Fu San Ede Saulus Ben Frufolgu den Kresten?

’MI BEN DENKI TRUTRU TAKI MI BEN MUSU du furu ogri teige a nen fu Yesus fu Nasarèt, èn mi ben du dati tu na Yerusalem. Mi ben sroto furu fu den santawan na ini strafu-oso, fu di mi ben kisi a makti fu den edeman-priester. Te den ben o kiri den disipel, dan mi ben stem teige den. Mi ben strafu den furutron na ini ala den snoga, èn mi ben pruberi fu dwengi den fu den drai den baka gi a bribi fu den. Fu di mi ati ben faya srefisrefi nanga den, meki mi ben go so fara taki mi ben frufolgu den srefi te na ini den foto na dorosei fu wi kondre.’—Tori fu den Apostel 26:9-11.

NA SO Saulus fu Tarsus, di wi sabi tu leki na apostel Paulus, ben taki. A no de fu taki, dati di a ben taki disi, dan a ben kenki. A no ben de wan gensman moro fu Krestendom, ma now a ben de wan fu den moro faya fetiman fu den. Ma san meki Paulus ben frufolgu den Kresten fosi? Fu san ede a ben denki taki ’a ben musu du’ den sani dati? ¿Èn wi kan leri wan sani fu disi?

Di Den Ben Ston Stefanus Kiri

A fosi leisi di den e taki fu Saulus na ini Bijbel, na di a ben de nanga den sma den ben kiri Stefanus. „Baka di den trowe [Stefanus] go na dorosei fu a foto, den ben bigin fringi ston na en tapu. Èn den kotoigi ben poti den tapusei krosi fu den na den futu fu wan yonkuman di nen Saulus.” „Saulus fu en sei, ben feni en bun taki den ben kiri en” (Tori fu den Apostel 7:58; 8:1). San meki den du na ogri disi? Den Dyu, so srefi son wan fu Silisia, ben haritaki nanga Stefanus ma den no ben man kakafutu gi en. Den no e taki efu Saulus, di ben de wan Silisiasma tu, ben de na den mindri. Awansi fa no fa, den ben gebroiki falsi kotoigi fu taki dati Stefanus ben de wan sma di ben afrontu Gado èn den ben srepi en go na fesi a Sanhedrin (Tori fu den Apostel 6:9-14). A konmakandra disi, di ben abi a granpriester leki fesiman, ben handri leki a Hei krutubangi fu den Dyu. Den memre fu a moro hei relisi krutubangi dati ben kibri so srefi a sani di den ben si leki a soifri relisi leri. Soleki fa den ben si en, dan Stefanus ben musu dede. ¿A no ben de so, taki a ben prefuru fu taki dati den no ben hori densrefi na a Wet? (Tori fu den Apostel 7:53) ¡We, now den ben o sori en fa sma musu hori densrefi na a Wet!

Saulus ben feni so wan denki bun, fu di disi ben de soifri san a ben bribi. A ben de wan Fariseiman. A sekte disi di ben abi furu makti ben dwengi sma fu hori densrefi soifri na den wet nanga den gwenti. Den ben feni taki Krestendom ben de kontrari den leri dati, fu di den ben leri wan nyun fasi fu kisi frulusu nanga yepi fu Yesus. Den Dyu fu a fosi yarihondro ben fruwakti taki a Mesias ben o de wan glori Kownu di ben o fri den fu a tyatyari fu a tiri fu Rome, di den no ben lobi kwetikweti. A no ben kan kwetikweti taki a sma di a Bigi Sanhedrin ben krutu fu di den ben feni taki a ben afrontu Gado èn di den ben spikri fu dati ede na wan pina-udu leki wan ogriman, ben kan de a Mesias. A ben de wan tumusi freimde èn tegu prakseri di den no ben lobi kwetikweti.

A Wet ben taki dati wan sma di ben anga na wan postu ben de wan sma „di Gado fluku” (Deuteronomium 21:22, 23; Galasiasma 3:13). Soleki fa Saulus ben si en, dan „den wortu disi ben fiti gi Yesus krinkrin”, na so Frederick F. Bruce e taki. „A dede fu di Gado ben fluku en, èn fu dati ede a no ben kan de a Mesias kwetikweti di, akruderi a Dyu gwenti, ben o kisi Gado blesi na wan tumusi aparti fasi. Fu taki dati Yesus ben de a Mesias, ben de fu dati ede wan sani di ben afrontu Gado; den sma di ben taki a law sani dati ben musu dede leki sma di ben afrontu Gado.” Soleki fa Saulus srefi ben erken baka ten, dan srefi a prakseri taki „Krestes di den ben anga na wan postu, . . . ben de gi den Dyu wan sani fu naki futu fadon”.—1 Korentesma 1:23.

A sani di Saulus ben du na tapu a leri dati, ben de fu gens a leri nanga wan moro fasti bosroiti. A ben o du disi na wan kefalek ogri fasi srefi efu dati ben de fanowdu fu kan tyari wan kaba kon na a leri disi. A ben de seiker taki na dati Gado ben wani. Saulus ben taki san ben de a denki fu en: „Ini a tori fu a faya fu mi, mi ben e frufolgu a gemeente; ini a tori fu regtfardikifasi di de nanga yepi fu a wet, mi ben de wan sma di ben sori taki a ben de sondro fowtu.” „Mi ben tan frufolgu a gemeente fu Gado pasa marki èn ben pori en, èn mi ben go na fesi na ini a Dyu bribi moro leki furu fu den speri fu mi di de fu a srefi ras leki mi, fu di mi ben fayafaya gi den gwenti fu den tata fu mi, moro leki den.”—Filipisma 3:6; Galasiasma 1:13, 14.

A Moro Bigi Frufolguman

Baka di Stefanus dede, den no ben si Saulus moro leki soso wan sma di ben yepi frufolgu trawan, ma den ben si en leki a moro bigi frufolguman. So bun, a ben musu de so taki a ben kon tron wan sma nanga wan takru nen, fu di srefi baka di a ben drai en libi èn a ben meki muiti fu moksi ensrefi nanga den disipel, dan „den alamala ben frede en, bika den no ben bribi taki a ben de wan disipel”. Di a ben de krin taki a ben de wan Kresten trutru, dan den disipel ben breiti srefisrefi èn ben de nanga tangi taki a ben drai en libi. Den disipel ben breiti fu di den ben yere tu taki a no wan gewoon gensman di ben e gens den fosi, ben kenki en ati, ma taki a ben de „a man di ben frufolgu wi fosi, e meki a bun nyunsu bekènti now fu a bribi di a ben pori fosi”.—Tori fu den Apostel 9:26; Galasiasma 1:23, 24.

Damaskus ben de so wan 220 kilometer fu Yerusalem — te yu ben o waka en dan a ben o teki seibi dei. Toku Saulus, di „ben de wan kefar . . . gi den disipel”, ben go na a granpriester èn ben aksi en brifi fu go na den snoga na Damaskus. Fu san ede? So taki Saulus ben kan tai ala sma di a ben feni èn di ben de fu „A Pasi” èn tyari den kon na Yerusalem. Now di a ben kisi primisi, a ’ben bigin handri nanga a gemeente na wan ogri-ati fasi, ala di a ben broko go na ini a wán oso baka a trawan, a ben e srepi mansma èn so srefi umasma go na dorosei èn ben tyari den go poti na strafu-oso’. Trawan a ben ’fon na ini den snoga’, èn a ’ben stem’ (trutru, trowe en „ston fu stem”) fu sma ben kan kiri den.—Tori fu den Apostel 8:3; 9:1, 2, 14; 22:5, 19; 26:10, futuwortu.

Son sabiman e denki taki, te yu e luku a skoro di Saulus ben kisi fu Gamalièl èn a makti di a ben abi now, a ben de wan studenti fosi fu a Wet èn now a ben tron wan sma di ben abi makti na ini a Dyu bribi. Wan sabiman e taki fu eksempre taki a kan taki Saulus ben tron wan leriman na ini wan snoga na Yerusalem. Ma wi no sabi seiker san a wani taki dati Saulus ’ben stem’ — efu a ben du disi leki wan memre fu wan krutubangi noso leki wan sma di ben sori taki a ben horibaka gi a kiri di den ben kiri den Kresten.a

Biginbigin kaba, ala Kresten ben de Dyu noso Dyu proseliet dati meki, soleki fa a sori, Saulus ben si Krestendom leki wan grupu sma di ben fadon komoto na a Dyu bribi, èn a ben si en leki a frantwortu fu a Dyu bribi srefi fu meki den sma fu a bribi dati kon waka na tapu a yoisti pasi baka. „Wi no denki”, na so sabiman Arland J. Hultgren, e taki, „dati Paulus a frufolguman ben o gens Krestendom bika a ben si en leki wan relisi di ben de dorosei fu a Dyu bribi, wan bribi di ben strei nanga den. En nanga trawan ben o si den Kresten leki sma di ben de na ondro a Dyu tiri ete.” Fu dati ede a ben abi na prakseri fu dwengi Dyu di ben fadon komoto na bribi, fu drai den ben baka gi a bribi fu den èn fu kon baka na ini a Dyu bribi, èn a ben o gebroiki ala sani di a ben man fu du dati (Tori fu den Apostel 26:11). Wán sani di a ben kan du ben de fu poti den na strafu-oso. Wan tra sani ben de taki a ben kan fon den na ini den snoga, wan strafu di ala sma ben sabi èn di iniwan krutubangi di ben abi dri krutuman, ben kan gi fu strafu wan sma di no ben gi yesi na a makti fu den rabi.

A no de fu taki dati di Yesus ben sori ensrefi na Saulus di a ben de na pasi e go na Damaskus, dan ala den sani disi ben kon na wan kaba. Wantronso Saulus, di ben de wan ogri feanti fu Krestendom, ben tron wan fayafaya fetiman gi Krestendom, èn fosi yu denki den Dyu na Damaskus ben suku fu kiri en (Tori fu den Apostel 9:1-23). Tra fasi leki san wi ben sa fruwakti, Saulus di ben tron wan Kresten, ben o nyan furu pina fu sani ede di ensrefi ben du di a ben de wan frufolguman, èn fu dati ede wan tu yari na baka a ben kan taki: „Feifi tron den dyu ben gi mi a fonfon pe den e naki sma fotenti leisi, puru wán.”—2 Korentesma 11:24.

A Faya fu Wan Sma Kan Gebroiki na wan Fowtu Fasi

„Mi ben de wan sma di ben afrontu Gado fosi èn wan sma di ben frufolgu trawan èn wan asrantisma,” na so Saulus ben skrifi baka di a ben drai en libi, di sma ben sabi en moro betre leki Paulus. „Ma toku, Gado ben sori mi sari-ati, bika mi no ben sabi èn mi ben handri sondro fu abi bribi” (1 Timoteus 1:13). Fu dati ede, te wan sma de opregti èn a abi faya gi a bribi fu en, dan dati a no wan dyaranti taki Gado feni en bun. Saulus ben abi faya èn a ben handri akruderi a konsensi fu en, ma dati no ben meki taki a ben abi leti. A ben gebroiki a bigi faya fu en na wan fowtu fasi. (Teki gersi Romesma 10:2, 3.) Disi musu meki wi go prakseri.

Furu sma na ini a ten disi e bribi tranga taki wan bun fasi fu libi na ala san Gado e aksi fu den. ¿Ma dati tru? A ben o bun efu ibriwan fu den ben o arki a frumane di Paulus e gi: „Overtoigi yusrefi fu ala sani, hori fasti na a sani di bun srefisrefi” (1 Tesalonikasma 5:21). Dati wani taki dati a sma musu teki ten fu leri a soifri sabi fu Gado Wortu di e taki fu a waarheid èn dan libi krinkrin akruderi disi. Efu wi e frustan taki wi musu kenki wan tu sani ini wi libi te wi studeri Bijbel, dan seiker wi musu du dati wantewante. Kande son wan fu wi ben de sma di ben afrontu Gado, frufolguman noso asrantisma, neleki fa Saulus ben de dati. Toku, neleki en, wi kan meki taki Gado feni wi bun, soso te wi e handri akruderi bribi nanga soifri sabi.—Yohanes 17:3, 17.

[Futuwortu]