Gi Sma Pardon Nanga Yu Heri Ati

„Na so mi hemel Tata sa du tu nanga unu, efu unu no gi un brada pardon nanga un heri ati.”—MATEUS 18:35.

1, 2. (a) Fa wan uma di ben de wan sondari èn di sma ben sabi bun, ben sori taki a ben abi warderi gi Yesus? (b) San Yesus ben sori nanga a fasi fa a ben piki?

SOLEKI fa a sori, dan na uma ben de wan motyo. A no ben de wan sma di yu ben sa fruwakti fu si na ini na oso fu wan relisi sma. Kande sma ben skreki fu si en drape, ma san na uma ben du ben skreki den moro. A ben go na a man di ben hori ensrefi na den moro hei moreel markitiki èn a ben sori warderi gi den wroko fu a man, di a ben wasi a man en futu nanga den watra-ai fu en èn a ben drei den nanga en ede-wiwiri.

² A man dati, Yesus, no ben tegu fu na uma disi „di sma na ini a foto ben sabi leki wan sondari”. Ma a ben trobi Simon a Fariseiman, di ben abi na oso, taki na uma ben de wan sondari. Yesus ben piki en di a ben fruteri fu tu man di ben abi wan paiman na wan sma di ben leni den moni. Wán fu den ben abi wan bigi paiman — a moni di wan wrokoman e wroko na ini tu yari. A paiman fu a trawan ben de wan di fu tin pisi fu dati — a no ben doro a moni ete di wan sma e wroko na ini dri mun. Di no wan fu den ben man pai a paiman, dan a sma di ben leni den a moni „ben gi den ala tu pardon na wan fri fasi”. A de krin taki a sma di ben kisi moro pardon ben abi moro reide fu sori lobi. Baka di Yesus ben sori san disi ben abi fu du nanga a bun sani di na uma ben du, dan a ben taki tu fu a gronprakseri: „A sma di no e kisi furu pardon, no lobi furu.” Ne a ben taigi na uma: „Yu kisi pardon fu den sondu fu yu.”—Lukas 7:36-48.

3. Sortu sani wi musu go ondrosuku na wisrefi?

³ Aksi yusrefi: ’Efu mi ben de na uma dati noso efu mi ben de na ini so wan situwâsi èn sma ben abi sari-ati nanga mi, ¿dan mi ben o abi a tranga-ati fu no gi trawan pardon?’ Kande yu ben sa piki: ’¡Kwetikweti!’ ¿Ma yu e bribi trutru taki yu wani gi sma pardon? ¿Na so yu tan? ¿Yu du dati wantewante furutron, èn trawan ben sa taki dati yu na wan sma di de klariklari fu gi trawan pardon? Kon meki wi go luku fu san ede ibriwan fu wi musu ondrosuku wisrefi na wan eerlijk fasi.

A De Fanowdu fu Gi Pardon—Èn Taki Wi E Kisi Pardon

4. Sortu sani fu wisrefi wi musu erken?

⁴ Yu no de volmaakti, èn dati yu sabi heri bun. Efu sma ben sa aksi yu, dan yu ben sa agri nanga disi srefi, èn kande yu ben o kari den wortu di de fu feni na 1 Yohanes 1:8: „Efu wi e fruklari: ’Wi no abi sondu’, dan wi e kori wisrefi èn a waarheid no de na ini wi” (Romesma 3:23; 5:12). A sondu fu son sma ben de fu si kande di den du bigi sondu di ben hati sma. Ma srefi efu yu no du disi fu espresi, toku a de seiker taki furu leisi èn na furu fasi yu no hori yusrefi na den markitiki fu Gado — noso taki yu sondu. ¿A no so?

5. Gi sortu sani wi musu taki Gado tangi?

⁵ Fu dati ede a situwâsi fu yu ben sa kan gersi a sani di na apostel Paulus ben taki: „Gado ben meki unu kon na libi makandra nanga [Yesus], ala di unu ben dede na ini den fowtu fu unu èn ala di un skin no ben besnij. A ben gi wi pardon fu ala den fowtu fu wi na wan bun-ati fasi” (Kolosesma 2:13; Efeisesma 2:1-3). Luku den wortu „gi wi pardon fu ala den fowtu fu wi”. Dati na wan lo sani. Ibriwan fu wi abi nofo reide fu begi leki fa David ben begi: „Fu yu nen ede, o Yehovah, yu musu gi mi pardon srefi fu a sondu fu mi, bika a bigi.”—Psalm 25:11.

6. Fu sortu sani wi kan de seiker ini a tori fu Yehovah èn fu a gi di a e gi sma pardon?

⁶ Fa yu — noso iniwan fu wi — kan kisi pardon? Wan prenspari sani de taki Yehovah Gado wani gi sma pardon. Na so a tan (Exodus 34:6, 7; Psalm 86:5). Wi kan frustan taki Gado e fruwakti fu wi taki wi e begi en, fu aksi en efu a wani gi wi pardon (2 Kroniki 6:21; Psalm 103:3, 10, 14). Èn a sreka sani so, taki wi abi wan yoisti fondamenti fu a gi wi pardon — a frulusu-ofrandi fu Yesus.—Romesma 3:24; 1 Petrus 1:18, 19; 1 Yohanes 4:9, 14.

7. Na sortu fasi yu ben sa wani waka baka na eksempre fu Yehovah?

⁷ A fasi fa Gado de klariklari fu gi sma pardon, musu sori yu wan eksempre pe yu kan si fa yu musu handri nanga tra libisma. Paulus ben poti prakseri na disi, di a ben skrifi: „Tron sma di abi switifasi gi makandra, di abi safu sari-atifasi, èn di e gi makandra pardon na wan fri fasi, neleki fa Gado ben gi unu pardon na wan fri fasi nanga yepi fu Krestes” (Efeisesma 4:32). Tweifri no de taki a sani di Paulus ben taki, abi fu du nanga a leri di wi musu leri fu na eksempre fu Gado, bika a vers di e kon na baka e taki moro fara: „Fu dati ede, kon de sma di e waka baka na eksempre fu Gado, leki lobi pikin” (Efeisesma 5:1). ¿Yu e si san disi abi fu du nanga a tori? Yehovah Gado ben gi yu pardon, dati meki — soleki fa Paulus e sori na wan krakti fasi — yu musu waka na En baka èn yu musu ’abi safu sari-atifasi, fu di yu e gi tra sma pardon na wan fri fasi’. Ma aksi yusrefi: ’¿Mi e du dati? Efu disi a no a fasi fa mi gwenti, ¿dan mi e du muiti fu tron so wan sma, èn mi e du muiti trutru fu waka baka na eksempre fu Gado èn de wan sma di de klariklari fu gi trawan pardon?

Wi Musu Du Muiti fu De Sma Di De Klariklari fu Gi Trawan Pardon

8. Sortu sani wi musu erken fu den sma di de na ini a gemeente fu wi?

⁸ A ben o moi fu denki taki na ini a Kresten gemeente, wanwan leisi so wi abi fu gi sma pardon na a fasi fa Gado wani. Ma sani de heri tra fasi. A tru taki den Kresten brada nanga sisa fu wi e du muiti fu teki na eksempre fu Yesus di ben sori lobi (Yohanes 13:35; 15:12, 13; Galasiasma 6:2). Wan heri pisi ten kaba den du muiti fu no denki, fu no taki èn fu no du leki fa sma gwenti na ini a godelowsu grontapu disi, èn te now ete den e du muiti fu disi. Den trutru wani sori a nyun fasi fa wan sma musu de (Kolosesma 3:9, 10). Ma wi no kan frigiti taki a gemeente na heri grontapu, èn ibriwan gemeente, abi onvolmaakti libisma. Moro furu, den betre moro leki fa den ben de fosi, ma toku den de onvolmaakti ete.

9, 10. Fu san ede wi no musu fruwondru te brada e kisi problema nanga makandra?

⁹ Na ini Bijbel, Gado e fruteri wi fu espresi taki wi kan fruwakti onvolmaaktifasi na ini a gemeente, na mindri den brada nanga den sisa fu wi. Luku fu eksempre den wortu di Paulus ben skrifi na Kolosesma 3:13: „Tan frudrage makandra èn gi makandra pardon na wan fri fasi efu a wan abi wan sani fu kragi fu a trawan. Soleki fa Yehovah gi unu pardon na wan fri fasi, na so unu musu du tu.”

¹⁰ A moi fu si, taki dya Bijbel e memre wi san a gi di Gado e gi wi pardon abi fu du nanga a fruplekti di wi abi fu de klariklari fu gi trawan pardon èn a musu di wi musu du dati. Fu san ede disi na wan tyalensi? Fu di Paulus ben agri taki wan sma kan abi „wan sani fu kragi fu a trawan”. A ben sabi taki den sortu sani dati ben o de. Den musu ben de na ini a fosi yarihondro, srefi na mindri den Kresten „santawan”, di ben abi wan ’howpu di ben poti na wan sei gi den na hemel’ (Kolosesma 1:2, 5). ¿So bun, wi kan denki taki a ben o de tra fasi na ini ten disi pe moro furu tru Kresten no abi a kotoigi fu a yeye taki den na „den wan di Gado frukisi, di santa èn di a lobi”? (Kolosesma 3:12) Fu dati ede wi no musu prakseri taki wan sani no bun kwetikweti efu sma na ini a gemeente fu wi abi wan sani fu kragi fu wan trawan — sma hati den firi fu trawan, fu di a wan du a trawan wan ogri trutru, noso a wan e denki taki a trawan du en wan ogri.

11. Gi sortu sani a disipel Yakobus ben warskow wi?

¹¹ Den wortu fu Yesus en afubrada Yakobus e sori tu taki wi musu fruwakti taki wanwan leisi wi kan kisi fu du seiker nanga situwâsi pe wi musu gi den brada fu wi pardon. „Suma fu unu koni èn abi frustan? Meki a sori den wroko fu en, nanga a tumusi bun fasi fa a e tyari ensrefi, na wan safri-ati fasi di e fiti koni. Ma efu unu abi bigi dyarusu ini na ati fu unu èn lobi fu suku trobi, dan no e dyaf èn no e lei gi a waarheid” (Yakobus 3:13, 14). ’¿Bigi dyarusu de ini na ati fu tru Kresten èn den lobi fu suku trobi’? Iya, den wortu fu Yakobus e sori krin taki a sani dati ben de na ini a fosi yarihondro gemeente èn a sa de tu na ini a ten disi.

12. Sortu problema ben kon ini na owruten gemeente na Filipi?

¹² Wan trutru eksempre na san ben pasa nanga tu salfu Kresten di ben abi wan bun nen fu di den ben wroko bun tranga makandra nanga Paulus. Kande yu e memre ete taki yu ben leisi fu Efowdia nanga Sentike, memre fu a gemeente na Filipi. Ala di Filipisma 4:2, 3 no e taki fini fu a tori, toku a e sori taki wan problema ben de na mindri den. ¿A problema ben bigin fu di wan fu den, sondro fu denki fosi, ben taki wan sani di no ben switi so? ¿A ben bigin fu di wan fu den ben taki wan sani di ben meki wan famiriman firi syen, noso a ben kon na krin taki den ben dyarusu tapu makandra? Awansi san ben de a problema, a ben kon so seryusu taki Paulus ben yere en te na Rome. Kande dati ben meki taki den tu sisa na yeye fasi no ben taki moro nanga makandra, di ben abi leki bakapisi taki den ben wai pasi gi makandra na den konmakandra noso fu di a wan ben taigi den mati fu en hati sani fu a trawan.

13. Na sortu fasi kande, Efowdia nanga Sentike ben koti a trobi di den ben abi, èn san wi e leri fu disi?

¹³ ¿Disi na wan sani di yu sabi, di gersi wan sani di ben pasa na mindri wan tu sma na ini a gemeente fu yu noso wan sani di ben abi fu du nanga yu? So wan problema kan de srefi now pikinso. San wi kan du? Na ini na eksempre fu fositen, Paulus ben gi den tu sisa dati di ben wroko fayafaya, deki-ati fu „abi a srefi denki na ini Masra”. Kande den agri fu taki fu a tori, fu lusu den problema di ben tyari a kesekese kon, fu sori taki den de klariklari fu gi makandra pardon, èn taki den wani waka trutru baka na eksempre fu Yehovah fu de klariklari fu gi pardon. Wi no abi no wan reide fu denki taki a no ben waka bun nanga Efowdia nanga Sentike, èn a kan waka bun nanga wi tu. Wi kan de klariklari fu gi sma pardon na ini a ten disi nanga bun bakapisi.

Tyari Vrede Kon—Gi Pardon

14. Fu san ede nofotron yu kan libi a trobi leki fa a de èn a moro bun fu du dati?

¹⁴ San de fanowdu trutru fu gi wan tra Kresten pardon te yu abi wan problema nanga en? Fu taki en leti, wan makriki fasi no de, ma Bijbel e gi eksempre di kan yepi wi èn a e gi rai tu di wi kan gebroiki. Wan prenspari rai — ala di a no de wan makriki sani fu teki èn fu du — na fu frigiti a tori, libi en leki fa a de. Nofotron te wan problema de, soleki fa a ben de na mindri Efowdia nanga Sentike, dan ibriwan fu den e denki taki a trawan fowtu noso taki na en abi a moro bigi fowtu. Dati meki, te so wan situwâsi de, dan yu kan denki taki a de moro furu a fowtu fu a tra Kresten noso taki en du moro ogri. ¿Ma yu kan gi a sma pardon èn libi a tori leki fa a de? Yu musu frustan taki efu a de moro furu a fowtu fu a tra Kresten noso taki en wawan fowtu, wan sani di pikinmoro noiti no de so, dan a e didon na yu fu libi a tori leki fa a de èn fu gi a sma pardon.

15, 16. (a) San Mika ben taki fu Yehovah? (b) San a wani taki dati Gado „no e tan prakseri . . . den sondu”?

¹⁵ Meki wi no frigiti Gado di gi wi na eksempre fa fu gi sma pardon (Efeisesma 4:32–5:1). A profeiti Mika ben skrifi fu na eksempre fu En fu gi sma pardon: „Suma na wan Gado leki yu, wan di e gi pardon fu fowtu èn di no e tan prakseri den sondu fu a fikapisi fu a famiri-gudu fu en? Fu tru a no sa tan de nanga atibron fu têgo, bika a abi prisiri na ini lobi bun-ati.”—Mika 7:18.

¹⁶ Bijbel, di e taki dati Yehovah na wan sma „di no e tan prakseri . . . sondu”, no e taki dati a no man memre den fowtu moro, neleki a abi wan siki di e meki en frigiti den sani di a no wani memre. Luku san ben pasa nanga Simson èn nanga David, di ben du seryusu sondu. Gado ben man memre den sondu fu den langa ten ete baka dati; srefi wi sabi wan tu fu den sondu di den ben du, fu di Yehovah ben meki sma skrifi den na ini Bijbel. Toku a Gado fu wi di de klariklari fu gi sma pardon ben sori den tu sma dati sari-ati, èn a ben gebroiki den leki eksempre fu sma di ben abi bribi èn di wi musu waka na den baka.—Hebrewsma 11:32; 12:1.

17. (a) Sortu denki kan yepi wi fu no tan prakseri den sondu fu trawan noso den sani di den du di ben afrontu wi? (b) Fa wi sa waka baka na eksempre fu Yehovah, te wi e du muiti gi dati? (Luku a futuwortu.)

¹⁷ Iya, Yehovah ben abi a krakti fu ’no tan prakseri’a den sondu, soleki fa David ben aksi en furu leisi fu du (2 Samuèl 12:13; 24:10). ¿Wi kan waka na baka na eksempre fu Gado na ini disi, te wi de klariklari fu no tan prakseri den sani di wan kompe-futuboi fu wi taki noso du fu meki wi firi syen èn di a ben afrontu wi fu di a de wan onvolmaakti libisma? Prakseri taki yu de na ini wan opolani di e rij na tapu na opolani pasi fu opo go na loktu. Te yu e luku go na dorosei, dan krosibei fu na opolani pasi yu e si wan uma di yu sabi. A e du a pikin-nengre sani fu sutu en tongo go na doro gi yu. Yu sabi taki a ben mandi èn kande a abi yu na prakseri. Noso kande a no e prakseri yu kwetikweti. Awansi fa a no fa, te na opolani e frei lontu fu opo go moro hei, dan yu e pasa hei abra na uma di gersi soso na ede fu wan pina now. Baka wan yuru yu de hondrohondro kilometer fu drape, èn yu libi a sani di a ben du di a ben afrontu yu, na yu baka someni langa kaba. Na so a de tu taki furu leisi a sa yepi wi fu man gi sma pardon te wi e pruberi fu de leki Yehovah, èn wi e handri nanga koni efu wi no e tan prakseri na afrontu di sma afrontu wi (Odo 19:11). ¿A sani di a du di ben meki wi firi syen no sa gersi wan pikin sani baka tin yari noso baka tu hondro yari na ini a Dusun Yari Tiri? Fu san ede yu no e frigiti en nomo?

18. Sortu rai wi kan gebroiki efu a gersi leki wi no man frigiti wan sani di wan sma du di a ben afrontu wi?

¹⁸ Ma son leisi yu begi fu a tori kande èn yu ben pruberi fu gi a sma pardon, ma yu e firi taki yu no man. San yu kan du dan? Yesus ben gi wi deki-ati fu go na a tra sma èn pruberi fu koti a trobi te yu de nanga a sma wawan so taki yu kan abi vrede. „Fu dati ede, te yu e tyari yu presenti go na a altari èn drape yu e memre taki a brada fu yu abi wan sani nanga yu, dan libi yu presenti drape na fesi na altari èn gowe; suku vrede fosi nanga a brada fu yu, èn baka dati, te yu drai kon baka, òfer a presenti fu yu.”—Mateus 5:23, 24.

19. Sortu denki wi musu abi èn fa wi no musu denki efu wi e suku vrede nanga wi brada?

¹⁹ A moi fu si taki Yesus no ben taki dati yu musu go na yu brada fu overtoigi en taki yu ben abi leti èn taki en no ben abi leti. Kande a no ben abi leti. Ma a kan moro furu taki un ala tu ben abi fowtu. Awansi fa a no fa, yu no musu go na en fu meki en erken taki a ben fowtu, fu meki a kroipi gi yu, fu taki en so. Efu dati na fa yu wani taki fu a tori, dan yu kan de pikinmoro seiker taki a no sa waka bun. Èn yu no musu go na en tu fu taki finifini fu ibri sani di a du trutru di a ben afrontu yu noso di yu denki taki a afrontu yu. Te unu e taki nanga makandra sondro fu atibron èn unu e sori Kresten lobi èn a e kon na krin taki a problema ben kon fu di unu no ben frustan makandra bun, dan un ala tu kan pruberi fu lusu a tori. Ma srefi te unu no man agri krinkrin nanga makandra baka te unu taki, dan ¿dati de ala ten fanowdu? ¿A no ben sa moro betre efu unu ben kan agri nanga makandra taki trutru un ala tu wani dini wi Gado di de klariklari fu gi sma pardon? Te yu e prakseri fu a tru tori disi, dan kande a moro makriki gi ibriwan fu unu fu taki nanga un heri ati: „Mi e sari taki fu di wi no de volmaakti, wi ben kisi a trobi disi. Grantangi, meki wi frigiti a tori.”

20. San wi kan leri fu na eksempre fu den apostel?

²⁰ Memre taki den apostel ben kisi trobi nanga makandra, leki a leisi di wan tu fu den ben wani kisi moro grani (Markus 10:35-39; Lukas 9:46; 22:24-26). A sani dati ben tyari trobi kon, èn kande a ben hati a firi fu den trawan, noso a ben afrontu den srefisrefi. Ma den ben abi a krakti fu no tan prakseri den trobi dati èn den ben tan wroko nanga makandra. Wan fu den ben skrifi baka ten: „A sma di wani lobi a libi èn wani si bun dei, meki a kibri en tongo fu no taki san ogri èn en mofobuba fu no taki bedrigi sani, ma meki a kaba du ogri èn meki a du bun; meki a suku vrede èn du muiti fu kisi en.”—1 Petrus 3:10, 11.

21. Sortu bun rai Yesus ben gi fu gi sma pardon?

²¹ Wi ben si kaba san na wán sei fu a tori: Gado ben gi wi pardon fu wan lo sondu di wi ben du na ini a ten di pasa, dati meki wi musu waka na baka na eksempre fu en èn gi den brada fu wi pardon (Psalm 103:12; Yesaya 43:25). Ma ete wan sei de na a tori. Baka di Yesus ben leri sma a modelbegi, a ben taki: „Efu unu e gi sma pardon fu den sondu fu den, dan un hemel Tata sa gi unu pardon tu.” Moro leki wan yari baka dati, a ben taki baka o prenspari disi de, di a ben leri den disipel fu en fu begi: „Gi wi pardon fu wi sondu, bika wi tu e gi ibriwan sma pardon di abi wan paiman na wi” (Mateus 6:12, 14; Lukas 11:4). Baka dati, wan tu dei nomo bifo a dede, Yesus ben taki moro fara: „Te unu e tanapu e begi, gi pardon na iniwan sani di unu abi nanga wan sma; so taki a Tata fu unu, di de na hemel, kan gi unu pardon gi den fowtu fu unu.”—Markus 11:25.

22, 23. Fa a kan abi krakti tapu a tamara fu wi efu wi de klariklari fu gi sma pardon?

²² Iya, a fruwakti di wi e fruwakti taki Gado sa tan gi wi pardon, abi furu fu du nanga a wani di wi wani gi den brada fu wi pardon. Te Kresten e kisi wan problema nanga makandra, dan aksi yusrefi: ’¿A no moro prenspari fu Gado gi mi pardon, leki fu buweisi taki wan brada noso wan sisa ben meki wan pikin fowtu di ben meki mi firi syen, noso wan pikin sani di a ben du di ben afrontu mi, noso wan sani di a ben du fu di a de wan onvolmaakti libisma?’ Yu sabi a piki.

²³ Ma san yu musu du te a tori seryusu moro leki wan pikin sani di wan sma du di a ben afrontu yu noso wan moro pikin problema? Èn o ten wi musu gebroiki a rai fu Yesus di skrifi na Mateus 18:15-18? Kon meki wi luku den tori disi now.

[Futuwortu]

¿Yu Kan Memre Disi Ete?

◻ Fa Yehovah gi wi na eksempre di e sori fa wi musu gi sma pardon?

◻ San wi musu hori na prakseri fu den sma na ini a gemeente?

◻ Sortu sani wi musu man du moro furu, te sma taki wan sani di ben meki wi firi syen noso di ben afrontu wi?

◻ San wi kan du fu kisi vrede nanga wi brada, efu a de fanowdu?

[Prenki na tapu bladzijde 15]

Te yu kisi trobi nanga wan Kresten, dan pruberi fu libi a tori leki fa a de; baka wan pisi ten a tori sa kon moro pikin