Troetroe jepi gi na osofamiri

„A de wan eerlijk sani foe taki dati den osofamiri na ini Amerkankondre de na ini wan moeilek situwâsi. Wi no man srefisrefi foe taki wan tra sani te wi e si a nomroe foe sma di e broko trow, a nomroe foe sma di gebore sondro taki den papa nanga mama ben trow, [nanga] den kefal pe sma e meshandri jongoe pikin èn den trowpatna foe den.”

DEN sani disi di Tom Brokaw taki, wan njoensoeman na tapoe telefisi foe Amerkankondre, de so gi moro foeroe foe den kondre. San a moeilek situwâsi disi wani taki?

Na foeroe fasi na osofamiri na a moro prenspari pisi foe bow wan libimakandra. Efoe na osofamiri de na ini problema, dan a libimakandra de na ini problema toe. Boiti dati, na osofamiri na a presi pe den pikin e kisi jepi na emotioneel sei èn na moni sei. A de a presi pe den e leri den fosi èn moro prenspari lès foe a libi. Te na osofamiri de na ini problema, dan san den pikin e leri dan? Pe den kan feni seikerfasi? Sortoe bigisma den sa tron?

Jepi de gi na osofamiri na ini a moeilek ten disi pe den de na ini? Ija. Na osofamiri na wan seti di Gado srefi ben meki (Genesis 1:27, 28). Èn a gi tiri di de tranga fanowdoe gi na osofamiri, na ini en Wortoe, bijbel (Kolosesma 3:18-21). A troe, wi no man kenki a heri libimakandra, ma wi kan gebroiki a rai foe bijbel na ini wi eigi osofamiri. Wi wani froeteri joe foe wan toe sma di ben doe dati èn den boen bakapisi di den ben kisi foe dati.

A tapoe den foe no broko trow

Na ini foeroe kondre so wan 50 procent foe ala den trow e broko. Dati na wan bigi kontren pe a no e go boen srefisrefi nanga a fasi fa libisma e handri nanga makandra! A troe, foeroe foe den sma di foe a sani disi ede e tron wan papa noso mama di de en wawan, e doe wan kefalek boen wroko te den e kweki den pikin foe den. Ma moro foeroe sma seiker ben sa agri, taki a moro boen te wan trowpaar kan loesoe den problema foe den èn tan nanga makandra.

A trowlibi foe wan trowpaar na den Salomon Èilanti ben o tron wan rampoe. A masra, a manpikin foe wan edeman, ben abi ogri-atifasi èn ben abi foeroe takroe gwenti. A libi ben moeilek so kefalek gi en wefi, taki a wefi ben proeberi foe kiri ensrefi. Ne, a masra ben agri foe studeri bijbel nanga Jehovah Kotoigi. A ben leri taki ibri sma di wani plisi Gado no moesoe sabi wawan san ogri, ma a „no [moesoe] wani si den sani di no boen, na ai” toe (Psalm 97:10). Dati wani taki dati a no moesoe wani si sani na ai soleki lei, foefoeroe, ogri di e doe nanga tranga, nanga droengoefasi. A ben gi jesi na a rai disi èn heri esi a ben tapoe nanga den takroe gwenti foe en èn nanga na ogri-atifasi foe en. En wefi ben froewondroe foe si a fasi fa a ben kenki, èn a trowlibi foe den ben kon moro boen srefisrefi, bika foe a krakti foe Gado Wortoe.

Na ini Zuid-Afrika wan oema di de wan foe den Kotoigi foe Jehovah ben jere taki en wrokobasi nanga a masra foe en wrokobasi ben e prakseri foe broko trow. A Kotoigi ben taki nanga en basi foe a fasi fa Gado e prakseri foe a trowlibi èn ben sori en a boekoe di nen A sroto gi wan kolokoe osofamiri. A boekoe disi di Jehovah Kotoigi tjari kon na doro, e poti krakti tapoe den bijbel gronprakseri di abi foe doe nanga a trowlibi, èn a e poti spesroetoe krakti tapoe a fasi fa bijbel e jepi trowpaar foe loesoe den problema. A wrokobasi nanga en masra ben leisi a boekoe èn ben proeberi serjoesoe foe gebroiki a bijbel rai di a boekoe e gi. Leki wan bakapisi foe dati, den ben bosroiti taki den no o broko trow — èn nanga disi ete wan trow ben tan boen foe di den ben gebroiki den bijbel gronprakseri.

Difrenti relisi na ini wan osofamiri

Fa a de nanga wan trowlibi pe den trowpaar abi difrenti relisi? Bijbel e gi kresten na wan troe fasi a rai foe trow „soso na ini Masra” (1 Korentesma 7:39). Ma sontron wan trowpatna e kenki en relisi. Dati wani taki dati a trowlibi moesoe tapoe? Kwetikweti.

Den ben aksi wan oema na ini Botswana di no so langa pasa ben tron wan foe den Kotoigi foe Jehovah, fa en njoen bribi ben meki a kenki. A ben aksi en masra foe piki gi en, èn disi na san a masra ben taki: „Sensi a ten di mi wefi tron wan foe den Kotoigi foe Jehovah, mi ben si foeroe boen kenki na en. Now a abi wan tiri èn koni krakti di a no ben abi bifo. A ben abi a krakti èn na overtoigi foe tapoe nanga smoko, wan takroe sani di mi no man wini ete. Mi wefi e sori moro lobi nanga firi gi den pikin èn gi mi, èn so srefi gi tra sma. A e froedrage sani moro, spesroetoe foe den pikin. Mi e si en na ini a diniwroko foe jepi tra sma foe meki den libi kon moro boen. Mi si boen kenki na misrefi toe. Mi e denki dati disi de so bika foe na eksempre foe en.” Bijbel gronprakseri ben abi boen bakapisi na ini a trowlibi disi srefisrefi! Foeroe tra sma di no de Kotoigi ben taki den srefi sortoe sani foe den trowpatna foe den di de Kotoigi.

Te papa no e doe den frantiwortoe foe en

A matifasi na mindri wan papa nanga en pikin de wan prenspari sani foe bow wan tranga osofamiri. Na apostel Paulus ben gi a rai: „Oenoe, papa, no tanteri den pikin foe oenoe, ma tan kweki den na ini a tranga leri èn a serjoesoe froemane foe Jehovah” (Efeisesma 6:4). Wi kan froestan foe dati ede, taki wan artikel na ini The Wilson Quarterly ben taki dati foeroe foe den problema na ini a libimakandra ben de a frantiwortoe foe papa di no ben doe san den moesoe doe. Na artikel ben taki: „Na mindri 1960 nanga 1990, a nomroe foe pikin di no e libi nanga a troetroe papa foe den kon toe tron moro foeroe . . . A doe di papa no e doe den frantiwortoe foe den, na wan prenspari sani di e meki foeroe foe den moro serjoesoe problema de di e froeferi a libimakandra foe Amerkankondre.”

Disi wani taki dati den pikin di abi papa di no e gi den tiri seiker no sa abi boen bakapisi? Nôno. A psalm singiman foe owroeten ben taki: „Efoe mi eigi papa nanga mi eigi mama ben gowe libi mi, dan Jehovah srefi ben sa teki mi” (Psalm 27:10). Na ini Thailand, wan boi di abi neigi jari ben kon si taki disi de troe. A ben lasi en mama di a ben de wan beibi, èn en papa di no ben wani en, ben libi en gi en granmama. Foe di a ben firi taki sma no wani en èn sma no lobi en, meki a boi ben opo ensrefi teige tiri èn ben kisi wan takroe nen leki wan sma di lobi foe doe trawan ogri. A ben de wan kefar srefi gi en granmama. Toe foeroeten preikiman foe Jehovah Kotoigi di ben si taki nofotron a ben tanapoe dorosei foe a Kownoekondre zaal foe a kontren, ben kari en wan leisi foe kon na a oso foe den.

Den ben froeteri en foe Gado — taki En, leki wan papa, lobi den pikin foe en. Den ben taki toe foe a Paradijs na grontapoe di Gado pramisi den libisma di de getrow (Openbaring 21:3, 4). Ala den sani disi ben hari a boi, èn ibri dei a ben kon baka foe leri moro. Den Kotoigi ben taigi en taki a ben sa moesoe tapoe foe doe sma ogri efoe a wani troetroe taki Gado moesoe de en Papa. Disi ben de akroederi den wortoe foe Paulus gi den Romesma: „So langa a e anga foe oenoe, abi vrede nanga ala sma” (Romesma 12:18). A ben sa moesoe abi switifasi toe nanga en granmama (1 Timoteus 5:1, 2). Heri esi a ben gebroiki den bijbel gronprakseri — èn seiker dati ben meki na osofamiri libi foe en nanga en granmama kon moro boen (Galasiasma 5:22, 23). Den kenki di den birtisma ben si na ini en ben naki den ati so kefalek taki den ben wani meki den eigi pikin foe den e studeri bijbel nanga Jehovah Kotoigi!

Wan jeje foe vrede

Na apostel Paulus ben skrifi den Kolosesma: „Weri lobi gi oensrefi, bika a de wan volmaakti banti foe wánfasi. Meki so srefi a vrede foe a Krestes basi oen ati” (Kolosesma 3:14, 15). Wan jeje foe vrede nanga wan dipi lobi seiker sa tai wan osofamiri na makandra. Èn den kan meki pratifasi di ben de langaten na ini wan famiri kon boen baka. Rukia di e libi na ini Albania, no ben taki nanga en brada moro leki 17 jari langa foe wan famiri trobi ede. Di a ben studeri bijbel nanga Jehovah Kotoigi, dan a ben leri taki ibri foetoeboi foe Gado e kisi a deki-ati foe abi vrede nanga tra sma. „Meki a soekoe vrede èn doe moeiti foe kisi en.” — 1 Petrus 3:11.

Rukia ben froestan taki a ben moesoe soekoe vrede nanga en brada. A ben begi heri neti, èn a tra mamanten ala di en ati ben naki tranga, a ben waka go na a oso foe en brada. A bradapikin foe Rukia ben opo a doro èn ben aksi nanga froewondroe: „San joe e doe djaso?” Na wan tiri fasi Rukia ben aksi foe miti en brada, èn a ben taki dati a ben wani meki vrede nanga en. Foe san ede? Bika a ben froestan now taki disi na san Gado wani. En brada ben handri boen, èn den ben kon na makandra baka nanga brasa èn nanga watra-ai foe prisiri ede — wan famiri ben kon na wán baka, bika a ben gebroiki den bijbel gronprakseri.

Takroe kompe

„Na ini a ten disi, pikinmoro ibri pikin e loekoe telefisi seibi joeroe langa ibri dei. Te den klari a lagiskoro, dan a pikin si moro leki aiti doesoen kiri nanga wán hondrodoesoen ogridoe.” Na so a boekoe The 7 Habits of Highly Effective Families e taki. Sortoe krakti den sani di wan pikin e si, abi na en tapoe? „Sabiman” no e agri nanga densrefi na ini na afersi dati, ma bijbel e warskow tranga teige takroe kompe. A e taki foe eksempre: „A sma di abi foe doe nanga den wan sondro froestan, a no sa go boen nanga en” (Odo 13:20). A e taki toe: „Takroe kompe e pori boen gwenti” (1 Korentesma 15:33). Na osofamiri libi kan kon moro boen te na wan koni fasi wi e froestan taki a gronprakseri disi de troe, awansi a takroe kompe na libisma srefi, noso a de na tapoe wan telefisi programa.

Wan mama na ini Luxemburg ben e studeri bijbel nanga wan foe den Kotoigi foe Jehovah. Wan dei a ben taigi a Kotoigi, taki na neti joeroe den toe oemapikin foe en di abi seibi nanga aiti jari, ben e meki trobi srefisrefi èn lobi foe feti. A Kotoigi ben aksi en san den meisje ben e doe teneti. A mama ben taki dati den ben e loekoe telefisi ala di en e krin a koekroe. Sortoe programa? „O, wan toe tekenfilm”, a mama ben piki. Di a Kotoigi ben taigi en taki foeroetron den sortoe programa disi abi foeroe ogridoe na ini, dan a mama foe den meisje ben pramisi taki a ben o hori ai na tapoe sani.

A dei na baka srefi, a mama ben froeteri taki a ben skreki srefisrefi di a ben si den tekenfilm di den oemapikin foe en ben e loekoe. Den film e sori bigi takroe monster di no e bèsta na dorosei foe grontapoe, èn di na wan ogri-ati fasi e broko ala sani di de na tapoe den pasi. A ben taigi den oemapikin foe en taki Jehovah no lobi den sortoe ogridoe disi èn taki a no e prisiri te wi e loekoe den sortoe ogri-ati sani disi (Psalm 11:5). Den meisje di ben wani plisi Jehovah ben agri foe teken wan toe sani èn meki skedrei na presi foe loekoe telefisi. Wantewante den no ben lobi foe feti moro, èn a situwâsi na ini na osofamiri ben kon moro boen.

Disi na nomo wan toe eksempre foe sori taki te wi e gebroiki den bijbel gronprakseri, dan dati e meki na osofamiri libi kon moro boen. A rai foe bijbel e taki foe ala sortoe situwâsi. Den de troe èn den abi wan tranga èn boen krakti na tapoe sma (Hebrewsma 4:12). Te sma e studeri bijbel èn e proeberi na wan opregti fasi foe doe san a e taki, dan den osofamiri e kon moro tranga, den eigifasi e kon moro boen, èn fowtoe no e meki so foeroe. Srefi te wán memre nomo foe wan osofamiri e gebroiki a rai foe Gado, tokoe sani e kon moro boen. Foe troe, na ini ala kontren foe a libi, wi moesoe si a Wortoe foe Gado leki fa a psalm singiman ben si en, di ben skrifi: „Joe wortoe na wan lampoe gi mi foetoe, èn wan leti na tapoe mi pasi.” — Psalm 119:105.

[Prenki na tapoe bladzijde 5]

Osofamiri problema loesoe foe di sma gebroiki den bijbel gronprakseri