Yehovah E Sreka a Pasi

„A bun nyunsu disi fu a kownukondre sa preiki.”—MATEUS 24:14.

1. San a preikiwroko du na ini a fosi yarihondro èn so srefi na ini a di fu 20 yarihondro?

FU DI Yehovah na wan Gado fu lobi, meki a de a wani fu en taki „ala sortu sma musu kisi frulusu èn kon kisi wan soifri sabi fu waarheid” (1 Timoteus 2:4). Dati meki a ben de fanowdu fu preiki èn fu gi sma leri na heri grontapu. Na ini a fosi yarihondro a preikiwroko disi ben meki a Kresten gemeente kon tron „wan postu nanga wan yepi fu a waarheid” (1 Timoteus 3:15). Baka dati, wan heri pisi ten ben kon taki sma ben fadon komoto na bribi èn a leti fu waarheid ben kon swaki. Na ini a ten fu wi, na ini „a ten fu a kaba” „a tru sabi” ben kon de bogobogo baka, èn a e gi milyunmilyun sma a Bijbel howpu taki den kan kisi têgo frulusu.—Danièl 12:4.

2. San Yehovah du gi a preikiwroko?

² Ala di Satan tan pruberi nomonomo fu pori a prakseri fu Gado, toku a preikiwroko na ini a fosi èn na ini a di fu 20 yarihondro waka kefalek bun. A e meki wi prakseri a profeititori fu Yesaya. Yesaya ben skrifi fu a ten di den Dyu katiboman ben drai kon baka na Yuda na ini a di fu siksi yarihondro b.G.T.: „Meki ibri lagipresi kon hei, èn meki ibri bergi nanga pikin bergi kon lagi. Èn a kundukundu gron musu kon plata èn a gron di no grati musu tron wan lagipresi” (Yesaya 40:4). Yehovah sreka èn grati a pasi tu gi a bigi preikiwroko na ini a fosi èn na ini a di fu 20 yarihondro.

3. Na sortu fasi Yehovah man du den sani di a abi na prakseri?

³ Disi no wani taki dati Yehovah ben abi fu du langalanga nanga ibri sani di ben pasa na grontapu, so taki a preikiwroko ben kan go na fesi; èn a no wani taki tu dati Yehovah ben gebroiki a makti di a abi fu kon sabi na fesi finifini fa ala sani ben o waka. A tru, taki a man si a tamara na fesi èn a man meki den pasa tu (Yesaya 46:9-11). Ma a man du wan sani tu na a momenti te sani pasa. Neleki wan skapuman di abi ondrofeni èn di sabi fa fu tyari den meti fu en èn fa fu gi den kibri, na so Yehovah e tiri a pipel fu en. A e tyari den go na frulusu, a e kibri a yeyefasi fu den èn a e meki den meki bun gebroiki fu situwâsi èn sani di e pasa èn di e yepi fu meki den abi bun bakapisi te den e preiki a bun nyunsu na heri grontapu.—Psalm 23:1-4.

Wan Muilek Wroko

4, 5. Fu san ede a preiki fu a bun nyunsu ben de wan muilek wroko?

⁴ Neleki fa a ben de nanga a bow fu na ark na ini a ten fu Noa, na so a ben de tu taki a wroko fu preiki a Kownukondre ben de wan kefalek bigi wroko — na ini a fosi yarihondro èn na ini a ten disi. A muilek kaba fu go na ala sma nanga wan boskopu, ma a wroko disi ben de wan bigi tyalensi. Na ini a fosi yarihondro, den disipel no ben de nanga furu. Sma ben kiri Yesus, a Fesiman fu den, leki wan sma di ben e pusu trawan fu meki opruru. A Dyu relisi ben seti bun. Wan bun bigi tempel ben de na ini Yerusalem. Den relisi dorosei fu a Dyu relisi na ini a kontren na a Mindrikondre Se ben seti bun tu, èn den ben abi tempel nanga priester. So srefi, di „a ten fu a kaba ben bigin” na ini 1914, dan den salfu Kresten no ben de nanga furu, èn den sma fu tra relisi di ben e taki dati den ben dini Gado, ben lai.—Danièl 12:9.

⁵ Yesus ben warskow den bakaman fu en taki sma ben o frufolgu den. A ben taki: „Den sa gi unu abra na banawtu èn den sa kiri unu, èn unu sa de sma di no wan nâsi no sa wani si na ai fu mi nen ede” (Mateus 24:9). Boiti den problema dati, den Kresten ben o ondrofeni ’muilek ten di tranga fu pasa’ spesrutu na ini „den lasti dei” (2 Timoteus 3:1). A bigi di a wroko ben o bigi, a seiker di den ben de seiker taki sma ben o frufolgu den, èn den muilek ten, meki taki a preikiwroko na wan tyalensi èn a muilek. Furu bribi ben de fanowdu.

6. Sortu dyaranti Yehovah ben gi en pipel taki den sa abi bun bakapisi?

⁶ Ala di Yehovah ben sabi taki muilek ten ben o kon, a ben sabi tu taki noti no ben o man tapu a wroko. Wan profeititori di wi sabi bun èn di kon tru na wan kefalek moi fasi na ini a fosi yarihondro èn na ini a di fu 20 yarihondro ben taki na fesi dati a wroko ben o waka bun: „A bun nyunsu disi fu a kownukondre sa preiki na heri grontapu pe sma e libi.”—Mateus 24:14.

7. O bigi a preikiwroko ben de na ini a fosi yarihondro?

⁷ Den futuboi fu Gado na ini a fosi yarihondro ben tan du a wroko di den ben kisi fu du, fu di den ben abi bribi èn santa yeye. Fu di Yehovah ben de nanga den, meki den ben abi bun bakapisi moro leki san den ben sa kan fruwakti. Na a ten di Paulus ben skrifi den Kolosesma, so wan 27 yari baka a dede fu Yesus, dan a ben kan taki dati a bun nyunsu ben e „preiki na ala sani di Gado kria na ondro hemel” (Kolosesma 1:23). So srefi, na a kaba fu a di fu 20 yarihondro, a bun nyunsu e preiki na ini 233 kondre.

8. Na ini sortu situwâsi furu sma teki a bun nyunsu? Gi eksempre.

⁸ Milyunmilyun sma teki a bun nyunsu na ini den someni tenti yari di pasa kaba. Furu sma du dati ala di a situwâsi pe den ben de na ini no ben bun — na ini ten fu orloku, na ini ten pe lanti ben tapu a wroko, èn na ini ten pe sma ben frufolgu den hebi. Dati ben de so tu na ini a fosi yarihondro. Wan leisi na ini a fosi yarihondro, den ben fon Paulus nanga Silas kefalek nanga tiki èn den ben trowe den na ini strafu-oso. ¡Yu no ben sa denki taki dati ben de wan situwâsi pe den ben man meki disipel! Toku Yehovah ben gebroiki a situwâsi fu du so wan sani. Paulus nanga Silas ben kon fri, èn a waktiman fu a strafu-oso makandra nanga en osofamiri ben tron bribiman (Tori fu den Apostel 16:19-33). Den ondrofenitori dati e sori taki den sma di e gens a bun nyunsu, no man tapu en (Yesaya 54:17). Toku a historia fu a Kresten bribi no de wan ten fu soso gens nanga frufolgu. Kon meki wi poti prakseri now na wan tu bun sani di pasa èn di yepi fu grati a pasi meki a wroko fu preiki a bun nyunsu waka bun na ini a fosi èn na ini a di fu 20 yarihondro.

Fasi fa Sani Ben De na Relisi Sei

9, 10. Fa Yehovah ben meki taki sma ben kan fruwakti taki a bun nyunsu ben o preiki na ini a fosi yarihondro èn na ini a di fu 20 yarihondro?

⁹ Luku a ten taki a preikiwroko ben du na heri grontapu. Soleki fa sani ben pasa na ini a fosi yarihondro, dan a profeititori fu den 70 yariwiki, di de fu feni na Danièl 9:24-27, ben sori a yari di a Mesias ben o kon — 29 G.T. Ala di den Dyu fu a fosi yarihondro no ben frustan soifri o ten sani ben o pasa, toku den ben e fruwakti èn e wakti a Mesias (Lukas 3:15). A Fransi buku Manuel Biblique e taki: „Sma ben sabi taki den seibitenti yariwiki di Danièl ben kari krinkrin, ben e kon na wan kaba; no wan sma ben fruwondru fu yere Yohanes a Dopuman e meki bekènti taki a kownukondre fu Gado ben kon krosibei.”

¹⁰ Fa sani ben waka na ini a ten disi? We, wan tumusi prenspari sani ben de di Yesus ben tron Kownu na hemel, san ben de a bigin fu en denoya na ini Kownukondre makti. Den profeititori na ini Bijbel e sori taki disi ben pasa na ini 1914 (Danièl 4:13-17). Fu di son relisi sma fu a ten disi ben e howpu na tapu a sani disi di ben o pasa, meki den ben e fruwakti a ten. Taki sma ben fruwakti sani, ben de fu si tu na den Bijbel Ondrosukuman di ben tyari a tijdschrift disi kon na doro na ini 1879 leki Zion’s Watch Tower and Herald of Christ’s Presence, (Sion Waktitoren nanga Bariwrokoman fu Krestes Denoya). So bun, na ini a fosi yarihondro èn na ini a ten disi, den sani di sma ben fruwakti na relisi sei ben sreka a pasi fu kan preiki a bun nyunsu.a

11. Sortu relisi fondamenti ben poti fu yepi a wroko fu preiki a bun nyunsu?

¹¹ Wan tra sani di ben meki a wroko fu den Kresten go na fesi na ini ala tu pisi ten ben de taki furu sma ben sabi den Santa Buku fu Bijbel. Na ini a fosi yarihondro, den Dyu libimakandra ben panya na ini ala den kontren fu den Heiden nâsi. Den libimakandra disi ben abi snoga pe sma ben miti makandra doronomo fu arki te sma ben leisi den Buku fu Bijbel èn fa den ben taki fu den. So bun, den fositen Kresten ben man go doro nanga a sabi di sma ben sabi sani na relisi sei kaba (Tori fu den Apostel 8:28-36; 17:1, 2). Na a bigin fu a yarihondro fu wi, a pipel fu Yehovah ben ondrofeni wan srefi sortu sani na furu kondre. Bijbel ben de fu feni na ala presi na ini den kondre pe a Krestenhèit ben de, spesrutu na ini den Protestant kondre. Den ben leisi en na ini furu kerki; milyunmilyun sma ben abi wan. Sma ben abi Bijbel kaba, ma den ben abi yepi fanowdu fu kon frustan san den ben abi.

Den Wini di a Wet E Gi

12. Fa a wet fu Rome nofotron ben de wan kibri gi sma na ini a fosi yarihondro?

¹² Furutron a preikiwroko fu den Kresten ben kisi wini fu a wet fu lanti. A Gran Kownukondre Rome ben tiri a grontapu fu a fosi yarihondro, èn den wet di a ben skrifi ben abi furu krakti tapu na aladei libi. Den wet disi ben gi sma kibri, èn den fositen Kresten ben kisi wini fu dati. Fu eksempre, di Paulus ben aksi a yepi fu a wet fu Rome, dan den ben lusu en fu strafu-oso èn disi ben tapu sma fu krawasi en (Tori fu den Apostel 16:37-39; 22:25, 29). Di den ben sori na tapu a seti fu a krutu-sistema fu Rome, dan dati ben yepi fu kowru na atibron fu wan bigi grupu sma na Efeise (Tori fu den Apostel 19:35-41). Wan leisi den ben puru Paulus na ini wan situwâsi pe sma na Yerusalem ben o du en ogri, èn dati ben de fu di a ben de wan borgu fu Rome (Tori fu den Apostel 23:27). Baka ten, a wet fu Rome ben gi en na okasi fu opo taki gi a bribi fu en na fesi fu Caesar (Tori fu den Apostel 25:11). Ala di difrenti Caesar ben de ogri-ati tiriman, toku den wet fu a fosi yarihondro ben gi na okasi nofotron fu ’opo taki gi a bun nyunsu èn fu poti en steifi akruderi a wet’.—Filipisma 1:7.

13. Fa a preikiwroko na ini a ten fu wi nofotron ben kisi wini fu a wet?

¹³ Dati de so tu na furu kondre na ini a ten disi. Ala di sma ben de di ben ’seti problema nanga yepi fu wet’, toku den wet di skrifi na ini moro furu kondre e si a fri di sma fri fu abi wan relisi, leki wan fondamenti reti (Psalm 94:20). Fu di furu tiri e si taki den Kotoigi fu Yehovah no de wan kefar gi na orde na ini a libimakandra, meki den ben gi wi primisi fu du a wroko fu wi akruderi wet. Na Amerkankondre, pe furu fu den buku fu den Kotoigi e druk, den wet drape ben meki taki a Waktitoren tijdschrift ben man druk doronomo 120 yari langa èn sma ben kan leisi den na heri grontapu.

Ten fu Vrede èn a Frudrage Di Den Frudrage Wi

14, 15. Fa a de di dyugudyugu no ben de someni na ini a libimakandra ben abi wini gi a preikiwroko na ini a fosi yarihondro?

¹⁴ A preikiwroko kisi wini tu fu den ten pe vrede ben de pikinso. Ala di Yesus ben taki na fesi soifri taki na ini a fosi yarihondro nanga a di fu 20 yarihondro ’nâsi ben sa opo go feti nanga nâsi’, toku ten ben de taki dyugudyugu no ben de èn dati ben meki taki a Kownukondre ben man preiki fayafaya (Mateus 24:7). Den Kresten fu a fosi yarihondro ben libi ini a ten fu a Pax Romana, noso a Vrede fu Rome. Wan historia skrifiman ben skrifi: „Rome ben abi den sma fu a kontren fu a Mindrikondre Se so kefalek na ini en makti, taki a ben tyari wan kaba kon na den hondrohondro yari pe orloku ben e de doronomo.” A pisi ten disi pe dyugudyugu no ben de, ben gi den fositen Kresten na okasi fu reis na ini a kontren fu Rome pikinmoro sondro fu wan ogri miti den.

¹⁵ A Gran Kownukondre Rome ben du muiti fu tyari sma kon na wán na ondro a tranga tiri fu en. A sistema disi no ben meki nomo taki sma ben kan reis, taki den ben frudrage makandra, èn ben kan leri prakseri fu makandra, ma a ben meki sma kisi a prakseri fu wan internationaal bradafasi tu. A buku On the Road to Civilization e taki: „A wánfasi na ini a Gran Kownukondre [Rome] ben meki taki a situwâsi pe [a Kresten preikiwroko] ben kan du ben bun. Skotu no ben prati kondre moro. Wan borgu fu Rome ben de wan borgu fu grontapu. . . . Boiti dati, na ini wan kondre di ben leri sma taki den ben de borgu fu heri grontapu, sma ben kan frustan wan relisi di ben e leri taki sma musu libi nanga makandra leki brada.”—Teki gersi Tori fu den Apostel 10:34, 35; 1 Petrus 2:17.

16, 17. San meki sma du muiti fu tyari vrede kon na ini a ten disi, èn san furu sma kon si?

¹⁶ Fa a de nanga a ten fu wi? Den moro ogri orloku fu historia pasa na ini a di fu 20 yarihondro, èn orloku na ini moro pikin kontren e tan go doro na ini wan tu kondre (Openbaring 6:4). Toku yu ben abi ten tu pe vrede ben de pikinso. Den bigi tirimakti fu grontapu no feti nanga makandra na ini wan bigi orloku moro leki 50 yari kaba. A situwâsi disi yepi trutru fu preiki a bun nyunsu na ini den kondre dati.

¹⁷ Den ogri di ben pasa na ini den orloku fu a di fu 20 yarihondro meki taki furu sma kon si taki wán tiri gi heri grontapu de fanowdu. Fu di sma frede wan grontapu orloku meki den ben opo a Folkubontu nanga den Verenigde Nâsi (Openbaring 13:14). Wan marki di ala tu organisâsi ben meki bekènti ben de fu meki ala kondre wroko nanga makandra èn fu tyari vrede kon. Sma di e si taki a sani disi de fanowdu, nofotron e handri bun na tapu a bun nyunsu di e taki fu a grontapu tiri di sa tyari trutru vrede kon di sa tan — Gado Kownukondre.

18. Sortu fasi fa sma e si relisi, ben bun gi a preikiwroko?

¹⁸ Ala di sma frufolgu den Kresten na wan ogri-ati fasi son leisi, toku ten ben de na ini a fosi yarihondro èn na ini a di fu 20 yarihondro taki sma ben frudrage den relisi fu makandra (Yohanes 15:20; Tori fu den Apostel 9:31). Den Romesma no ben abi muiti fu teki den gado fu den sma di den ben wini èn fu fiti densrefi na den gado dati. Profesor Rodney Stark ben skrifi: „Na furu fasi Rome ben tyari moro fri kon na relisi sei, di no ben de moro te na baka a Revo fu Amerkankondre.” Na ini a ten disi, sma na furu kondre wani arki prakseri fu tra sma moro nanga moro, èn a bakapisi de taki den ben de klariklari fu arki a Bijbel boskopu di Kotoigi fu Yehovah e tyari gi sma.

A Rol fu a Sabidensi Di E Meki Nyunmodo Wrokosani

19. Fa den fositen Kresten ben gebroiki a codex?

¹⁹ Te fu kaba, luku fa Yehovah meki a pipel fu en kisi wini fu den nyunmodo wrokosani di sabidensi meki. Ala di den fositen Kresten no ben libi na ini wan ten pe a sabidensi di e meki nyunmodo wrokosani ben e gro esi-esi, toku wan sani di den ben gebroiki ben de a codex, noso a buku nanga bladzijde. A codex ben kon ini a presi fu a hebi bukulolo. A buku The Birth of the Codex e taki: „Ala di a ben teki langa èn a ben go safrisafri, fosi a codex ben teki a presi fu a bukulolo abra na ini grontapu buku, toku a sori leki den Kresten ben gebroiki a codex wantewante èn na ala presi.” A buku disi e taki tu: „Na ala presi den Kresten ben gebroiki a codex na ini a di fu tu yarihondro, taki a musu de so taki den ben bigin gebroiki en langa ten bifo A.D. 100.” A codex ben makriki fu gebroiki moro leki wan bukulolo. Sma ben kan feni den tekst moro esi. Disi seiker ben yepi den fositen Kresten di, neleki Paulus, no ben fruklari den Buku fu Bijbel nomo, ma den ben ’buweisi tu nanga yepi fu tra bijbeltekst’ den sani di den ben leri.—Tori fu den Apostel 17:2, 3.

20. Fa a pipel fu Gado ben gebroiki a meki di sabidensi meki nyunmodo wrokosani na ini a ten disi fu preiki na heri grontapu, èn fu san ede?

²⁰ Den nyunmodo wrokosani di sabidensi meki na ini a yarihondro fu wi ben moi kefalek. Drukpers di e waka bun esi meki taki buku di e taki fu Bijbel ben man tyari kon na doro na a srefi ten na ini wan lo tongo. A disiten fasi fa sabidensi e meki nyunmodo wrokosani meki taki a wroko fu vertaal Bijbel go moro esi. Truck, loko, sipi, nanga opolani meki taki buku di e taki fu Bijbel ben man tyari go na heri grontapu esi-esi. Telefon nanga fax masyin meki taki sma man taki nanga makandra wantewante. Nanga yepi fu en yeye, Yehovah meki den futuboi fu en gebroiki a fasi disi fa sabidensi e meki nyunmodo wrokosani, so taki a bun nyunsu kan preiki na heri grontapu. Den no e gebroiki den sani dati di sma e meki, soso fu kon sabi èn fu kan gebroiki ibri nyunyun sani na ini a grontapu disi. Na presi fu dati, a moro prenspari sani di den abi na prakseri, na sortu sani sa yepi den fu du a preikiwroko fu den na wan moro bun fasi.

21. Fu sortu sani wi kan de seiker?

²¹ „A bun nyunsu disi fu a kownukondre sa preiki na heri grontapu pe sma e libi,” na so Yesus ben taki na fesi (Mateus 24:14). Neleki fa den fositen Kresten ben si fa a profeititori dati ben kon tru, na so wi na ini a ten disi e si disi tu na wan moro bigi fasi. Ala di a wroko bigi èn a muilek, na ini bun ten èn na ini takru ten, na ini wan ten pe wet nanga a fasi fu denki e kenki, na ini ten fu orloku èn na ini ten fu vrede, èn na ini ten pe sabidensi e meki ala sortu nyunmodo wrokosani, toku a bun nyunsu preiki èn a e preiki ete. ¿Disi no e meki yu kisi furu lespeki gi a koni fu Yehovah èn a kefalek moi fasi fa a man si sani na fesi? Wi kan de seiker srefisrefi taki a preikiwroko sa kaba na a ten di Yehovah poti èn taki a prakseri fu en di e sori taki a lobi wi sa blesi den regtfardiki sma. Den sa kisi grontapu èn libi na en tapu fu têgo (Psalm 37:29; Habakuk 2:3). Efu wi e libi akruderi a prakseri fu Yehovah, dan wi sa de wan fu den.—1 Timoteus 4:16.

[Futuwortu]

Penti fu Luku Sani Syatu Baka

◻ Fu san ede a preiki fu a bun nyunsu ben de wan muilek wroko?

◻ Fa a wroko fu den Kresten kisi wini fu sani di den lanti ben seti èn fu ten pe dyugudyugu no ben de someni na ini a libimakandra?

◻ Fu sortu sani di o pasa na ini a ten di e kon wi kan de seiker te wi e luku a fasi fa Yehovah blesi a preikiwroko?