No Meki Atibron Meki Yu Naki Futu Fadon
„¡HARI wan dipi bro!” „¡Hori yusrefi!” „¡Beti tapu yu tifi!” ¿Yu sabi den wortu disi? Kande yu taki den gi yusrefi fu kowru yu ati te wan sani e trobi yu. Son sma e go koiri te den no wani kisi atibron. Den sani disi na makriki fasi fu no atibron èn fu tan bun nanga tra sma.
Ma na ini den yari di pasa, sabiman gi rai di de kontrari makandra ini a tori fu a basi di wan sma musu basi en atibron noso dwengi en atibron, e bruya furu sma. Fu eksempre, son psycholoog kon nanga a leri taki „efu a e meki yu firi bun”, dan puru atibron. Trawan e warskow taki te sma e kisi atibron doronomo, dan dati „e sori moro krin leki den tra kefar soleki smoko, heibrudu, nanga furu cholesterol, taki a sma sa dede yonguyongu”. A Wortu fu Gado e taki krin: „Libi atibron na wan sei èn no kisi bigi atibron; no sori taki yu ati e kon faya soso fu du ogri” (Psalm 37:8). Fu san ede Bijbel e gi a spesrutu rai dati?
Te wan sma no e basi den firi fu en, dan a kan du sani di a no man basi. Disi ben kon na krin na a bigin kaba fu a libisma historia. Wi e leisi: „Kain bigin kisi bigi atibron, èn a fesi fu en ben kon swa.” Pe disi ben tyari en go? Na atibron fu en ben teki en abra èn en atibron ben basi en, so furu taki en ati ben kon tranga èn a no ben arki di Yehovah ben frumane en fu du san bun. Fu di Kain no ben dwengi en atibron, meki a ben du wan bigi sondu — a ben kiri en brada.—Genesis 4:3-8.
Atibron ben teki Saul, a fosi kownu fu Israèl, abra tu di a ben yere fa sma ben prèise David someni. „Den umasma di ben dansi fu prisiri ben tan piki, taki: ’Saul naki den dusundusun fu en trowe, èn David den tin dusundusun fu en.’ Èn Saul ben kisi bigi atibron srefisrefi, èn soleki fa a ben si en, dan den sani di den ben taki no ben bun gi en.” Atibron ben basi a denki fu Saul so furu, taki a ben pruberi difrenti leisi fu kiri David. Ala di David ben pruberi fu tron mati baka nanga Saul, toku Saul no ben wani vrede èn a no ben wani kon bun baka nanga David. Te fu kaba, a ben lasi a bun-ati fu Yehovah krinkrin.—1 Samuèl 18:6-11; 19:9, 10; 24:1-21; Odo 6:34, 35.
A de seiker, taki wan sma di no e basi na atibron fu en, sa taki noso du sani di sa hati ala sma di abi fu du nanga a tori (Odo 29:22). Kain nanga Saul ben atibron fu di ibriwan fu den, na en eigi fasi, ben dyarusu èn den ben abi bigi-ai. Ma difrenti sani de di kan meki wan sma atibron. Te trawan krutu en sondro fu abi leti, te sma kosi en, te wan trobi de, noso te sma no handri bun nanga en, dan dati ben kan meki taki a e sori atibron.
Den eksempre fu Kain nanga Saul e sori taki den ala tu ben abi wan seryusu problema. A sori leki Kain no ben tyari na ofrandi fu en nanga nofo bribi (Hebrewsma 11:4). Fu di Saul no ben gi yesi na den krin komando fu Yehovah èn a ben pruberi fu regtfardiki ensrefi baka dati, meki a ben lasi a bun-ati èn a yeye fu Gado. A de krin, ala tu man ben pori a matifasi di den ben abi nanga Yehovah.
Teki a fasi dati gersi nanga a fasi fu David, di ben abi leti fu atibron nanga a fasi fa Saul ben handri nanga en. David ben man basi a denki fu en. Fu san ede? A ben taki: „Fu mi sei, fu a fasi fa Yehovah e si sani, mi no man denki taki mi ben sa du a sani disi nanga mi masra, a salfuwan fu Yehovah.” David ben hori a matifasi di a ben abi nanga Yehovah na prakseri bun, èn dati ben abi krakti na tapu a fasi fa a ben handri nanga Saul. Fu di David ben abi sakafasi, meki a ben libi a tori gi Yehovah.—1 Samuèl 24:6, 15.
Iya, te wan sma no e dwengi na atibron fu en, dan dati abi takru bakapisi. Na apostel Paulus ben warskow: „Kisi atibron èn toku no sondu” (Efeisesma 4:26). Ala di wan sma kan abi leti fu atibron, toku a kefar de ala ten taki atibron kan tron wan sani di kan meki wi naki futu fadon. Fu dati ede wi no musu fruwondru taki a dwengi di wi wani dwengi na atibron fu wi na wan tyalensi. Fa wi kan du dati?
Wan prenspari sani de taki wi musu kisi wan tranga banti nanga Yehovah. Yehovah e gi yu deki-ati fu opo yu ati nanga yu frustan gi en. Taigi en nanga sortu sani yu e broko yu ede èn sortu sani e trobi yu, èn aksi en fu gi yu wan korostu ati so taki yu man basi yu atibron (Odo 14:30). Yu kan bribi taki „den ai fu Yehovah de na tapu den regtfardikiwan, èn den yesi fu en e arki den tranga begi fu den”.—1 Petrus 3:12.
Begi kan kenki yu èn yepi yu. Na sortu fasi? A kan abi furu krakti na tapu a fasi fa yu e handri nanga tra sma. Prakseri fa Yehovah handri nanga yu. Soleki fa Bijbel e taki dan Yehovah „no handri nanga wi akruderi den sondu fu wi srefi” (Psalm 103:10). A de prenspari fu abi a gwenti fu gi sma pardon, so taki „Satan no wini” yu (2 Korentesma 2:10, 11). Boiti dati, begi e yepi yu fu opo yu ati fu meki a santa yeye tiri yu, èn dati kan puru tranga gwenti di yu abi. Nanga prisiri Yehovah e gi ’vrede di e pasa ala prakseri’ èn dati kan fri yu fu a tranga krakti di atibron abi na yu tapu.—Filipisma 4:7.
Ma boiti begi, wi musu ondrosuku Bijbel doronomo tu, so taki wi kan „tan si krin san na a wani fu Yehovah” (Efeisesma 5:17; Yakobus 3:17). Efu yu srefi feni en wan muilek sani fu basi na atibron fu yu, dan du muiti fu prakseri fu a tori soleki fa Yehovah e prakseri fu en. Luku den bijbeltekst di e taki spesrutu fu a fasi fa yu kan basi atibron.
Na apostel Paulus e memre wi na a prenspari sani disi: „Meki wi du bun gi ala sma, ma spesrutu gi den wan di de na ini a srefi bribi leki wi” (Galasiasma 6:10). Poti prakeri fa yu kan du bun gi trawan. Den sortu bun sani dati sa meki taki yu e firi gi trawan èn taki yu e frutrow den, èn a sa lusu a trobi di kan meki sma atibron moro makriki.
A psalm skrifiman ben taki: „Meki mi eigi futu de na ini yu wortu sondro fu degedege, èn meki no wan ogri sani basi mi. Vrede pasa marki de gi den wan di lobi yu wet, èn gi den no wan sani de di a meki den naki futu fadon” (Psalm 119:133, 165). Dati kan de so nanga yu tu.
[Faki/Prenki na tapu bladzijde 9]
SANI DI YU KAN DU FU BASI ATIBRON
□ Begi Yehovah.—Psalm 145:18.
□ Ondrosuku Bijbel ibri dei.—Psalm 119:133, 165.
□ Tan du sani di bun.—Galasiasma 6:9, 10.