San Yehovah E Aksi fu Wi na ini a Ten Disi?
„Wan sten na ini a wolku [ben taki]: ’Disi na mi Manpikin, a lobiwan, di mi feni bun; arki en.’”—MATEUS 17:5.
1. O ten a Wet ben doro en marki?
YEHOVAH ben gi a nâsi Israèl a Wet, di ben abi furu pisi. Na apostel Paulus ben skrifi fu den pisi dati: „Den ben de markitiki di a wet ben aksi èn di ben abi fu du nanga a skin èn di sma ben musu du te leki a fasti ten doro fu poti sani kon reti” (Hebrewsma 9:10). Di a Wet ben yepi wan fikapisi fu den Israèlsma fu bribi na ini Yesus leki a Mesias, noso Krestes, dan a Wet ben doro en marki. Dati meki Paulus ben fruklari: „Krestes na a kaba fu a Wet.”—Romesma 10:4; Galasiasma 3:19-25; 4:4, 5.
2. Suma ben de ondro a Wet, èn o ten den ben kon fri fu disi?
2 ¿Disi wani taki, dati wi na ini a ten disi no musu gi yesi na a Wet? Te yu luku en bun, dan a moro bigi pisi fu a libisma famiri no ben libi noiti na ondro a Wet, soleki fa a psalm singiman ben fruklari: „[Yehovah] e taigi Yakob en wortu, den frumane fu en nanga den krutubosroiti fu en na Israèl. A no du dati nanga no wan tra nâsi; èn fu a sei fu den krutubosroiti fu en, den no ben sabi den” (Psalm 147:19, 20). Di Gado ben meki a nyun frubontu tapu a fondamenti fu na ofrandi fu Yesus, dan srefi a nâsi Israèl no ben de fruplekti moro fu gi yesi na a Wet (Galasiasma 3:13; Efeisesma 2:15; Kolosesma 2:13, 14, 16). Fu dati ede, efu sma no musu gi yesi na a Wet moro, dan san Yehovah e aksi fu den wan di wani dini en na ini a ten disi?
Den Sani Di Yehovah E Aksi
3, 4. (a) San Yehovah e aksi moro furu fu wi na ini a ten disi? (b) Fu san ede wi musu waka soifri na ini Yesus en futustap?
3 Na ini a lasti yari fu Yesus en diniwroko, den apostel Petrus, Yakobus nanga Yohanes ben go nanga en na tapu wan hei bergi, kande wan pisi fu a Bergi Hermon. Drape den ben si wan profeiti fisyun fu Yesus na ini tumusi moi glori èn den ben yere Gado en eigi sten e fruklari: „Disi na mi Manpikin, a lobiwan, di mi feni bun; arki en” (Mateus 17:1-5). Moro furu, dati na san Yehovah e aksi fu wi — fu arki en Manpikin èn fu waka na baka en eksempre èn den leri fu en (Mateus 16:24). So bun, na apostel Petrus ben skrifi: „Krestes ben pina fu unu ede, èn ben libi gi unu wan eksempre fu waka soifri na ini en futustap.”—1 Petrus 2:21.
4 Fu san ede wi musu waka soifri na ini den futustap fu Yesus? Bika efu wi e waka na en baka, dan wi e waka na Yehovah Gado baka. Yesus ben sabi en Tata heri bun, fu di a ben tan milyardmilyard yari nanga en na hemel bifo a ben kon na grontapu (Odo 8:22-31; Yohanes 8:23; 17:5; Kolosesma 1:15-17). Di Yesus ben de na grontapu, dan a ben prenki a Tata fu en na wan loyaal fasi. A ben fruklari: „Soleki fa a Tata ben leri mi, na so mi e taki den sani disi.” Fu taki en leti, Yesus ben waka so soifri na Yehovah baka, taki a ben kan taki: „A sma di si mi, si a Tata tu.”—Yohanes 8:28; 14:9.
5. Na ondro sortu wet Kresten de, èn o ten a wet dati ben bigin wroko?
5 San wi musu du efu wi wani arki Yesus èn waka na en baka? ¿A wani taki, dati wi de na ondro wan wet? Paulus ben skrifi: „Misrefi no de na ondro a wet.” Dya a ben taki fu „na owru frubontu”, a Wet frubontu di ben meki nanga Israèl. Paulus ben erken taki a ben de „na ondro a wet ini a tori fu Krestes” (1 Korentesma 9:20, 21; 2 Korentesma 3:14). Di na owru Wet frubontu ben kon na wan kaba, dan wan „nyun frubontu” ben bigin wroko nanga en „wet fu Krestes” di ala futuboi fu Yehovah na ini a ten disi musu gi yesi na dati.—Lukas 22:20; Galasiasma 6:2; Hebrewsma 8:7-13.
6. San wi ben sa kan taki fu „a wet fu Krestes”, èn fa wi kan gi yesi na en?
6 Yehovah no ben meki sma skrifi „a wet fu Krestes” leki wan lo tirilin di a ben seti na ini difrenti grupu, soleki fa a ben du dati nanga na owru Wet frubontu. A nyun wet disi gi den bakaman fu Krestes no abi wan heri ipi sani di skrifi san wi musu du noso san wi no musu du. Ma Yehovah ben meki sma skrifi na ini a Wortu fu en fo langa tori di e taki fu a libi nanga den leri fu en Manpikin. Boiti dati, Gado ben meki wan tu fositen bakaman fu Yesus, skrifi sani nanga yepi fu santa yeye, èn di abi fu du nanga a fasi fa sma musu tyari densrefi, a fasi fa tori ini a gemeente e waka, sani di sma musu du ini na osofamiri, nanga tra tori (1 Korentesma 6:18; 14:26-35; Efeisesma 5:21-33; Hebrewsma 10:24, 25). Te wi e meki a libi fu wi de akruderi na eksempre èn den leri fu Yesus Krestes èn wi e arki a rai di den Bijbel skrifiman na ini a fosi yarihondro ben skrifi nanga yepi fu santa yeye, dan wi e gi yesi na „a wet fu Krestes”. Disi na a sani di Yehovah e aksi fu den futuboi fu en na ini a ten disi.
Lobi De Prenspari
7. Fa Yesus ben tyari kon na krin san na a moro prenspari sani fu a wet fu en di a ben hori a lasti Paskafesa nanga den apostel fu en?
7 Lobi ben de prenspari na ondro a Wet, ma a de a moro prenspari sani fu a wet fu Krestes. Yesus ben poti krakti na tapu disi di a ben kon makandra nanga den apostel fu en fu hori a Paskafesa fu 33 G.T. Akruderi den sani di na apostel Yohanes ben fruteri fu san ben pasa a neti dati, dan 28 leisi den seryusu wortu fu Yesus ben abi fu du nanga lobi. Disi ben sori den apostel fu en krin san na a moro prenspari sani fu a wet fu en noso san a wani taki trutru. A moi fu si, taki Yohanes ben bigin a tori fu en di ben taki fu den sani di ben pasa na tapu a prenspari neti dati, fu di a ben taki: „Bika a ben sabi bifo a paskafesa, taki en yuru ben kon fu gowe fu a grontapu disi go na en Tata, meki Yesus, fu di a ben lobi den wan fu en di ben de na grontapu, ben lobi den te na a kaba.”—Yohanes 13:1.
8. (a) San ben sori taki den apostel ben meki trobi nanga makandra di ben go nanga langa? (b) Fa Yesus ben leri den apostel fu en wan sani ini a tori fu sakafasi?
8 Yesus ben lobi den apostel fu en, ala di a ben gersi leki a pruberi, sondro bun bakapisi, fu yepi den apostel meki den no angri moro fu kisi makti nanga posisi. Wan tu mun bifo den ben kon na ini Yerusalem, ’den ben hari taki nanga makandra suma fu den ben de a moro bigiwan’. Èn leti bifo den ben doro na a foto fu hori a Paskafesa, den ben meki trobi baka fu posisi (Markus 9:33-37; 10:35-45). Taki disi ben de wan problema di ben go nanga langa, de fu si na a sani di ben pasa syatu baka di den apostel ben go na ini a sodrokamra fu hori a sani di ben musu de a lasti Paskafesa nanga makandra. Na a ten dati no wan fu den ben gebroiki na okasi fu du san sma ben gwenti du gi fisitiman taki den ben wasi den futu fu tra sma. Yesus srefi ben wasi den futu fu den, fu di a ben wani leri den wan sani ini a tori fu sakafasi.—Yohanes 13:2-15; 1 Timoteus 5:9, 10.
9. Fa Yesus ben handri nanga a tori di ben pasa baka a lasti Paskafesa?
9 Ma ala di a ben leri den a sani dati, toku luku san ben pasa agen, baka di den hori a Paskafesa èn Yesus ben seti a Memrefesa fu a dede di a ben o dede dyonsro. Na Evangelietori fu Lukas e taki: „Wan fayafaya kesekese ben de tu na den mindri fu suma fu den ben de a moro bigiwan.” Na presi taki Yesus ben atibron nanga den apostel èn taki a ben kosi den, a ben gi den rai na wan switi fasi taki den ben musu de tra fasi leki den tiriman fu grontapu di ben wani abi makti nomonomo (Lukas 22:24-27). Baka dati a ben gi den a sani di sma ben sa kan kari a fondamenti fu a wet fu Krestes, di a ben taki: „Mi e gi unu wan nyun komando, fu unu lobi makandra; neleki fa mi ben lobi unu, fu unu lobi makandra tu.”—Yohanes 13:34.
10. Sortu komando Yesus ben gi den disipel fu en, èn san disi ben wani taki?
10 Moro lati a neti dati, Yesus ben sori den o bigi a lobi fu wan Kresten musu de. A ben taki: „Disi na mi komando, taki unu lobi makandra neleki fa mi ben lobi unu. No wan sma abi moro lobi leki a wan disi, taki wan sma musu gi en sili abra gi a bun fu den mati fu en” (Yohanes 15:12, 13). ¿Yesus ben taki dati den bakaman fu en ben musu wani dede gi kompe-bribiman te disi ben de fanowdu? Dati na san Yohanes, wan sma di ben de drape, ben frustan bika baka ten a ben skrifi: „Nanga yepi fu disi wi ben leri sabi lobi, bika gi wi a sma disi [Yesus Krestes] ben gi a sili fu en; èn wi abi a fruplekti fu gi wi sili gi den brada fu wi.”—1 Yohanes 3:16.
11. (a) Fa wi e meki a wet fu Krestes kon tru? (b) Sortu eksempre Yesus ben gi?
11 Dati meki wi no e gi yesi na a wet fu Krestes soso te wi e leri trawan fu en. Wi musu libi tu leki Yesus èn du san a ben du. A tru, taki Yesus ben gebroiki moi wortu di a ben prakseri bun fu den fosi, te a ben taki nanga sma. Ma a ben gi leri tu nanga yepi fu na eksempre fu en. Ala di Yesus ben de wan makti yeye kriaturu na ini hemel fosi, toku a ben gebroiki na okasi fu sorgu gi den afersi fu en Tata na grontapu èn fu sori wi fa wi musu libi. A ben abi sakafasi, switifasi, èn a ben hori sma na prakseri, èn a ben yepi den sma di ben abi hebi lai èn den sma di ben e kisi kwinsi (Mateus 11:28-30; 20:28; Filipisma 2:5-8; 1 Yohanes 3:8). Èn Yesus ben gi den bakaman fu en tranga fu lobi makandra, neleki fa a ben lobi den.
12. Fu san ede wi kan taki dati a wet fu Krestes no e sori dati a no de prenspari fu lobi Yehovah?
12 ¿Na sortu presi a lobi gi Yehovah — a moro bigi komando fu a Wet — e kon na ini a wet fu Krestes? (Mateus 22:37, 38; Galasiasma 6:2) ¿A di fu tu presi? ¡Kwetikweti! Lobi gi Yehovah èn lobi gi den kompekresten fu wi abi bun furu fu du nanga makandra. Wan sma no kan lobi Yehovah trutru sondro fu lobi a brada fu en, bika na apostel Yohanes ben taki: „Efu wan sma e taki: ’Mi lobi Gado’ èn toku a no wani si en brada na ai, dan a de wan leiman. Bika a sma di no lobi en brada, di a si, no kan lobi Gado, di a no si.”—1 Yohanes 4:20; teki gersi 1 Yohanes 3:17, 18.
13. San ben de a bakapisi fu a gi di den disipel ben gi yesi na a nyun komando fu Yesus?
13 Di Yesus ben gi den disipel fu en a nyun komando fu lobi makandra neleki fa a ben lobi den, dan a ben taigi den san ben o de a bakapisi fu disi. „Nanga disi ala sma sa sabi taki unu na mi disipel,” na so a ben taki, „efu unu abi lobi na un mindri” (Yohanes 13:35). Tertullianus di ben libi moro leki wan hondro yari baka di Yesus dede, ben taki dati a lobi di den fositen Kresten ben lobi makandra leki brada, ben abi a bakapisi dati trutru. Tertullianus ben taki san sma di no ben de Kresten, ben taki fu den bakaman fu Krestes: ’Luku fa den lobi makandra èn fa den de klariklari fu dede gi makandra.’ Wi ben sa kan aksi wisrefi: ’¿Mi e sori a lobi dati gi kompekresten, di de wan buweisi taki mi na wan disipel fu Yesus?’
A Fasi Fa Wi E Buweisi Taki Wi Abi Lobi
14, 15. Fu san ede a kan de wan muilek sani fu gi yesi na a wet fu Krestes, ma san kan yepi wi fu du dati?
14 A de prenspari taki den futuboi fu Yehovah e sori a lobi di Krestes abi. ¿Ma yu feni en wan muilek sani fu lobi kompekresten di e sori taki den e prakseri densrefi nomo? We, soleki fa wi si kaba, dan srefi den apostel ben meki trobi nanga makandra èn ben pruberi fu suku den eigi wini nomo (Mateus 20:20-24). Den Galasiasma tu ben meki trobi nanga makandra. Baka di Paulus ben sori taki lobi gi a sma na wi sei ben meki a Wet kon tru, dan a ben warskow den: „Ma efu unu e tan beti èn swari makandra, dan luku bun taki unu no e kiri makandra.” Baka di Paulus ben teki den wroko fu a skin gersi nanga den froktu fu a yeye fu Gado, dan a ben gi a frumane: „No meki wi tron sma di e prakseri densrefi nomo, fu di wi e wiki strei nanga makandra èn e dyarusu tapu makandra.” Baka dati na apostel ben gi deki-ati: „Tan tyari den hebi fu makandra, èn du san a wet fu Krestes e taki na so fasi.”—Galasiasma 5:14–6:2.
15 ¿Yehovah e aksi tumusi furu fu wi te a e aksi wi fu gi yesi na a wet fu Krestes? Ala di a kan de wan muilek sani fu abi switifasi gi den sma di taki grofu nanga wi, te yu luku en bun, èn di hati den firi fu wi, toku wi abi a fruplekti fu „kon de sma di e waka baka Gado, leki lobi pikin, èn tan waka na ini lobi” (Efeisesma 5:1, 2). Wi musu tan luku na eksempre fu Gado, di „e rikomanderi en eigi lobi na wi na ini disi, taki Krestes dede gi wi, ala di wi ben de sondari ete” (Romesma 5:8). Te wi fosi e bigin yepi tra sma, so srefi den sma di no handri bun nanga wi, dan wi kan kon prisiri te wi sabi taki wi e waka baka Gado èn taki wi e gi yesi na a wet fu Krestes.
16. Fa wi e buweisi taki wi lobi Gado nanga Krestes?
16 Wi musu hori na prakseri taki wi e sori a lobi fu wi nanga den sani di wi e du, èn no soso nanga den sani di wi e taki. Srefi Yesus ben feni en muilek wan leisi, fu du wan sani di ben abi fu du nanga a wani fu Gado, fu di a ben prakseri ala sani di ben de ini a tori. „Tata, efu yu wani, puru a kan disi na mi,” Yesus ben begi. Ma wantewante a ben taki: „Ma toku, no meki a wani fu mi pasa, ma yu wani” (Lukas 22:42). Ala di Yesus ben pina someni, toku a ben du a wani fu Gado (Hebrewsma 5:7, 8). Te wi e gi yesi, dan dati na wan buweisi fu a lobi fu wi èn a e sori taki wi erken taki a pasi fu Gado na a moro bun wan. „Disi na san a lobi gi Gado wani taki,” na so Bijbel e taki, „dati wi e hori den komando fu en” (1 Yohanes 5:3). Èn Yesus ben taigi den apostel fu en: „Efu unu lobi mi, dan unu sa du den komando fu mi.”—Yohanes 14:15.
17. Sortu spesrutu komando Yesus ben gi den bakaman fu en, èn fa wi sabi taki a fiti gi wi na ini a ten disi?
17 Sortu spesrutu komando Krestes ben gi den bakaman fu en, boiti a komando taki den ben musu lobi makandra? A ben komanderi den taki den ben musu du a preikiwroko di a ben leri den. Petrus ben taki: „A ben gi wi a komando tu fu preiki gi a pipel èn fu gi kotoigi dorodoro” (Tori fu den Apostel 10:42). Yesus ben gi a spesrutu komando: „Go fu dati ede, èn meki disipel fu sma fu ala nâsi, èn dopu den na ini a nen fu a Tata èn fu a Manpikin èn fu a santa yeye, èn leri den fu du ala den sani di mi komanderi unu” (Mateus 28:19, 20; Tori fu den Apostel 1:8). Yesus ben tyari kon na krin taki den sani dati di a ben taigi den fu du, ben o fiti tu gi den bakaman fu en now, na ini „a ten fu a kaba”, bika a ben taki: „A bun nyunsu disi fu a kownukondre sa preiki na heri grontapu pe sma e libi, leki wan kotoigi gi ala nâsi, èn dan a kaba sa kon” (Danièl 12:4; Mateus 24:14). A no de fu taki, dati a de a wani fu Gado taki wi e preiki. Ma son sma kan denki taki Gado e aksi tumusi furu fu wi te a e aksi wi fu du a wroko disi. ¿Ma dati de trutru so?
Fu San Ede a Kan Gersi wan Muilek Sani
18. San wi musu hori na prakseri te wi e pina fu di wi e du san Yehovah e aksi?
18 Soleki fa wi si kaba, dan Yehovah aksi sma fu du difrenti sani na ini a historia. Èn neleki fa den sani di a ben aksi den fu du ben difrenti, na so den tesi di den ben kisi ben difrenti tu. A lobi Manpikin fu Gado ben kisi den moro muilek tesi, èn te fu kaba den ben kiri en na a moro ogri-ati fasi fu di a ben du san Gado ben aksi. Ma te wi e pina fu di wi e du san Yehovah e aksi wi, dan wi musu hori na prakseri taki a no en e meki wi kisi den tesi fu wi (Yohanes 15:18-20; Yakobus 1:13-15). Na opruru di Satan ben meki ben tyari sondu, pina nanga dede kon, èn en na a sma di tyari situwâsi kon di nofotron meki taki a muilek tumusi fu du san Yehovah e aksi fu den futuboi fu en.—Yob 1:6-19; 2:1-8.
19. Fu san ede a de wan grani fu du san Gado aksi fu wi nanga yepi fu en Manpikin?
19 Yehovah ben gebroiki en Manpikin fu gi a komando taki na ini a ten disi fu a kaba, den futuboi fu En sa meki bekènti na heri grontapu taki a wan-enkri lusu fu ala a pina di ala libisma e kisi, na a Kownukondre tiri. A tiri disi fu Gado sa puru ala problema na grontapu — orloku, ogridu, pôtifasi, na owrudei, siki, dede. A Kownukondre sa tyari wan tumusi moi paradijs na grontapu kon tu, pe dedesma srefi sa kon na libi baka (Mateus 6:9, 10; Lukas 23:43; Tori fu den Apostel 24:15; Openbaring 21:3, 4). ¡A de wan bigi grani trutru fu meki a bun nyunsu fu den sani disi bekènti! Fu dati ede a de krin, taki a sani di Yehovah e aksi wi fu du no de wan problema. Sma e gens wi, ma na Satan Didibri nanga a grontapu fu en e du disi.
20. Fa wi kan kakafutu gi iniwan tyalensi di wi e kisi fu Didibri?
20 Fa wi kan kakafutu nanga bun bakapisi gi iniwan tyalensi di wi e kisi fu Satan? Wi kan du disi te wi e hori den wortu disi na prakseri: „Sori taki yu koni, mi manpikin, èn prisiri mi ati, so taki mi kan gi wan piki na a sma di e spotu mi” (Odo 27:11). Yesus ben meki taki Yehovah ben kan piki na tapu a spotu di Satan ben spotu En, fu di Yesus ben gowe libi a libi na hemel pe ogri no ben man pasa nanga en, so taki a ben kan du a wani fu en Tata na grontapu (Yesaya 53:12; Hebrewsma 10:7). Di Yesus ben de wan libisma dan a ben horidoro na ondro ibri sortu tesi di a ben kisi, srefi a dede di a dede na wan pina-udu. Efu wi e waka na en baka leki a moro bigi Eksempre fu wi, dan wi srefi kan horidoro na ondro tesi èn wi kan du san Yehovah e aksi fu wi.—Hebrewsma 12:1-3.
21. San yu e denki fu a lobi di Yehovah nanga en Manpikin sori?
21 ¡Dati ben de trutru lobi di Gado nanga en Manpikin sori wi! Tangi fu na ofrandi fu Yesus, meki libisma di e gi yesi abi a howpu fu libi fu têgo na ini Paradijs. So bun, no meki noti meki wi lasi a howpu fu wi. Na presi fu dati, meki wi srefi gi yesi na a sani di Yesus ben kan du, soleki fa Paulus ben du, di ben taki: „A Manpikin fu Gado . . . ben lobi mi èn [a] ben gi ensrefi abra fu mi ede” (Galasiasma 2:20). Èn meki wi sori trutru warderi gi Yehovah, wi Gado, di lobi wi èn di noiti no e aksi tumusi furu fu wi.
San Yu Ben Sa Piki?
◻ San Yehovah e aksi fu wi na ini a ten disi?
◻ Fa Yesus ben tyari kon na krin o prenspari lobi de, tapu a lasti neti di a ben de nanga den apostel fu en?
◻ Fa wi kan buweisi taki wi lobi Gado?
◻ Fu san ede a de wan grani fu du san Yehovah e aksi fu wi?
[Prenki na tapu bladzijde 23]
Sortu sani Yesus ben leri den apostel fu en di a ben wasi den futu fu den?
[Prenki na tapu bladzijde 25]
Awansi sma e gens wi, toku a de wan prisiri grani fu taki nanga sma fu a bun nyunsu