Waka nanga Gado — Den fosi stap
„Kon krosibei na Gado, èn en sa kon krosibei na oenoe.” — JAKOBUS 4:8.
1, 2. Foe san ede joe ben sa taki dati a de wan bigi grani foe dini Jehovah?
A MAN ben pina na doengroe-oso foeroe jari langa. Baka dati a ben kisi a komando taki a ben moesoe kon na fesi a tiriman foe a kondre. Den sani ben pasa esi-esi. Wantronso, a strafoeman ben feni ensrefi na ini a diniwroko foe a moro makti kownoe foe grontapoe. A man di ben de wan strafoeman fosi, den ben poti en na ini wan posisi foe bigi frantiwortoe nanga kefalek bigi grani. Josef — a man di foetoe ben tai nanga keti wan leisi — ben waka nanga wan kownoe now! — Genesis 41:14, 39-43; Psalm 105:17, 18.
2 Nojaso, libisma abi na okasi foe doe diniwroko gi wan sma di bigi srefisrefi moro Farao foe Egipti. A Moro Heiwan foe na universum e gi wi alamala a kari foe dini en. Dati na troetroe wan lespeki grani di e gi wi frede foe dini èn foe kweki wan krosibei matifasi nanga Jehovah, na Almakti Gado! Den Boekoe foe bijbel e sori, taki Jehovah abi foe doe nanga majesteiti makti nanga glori èn so srefi korostoefasi, moifasi, nanga prisirifasi (Esekièl 1:26-28; Openbaring 4:1-3). Lobi de foe firi tranga na ini ala sani di A e doe (1 Johanes 4:8). Noiti Gado e lei (Numeri 23:19). Èn noiti Jehovah e meki den wan di de loyaal na en, lasi ati (Psalm 18:25). Efoe wi e hori wisrefi na den regtfardiki markitiki foe en, dan wi kan njan boen now foe kolokoe libi di wani taki wan sani, nanga têgo libi na prakseri (Johanes 17:3). No wan libisma di e tiri, kan pristeri wan sani di gersi den sortoe blesi nanga grani disi pikinso srefi.
3. Na sortoe fasi Noa ben „waka nanga a troe Gado”?
3 Langa ten pasa kaba, a famiri-edeman Noa ben teki a fasti bosroiti foe libi na ini wánfasi nanga a wani foe Gado èn san A abi na prakseri. Bijbel e taki foe Noa: „Noa ben de wan regtfardiki man. A ben sori foe de sondro fowtoe na mindri den sma foe en ten. Noa ben waka nanga a troe Gado” (Genesis 6:9). A no de foe taki dati Noa no ben hori na anoe foe Jehovah èn waka nanga en troetroe, bika srefi no wan sma noiti „si Gado wan ten” (Johanes 1:18). Na presi foe dati, a waka di Noa ben waka nanga Gado ben de so, taki a ben doe san Gado ben taigi en foe doe. Foe di Noa ben gi en libi foe doe a wani foe Jehovah, dati meki a ben njan boen foe wan waran, krosibei matifasi nanga na Almakti Gado. Neleki Noa, miljoenmiljoen sma na ini a ten disi ’e waka nanga Gado’ foe di den e libi na ini wánfasi nanga Jehovah en rai èn nanga a leri di a e gi. Fa wan sma e bigin so wan waka?
Soifri sabi de prenspari
4. Fa Jehovah e gi leri na a pipel foe en?
4 Efoe wi wani waka nanga Jehovah, dan wi moesoe kon leri sabi en fosi. A profeiti Jesaja ben taki na fesi: „A moesoe pasa na ini den kaba pisi foe den dei taki a bergi foe na oso foe Jehovah sa poti kon steifi moro hei leki na ede foe den bergi, èn foe troe den sa opo en kon moro hei leki den pikin bergi; èn na en ala den nâsi moesoe go. Èn foe troe, foeroe pipel sa go èn taki: ’Kon, meki wi opo go na a bergi foe Jehovah, na a oso foe a Gado foe Jakob; èn a sa leri wi foe den pasi foe en, èn wi sa waka na tapoe den foetoepasi foe en.’ Bika na Sion a wet sa komoto, èn a wortoe foe Jehovah sa komoto na Jerusalem” (Jesaja 2:2, 3). Ija, wi kan froetrow na tapoe taki Jehovah sa gi leri na ala den sma di e soekoe foe waka den pasi foe en. Jehovah gi wi en Wortoe, bijbel, èn a e jepi wi foe froestan bijbel. Wán fasi fa A e doe disi de nanga jepi foe „a getrow èn koni srafoe” (Mateus 24:45-47). Jehovah e gebroiki ’a getrow srafoe’ foe gi leri na jejefasi nanga jepi foe kresten konmakandra, oso-bijbelstudie sondro foe pai gi dati, èn poeblikâsi di abi den gron na tapoe bijbel. Gado e jepi en pipel foe froestan en Wortoe nanga jepi foe en santa jeje. — 1 Korentesma 2:10-16.
5. Foe san ede bijbel waarheid warti foeroe?
5 Ala di wi no e pai moni gi bijbel waarheid, tokoe a de wan diri sani. Te wi e studeri Gado Wortoe, dan wi e leri sani foe Gado srefi — a nen foe en, a fasi fa a de, san a abi na prakseri, èn a fasi fa a e handri nanga libisma. Wi e leri so srefi den piki tapoe den prenspari aksi foe a libi, piki di e meki sma kon fri; den aksi na: Foe san ede wi djaso? Foe san ede Gado e gi pasi meki pina de? San a tamara sa tjari? Foe san ede wi e kon owroe èn e dede? Libi de baka dede? Moro fara, wi e leri san na Gado wani gi wi, dati na, fa wi moesoe waka so taki wi kan plisi En srefisrefi. Wi e leri taki den sani di Gado e aksi foe wi, na sani di wi kan doe èn di e gi kefalek moi winimarki te wi e libi akroederi den sani disi. Sondro a leri foe Gado, noiti wi no ben o man froestan den sortoe sani disi.
6. Sortoe waka nanga libi, soifri sabi foe bijbel e jepi wi foe feti na baka?
6 Bijbel waarheid abi krakti èn a e boeweigi wi foe tjari kenki kon na ini wi libi (Hebrewsma 4:12). Bifo wi teki sabi na ini wi foe den Boekoe foe bijbel, dan a wan-enkri fasi fa wi kan waka, de soso „akroederi a seti foe sani foe a grontapoe disi” (Efeisesma 2:2). Ma soifri sabi foe Gado Wortoe e sori wi krinkrin wan tra fasi foe waka nanga libi, so taki wi kan „waka na wan fasi di warti gi Jehovah, foe plisi en dorodoro” (Kolosesma 1:10). Fa a de wan prisiri foe teki wi fosi stap foe bigin waka nanga Jehovah, a moro bigi Sma na ini a heri universum! — Lukas 11:28.
Toe prenspari stap — A gi di wan sma e gi ensrefi abra èn a teki di a e teki dopoe
7. Te wi e studeri Gado Wortoe, dan sortoe waarheid foe libisma tirimakti e kon de krin foe si?
7 Te wi e kon froestan bijbel moro nanga moro, dan wi e bigin ondrosoekoe den afersi foe libisma nanga wi eigi libi ini a jeje leti foe Gado Wortoe. Na so wi e kon si wan prenspari troe tori. A profeiti Jeremia ben taki langa ten pasa foe a troe tori dati, a ben skrifi: „Mi sabi heri boen, o Jehovah, taki a no de na a sma foe grontapoe foe a bepaal en pasi. A no de na wan man di e waka srefi foe bepaal pe foe poti en foetoe na pasi” (Jeremia 10:23). Wi libisma — wi alamala — abi a tiri foe Gado fanowdoe.
8. (a) San e boeweigi sma foe gi densrefi abra na Gado? (b) San na a gi di wan sma e gi ensrefi abra leki wan kresten?
8 Efoe wi e froestan a prenspari troe tori disi, dan dati e boeweigi wi foe soekoe tiri di e kon foe Jehovah. Èn lobi gi Gado e boeweigi wi foe gi wi libi abra na en. Foe gi wisrefi abra na Gado, wani taki dati wi e go na en na ini begi èn e pramisi en na wan serjoesoe fasi taki wi o gebroiki wi libi foe dini en èn foe waka den pasi foe en na wan getrow fasi. Te wi e doe disi, dan wi e waka baka na eksempre foe Jesus di ben pristeri ensrefi na Jehovah nanga a fasti bosroiti foe doe a wani foe Gado. — Hebrewsma 10:7.
9. Foe san ede sma e gi den libi abra na Jehovah?
9 Noiti Jehovah Gado e poti hebi na tapoe wan sma, noso e dwengi wan sma, foe gi ensrefi abra na en. (Teki gersi 2 Korentesma 9:7.) Boiti dati, Gado no e froewakti taki iniwan sma sa gi en libi abra na en foe di wantronso a sma ben abi a firi, ma di ben lasi gowe baka wan sjatoe pisi ten. Fosi wan sma teki dopoe, dan a moesoe de wan disipel kaba, èn dati e aksi foe en taki a e meki moeiti foe teki sabi na ini en (Mateus 28:19, 20). Serjoesoe, Paulus ben begi den wan di ben dopoe kaba foe ’pristeri den skin leki wan srakti-ofrandi di de libilibi, santa èn e fiti Gado ai, wan santa diniwroko nanga a krakti foe den denki’ (Romesma 12:1). Na so wan srefi fasi foe gebroiki a krakti foe wi foe denki e meki taki wi e gi wisrefi abra na Jehovah Gado. Baka di wi leri san de ini a tori èn wi prakseri boen foe dati, dan wi wani srefisrefi foe gi wi libi abra na Gado èn wi e prisiri foe doe dati. — Psalm 110:3.
10. Fa a gi di wan sma gi ensrefi abra, abi foe doe nanga a teki di a sma e teki dopoe?
10 Baka di wi go wi wawan na ini begi na fesi Gado foe taigi en taki wi abi a fasti bosroiti foe waka den pasi foe en, dan wi e teki a tra stap. Wi e meki sma kon sabi na poebliki taki wi gi wi libi abra foe di wi e teki dopoe na ini watra. Na a fasi disi wi e meki bekènti na poebliki taki wi doe wan serjoesoe pramisi foe doe a wani foe Gado. Di Jesus ben bigin nanga en diniwroko na grontapoe, dan Johanes ben dopoe Jesus, èn na so Jesus ben gi wi wan eksempre (Mateus 3:13-17). Baka ten, Jesus ben gi den bakaman foe en a komando foe meki disipel foe sma èn dopoe den. Foe dati ede, a gi di wan sma e gi ensrefi abra èn e teki dopoe, na prenspari stap gi ibriwan sma di e winsi foe waka nanga Jehovah.
11, 12. (a) Fa wi ben sa kan agersi a teki di sma e teki dopoe nanga wan trow? (b) Sortoe srefi sortoe fasi de na mindri a matifasi foe wi nanga Jehovah èn na mindri trowmasra nanga trow-oema?
11 A gi di wan sma e gi ensrefi abra èn a teki di a e teki dopoe foe tron wan disipel foe Jesus Krestes, e gersi pikinso a trow di wan sma e trow. Na ini foeroe kondre, difrenti sani e pasa bifo a trowdei. Wan man nanga wan oema e miti makandra, den e kon leri sabi makandra, èn den e kon lobi makandra. Baka dati den e meki mofo foe trow. A trow-oso na wan meki bekènti foe wan sani di ben bosroiti pe den toe sma ben de den wawan — foe trow èn baka dati libi makandra leki man nanga oema. A trow-oso na a sani di e sori sma na poebliki, taki den toe sma bigin a spesroetoe sortoe matifasi dati. A dei dati na a bigin foe a trowlibi. Na so toe, dopoe na a bigin foe wan libi pe wan sma e gi enrefi foe waka nanga Jehovah na ini wan matifasi pe a sma gi ensrefi abra na en.
12 Poti prakseri na tapoe wan tra eksempre foe toe sani di gersi makandra. Baka a trow dei foe wan man nanga wan oema, dan a lobi na mindri den toe sma disi moesoe kon moro dipi èn moesoe kon moro bigi. Foe kon moro krosibei na makandra, dan ala den toe trowpatna moesoe meki moeiti sondro foe denki densrefi wawan, foe tan abi wan matifasi na ini a trowlibi èn foe meki dati kon moro tranga. Ala di wi no e bigin wan trowlibi nanga Gado, tokoe a de so taki baka te wi teki dopoe, wi moesoe wroko foe tan abi wan krosibei matifasi nanga Jehovah. A e si èn e warderi den moeiti di wi e meki foe doe a wani foe en èn a e kon krosibei na wi. „Kon krosibei na Gado,” na so a disipel Jakobus ben skrifi, „èn en sa kon krosibei na oenoe.” — Jakobus 4:8.
Waka na ini den foetoestap foe Jesus
13. Te wi e waka nanga Gado, dan na baka na eksempre foe soema wi moesoe waka?
13 Foe waka nanga Jehovah, wi moesoe teki na eksempre di Jesus Krestes ben gi wi. Na apostel Petrus ben skrifi: „Foe a sani disi ede den ben kari oenoe, bika srefi Krestes ben pina foe oenoe ede, èn ben libi gi oenoe wan eksempre foe waka soifri na ini en foetoestap” (1 Petrus 2:21). Foe di Jesus ben de volmaakti èn wi de onvolmaakti, dati meki wi no kan waka baka na eksempre di Jesus gi wi sondro foe wi meki fowtoe. Ma tokoe, Jehovah e froewakti foe wi taki wi sa doe ala san wi man. Meki wi poti prakseri na tapoe feifi sani foe Jesus en libi nanga en diniwroko di kresten di gi densrefi abra, kan meki moeiti foe waka na baka dati.
14. Sortoe sani de toe na ini a sabi di wan sma sabi Gado Wortoe?
14 Jesus ben abi wan soifri èn finifini sabi foe Gado Wortoe. Di Jesus ben doe a diniwroko foe en, dan ibri tron baka a ben taki sani di a ben teki poeroe foe den Hebrew Boekoe foe bijbel (Lukas 4:4, 8). A no de foe taki, dati den ogri relisi fesiman foe a ten dati, ben teki sani taki toe di den ben poeroe foe den Boekoe foe bijbel (Mateus 22:23, 24). A difrenti ben de taki Jesus ben froestan san den Boekoe foe bijbel ben wani taki, èn a ben gebroiki dati na ini en libi. A no ben sabi den soifri wortoe foe a Wet wawan, ma a ben sabi so srefi san a Wet ben wani leri wan sma troetroe. Efoe wi e waka baka na eksempre foe Krestes, dan wisrefi toe moesoe meki moeiti foe froestan Gado Wortoe, kon sabi san a wani taki, noso san a wani leri wi troetroe. Efoe wi e doe so, dan wi kan tron wrokoman di Gado feni boen èn di man „gebroiki a wortoe foe waarheid na wan reti fasi”. — 2 Timoteus 2:15.
15. Fa Jesus ben gi wi wan eksempre fa foe taki foe Gado?
15 Krestes Jesus ben taki nanga trawan foe a hemel Tata foe en. Jesus no ben hori a sabi di a ben abi foe Gado Wortoe, gi ensrefi. Srefi den feanti foe en ben kari en „Leriman”, bika ala presi pe Jesus ben go, a ben taki nanga tra sma foe Jehovah èn san Jehovah abi na prakseri (Mateus 12:38). Jesus ben preiki na poebliki na ini a birti foe a tempel, na ini snoga, na ini foto, èn na ini boitipresi (Markus 1:39; Lukas 8:1; Johanes 18:20). Jesus ben gi leri na wan sari-ati fasi èn na wan switi fasi èn ben e sori lobi gi den wan di a ben jepi (Mateus 4:23). Den wan di e waka baka na eksempre foe Jesus, e feni so srefi foeroe presi nanga fasi foe leri trawan foe Jehovah Gado èn den kefalek moi sani di a abi na prakseri.
16. O krosibei a matifasi foe Jesus ben de nanga den kompe anbegiman foe Jehovah?
16 Jesus ben firi wan krosibei banti nanga tra sma di ben anbegi Jehovah. Di Jesus ben taki nanga den ipi-ipi sma na wan okasi, dan en mama èn den brada foe en di no ben de na bribi, ben kon foe taki nanga en. A bijbel tori e taki: „Wan sma ben taigi en: ’Loekoe! Joe mama nanga den brada foe joe e tanapoe na dorosei èn den e proeberi foe taki nanga joe.’ A ben piki a sma di ben e taigi en den sani disi, taki: ’Soema na mi mama, èn soema na den brada foe mi?’ Èn ala di a ben e langa en anoe go na den disipel foe en, a ben taki: ’Loekoe! Mi mama nanga den brada foe mi! Bika ibriwan sma di e doe a wani foe mi Tata di de na hemel, a sma dati na mi brada nanga sisa nanga mama’ ” (Mateus 12:47-50). Disi no wani taki dati Jesus no ben wani en famiri moro, bika sani di ben pasa baka dati ben sori taki dati no de so (Johanes 19:25-27). Ma a tori disi e poti krakti na tapoe a lobi di Jesus ben abi gi den kompe bribiman foe en. So a de toe na ini a ten disi, taki den sma di e waka nanga Gado e soekoe tra foetoeboi foe Jehovah leki kompe èn den e kon lobi den moro nanga moro. — 1 Petrus 4:8.
17. Fa Jesus ben firi foe a doe di a ben e doe a wani foe en hemel Tata, èn fa disi moesoe abi krakti na wi tapoe?
17 Jesus ben sori lobi gi en hemel Tata, foe di a ben e doe a wani foe Gado. Jesus ben gi jesi na Jehovah na ini ala sani. Jesus ben taki: „Mi njanjan de, foe mi doe a wani foe en di ben seni mi kon èn foe kaba a wroko foe en” (Johanes 4:34). Krestes ben taki so srefi: „Ala ten mi e doe den sani di e plisi en” (Johanes 8:29). Jesus ben lobi en hemel Tata sote taki „a ben saka ensrefi èn ben gi jesi te na dede, ija, dede na wan pina-oedoe” (Filipisma 2:8). Jehovah foe en sei ben blesi Jesus, ben e hei en foe kisi wan posisi foe makti nanga grani, soso Jehovah srefi ben de na en tapoe (Filipisma 2:9-11). Neleki Jesus, wi e sori wi lobi gi Gado foe di wi e hori den komando foe en èn foe di wi e doe a wani foe en. — 1 Johanes 5:3.
18. Na sortoe fasi Jesus ben gi wan eksempre ini a tori foe begi?
18 Jesus ben de wan man di ben e begi. Jesus ben e begi di a ben teki dopoe (Lukas 3:21). Bifo Jesus ben e teki den 12 apostel foe en, a ben teki a heri neti foe begi (Lukas 6:12, 13). Jesus ben leri den disipel foe en fa foe begi (Lukas 11:1-4). Na a neti bifo a dede foe en, a ben e begi gi den disipel foe en èn a ben e begi nanga den (Johanes 17:1-26). Begi ben de wan prenspari pisi foe a libi foe Jesus, soleki fa a moesoe de toe na ini wi libi, foe di wi na bakaman foe Jesus. Fa a de wan grani foe taki nanga na Universeel Soeverein na ini begi! Moro fara, Jehovah e gi piki na tapoe begi, bika Johanes ben skrifi: „Disi na a froetrow di wi abi na ini en, taki, awansi san wi e aksi akroederi en wani, a e jere wi. Moro fara, efoe wi sabi taki a e jeri wi na ini ala sani di wi e aksi en, dan wi sabi taki wi sa abi den sani di wi e aksi, foe di wi ben aksi en den sani.” — 1 Johanes 5:14, 15.
19. (a) Na baka sortoe eigifasi foe Jesus wi moesoe waka? (b) Na sortoe fasi wi e kisi winimarki te wi e studeri a libi nanga a diniwroko foe Jesus?
19 Wi kan leri so foeroe sani te wi e ondrosoekoe a libi nanga a diniwroko foe Jesus na grontapoe, finifini! Go prakseri foe den eigifasi di a ben sori: lobi, sari-ati, switifasi, krakti, balansifasi, reidelekfasi, sakafasi, deki-ati, nanga a denki di a no ben denki ensrefi wawan. O moro wi e leri foe Jesus, o moro wi wi e angri foe de getrow bakaman foe en. A sabi di wi abi foe Jesus e meki wi kon moro krosibei toe foe Jehovah. Te foe kaba, Jesus ben sori na wan volmaakti fasi fa en hemel Tata de. A ben abi so wan krosibei matifasi nanga Jehovah, dati a ben kan taki: „A sma di si mi, si a Tata toe.” — Johanes 14:9.
Froetrow na ini Gado foe horibaka gi joe
20. Fa wi kan kisi froetrow na ini a waka di wi e waka nanga Jehovah?
20 Te pikin-nengre e bigin foe leri waka, dan den no e tanapoe kánkan ete te den e teki den stap foe den. Fa den e leri foe waka nanga froetrow? Soso te den e waka èn e horidoro. We, den wan di e waka nanga Jehovah e meki ala moeiti foe waka nanga froetrow èn e tan waka nanga en sondro degedege. A sani disi toe, e teki ten èn a e aksi foe wan sma moesoe horidoro. Paulus ben sori o prenspari a de foe horidoro te wi e waka nanga Gado, di a ben skrifi: „Te foe kaba brada, wi e begi oenoe èn e froemane oenoe ini a nen foe Masra Jesus, neleki fa oenoe ben kisi leri foe wi foe a fasi fa oenoe moesoe waka èn plisi Gado, soleki fa oenoe e waka kaba, te joe e loekoe en boen, taki oenoe ben sa tan doe disi moro nanga moro.” — 1 Tesalonikasma 4:1.
21. Te wi e waka nanga Jehovah, dan foe sortoe blesi wi kan njan boen?
21 Efoe wi gi ala san wi abi foe dini Gado, dan a sa jepi wi foe tan waka nanga en (Jesaja 40:29-31). No wan sani di a grontapoe disi kan gi, wi kan teki gersi nanga den blesi di Gado e gi den sma di e waka den pasi foe en. En na ’a Sma di e leri wi foe gi wisrefi wini, a Sma di e meki wi waka na tapoe a pasi di wi moesoe waka. Èn efoe wi troetroe ben sa poti prakseri nomo na tapoe den komando foe en, dan a vrede foe wi ben sa tron leki wan liba, èn a regtfardikifasi foe wi leki den skwala foe se’ (Jesaja 48:17, 18). Efoe wi e teki a kari foe waka nanga Gado èn efoe wi e doe disi na wan getrow fasi, dan wi kan njan boen foe vrede nanga Gado foe têgo.
San joe ben sa piki?
◻ Foe san ede a de wan grani foe waka nanga a troe Gado?
◻ Foe san ede studeri, gi wisrefi abra, èn teki dopoe na den fosi stap foe waka nanga Jehovah?
◻ Fa wi ben sa kan waka na ini den foetoestap foe Jesus?
◻ Fa wi doe sabi taki Jehovah sa horibaka gi wi te wi e waka nanga en?
[Prenki na tapoe bladzijde 13]
Studeri, gi wisrefi abra, èn teki dopoe na den fosi stap foe waka nanga Gado