Den Wini Di Wi E Kisi te Wi Lobi Gado Wortu
„Lobi [koni], èn a sa kibri yu. . . . A sa gi yu glori, fu di yu e brasa en.”—ODO 4:6, 8.
1. San a wani taki fu lobi Gado Wortu trutru?
A DE prenspari gi wan Kresten fu leisi a Bijbel. Ma a leisi di wan sma e leisi en nomo, no e sori taki a lobi Gado Wortu. Fa a de te wan sma e leisi Bijbel, ma a e du den sani di a Bijbel no feni bun? A de krin, taki a no lobi Gado Wortu leki fa a skrifiman fu Psalm 119 ben lobi en. A lobi di a skrifiman ben lobi Gado Wortu ben meki taki a ben libi akruderi den markitiki fu Gado Wortu.—Psalm 119:97, 101, 105.
2. Sortu wini wi e kisi fu a koni di de fu feni na ini Gado Wortu?
2 Ibri leisi baka, wan sma di e libi akruderi Gado Wortu, musu kenki en denki èn a fasi fa a e libi. So wan fasi fu libi e sori taki a abi a koni fu Gado, san wani taki dati a musu gebroiki a sabi èn a frustan di a kisi fu di a studeri Bijbel, na wan bun fasi. „Lobi [koni], èn a sa kibri yu. Abi furu warderi gi en, èn a sa hei yu. A sa gi yu glori, fu di yu e brasa en. A sa gi wan moi kransi na yu ede; wan moi kroon a sa gi yu” (Odo 4:6, 8, 9). ¡Dati na trutru wan moi fasi fu gi wi deki-ati, taki wi musu lobi Gado Wortu moro, wi musu meki a tiri wi! Suma wani meki ogri miti en? Suma no wani kon hei, èn kisi glori?
Meki Koni Kibri Yu, so Taki Ogri No Miti Yu fu Têgo
3. Fu san ede Kresten musu kisi kibri now moro leki iniwan ten na fesi, èn fu suma?
3 Fa a koni di wan sma e kisi te a e studeri Gado Wortu èn e gebroiki en bun, kan kibri en? Wan sani de seiker, taki disi e kibri en gi Satan Didibri. Yesus ben leri den bakaman fu en fu begi efu den ben kan kon fri fu a godelowsuwan, Satan (Mateus 6:13). Na ini a ten disi, a de tumusi prenspari fu aksi a sani disi na ini den begi fu wi. Krestes ben trowe Satan nanga den ogri yeye fu en komoto na ini hemel baka 1914, èn fu dati ede Satan abi „bigi atibron, fu di a sabi taki a abi wan syatu pisi ten nomo” (Openbaring 12:9, 10, 12). Na ini den dei disi, di de krosibei fu a kaba, a musu atibron srefisrefi bika a e feti nanga den sma „di e hori den komando fu Gado èn [di] abi a wroko fu gi kotoigi fu Yesus”, èn a no man wini den.—Openbaring 12:17.
4. San e kibri den Kresten gi a druk fu Satan èn den trapu fu en?
4 Satan di e atibron, trutru e tan tyari problema kon gi den Kresten bedinari disi èn a e gi sma deki-ati fu frufolgu den na wan ogri-ati fasi noso a e meki sani pasa fu hendri a wroko fu den. A wani kori den Kownukondre preikiman so taki den no e prakseri a Kownukondre preikiwroko, ma taki den e prakseri sani nomo leki a kisi di sma kan kisi bigi nen na grontapu, a lobi di sma lobi fri ten, a bai di sma e bai materia gudu, èn a feti di sma e feti na baka prisiri. Sortu sani e kibri den getrow futuboi fu Gado meki den no e brokokindi gi a druk fu Satan noso meki den no e go na ini den trapu fu en? A no de fu taki, dati begi de prenspari, so srefi wan tranga banti nanga Yehovah, èn a bribi di wan sma e bribi taki den pramisi fu En sa kon tru, seiker. Ma ala den sani disi abi fu du nanga a sabi di wi musu sabi den frumane di de na ini Gado Wortu èn a fasti bosroiti di wi musu abi fu du den. Wi kan kon sabi den frumane disi te wi e leisi a Bijbel nanga den bijbelstudie yepisani, te wi e go na den Kresten konmakandra, te wi e gi yesi na a rai di wan tra bribiman e gi wi nanga yepi fu a Bijbel, noso srefi te wi e begi nomo èn e prakseri dipi fu den gronprakseri na ini Bijbel di a yeye fu Gado e meki wi prakseri fu den baka.—Yesaya 30:21; Yohanes 14:26; 1 Yohanes 2:15-17.
5. Na sortu fasi a koni di de fu feni na ini Gado Wortu e gi wi kibri?
5 Tra fasi de fa koni e kibri den sma di lobi Gado Wortu. Fu eksempre, den kan wai pasi gi broko-ede na emotioneel sei èn gi siki di sma kan kisi te den e gebroiki drug na wan fowtu fasi, te den e smoko tabaka, èn te den du seks hurudu (1 Korentesma 5:11; 2 Korentesma 7:1). Den no e konkru noso e taki takru sani fu sma, so taki mati e pori (Efeisesma 4:31). Èn den no e go tweifri tu na sani, san kan pasa te sma e go ondrosuku den filosofia fu a koni fu grontapu di e bedrigi sma (1 Korentesma 3:19). Fu di den lobi Gado Wortu, meki dati e kibri den fu sani di kan meki taki a matifasi di den abi nanga Gado kon pori èn di kan meki den lasi a howpu tapu têgo libi. Den e tan wroko tranga fu yepi den sma na den sei fu kon bribi den tumusi moi pramisi di de na ini a Bijbel, fu di den sabi taki den sa ’frulusu densrefi èn den sma di e arki den’.—1 Timoteus 4:16.
6. Fa koni di de fu feni na ini Gado Wortu kan kibri wi srefi na ini muilek situwâsi?
6 A tru taki ala sma — srefi den sma di lobi Gado Wortu — e kisi fu du nanga „ten nanga sani di e pasa èn di sma no sabi na fesi” (Preikiman 9:11). A de so, taki wan tu fu wi sa musu kisi fu du nanga naturu rampu, seryusu siki, mankeri, noso wan fruku dede. Ma toku Gado Wortu e kibri wi. No wan rampu kan du wan sma di trutru lobi Gado Wortu ogri fu ala ten. Fu dati ede, wi no musu broko wi ede pasa marki nanga san kan pasa na ini a ten di e kon. Baka di wi sreka wisrefi bun gi sani na wan fasi di fiti, dan a moro betre fu libi a tori gi Yehovah, so taki den onseikerfasi fu a libi fu a ten disi no e meki wi lasi a vrede fu wi (Mateus 6:33, 34; Filipisma 4:6, 7). Prakseri a dyaranti di na opobaka howpu e gi wi èn a dyaranti di wi abi taki wan moro betre libi sa kon te Gado ’meki ala sani kon nyun’.—Openbaring 21:5; Yohanes 11:25.
Sori Taki Yu De „Bun Gron”
7. Sortu agersitori Yesus ben fruteri den ipi-ipi sma di ben kon arki en?
7 Na ini wan fu den agersitori fu Yesus a ben kon na krin o prenspari a de fu abi wan yoisti denki. Di Yesus ben meki a bun nyunsu bekènti na ini heri Palestina, dan den ipi-ipi sma ben kon makandra fu arki en (Lukas 8:1, 4). Ma no alamala ben lobi Gado Wortu trutru. A de seiker taki furu sma ben kon arki en fu di den ben wani si wondru noso fu di den ben lobi a tumusi moi fasi fa a ben gi leri. Fu dati ede, Yesus ben fruteri den ipi-ipi sma wan agersitori: „Wan saiman ben go sai a siri fu en. We, di a ben e sai, dan wan pisi fu a siri ben fadon na sei pasi èn sma ben trapu na en tapu, èn den fowru fu hemel ben nyan en. Wan tra pisi ben fadon na tapu den ston, èn baka di a opo kon, dan a ben kon drei fu di a no ben abi watra. Wan tra pisi baka ben fadon na mindri den maka, èn den maka di ben gro kon makandra nanga en ben kiri en. Wan tra pisi baka ben fadon na tapu bun gron, èn baka di a ben opo kon, dan a ben gi froktu wan hondro tron.”—Lukas 8:5-8.
8. San na a siri na ini Yesus agersitori?
8 Na agersitori fu Yesus ben sori taki sma ben o handri na difrenti fasi te den ben o yere a bun nyunsu, wan sani di ben o anga fu a fasi fa na ati fu na arkiman tan. A siri di e sai na „a wortu fu Gado” (Lukas 8:11). Noso soleki fa wan tra tori fu na agersitori e taki, dan a siri na „a wortu fu a kownukondre” (Mateus 13:19). Yesus ben kan gebroiki ala tu fasi fu taki en, fu di a thema fu Gado Wortu na a Kownukondre na hemel ini na anu fu Yesus Krestes leki Kownu di Yehovah sa gebroiki fu regtfardiki en soevereiniteit èn fu santa en nen (Mateus 6:9, 10). Dati meki te yu luku en bun, dan a siri na a boskopu fu a bun nyunsu na ini Bijbel, a Wortu fu Gado. Yehovah Kotoigi e tyari a Kownukondre boskopu disi kon na krin te den e sai siri neleki fa a fosi Saiman, Yesus Krestes ben du. San sma e du te den e yere en?
9. San a siri di e fadon (a) na seipasi (b) na tapu den ston (c) na tapu a gron di ben abi maka, e prenki?
9 Yesus ben taki dati wan tu siri e fadon na sei pasi èn sma e trapu na en tapu. Disi abi fu du nanga sma di abi tumusi furu fu du fu meki a Kownukondre siri gro na ini na ati fu den. Bifo den kan leri fu lobi Gado Wortu, „Didibri e kon èn e puru a wortu na ini na ati fu den so taki den no ben o bribi èn kisi frulusu” (Lukas 8:12). Wan tu siri e fadon na tapu ston. Disi abi fu du nanga sma di lobi a boskopu fu Bijbel, ma den no meki a abi krakti na tapu na ati fu den. Te sma e gens den, noso te den e feni en wan muilek sani fu gi yesi na a rai fu Bijbel, dan „den e fadon gowe” fu di den no abi rutu (Lukas 8:13). Dan yu abi den sma di e yere a wortu, ma di e meki taki den „broko-ede nanga den gudu nanga den prisiri fu a libi disi” teki den abra krinkrin. Te fu kaba, neleki fa maka e tyokro sani di prani kiri, na so „den e tyokro kiri krinkrin”.—Lukas 8:14.
10, 11. (a) Suma a bun gron e prenki? (b) San wi musu du fu „hori” Gado Wortu na ini wi ati?
10 Te fu kaba, yu abi den siri di e fadon na tapu bun gron. Disi e sori go na den sma di e teki a boskopu nanga „wan opregti èn bun ati”. A no de fu taki, dati ibriwan fu wi ben sa wani denki taki a de fu a grupu disi. Ma te yu luku en bun, dan san e teri na a fasi fa Gado e denki (Odo 17:3; 1 Korentesma 4:4, 5). En Wortu e taki dati wi kan sori taki wi abi „wan opregti èn bun ati”, nanga den sani di wi e du sensi a momenti disi te leki wi dede noso te leki Gado e tyari wan kaba kon na a godelowsu seti fu sani disi. Efu wi ben handri bun di wi ben yere a Kownukondre boskopu a fosi leisi, dan dati bun. Ma den sma di abi wan bun èn opregti ati e teki Gado Wortu èn den „e hori en èn e meki froktu fu di den e horidoro”.—Lukas 8:15.
11 A wan-enkri tru fasi fu hori Gado Wortu na ini wi ati na fu leisi en èn fu studeri en te wi de wi wawan èn te wi de nanga tra bribiman. Disi wani taki tu dati wi e gebroiki ala a nyanyan na yeye fasi di wi e kisi fu den sma di Gado poti fu sorgu gi den afersi na yeye fasi fu den tru bakaman fu Yesus (Mateus 24:45-47). Na so fasi, den sma di e hori Gado Wortu na ini den ati, e meki taki lobi e gi den deki-ati fu „meki froktu fu di den e horidoro”.
12. San na a froktu di wi musu tyari fu di wi e horidoro?
12 Sortu froktu e gro na tapu a bun gron? Na ini a naturu, siri e gro kon tron bon di e tyari froktu èn di abi a srefi sortu siri, di kan panya go moro fara fu gi tra froktu. Na so a de tu taki a siri fu a wortu e gro na ini den sma di abi wan opregti èn bun ati, so taki den e gro na yeye fasi te leki den so srefi kan sai a siri na ini na ati fu tra sma (Mateus 28:19, 20). Èn na a wroko di den e du fu sai, yu kan si taki den e horidoro. Yesus ben sori o prenspari a de fu horidoro nanga a wroko fu sai, di a ben taki: „A sma di horidoro te na a kaba, na en sa kisi frulusu. Èn a bun nyunsu disi fu a kownukondre sa preiki na heri grontapu pe sma e libi, leki wan kotoigi gi ala nâsi, èn dan a kaba sa kon.”—Mateus 24:13, 14.
„Tyari Froktu ini Ibri Bun Wroko”
13. Sortu begi Paulus ben begi di ben sori san a tyari di wi e tyari froktu, abi fu du nanga a sabi fu Gado Wortu?
13 Na apostel Paulus tu ben taki dati a de fanowdu fu tyari froktu, èn a ben taki dati a tyari di wi e tyari froktu abi fu du nanga Gado Wortu. A ben begi taki tra bribiman ben musu „kon furu nanga a soifri sabi fu a wani fu [Gado] ini ala koni nanga frustan fu sani na yeye fasi, so taki unu kan waka na wan fasi di warti gi Yehovah, fu plisi en dorodoro, ala di unu e tan tyari froktu ini ibri bun wroko.”—Kolosesma 1:9, 10; Filipisma 1:9-11.
14-16. Sortu froktu den sma e tyari di lobi Gado Wortu, soleki fa disi kon na krin na ini a begi fu Paulus?
14 So bun, Paulus e sori taki a kisi di wi e kisi sabi fu Bijbel a no a wan-enkri marki di wi wani doro. Ma lobi gi Gado Wortu e gi wi deki-ati fu „waka na wan fasi di warti gi Yehovah” fu di wi e tan ’tyari froktu ini ibri bun wroko’. Sortu bun wroko? A wroko fu preiki a bun nyunsu fu a Kownukondre, na a tumusi aparti wroko di Kresten musu du na ini den lasti dei disi (Markus 13:10). Boiti dati, den sma di lobi Gado Wortu e du ala san den man du fu gi moni fu horibaka gi a wroko disi. Den e prisiri nanga a grani disi, fu di den sabi taki „Gado lobi wan sma di e gi nanga prisiri” (2 Korentesma 9:7). Den bijdrage fu den na fu pai den paiman di musu meki fu drai moro leki wan hondro presi pe Bethel de èn fu pe den e tiri a Kownukondre preikiwroko èn pe na ini son wan fu den Bijbel nanga Bijbel publikâsi e meki. Den bijdrage fu den de tu fu pai gi den paiman di e kon te bigi Kresten kongres e hori èn te opziener di e reis, zendeling nanga tra furuten evangelie preikiman musu seni go na tra presi.
15 Tra bun wroko abi fu du nanga a bow-wroko èn a wroko fu sorgu gi den presi pe wi e anbegi a tru Gado. Lobi gi Gado Wortu e gi anbegiman fu En deki-ati fu sorgu bun gi den Kongreshal nanga den Kownukondre zaal. (Teki gersi Nehemia 10:39.) Fu di a nen fu Gado de na tapu a fesisei fu den oso dati, meki a de prenspari taki den musu tan krin na inisei èn na dorosei. Den zaal musu moi èn den sma di e anbegi Gado na ini den zaal dati no musu tyari densrefi na wan fasi di e gi syen (2 Korentesma 6:3). Son Kresten man du moro. Fu di den lobi Gado Wortu, meki den e froisi go na farawe presi so taki den kan yepi fu bow nyun presi pe sma kan anbegi Gado na ini, na presi na grontapu pe nowtu de fu di sma pôti noso fu di den no man du a wroko.—2 Korentesma 8:14.
16 Fu „tyari froktu ini ibri bun wroko”, wani taki tu fu du wi plekti na ini na osofamiri èn fu sori taki wi e broko wi ede nanga tra Kresten. Lobi gi Gado Wortu e gi wi deki-ati fu si esi-esi san sma di „de na ini a srefi bribi leki wi” abi fanowdu èn ’fu meki wi gi wisrefi na ini a dini fu Gado ini wi eigi osofamiri’ (Galasiasma 6:10; 1 Timoteus 5:4, 8). Dati meki wi e du wan bun wroko te wi e go luku den siki sma èn e trowstu den sma di e sari. ¡Èn den gemeente owruman nanga den Ati-oso Komte e du wan bun wroko trutru ten den e yepi sma di e kisi fu du nanga muilek situwâsi tapu a kontren fu datra tori! (Tori fu den Apostel 15:29) Dan dei fu dei wi e kisi fu du nanga moro rampu — wan tu fu den na naturu rampu èn trawan kon fu a donfasi fu libisma. Yehovah Kotoigi di e kisi yepi fu Gado en yeye, kisi wan bun nen na furu presi na grontapu fu di den e yepi kompe-bribiman esi-esi, so srefi tra sma di rampu nanga mankeri miti den. Ala den sani disi na bun froktu di sma di lobi Gado Wortu e sori.
Moi Wini gi a Tamara
17, 18. (a) San na a bakapisi fu a wroko di e du fu sai a siri fu a Kownukondre? (b) Sortu tumusi span sani den sma di lobi Gado Wortu sa si dyonsro?
17 A wroko fu sai Kownukondre siri e tan tyari furu wini kon gi libisma. Na ini den yari di no pasa so langa ete, moro leki 300.000 sma ibri yari gi pasi meki a boskopu fu Bijbel gro na ini na ati fu den, so taki den gi densrefi abra na Yehovah èn disi den ben sori di den ben teki dopu na ini watra. ¡Wan tumusi moi tamara e wakti den!
18 Den sma di lobi Gado Wortu sabi taki Yehovah Gado sa opo dyonsro fu gi en nen glori. „Babilon a Bigiwan” a grontapu makti fu falsi relisi, sa kisi pori (Openbaring 18:2, 8). Dan Kownu Yesus Krestes sa kiri den sma di no wani libi akruderi Gado Wortu (Psalm 2:9-11; Danièl 2:44). Baka dati Gado Kownukondre sa puru ogridu, feti, nanga tra rampu fu têgo. A no sa de fanowdu moro fu trowstu sma fu di den abi pen, fu di den siki noso fu dede ede.—Openbaring 21:3, 4.
19, 20. Sortu tumusi moi tamara den sma di lobi Gado Wortu trutru, sa kisi?
19 ¡Den sma di lobi Gado Wortu sa du tumusi bun wroko na a ten dati! Den sma di pasa Armagedon libilibi sa bigin nanga a prisiri wroko fu meki grontapu kon tron wan paradijs. Den sa kisi a bigi grani fu sreka sani di den dedesma di e rostu now na ini a grebi ben sa abi fanowdu èn di de ini a prakseri fu Gado nanga a fruwakti taki den sa kisi wan opobaka na dede (Yohanes 5:28, 29). Na a ten dati, den sma di e libi na grontapu sa kisi volmaakti tiri fu a Soeverein Masra Yehovah, nanga yepi fu en Manpikin Yesus Krestes, di opo kon hei. ’Bukulolo sa opo’ di sa tyari kon na krin san na den sani di Yehovah sa leri den sma di sa libi na ini a nyun grontapu.—Openbaring 20:12.
20 Na wan ten di Yehovah poti, a heri grupu getrow salfu Kresten sa opo go na hemel kaba fu kisi a pai fu den leki „erfgenaam nanga Krestes” (Romesma 8:17). Na ini a Dusun Yari Tiri fu Krestes, ala libisma na grontapu di lobi Gado Wortu sa kon de volmaakti baka na ini den frustan èn na ini den skin. Baka te den kisi wan lasti tesi èn den sori taki den de getrow, dan Yehovah sa pai den nanga têgo libi èn den sa kisi „a glori fri fu den pikin fu Gado” (Romesma 8:21; Openbaring 20:1-3, 7-10). ¡Dati sa de trutru wan tumusi moi ten! Fu tru, awansi Yehovah gi wi wan howpu fu libi na hemel noso na grontapu, te wi e tan lobi en Wortu èn wi abi a fasti bosroiti fu libi akruderi a koni fu Gado, dan dati sa kibri wi now. Èn na ini a tamara a ’sa gi wi glori fu di wi brasa en’.—Odo 4:6, 8.
¿Yu Kan Tyari Disi Kon Na Krin?
◻ Fa a lobi gi Gado Wortu sa kibri wi?
◻ San na a siri fu Yesus agersitori èn fa a siri e sai?
◻ Fa wi kan sori taki wi na „bun gron”?
◻ Sortu wini, den sma di lobi Gado Wortu kan fruwakti?
[Prenki na tapu bladzijde 16]
A siri fu Yesus agersitori e prenki a boskopu di e taki fu a bun nyunsu di de na ini Gado Wortu
[Sma di abi a reti fu a prenki]
Garo Nalbandian
[Prenki na tapu bladzijde 17]
Yehovah Kotoigi e waka na baka a Bigi Saiman
[Prenki na tapu bladzijde 18]
Sma di sa pasa Armagedon libilibi sa nyan bun fu den froktu fu grontapu