„Gado lobi wan sma di e gi nanga prisiri”

JEHOVAH na a sma di lobi foe gi sani. Foe troe, bijbel e taki dati en na a Sma di e gi „ibri boen presenti nanga ibri volmaakti kado” (Jakobus 1:17). Loekoe foe eksempre den sani di Gado ben kria. A ben meki njanjan di switi, a no ben meki njanjan sondro tesi; bromki di abi moimoi kloroe, èn no nanga dòf kloroe; kefalek moi sondongo, no sondro taki a e brenki noso e skèin kloroe kon baka. Ija, ibri sani di Jehovah kria e boeweisi a lobi foe en nanga a lobi di a lobi foe gi sani (Psalm 19:1, 2; 139:14). Moro fara, Jehovah na wan Sma di e gi nanga prisiri. A e prisiri foe doe boen gi den foetoeboi foe en. — Psalm 84:11; 149:4.

Den Israèlsma ben kisi a komando foe sori a lobi di Gado lobi foe gi sani te den ben e handri nanga makandra. „Joe no moesoe meki joe ati kon tranga noso joe no moesoe tapoe joe anoe gi joe pôti brada”, Moses ben taigi den. „Awansi fa a no fa joe moesoe gi en, èn joe ati no moesoe gridi te joe e gi en” (Deuteronomium 15:7, 10). Foe di den ben moesoe gi nanga den ati, meki den Israèlsma ben moesoe prisiri te den ben e doe sani di ben e sori dati den ben lobi foe gi sani.

Kresten ben kisi den srefi sortoe froemane. Foe troe, Jesus ben taki dati „kolokoe de ini a gi foe sani” (Tori foe den Apostel 20:35). Den disipel foe Jesus ben de eksempre foe sma di ben gi nanga prisiri. Foe eksempre, bijbel e froeteri taki na Jerusalem den sma di ben tron bribiman „ben seri den sani di den ben abi èn den goedoe foe den èn den ben prati a moni di den ben kisi gi ala sma, akroederi san ibriwan sma ben sa abi fanowdoe”. — Tori foe den Apostel 2:44, 45.

Ma den Judeasma disi di ben lobi foe gi sani ben kon pôti baka ten. Bijbel no e taki soifri san ben meki den kon na ini a situwâsi dati. Son sabiman e taki dati na angriten di den e taki foe en na Tori foe den Apostel 11:28, 29 kande ben de frantiwortoe gi dati. Awansi fa a no fa, den kresten na Judea ben de na bigi nowtoe èn Paulus ben wani de seiker taki den ben kisi jepi. Fa a ben o doe dati?

Piki moni gi den wan na nowtoe

Paulus bigin soekoe jepi foe den gemeente te na Masedonia srefi èn a ben seti sani foe piki moni gi den kresten di ben e pina na Judea. Paulus ben skrifi den Korentesma: „Oenoe doe so toe, neleki fa mi ben gi komando na den gemeente foe Galasia. Ibri fosi dei foe a wiki, meki ibriwan foe oenoe poti wan sani na wan sei na ini en eigi oso èn kibri en, akroederi a fasi fa sani go boen gi en.”a —1 Korentesma 16:1, 2.

Paulus ben froewakti taki a moni disi ben moesoe seni go esi-esi na den brada na Jerusalem, ma den Korentesma no ben handri esi-esi tapoe den rai foe Paulus. Foe san ede? Den no ben firi gi a takroe situwâsi foe den brada foe den na Judea? Nôno, bika Paulus ben sabi taki den Korentesma ben „abi pasa marki na ini ala sani na ini bribi èn wortoe èn sabi èn ala serjoesoefasi” (2 Korentesma 8:7). A sori leki den ben abi foeroe foe doe nanga den tra prenspari afersi di Paulus ben skrifi den na ini a fosi brifi foe en gi den. Ma now a situwâsi na Jerusalem ben kon serjoesoe. So boen, Paulus ben taki foe na afersi na ini a di foe toe brifi foe en gi den Korentesma.

Wroko tapoe a lobi foe gi sani

Na a fosi presi, Paulus ben taigi den Korentesma foe den Masedoniasma di ben handri na wan boen fasi tapoe den moeiti di ben doe foe gi jepi. „Na ondro wan bigi tesi di ben kwinsi den”, Paul ben skrifi, „a prisiri di den abi pasa marki èn a hebi pina foe den, ben meki a lobi di den lobi foe gi foeroe, de pasa marki”. A no ben de fanowdoe foe poesoe den Masedoniasma foe gi sani. Na presi foe dati, Paulus ben taki dati „foe densrefi den ben tan begi wi nanga tranga foe kan kisi a grani foe gi wi sani nanga prisiri”. A lobi di den Masedoniasma ben lobi foe gi sani nanga prisiri e kon moro boen na fesi te wi e hori na prakseri taki den srefi ben ’pina hebi’. — 2 Korentesma 8:2-4.

A ben de so, taki di Paulus ben e prèise den Masedoniasma, dati a ben proeberi foe wiki wan jeje foe strei a mindri den Korentesma? Kwetikweti, bika a ben sabi taki disi no ben de wan joisti fasi foe boeweigi sma foe doe wan sani (Galasiasma 6:4). Moro fara, a ben sabi taki a no ben abi foe meki den Korentesma firi sjen meki den doe a joisti sani. Na presi foe dati, a ben de seiker taki den Korentesma ben lobi den brada foe den na Judea troetroe èn taki den ben wani gi bijdrage gi den moeiti di ben doe foe gi jepi. „Wan jari pasa kaba oenoe no ben bigin wawan foe doe, ma so srefi nanga a wani di oenoe ben wani foe doe en”, a ben taigi den (2 Korentesma 8:10). Foe troe, na ini wan toe afersi foe den moeiti di ben doe foe gi jepi, den Korentesma ben de wan eksempre. „Mi sabi a de di oenoe de klariklari foe doe sani, wan sani di mi e gafa oenoe na den Masedoniasma”, Paulus ben taigi den, ala di a ben taki toe: „A faja foe oenoe ben gi a moro bigi pisi foe den deki-ati” (2 Korentesma 9:2). Ma now den Korentesma ben moesoe doe a sani di den ben wani fajafaja.

Foe dati ede Paulus ben taigi den: „Ibriwan sma doe soleki fa a bosroiti na ini en ati, no nanga a firi foe no wani doe en noso na ondro dwengi, bika Gado lobi wan sma di e gi nanga prisiri” (2 Korentesma 9:7). Paulus en prakseri no ben de foe dwengi den Korentesma, bika wan sma no kan gi nanga prisiri te den e dwengi en. A de krin taki Paulus ben si taki wan joisti reide foe doe sani ben de kaba, taki ibriwan sma ben bosroiti kaba foe gi. Moro fara, Paulus ben taigi den: „Efoe a de di wan sma de klariklari foe gi, ben de kaba, dan disi boen spesroetoe akroederi den sani di wan sma abi, èn no akroederi den sani di wan sma no abi” (2 Korentesma 8:12). Ija, efoe a de di wan sma de klariklari foe gi — te lobi na a sani di meki taki a e gi — dan san a e pristeri, Gado sa feni en boen, awansi o pikinso a moni de. — Teki gersi Lukas 21:1-4.

Sma di e gi nanga prisiri na ini a ten disi

Den moeiti di ben doe foe jepi den kresten na Judea de wan toemoesi moi eksempre gi a ten foe wi. Jehovah Kotoigi doe wan preikiwroko na heri grontapoe, èn so den e tjari njanjan gi miljoenmiljoen sma di e angri na jejefasi (Jesaja 65:13, 14). Den e doe disi foe di den e gi jesi na a komando foe Jesus: „Go foe dati ede, èn meki disipel foe sma foe ala nâsi, èn dopoe den . . . leri den foe doe ala den sani di mi komanderi oenoe.” — Mateus 28:19, 20.

Foe doe a komando disi a no wan makriki wroko. A wani taki foe sorgoe gi zending-oso èn moro leki wán hondro bijkantoro na heri grontapoe. A wani taki toe foe bow Kownoekondre zaal nanga kongreshal so taki anbegiman foe Jehovah kan abi boen presi foe kon makandra èn foe gi makandra deki-ati (Hebrewsma 10:24, 25). Ten na ten, Jehovah Kotoigi e gi jepi toe na ini kontren pe natoeroe rampoe ben doe foeroe ogri.

Prakseri toe foe den bigi kostoe di meki foe druk poeblikâsi. Ibri wiki so wan 22.000.000 Waktitoren noso so wan 20.000.000 Ontwaakt! e druk. Boiti a jeje njanjan disi di e gi doronomo, dan joe abi miljoenmiljoen boekoe, brochure, cassette-lolo, nanga video-banti di e meki ibri jari.

Fa den e horibaka gi ala a wroko disi? Nanga friwani bijdrage. Den no e gi foe kon bekènti na sma noso foe den eigi wini, ma foe meki a troe anbegi gro. Foe dati ede, den sortoe bijdrage dati e tjari prisiri nanga a blesi foe Gado kon gi a sma di e gi (Maleaki 3:10; Mateus 6:1-4). Srefi pikin-nengre na mindri Jehovah Kotoigi e sori taki den na sma di lobi foe gi nanga prisiri. Foe eksempre, baka di Alison di abi fo jari èn di e libi na Amerkankondre, ben jere taki wan bigi winti ben pori wan kontren foe a kondre, dan a ben gi toe Amerkan dala leki bijdrage. „Disi na ala moni di mi ben abi na ini a dosoe pe mi e kibri moni”, a ben skrifi. „Mi sabi taki den pikin lasi ala den preisani nanga boekoe nanga popki. Kande joe kan gebroiki a moni disi foe bai wan boekoe gi wan pikin meisje di owroe leki mi.” Maclean, di abi aiti jari, ben skrifi taki a ben breiti taki no wan foe den brada dede na ini a bigi winti. A ben taki moro fara: „Mi meki 17 Amerkan dala, di mi nanga mi papa ben e seri wiel dòp. Mi ben o bai wan sani nanga mi moni, ma baka dati mi ben prakseri den brada.” — Loekoe a boksoe na tapoesei toe.

Foe troe, na ati foe Jehovah e prisiri te a e si taki jongoewan nanga owroewan e poti den Kownoekondre afersi foe en na a fosi presi te den e ’gi en grani nanga den warti sani foe den’ (Odo 3:9, 10). A no de foe taki, dati no wan sma kan meki Jehovah kon goedoe, bika na en abi ala sani (1 Kroniki 29:14-17). Ma foe horibaka gi a wroko na wan grani di e gi na anbegiman na okasi foe sori taki a lobi Jehovah. Wi e taigi ibriwan sma tangi foe di en ati ben meki en gi na so wan fasi.

[Foetoewortoe]

[Faki na tapoe bladzijde 26, 27]

Fasi fa son wan e gi bijdrage gi a wroko na heri grontapoe

Foeroe sma e poti moni na wan sei di den e poti na ini den bijdrage boksoe pe skrifi na tapoe: „Bijdrage gi a wroko foe a Genootschap di e doe na heri grontapoe — Mateus 24:14.” Ibri moen den gemeente e seni den bijdrage disi go na a edekantoro na Brooklyn, New York, noso na a bijkantoro foe a kondre foe den.

Friwani bijdrage foe moni kan seni langalanga go toe na a bijkantoro foe a Watch Tower Bible and Tract Society of Pennsylvania, Garnizoenspad 239, Distrikt Wanica. Joe kan gi so srefi gowtoe sani noso tra sani di abi waarde. Den bijdrage disi moesoe seni go nanga wan sjatoe brifi pe skrifi taki den sani disi na bijdrage.

Gi moni ondro spesroetoe kondisi

Moni kan gi na a Waktitoren Genootschap toe ondro wan spesroetoe seti pe a bijdrage kan seni go baka na a sma di ben gi en, efoe a de so taki a sma srefi abi a moni fanowdoe. Efoe joe wani sabi moro, dan grantangi meki kontakt nanga a bijkantoro na a adres di skrifi na tapoesei.

Meki plan foe gi bijdrage

Boiti taki moni kan gi langalanga èn moni kan gi ondro spesroetoe kondisi, tra fasi de foe gi sani so taki a Kownoekondre wroko na heri grontapoe kan abi winimarki foe dati. Disi abi na ini toe:

Verzekering: Joe kan poti a nen foe a Waktitoren Genootschap foe den kisi a moni foe wan levensverzekeringspolis noso foe wan pensjoenregeling.

Bankrekening: Bankrekening, boeweisi taki joe e poti moni na bangi, depositobewijs, noso a pensjoenmoni foe wan sma kan poti tapoe a nen foe a Waktitoren Genootschap foe den hori a moni wan pisi ten noso foe gi disi na a Genootschap te a sma dede, akroederi den markitiki foe a bangi foe a presi.

Aandelen nanga obligatie: Aandelen nanga obligatie kan gi na a Waktitoren Genootschap leki wan sani di wan sma kan gi langalanga noso na ondro wan seti pe den e tan pai a sma di gi den aandelen nanga obligatie.

Gron noso oso: Gron noso oso di kan seri, kan gi na a Waktitoren Genootschap langalanga noso a sma di gi en kan tan gebroiki a gron noso oso, so taki so langa a de na libi, a kan libi na ini. Kontakti moesoe meki nanga a Genootschap bifo wan sma poti iniwan gron noso oso tapoe a nen foe a Genootschap.

Testamenti nanga papira di e gi sma makti tapoe goedoe nanga moni: Sani noso moni di wan sma abi, kan gi na a Waktitoren Genootschap te a sma dede, nanga jepi foe wan testamenti di meki akroederi wet, noso a kan poti a nen foe a Genootschap leki sma di kisi a makti dati. Te wan relisi organisâsi e kisi den papira di e gi en a makti tapoe goedoe nanga moni, dan dati kan meki taki den winimarki di wan sma kan kisi na a sei foe belasting kan kon moro bigi.

Soleki fa den wortoe „meki plan foe gi” e sori, dan den sortoe fasi disi foe gi bijdrage e aksi foe a sma di e gi, taki a e meki plan na fesi. Foe jepi sma di wani meki a Genootschap feni boen foe a wán noso tra fasi fa a ben meki plan foe gi bijdrage, dati meki a Genootschap sreka wan brochure di nen Planned Giving to Benefit Kingdom Service Worldwide (Meki plan foe gi bijdrage, foe a boen foe a Kownoekondre wroko na heri grontapoe). A brochure ben skrifi leki wan piki tapoe den foeroe aksi di a Genootschap kisi ini a tori foe presenti, testamenti nanga papira di e gi sma makti tapoe goedoe noso moni. A brochure abi moro tori na ini di sma kan gebroiki foe meki plan ini a tori foe goedoe noso oso, moni nanga belasting. Èn a skrifi foe jepi sma na Amerkankondre di e meki plan foe gi a Genootschap wan spesroetoe presenti now noso di wani libi wan testamenti na baka te den dede foe di den feni taki dati na a moro boen fasi foe tjari wini kon gi den famiri èn gi densrefi.

Baka di foeroe sma leisi a brochure èn aksi rai na den wan di e wroko na a Planned Giving Desk, den ben man jepi a Genootschap èn na a srefi ten meki taki den winimarki di belasting e gi, kon moro bigi foe di den doe dati. Den moesoe seni piki a Planned Giving Desk èn a moesoe kisi wan eksemplaar foe a papira di e taki foe iniwan foe den sani disi di seti. Den wan di wani kisi wan pikin boekoe noso di wani sabi moro foe iniwan foe den seti disi foe meki plan foe gi, moesoe meki kontakti nanga a Planned Giving Desk a kan foe di a e skrifi noso bèl kon na a adres di skrifi djaso na ondrosei.

Watch Tower Bible and Tract Society of Pennsylvania

Garnizoenspad 239

Distrikt Wanica

Telefon: 0328054

[Faki na tapoe bladzijde 28]

Pikin-nengre na sma di e gi nanga prisiri toe!

Mi wani gi joe a moni disi foe meki moro boekoe gi wi. Mi poti a moni disi na wan sei foe di mi ben jepi mi papa. Grantangi gi ala a tranga wroko di joe e doe. — Pamela, seibi jari.

Mi e seni 6,85 Amerkan dala gi joe foe jepi bow moro Kownoekondre zaal. Mi wroko a moni disi a zomer disi di mi ben e seri stroop na strati. — Selena, siksi jari.

Mi ben kweki wan mamafowroe èn en ben meki wan kakafowroe nanga ete wan tra mamafowroe. Mi ben gi Jehovah a mamafowroe disi. Te foe kaba a meki dri tra mamafowroe èn mi ben seri den dati. Mi poti a moni na ini a brifi disi gi a wroko foe Jehovah. — Thierry, aiti jari.

Disi na ala a moni di mi abi! Grantangi, gebroiki en nanga koni. A no ben de makriki foe poti en na wan sei. Djaso mi abi 21 Amerkan dala. — Sara, tin jari.

Mi ben wini a fosi prijs gi wan sani di wi ben moesoe doe na skoro, èn mi ben moesoe go doro na a wega foe a staat. Agen mi ben wini a fosi prijs drape èn baka dati mi ben wini a di foe toe prijs na den finale foe a distrikt. Gi ala den wega disi mi ben wini moni. Mi ben wani prati pikinso foe a moni dati nanga a Genootschap. Mi denki taki mi ben man wini den prijs disi foe a leri di mi kisi na a theokrasia diniwroko-skoro. Mi ben de seiker foe misrefi di mi ben taki foe a verslag foe mi na fesi den memre foe a jury. — Amber, a di foe siksi klas.

Mi wani gi joe disi gi Jehovah. Aksi en san foe doe nanga en. A sabi ala sani. — Karen, siksi jari.

[Prenki na tapoe bladzijde 25]

Friwani bijdrage e horibaka gi den wroko foe Jehovah Kotoigi