Den ben doe a wani foe Jehovah
Foe di pardon ben gi, meki a pasi opo foe kisi froeloesoe
DEN tin manpikin foe Jakob di ben tanapoe na fesi a fosi ministri foe Egipti, ben sabi wan boen takroe kibritori. Foeroe jari na fesi, den ben seri den afoebrada Josef, leki srafoe èn den ben abi na prakseri foe taigi a papa foe den taki wan ogri meti ben kiri Josef. — Genesis 37:18-35.
Now, so wan 20 jari baka dati, wan hebi angriten ben dwengi den tin man disi foe kon na Egipti foe bai siri-njanjan. Ma sani no ben waka so boen. A fosi ministri, di ben de a sma toe di ben orga njanjan tori, ben taigi den taki den ben de spion. A ben poti wan foe den na strafoe-oso èn a ben komanderi taki den trawan ben moesoe drai go baka na oso èn tjari Benjamin, a moro jongoe brada foe den, kon baka. Di den ben doe dati, dan a fosi ministri meki den tjari Benjamin go sroto, foe di a ben seti a tori so kaba. — Genesis 42:1–44:12.
Juda, wan foe den manpikin foe Jakob, no ben agri. ’Efoe wi e go na oso baka sondro Benjamin,’ na so a ben taki, ’dan wi papa o dede.’ Dan wan sani ben pasa di Juda èn no wan foe den kompe di ben waka nanga en, ben froewakti. Baka di a fosi ministri gi ala sma boiti den manpikin foe Jakob a komando foe gowe libi a kamra, a ben bari krei. Dan a kisi ensrefi baka èn a ben froeklari: „Mi na Josef.” — Genesis 44:18–45:3.
Sari-ati nanga froeloesoe
„Mi papa de na libi ete?” Josef ben aksi den afoebrada foe en. Den no ben piki. Ija, den afoebrada foe Josef no ben sabi san foe taki. Den ben moesoe breiti, noso den ben moesoe frede? Te joe loekoe en boen, dan di den ben de 20 jari moro jongoe, den ben seri a man disi leki srafoe. Josef ben abi a makti foe poti den na strafoe-oso, foe seni den go na oso sondro njanjan, noso — a moro ogri sani di ben sa man pasa — foe kiri den! Nanga reti den afoebrada foe Josef no ben „man piki en kwetikweti, foe di den ben broeja foe en”. — Genesis 45:3.
Josef no ben wakti langa foe meki na ati foe den man disi kon kowroe. „Grantangi, kon krosibei na mi”, a ben taki. Dati den ben doe. Dan a ben taki: „Mi na Josef, oen brada, di oenoe ben seri go na Egipti. Ma now no sari èn no atibron nanga oensrefi di oenoe ben seri mi kon djaso; bika foe hori sma na libi, meki Gado seni mi kon na fesi foe oenoe.” — Genesis 45:4, 5.
A no foe soso Josef ben de nanga sari-ati. A ben si boeweisi kaba taki den ben abi berow. Foe eksempre, di Josef ben taki dati den afoebrada foe en ben de spion, dan a ben jere den e taigi makandra: „Tweifri no de taki wi abi fowtoe na wi brada . . . Dati meki a banawtoe disi kon na wi tapoe” (Genesis 42:21). So srefi, Juda ben aksi foe tron wan srafoe na presi foe Benjamin, so taki a jonkoeman ben kan drai go baka na en papa. — Genesis 44:33, 34.
Foe dati ede, Josef ben abi a reti foe sori den sari-ati. Ija, a ben froestan taki efoe a ben o doe disi, dan dati ben kan froeloesoe en heri famiri. Dati meki Josef ben taigi den afoebrada foe en foe drai go baka na den papa, Jakob, foe taigi en: „Disi na san joe manpikin Josef taki: ’Gado poti mi foe de masra foe heri Egipti. Kon na mi. No draidrai. Èn joe moesoe libi na a kondre Gosen, èn joe moesoe tan krosibei foe mi, joe nanga den manpikin foe joe nanga den manpikin foe den manpikin foe joe èn den ipi foe joe èn den meti foe joe èn ala san joe abi. Èn mi sa gi joe njanjan drape.’” — Genesis 45:9-11.
A Moro Bigi Josef
Wi kan kari Jesus Krestes a Moro Bigi Josef, bika boen foeroe sani de di meki den toe man disi gersi makandra. Neleki fa a ben de nanga Josef, na so den brada foe Jesus, di ben de bakapikin foe Abraham toe, meshandri Jesus. (Teki gersi Tori foe den Apostel 2:14, 29, 37.) Tokoe a situwâsi foe den toe man disi ben kon kenki krinkrin. Baka wan pisi ten, a posisi di Josef ben abi leki wan srafoe ben kenki kon tron a di foe fosi ministri, di ben de a moro prenspari man, boiti Farao. So srefi, Jehovah ben opo Jesus baka na dede èn ben meki en kisi wan hei posisi „na a reti-anoe foe Gado”. — Tori foe den Apostel 2:33; Filipisma 2:9-11.
Leki fosi ministri, Josef ben kan prati njanjan gi ala sma di ben kon na Egipti foe bai siri-njanjan. Na ini a ten disi, a Moro Bigi Josef abi a getrow èn koni srafoe na grontapoe èn a e gebroiki den foe prati njanjan na jejefasi „na a reti ten” (Mateus 24:45-47; Lukas 12:42-44). Ija, den sma di e kon na Jesus „no sa pina foe angri noso dreiwatra moro . . . bika a Pikin Skapoe di de na mindrisei foe a kownoestoeroe, sa wei den, èn a sa tjari den go na fonten foe watra foe libi”. — Openbaring 7:16, 17.
Wan sani di wi kan leri
Josef de wan heri moi eksempre foe wan sma di abi sari-ati. Efoe a ben loekoe a sani soifri akroederi geregtighèit, dan Josef ben moesoe strafoe den wan di ben seri en leki srafoe. Na a tra sei, den firi foe en ben kan meki en loekoe pasa den fowtoe foe den nomo. No wan foe den toe sani disi Josef ben doe. Na presi foe dati, a ben loekoe efoe den afoebrada foe en ben abi berow. Dan, di a ben si taki den ben sari troetroe, a ben gi den pardon.
Wi kan doe neleki Josef. Te wan sma di doe wi wan ogri, e sori taki en ati kenki troetroe, dan wi moesoe gi en pardon. Ma tokoe, noiti wi no moesoe meki den firi foe wi tapoe wi ai gi serjoesoe sondoe. Na a tra sei, wi no moesoe meki atibron tapoe wi ai gi sani di wan sma e doe foe di a abi berow troetroe. So boen, meki wi „tan froedrage makandra en gi makandra pardon na wan fri fasi” (Kolosesma 3:13). Te wi e doe dati, dan wi sa doe soleki fa wi Gado, Jehovah, e doe di „de klariklari foe gi pardon”. — Psalm 86:5; Mika 7:18, 19.