Timoteus—„Wan Trutru Pikin na ini a Bribi”

TE YU ben sa teki Timoteus gersi nanga tra sma, dan a ben yongu ete di a Kresten apostel Paulus ben bosroiti fu teki en leki wan kompe di ben kan reis nanga en. Disi ben de a bigin fu wan matifasi di ben o go doro so wan 15 yari. A matifasi di ben kon na mindri den tu man ben de so bun taki Paulus ben kan kari Timoteus „mi lobi èn getrow pikin na ini Masra” èn „wan trutru pikin na ini a bribi”.—1 Korentesma 4:17; 1 Timoteus 1:2.

Sortu sani fu a persoonlijkheid fu Timoteus ben meki taki Paulus ben lobi en so? Fa Timoteus ben tron so wan warti kompe? Èn sortu bun sani wi kan leri fu a tori di skrifi nanga yepi fu santa yeye, èn di e taki fu den sani di Timoteus du?

Paulus Bosroiti fu Teki En

Paulus ben feni a yongu disipel Timoteus di na apostel ben go na Listra (ini a disiten Torkukondre) na tapu en di fu tu zendingwaka na wan ten fu 50 G.T. Den Kresten na Listra nanga Ikonium ben taki bun sani fu Timoteus, di kande ben de wan bigi tini noso kande a ben pasa 20 yari kaba (Tori fu den Apostel 16:1-3). A ben libi akruderi a nen fu en, san wani taki „Wan Sma Di E Gi Gado Grani”. Sensi di Timoteus ben de wan pikin-nengre, en granmama Lois nanga en mama Eunice ben leri en sani fu den Santa Buku fu Bijbel (2 Timoteus 1:5; 3:14, 15). Kande den ben teki a Kresten bribi di Paulus ben kon a fosi leisi na a foto fu den wan tu yari na fesi. Now, nanga yepi fu a santa yeye, wan sani di ben taki na fesi ben sori fa a tamara fu Timoteus ben o de (1 Timoteus 1:18). Akruderi den sani dati di den ben kisi fu yere, Paulus nanga den owruman fu a gemeente ben poti den anu na tapu a yonkuman, èn nanga dati den ben sreka en gi wan spesrutu wroko, èn na apostel ben teki en fu de en kompe na tapu den zendingwaka.—1 Timoteus 4:14; 2 Timoteus 1:6.

Fu di en papa ben de wan Griki di no ben de na bribi, meki Timoteus no ben besnij. A no de fu taki, dati disi no ben de wan sani di wan Kresten ben musu du. Ma fu no meki den Dyu di den ben o fisiti, naki futu fadon meki Timoteus ben du a sani disi di e hati skin.—Tori fu den Apostel 16:3.

¿Sma ben si Timoteus leki wan Dyu fosi? Son sabiman e hori nomonomo taki den buku fu den rabi e sori taki „sma e bepaal nanga yepi fu a mama san na a posisi fu den pikin fu wan trowpaar pe a man nanga na uma komopo na mindri sma fu difrenti grupu, èn no nanga yepi fu a papa”. Dati wani taki „wan Dyu mama e kisi Dyu pikin”. Ma a skrifiman Shaye Cohen e tweifri efu den „wet dati fu den rabi di e taki fu sma, ben de kaba na ini a fosi yarihondro G.T.” èn efu den Dyu fu Pikin Asia ben hori densrefi na a wet dati. Baka di a luku den historia buweisi, a kon na a bosroiti taki te Heiden man ben trow nanga umasma fu Israèl, dan „sma ben si den pikin fu den trowlibi disi leki Israèlsma soso te na osofamiri ben libi na mindri den Israèlsma. Den ben bepaal a geslakti nanga yepi fu a mamabere te a ben de ini a kondre fu a mama. Te na Israèl uma ben froisi go na wan tra kondre fu de nanga en Heiden masra, dan sma ben si den pikin fu den leki Heiden.” Awansi fa a no fa, na abi di Timoteus ben abi wan papa nanga mama di ben komopo na mindri sma fu difrenti grupu, ben musu de wan wini gi a preikiwroko. A no ben o abi problema nanga den Dyu noso den Heiden, èn kande dati ben yepi en fu wai pasi gi den problema di ben de na mindri den.

Di Paulus ben go na Listra, dan dati ben de wan nyun bigin ini a libi fu Timoteus. Fu di a yonkuman ben de klariklari fu du san a santa yeye ben sori en fu du èn a ben wani wroko makandra nanga den Kresten owruman na wan sakafasi, meki dati ben tyari bigi blesi nanga grani na ini a diniwroko kon gi en. Efu Timoteus ben sabi disi na a ten dati efu no, na ondro a tiri fu Paulus den ben o gebroiki en baka ten gi prenspari theokrasia wroko, di ben o tyari en go fara fu oso èn srefi te na Rome, a mamafoto fu a gran kownukondre.

Timoteus E Meki Kownukondre Afersi Go na Fesi

Wi sabi soso wan pisi fu den sani di Timoteus ben du, ma a ben reis go na ala sei fu meki Kownukondre afersi go na fesi. A fosi reis fu Timoteus makandra nanga Paulus èn nanga Silas na ini 50 G.T., ben tyari en go na ini Pikin Asia èn na ini Europa. Drape a ben teki prati na a preikiwroko na Filipi, Tesalonika, nanga Berea. Baka di gens ben meki taki Paulus ben musu go na Ateine, dan a ben libi Timoteus nanga Silas na ini Berea fu sorgu gi a grupu fu disipel di ben opo drape (Tori fu den Apostel 16:6–17:14). Baka ten, Paulus ben seni Timoteus go na Tesalonika fu gi a nyun gemeente drape deki-ati. Timoteus ben meki a bun nyunsu go na fesi di a ben miti nanga Paulus na Korente.—Tori fu den Apostel 18:5; 1 Tesalonikasma 3:1-7.

Den Buku fu Bijbel no e taki o langa Timoteus ben tan nanga den Korentesma (2 Korentesma 1:19). Ma kande na a ten fu 55 G.T., Paulus ben abi na prakseri fu seni Timoteus go baka na den fu di a ben yere fruferi nyunsu fu a situwâsi fu den (1 Korentesma 4:17; 16:10). Baka ten, den ben seni Timoteus, makandra nanga Erastus, fu Efeise go na Masedonia. Èn di Paulus ben skrifi go na den Romesma di a ben de na Korente, dan Timoteus ben de nanga en baka.—Tori fu den Apostel 19:22; Romesma 16:21.

Timoteus nanga trawan ben gowe libi Korente makandra nanga Paulus, di Paulus ben go na Yerusalem, èn den ben go nanga na apostel kande te na Troas. Efu Timoteus ben go doro na Yerusalem wi no sabi. Ma a nen fu en e kari na a bigin fu den dri brifi di Paulus ben skrifi di a ben de na ini strafu-oso na Rome wan sani fu 60-61 G.T. (Tori fu den Apostel 20:4; Filipisma 1:1; Kolosesma 1:1; Fileimon 1).a Paulus ben abi na prakseri fu seni Timoteus fu Rome go na Filipi (Filipisma 2:19). Èn baka di den ben lusu Paulus na strafu-oso, dan Timoteus ben tan na Efeise soleki fa na apostel ben aksi en.—1 Timoteus 1:3.

A no ben de makriki fu reis na ini a fosi yarihondro èn a no ben switi tu, dati meki wi kan warderi en taki Timoteus ben de klariklari fu reis furu leisi fu a bun fu den gemeente. (Luku De Wachttoren fu 15 augustus 1996, bladzijde 29, a faki.) Luku wan fu den reis nomo di a ben o meki èn san disi e fruteri wi fu Timoteus.

Kon Sabi Moro fu a Fasi Fa Timoteus Tan

Timoteus ben de nanga Paulus na Rome di na apostel, di ben de na strafu-oso, ben skrifi go na den Kresten na Filipi di sma ben frufolgu èn a ben taki: „Fu di mi e frutrow tapu Masra Yesus meki mi e howpu taki mi kan seni Timoteus kon na unu esi-esi, so taki mi kan de wan sili di e prisiri te mi kon sabi den sani di abi fu du nanga unu. Bika mi no abi no wan tra sma di abi wan yeyefasi leki di fu en, di trutru sa sorgu gi den sani di abi fu du nanga unu. Bika ala den trawan e prakseri den eigi afersi nomo, no den di fu Krestes Yesus. Ma unu sabi sortu buweisi a ben gi fu ensrefi, taki, neleki wan pikin nanga wan papa, a ben wroko nanga mi leki wan srafu fu meki a bun nyunsu bekènti.”—Filipisma 1:1, 13, 28-30; 2:19-22.

Den wortu dati ben sori krin fa Timoteus ben broko en ede nanga kompe-bribiman. Efu den no ben go nanga sipi, dan gi so wan reis, den ben musu waka 40 dei nanga futu fu Rome te na Filipi, ala di den ben musu abra wan syatu pisi na tapu na Adriatisch Se, èn dan den abi ete 40 dei fanowdu fu drai go baka na Rome. Timoteus ben wani du ala den sani dati fu dini den brada nanga sisa fu en.

Ala di Timoteus ben reis furu, toku a no ben gosontu son leisi. A sori leki a ben abi wan problema nanga en bere èn a ben „siki furu leisi” (1 Timoteus 5:23). Toku a ben du ala muiti gi a bun fu a bun nyunsu. ¡A no de fu fruwondru taki Paulus ben abi so wan tranga banti nanga en!

A sori leki na ondro a tiri fu na apostel èn nanga yepi fu den sani di den ben ondrofeni makandra, Timoteus ben kon de leki Paulus. Dati meki Paulus ben kan taigi en: „Yu waka soifri na baka den sani di mi leri yu, a fasi fa mi ben tyari mi libi, den sani di mi abi na prakseri, a bribi fu mi, a langa pasensi fu mi, a lobi fu mi, a fasi fa mi horidoro, a frufolgu di sma frufolgu mi, den pina fu mi, den sortu sani di ben pasa nanga mi na Antiokia, na Ikonium, na Listra, den sortu frufolgu di mi kisi.” Timoteus ben krei makandra nanga Paulus, Paulus ben kari en na ini den begi fu en, èn a ben wroko tranga nanga Paulus fu meki den Kownukondre afersi go na fesi.—2 Timoteus 1:3, 4; 3:10, 11.

Paulus ben gi Timoteus deki-ati fu ’no meki no wan sma broko-ai gi den yongu yari fu en’. Disi e sori kande taki Timoteus ben fruleigi pikinso, èn taki a ben tweifri fu gebroiki a makti fu en (1 Timoteus 4:12; 1 Korentesma 16:10, 11). Ma a ben man du sani en wawan, èn nanga ala frutrow Paulus kan ben seni en fu go du frantwortu wroko (1 Tesalonikasma 3:1, 2). Di Paulus ben si taki krakti theokrasia tiri ben musu gi na a gemeente fu Efeise, dan a ben gi Timoteus tranga fu tan drape fu „gi wan tu sma a komando fu no kon nanga wan tra leri” (1 Timoteus 1:3). Ma ala di Timoteus ben kisi furu frantwortu, toku a ben de bescheiden. Èn ala di a ben fruleigi kande, toku a ben abi deki-ati. Fu eksempre, a ben go na Rome fu yepi Paulus, di den ben tyari go na fesi krutu fu a bribi fu en ede. Te yu luku en bun, dan Timoteus srefi ben tan wan pisi ten na strafu-oso, kande fu a srefi sani dati ede.—Hebrewsma 13:23.

Sondro tweifri Timoteus ben leri furu fu Paulus. A lespeki di na apostel ben abi gi a kompe-wrokoman fu en, e kon na krin fu di a ben skrifi tu brifi gi Timoteus nanga yepi fu santa yeye, èn den de fu feni na ini den Kresten Griki Buku fu Bijbel. Na a ten fu 65 G.T., di Paulus ben frustan taki a ten ben doro taki a ben o dede nanga furu skin-ati, dan a ben seni kari Timoteus ete wan leisi (2 Timoteus 4:6, 9). Bijbel no e taki efu Timoteus ben man go luku Paulus bifo den ben kiri na apostel efu no.

¡Gi Yusrefi!

Wi kan leri furu fu a moi eksempre fu Timoteus. A ben leri furu fu a de di a ben de nanga Paulus, èn fu wan fruleigi yongusma a ben tron wan opziener. Yongu Kresten man nanga uma kan kisi furu wini fu so wan demakandra na ini a ten disi. Èn efu den e meki a diniwroko fu Yehovah tron a libiwroko fu den, dan den sa abi furu warti wroko fu du (1 Korentesma 15:58). Den kan tron pionier, noso furuten preikiman, na ini a gemeente fu den, noso den kan go dini pe a nowtu gi Kownukondre preikiman de moro bigi. Wan fu den furu wroko di de fu du na a zendingwroko na ini tra kondre noso a diniwroko na a edekantoro fu a Waktitoren Genootschap noso na wan fu den tra bijkantoro. Èn a no de fu taki dati ala Kresten kan sori a srefi yeye di Timoteus ben sori, fu di den e du diniwroko gi Yehovah nanga den heri ati.

¿Yu e angri fu tan gro na yeye fasi, so taki den kan gebroiki yu na ini na organisâsi fu Yehovah gi awansi sortu wroko di Yehovah feni bun? Dan du san Timoteus ben du. Gi yusrefi someni leki yu kan. Èn yu no sabi sortu grani yu o kisi kande.

[Futuwortu]

[Prenki na tapu bladzijde 31]

„Mi no abi no wan tra sma di abi wan yeyefasi leki di fu en”