jerusalem ’hei pasa a moro prenspari sani di e meki joe prisiri’?
„Meki mi tongo tan fasi na a tapoesei foe mi inisei mofo, . . . efoe mi no ben sa meki Jerusalem kon hei, pasa a moro prenspari sani di e meki mi prisiri.” — PSALM 137:6
1. Fa foeroe djoe katiboman ben denki foe a foto di Gado ben froekisi?
SO WAN 70 jari ben pasa kaba sensi den fosi djoe katiboman, ben drai kon baka na Jerusalem na ini 537 b.G.T. A tempel foe Gado ben bow baka, ma a foto srefi ben de leki wan broko pranasi ete. Ini a pisi ten dati, wan njoen geslakti ben gro na ini katibo. A no abi misi taki foeroe foe den ben firi leki a psalm singiman di ben singi: „Efoe mi ben o frigiti joe, o Jerusalem, dan meki mi reti-anoe frigiti sani” (Psalm 137:5). Wan toe sma ben doe moro leki foe memre Jerusalem nomo; den ben sori nanga den sani di den ben doe taki Jerusalem ben kon hei, „pasa a moro prenspari sani di e meki [den] prisiri”. — Psalm 137:6.
2. Soema Esra ben de, èn fa a ben kisi blesi?
2 Foe eksempre, loekoe a priester Esra pikinso. Srefi bifo a ben drai go baka na en mamakondre, a ben wroko fajafaja foe horibaka gi den afersi foe soifri anbegi na ini Jerusalem (Esra 7:6, 10). Esra ben kisi foeroe blesi foe dati. Jehovah Gado ben poesoe na ati foe a kownoe foe Persia foe gi Esra a grani foe tjari wan tra groepoe katiboman go baka na Jerusalem. Moro fara, a kownoe ben gi den boen foeroe gowtoe nanga solfroe „foe moi Jehovah oso”. — Esra 7:21-27.
3. Fa Nehemia ben sori taki Jerusalem ben de a moro prenspari sani di a ben broko en ede nanga en?
3 So wan 12 jari baka dati, wan tra djoe ben de di ben teki boen bosroiti — Nehemia. A ben dini na ini a kownoe-oso foe Persia na Susan. Nehemia ben abi wan boen posisi leki wan man di ben kanti win gi Kownoe Artakserkses, ma dati no ben de „a moro prenspari sani di [ben] meki [Nehemia] prisiri”. Na presi foe dati, a ben wani gowe èn bow Jerusalem baka. Foeroe moen langa, Nehemia ben begi foe a sani disi, èn Jehovah Gado ben blesi en foe di a ben doe so. Di a kownoe foe Persia ben jere a sani di Nehemia ben broko en ede nanga dati, dan a kownoe ben gi Nehemia wan legre nanga wan toe brifi pe ben skrifi taki Nehemia abi a reti foe bow Jerusalem baka. — Nehemia 1:1–2:9.
4. Fa wi kan sori taki na anbegi foe Jehovah e pasa a moro prenspari sani di wi kan abi foe meki wi prisiri?
4 Sondro tweifri, Esra, Nehemia, nanga foeroe tra djoe di ben wroko makandra nanga den, ben sori taki na anbegi foe Jehovah di ben de na Jerusalem, ben de a moro prenspari sani gi den, moro leki iniwan tra sani — taki a ben ’pasa a moro prenspari sani di ben e meki den prisiri’, dati wani taki dati a ben hei moro ibri tra sani di ben kan meki den prisiri. Den sortoe sma dati de troetroe wan deki-ati gi ala sma na ini a ten disi di e si Jehovah, en anbegi, nanga en organisâsi di santa jeje e tjari, na a srefi fasi! Na so a de toe nanga joe? Joe e sori nanga a hori di joe e horidoro na ini wroko foe Gado taki a moro bigi sani di e meki joe prisiri na a grani foe anbegi Jehovah makandra nanga a pipel foe en di gi densrefi abra? (2 Petrus 3:11). Foe kisi moro deki-ati gi dati, meki wi poti prakseri na tapoe den moi bakapisi foe a waka di Esra ben teki go na Jerusalem.
Blesi nanga frantiwortoe
5. Sortoe bigi blesi den sma di ben e libi na Juda ben kisi na ini a ten foe Esra?
5 A groepoe foe so wan 6000 katiboman di ben drai kon baka nanga Esra, ben tjari gowtoe nanga solfroe gi a tempel foe Jehovah. A gowtoe nanga solfroe ben sa warti so wan 35 miljoen Amerkan dala nownow. Disi ben de so wan seibi tron moro foeroe gowtoe nanga solfroe leki den fosi katiboman ben man tjari kon. Den wan di ben tan na Jerusalem nanga Juda ben moesoe de Jehovah troetroe grantangi taki den kisi ala a jepi foe den libisma nanga den goedoe disi! Ma te Jehovah e gi foeroe blesi, dan dati e gi sma frantiwortoe toe. — Lukas 12:48.
6. San Esra ben kon si na ini en mamakondre, èn fa a ben handri?
6 Heri esi Esra ben kon si taki foeroe djoe, so srefi wan toe priester nanga owroeman, ben pasa Gado Wet foe di den ben trow nanga heiden oema (Deuteronomium 7:3, 4). Nanga reti, a ben sari srefisrefi foe a pasa di den ben pasa Gado en Wet froebontoe. „So esi leki mi ben jere foe a sani disi, mi ben priti mi krosi nanga mi skowroedjakti . . . èn mi ben tan sidon foe di mi no ben man bribi a tori” (Esra 9:3). Baka dati, ala di den Israèlsma di sani ben trobi den ben drape, Esra ben poeroe en ati kon na doro ini begi na Jehovah. Di Esra ben jere ala sma, dan a ben loekoe sjatoe baka fa Israèl no ben gi jesi na ini a ten di pasa èn fa Gado ben warskow foe den sani di ben o pasa efoe den ben go trow nanga heidensma foe a kondre. A ben kon na a bosroiti: „O Jehovah, a Gado foe Israèl, joe regtfardiki, bika wi de leki wan pipel di lowe komoto èn di tan abra soleki na a dei disi. Djaso wi de na joe fesi nanga wi fowtoe, bika foe dati ede, wi no man tanapoe na joe fesi.” — Esra 9:14, 15.
7. (a) Sortoe moi eksempre Esra ben gi ini a kisi di a ben kisi foe doe nanga ogri di sma ben doe? (b) Fa den wan di ben fowtoe ben handri na ini a ten foe Esra?
7 Esra ben gebroiki a wortoe „wi”. Ija, a ben poti ensrefi toe na ini a tori, ala di ensrefi no ben abi fowtoe. A bigi sari foe Esra èn a saka di a ben saka ensrefi na ini begi, ben naki na ati foe a pipel èn ben boeweigi den foe doe wroko di fiti berow. Den ben wani loesoe a problema na wan fasi di ben sa hati den — ala sma di ben pasa Gado Wet ben sa seni den dorosei wefi go baka na a mamakondre foe den wefi, makandra nanga den pikin di den ben meki. Esra ben agri nanga disi èn ben gi den wan di ben abi fowtoe a deki-ati foe kenki. Nanga a makti di Esra ben kisi foe a kownoe foe Persia, a ben abi a reti foe kiri den wan di ben pasa a wet, noso foe poeroe den wan dati foe Jerusalem nanga Juda (Esra 7:12, 26). Ma a ben gersi leki Esra no ben abi foe doe so wan sani. „A heri gemeente” ben taki: „Na wi tapoe a e kon foe doe soifri akroederi a wortoe foe joe.” Moro fara, den ben taki dati den fowtoe: „Wi ben tranga-ede toemoesi na ini na afersi disi” (Esra 10:11-13). Esra kapitel 10 e kari den nen foe 111 mansma di ben gi jesi na a bosroiti di den ben teki, foe di den ben seni den dorosei wefi foe den gowe makandra nanga den pikin di den oema disi ben meki.
8. Foe san ede a seni di den ben seni den dorosei wefi gowe, ben de wan sani foe a boen foe a heri libisma famiri?
8 A sani disi di den ben doe, no ben de gi a boen foe Israèl wawan ma so srefi toe gi a heri libisma famiri. Efoe no wan sani ben doe foe meki afersi waka boen baka, dan den Israèlsma ben kan tron neleki den nâsi lontoe den. Na ini a kefal dati, a famirilin foe a Pramisi Siri di ben sa tjari blesi gi a heri libisma famiri, no ben o de krin moro (Genesis 3:15; 22:18). A ben o de moeilek foe sori krinkrin soema na a Pramisi Siri leki wan bakapikin foe Kownoe David foe a lo foe Juda. So wan 12 jari baka dati, den poti prakseri baka na tapoe a prenspari afersi disi di „a siri foe Israèl ben prati ensrefi foe ala den doroseisma”. — Nehemia 9:1, 2; 10:29, 30.
9. Sortoe boen rai, bijbel e gi na den kresten di trow nanga sma di no de na bribi?
9 San den disiten foetoeboi foe Jehovah kan leri foe a tori disi? We, Kresten no de na ondro a Wet froebontoe (2 Korentesma 3:14). Na presi foe dati, den e gi jesi na „a wet foe Krestes” (Galasiasma 6:2). So boen, wan kresten di trow nanga wan sma di no de na bribi, e agri nanga a rai foe Paulus: „Efoe wan brada abi wan wefi di no de na bribi, èn tokoe a wefi e agri foe libi nanga en, dan a brada no moesoe gowe libi en” (1 Korentesma 7:12). Boiti dati, kresten di trow nanga wan sma di no de na bribi, abi a plekti foe bijbel foe wroko tranga foe meki a trowlibi foe den waka boen (1 Petrus 3:1, 2). A gi di son wan gi jesi na a moi rai disi, foeroetron ben abi leki bakapisi a blesi taki trowpatna di no de na bribi ben kenki a fasi fa den ben firi gi a troe anbegi. Son wan foe den ben tron getrow dopoe kresten srefi. — 1 Korentesma 7:16.
10. Sortoe sani kresten kan leri foe den 111 Israèlman di ben seni den dorosei wefi foe den gowe?
10 Tokoe, a kefal foe den Israèlsma di ben seni den dorosei wefi foe den gowe, e gi kresten di de den wawan sondro foe trow wan moi sani foe leri foe en. Den no moesoe bigin meki mofo nanga sma foe a tra geslakti di no de na bribi. A kan moeilek foe wai pasi gi so wan matifasi, a kan hati wan sma srefi foe doe so, ma a de a moro boen waka nanga libi di wan sma kan teki foe tan kisi den blesi foe Gado. Kresten e kisi a komando: „No kon na ondro wan tjatjari di no de a srefi nanga sma di no de na bribi” (2 Korentesma 6:14). Iniwan kresten di de en wawan sondro foe trow èn di wani trow, moesoe seti sani so, taki a kan trow nanga wan troetroe kompe bribiman. — 1 Korentesma 7:39.
11. Soleki fa a ben de nanga den Israèlman, dan fa wi kan kisi tesi foe si sortoe sani na a moro prenspari sani di e meki wi prisiri?
11 Na foeroe tra fasi toe, kresten tjari kenki kon di trawan sori den taki den e bigin waka na wan fasi di no de soleki fa bijbel e leri (Galasiasma 6:1). Ten na ten, a tijdschrift disi sori tapoe fasi fa wan sma e tjari ensrefi di no de akroederi bijbel èn di ben sa kan meki taki den sortoe sma disi no kan de wan pisi moro foe Gado en organisâsi. Na ini 1973 foe eksempre, a pipel foe Jehovah ben kon froestan heri boen taki a fowtoe gebroiki foe drug nanga a gebroiki foe tabaka na serjoesoe sondoe. Efoe wi wani doe moeiti foe waka èn libi leki fa Gado wani, dan wi moesoe „krin wisrefi foe ibri dotifasi foe skin nanga jeje” (2 Korentesma 7:1). Foeroe sma ben teki a bijbel rai disi na ati; den ben de klariklari foe pina foe den sani di ben o kon te den ben moesoe stòp wantronso nanga so wan gwenti nomo foe tan wan pisi foe Gado en krin pipel. Krin rai foe den Boekoe foe bijbel ben gi toe ini den tori soleki seks afersi, weri krosi, sorgoe wisrefi, èn fa foe gebroiki koni ini a tori foe wroko, prisiriten, nanga pokoe. Awansi sortoe gronprakseri foe bijbel wi e kisi foe jere, meki a de so taki wi de klariklari „foe kon boen baka”, neleki den 111 Israèl man (2 Korentesma 13:11). Disi sa sori taki a grani di wi abi foe anbegi Jehovah makandra nanga en santa pipel ’hei moro leki a moro prenspari sani di e meki wi prisiri’.
12. San ben pasa na ini 455 b.G.T.?
12 Baka di bijbel e taki foe a tori foe den dorosei wefi, a no e froeteri wi san ben pasa nanga Jerusalem na ini den 12 jari baka dati. Sondro tweifri, den birti kondre foe Israèl ben tron moro bigi feanti foe Israèl foe di Israèl ben broko foeroe trow froebontoe. Na ini 455 b.G.T., Nehemia ben doro na Jerusalem nanga wan groepoe sroedati di ben tjari en kon. A kownoe foe Persia ben poti en na wroko leki granman foe Juda èn a ben tjari wan toe brifi [nanga en] foe a kownoe pe a ben kisi a reti foe bow a foto baka. — Nehemia 2:9, 10; 5:14.
Den birti kondre di abi bigi-ai, e gens den
13. Sortoe fasi den falsi relisi birti kondre foe den djoe ben sori, èn fa Nehemia ben handri?
13 Den falsi relisi birti kondre, ben gens a sani di Nehemia ben wani doe di a ben kon drape. Den fesiman foe den ben e tapoe skreki gi Nehemia, foe di den ben aksi: „Na teige a kownoe oenoe e opo oensrefi?” Nehemia ben e sori bribi na ini Jehovah èn a ben piki: „A Gado foe hemel na a Wan di sa meki sani waka boen nanga wi, èn wisrefi, den foetoeboi foe en, sa opo, èn wi moesoe bow; ma oenoe, oenoe no abi wan prati, èn oenoe no man taki nanga reti dati wan sani na foe oenoe, èn no wan sma sa memre oenoe na Jerusalem” (Nehemia 2:19, 20). Di den ben bigin meki den skotoe, dan den srefi feanti ben spotoe: ’San den djoe di no man doe noti moro e doe? Den sa tjari den ston kon na libi foe den doti ipi? Efoe wan kraboedagoe ben sa djompo go na tapoe, foe troe a ben sa broko a stonskotoe foe den.’ Na presi foe piki den baka, Nehemia ben begi: „Jere, o wi Gado, bika wi tron wan tegoe sani; èn meki a kosikosi foe den kon na tapoe den eigi ede” (Nehemia 4:2-4). Dorodoro, Nehemia ben gi a moi eksempre disi foe poti froetrow na tapoe Jehovah! — Nehemia 6:14; 13:14.
14, 15. (a) Fa Nehemia ben doe nanga a kefar foe tranga ogridoe foe feanti? (b) Fa Jehovah Kotoigi ben man go doro nanga a bow-wroko foe den na jejefasi ala di gens de fajafaja?
14 Foe doe a prenspari preikiwroko di den kisi foe doe, dan Jehovah Kotoigi e froetrow na tapoe Gado toe na ini a ten disi. Gensman e proeberi foe tapoe a wroko disi foe di den e spotoe den kotoigi. Son tron, wan toe sma di abi belangstelling gi a Kownoekondre boskopoe e tapoe foe di den no man nanga a spotoe di trawan e spotoe den. Efoe spotoe no e wroko soleki fa den gensman ben wani, dan den kan kisi atibron èn den kan soekoe foe doe tranga ogri dorodoro. Disi na san den sma di ben bow a skotoe foe Jerusalem ben ondrofeni. Ma Nehemia ben weigri foe meki trawan skreki en èn frede en. Na presi foe dati, a ben gi den wan di ben bow, fetisani foe den kan feti te den feanti ben sa opo kon feti èn Nehemia ben tranga a bribi foe den wan disi, foe di a ben e taki: „No frede den. Prakseri Jehovah, a Wan di bigi èn e gi sma frede; èn feti gi oen brada, oen manpikin nanga oen oemapikin, oen wefi nanga oen oso.” — Nehemia 4:13, 14.
15 Neleki fa a ben de na ini den dei foe Nehemia, na so Jehovah Kotoigi kisi boen wrokosani foe go doro nanga a bow-wroko na jejefasi ala di gens de fajafaja. „A getrow èn koni srafoe” gi jeje njanjan di e tranga a bribi, èn dati e meki taki a pipel foe Gado kan doe boen wroko srefi na den presi pe a wroko no mag doe (Mateus 24:45). Leki wan bakapisi foe dati, Jehovah tan blesi a pipel foe en nanga gro na heri grontapoe. — Jesaja 60:22.
Problema na mindri densrefi
16. Sortoe problema di ben de na mindri den wrokoman di ben bow a skotoe foe Jerusalem ben de wan kefar gi a jejefasi foe den?
16 Di a wroko foe bow a skotoe foe Jerusalem baka ben go na fesi èn a skotoe ben kon moro hei, dan a wroko ben kon moro moeilek. Dati ben de a momenti di wan problema ben kon de krin foe si, èn di ben kan de wan kefar gi den wrokoman di ben abi en moeilek kaba. Foe di njanjan ben mankeri, dati meki wan toe djoe ben feni en tranga foe sorgoe taki den osofamiri foe den ben kisi njanjan èn foe pai den belasting foe den na a lanti foe Persia. Den djoe di ben moro goedoe, ben leni den tra djoe njanjan nanga moni. Ma tra fasi leki Gado Wet taki, dan den moro pôti Israèlsma ben moesoe panti den gron foe den nanga den pikin foe den, leki djaranti taki den ben sa pai a moni baka nanga rente (Exodus 22:25; Lefitikus 25:35-37; Nehemia 4:6, 10; 5:1-5). Now den wan di ben moesoe kisi a moni, ben tapoe skreki gi den trawan taki den ben o teki den gron foe den èn ben sa dwengi den foe seri den pikin foe den leki srafoe. Nehemia ati ben bron nanga a fasi disi fa den ben tjari densrefi sondro lobi èn pe den ben denki soso na materia goedoe. A ben handri gaw foe sorgoe taki Jehovah go doro foe blesi a wroko foe bow a skotoe foe Jerusalem baka.
17. San Nehemia ben doe foe sorgoe taki Jehovah go doro foe blesi a bow-wroko, èn san ben de a bakapisi?
17 „Wan bigi konmakandra” ben seti, èn Nehemia ben sori den moro goedoe Israèlsma krinkrin taki san den ben doe no ben plisi Jehovah. Dan a ben kroetoe den wan di ben fowtoe, so srefi wan toe priester, foe gi ala a rente moni baka di den ben teki èn foe gi den gron baka di sondro reti den ben teki na den wan di no ben man pai a rente. A de wan sani foe prèise taki den wan di ben fowtoe, ben taki: „Wi sa gi dati baka èn wi no sa aksi noti baka foe den. Wi sa doe neleki fa joe e taki.” Den wortoe disi no ben de soso wortoe, bika bijbel e taki dati „a pipel ben doe akroederi a wortoe [foe Nehemia]”. Èn a heri gemeente ben prèise Jehovah. — Nehemia 5:7-13.
18. Fa sma kon sabi Jehovah Kotoigi?
18 Fa a de na ini a ten foe wi? Na presi taki Jehovah Kotoigi e njan tra sma moni, den sma sabi Jehovah Kotoigi na foeroe presi leki sma di lobi foe gi sani na den kompe bribiman foe den èn na trawan di abi problema. Neleki fa a ben de na ini a ten foe Nehemia, disi abi leki bakapisi taki foeroetron nanga foeroe tangi sma ben prèise Jehovah. Ma na a srefi ten, „a getrow èn koni srafoe” ben feni en fanowdoe foe gi bijbel rai na ini bisnis afersi èn na ini a de di a de fanowdoe foe no njan tra sma moni na wan gridifasi. Na ini wan toe spesroetoe kondre a de wan gewoon sani foe aksi kefalek foeroe moni bifo den gi joe a trowmisi, ma bijbel e warskow sondro draidrai taki gridi sma nanga sma di e bedrigi trawan no sa kisi Gado Kownoekondre (1 Korentesma 6:9, 10). A boen fasi fa foeroe kresten e handri tapoe den sortoe rai disi, gersi a fasi fa den djoe ben si a sondoe foe njan a moni foe den brada foe den di ben moro pôti.
A skotoe foe Jerusalem ben kaba meki
19, 20. (a) Sortoe krakti a kaba foe a skotoe foe Jerusalem ben abi tapoe den relisi gensman? (b) Sortoe wini Jehovah Kotoigi ben ondrofeni na foeroe kondre?
19 Ala di ala den sortoe gens dati ben de, tokoe a skotoe foe Jerusalem ben kaba meki na ini 52 dei. Sortoe krakti disi ben abi tapoe den gensman? Nehemia ben taki: „So esi leki ala den feanti foe wi ben jere foe dati èn ala den nâsi lontoe wi ben kon si dati, dan wantronso den ben saka srefisrefi na ini den eigi ai, èn den ben kon sabi taki a wroko disi ben doe foe wi Gado ede.” — Nehemia 6:16.
20 Na ini a ten disi, feanti di e gens a wroko foe Gado e go doro na foeroe fasi èn na foeroe presi. Ma tokoe miljoenmiljoen sma e si taki a de foe soso taki sma e gens Jehovah Kotoigi. Foe eksempre, prakseri den feti di ben feti foe tapoe a preikiwroko na ini Nazi Doisrikondre, Owstoe Europa, èn foeroe kondre na Afrika. Ala den sortoe feti disi ben de lasi feti, èn foeroe sma e erken now taki ’a wroko disi e doe foe wi Gado ede’. Dati ben de wan troetroe paiman gi den owroe getrow man di ben meki na anbegi foe Jehovah ’moro hei leki a moro prenspari sani di e meki den prisiri’ na den sortoe kondre dati!
21. Na tapoe sortoe prenspari sani wi sa poti prakseri na ini a tra artikel?
21 Na ini a tra artikel, wi sa loekoe den prenspari sani baka di ben feni presi èn di ben meki na inwijding foe a skotoe foe Jerusalem di ben bow baka, wan prisiri sani. Wi sa poti prakseri toe tapoe a fasi fa a bow foe wan foto di bigi krinkrin moro a Jerusalem dati èn di de foe a boen foe a heri libisma famiri, e kon krosibei.
Joe e memre disi ete?
◻ Fa Esra nanga trawan ben prisiri nanga Jerusalem?
◻ Sortoe fowtoe Esra nanga Nehemia ben jepi foeroe djoe foe meki kon boen baka?
◻ Sortoe sani joe kan leri foe den tori foe Esra nanga Nehemia?
[Prenki na tapoe bladzijde 15]
A moro prenspari sani di Nehemia ben broko ede nanga en, ben de Jerusalem, èn no a boen wroko di a ben abi na Susan
[Prenki na tapoe bladzijde 16, 17]
Neleki Nehemia, wi moesoe begi taki Jehovah tjari wi èn gi wi krakti foe go doro nanga wi kefalek prenspari preikiwroko