Yehovah Na wan Gado fu Lobi Bun-ati gi Mi
SOLEKI FA JOHN ANDRONIKOS BEN FRUTERI
A ben de a yari 1956. Soso neigi dei baka di mi trow, mi ben tanapu na fesi wan hei krutubangi na ini a foto Komotiní, na a noordsei pisi fu Grikikondre. Mi ben e howpu taki den ben o puru a 12 mun strafu di mi ben kisi fu di mi ben preiki Gado Kownukondre. Ma a bosroiti fu a hei krutubangi — siksi mun na ini strafu-oso — ben puru a howpu dati krinkrin èn a ben kon na krin taki dati ben de soso a bigin fu wan heri ipi tesi. Ma ala den leisi dati, Yehovah ben buweisi taki a de wan Gado fu lobi bun-ati gi mi.
DI MI gebore na tapu 1 oktober 1931, dan na osofamiri fu mi ben e libi na ini a foto Kaválla, a Neapolis fu Masedonia di na apostel Paulus ben fisiti na a di fu tu zendingwaka fu en. Mâ ben tron wan Kotoigi fu Yehovah di mi ben abi feifi yari, èn ala di pikinmoro a no ben man leisi noso skrifi, toku a ben du ala san a ben man fu poti lobi gi Gado èn frede gi en na ini mi. Mi papa ben de wan man di ben abi wan tumusi owruten fasi fu denki èn a ben anga na a Griki Orthodox gwenti na wan tranga-ede fasi. A no ben wani sabi moro fu Bijbel waarheid èn a ben gens mi mama, èn nofotron a ben du so nanga tranga.
Na so mi ben gro na ini wan osofamiri di ben prati, pe Pâ ben naki Mâ èn ben meshandri en èn a ben gowe libi wi srefi. Sensi di mi ben de wan pikin, Mâ ben tyari mi nanga mi pikin sisa go na den Kresten konmakandra. Ma di mi ben tron 15 yari, dan den yongusma firi èn a denki di mi ben denki taki mi ben kan du sani na mi fasi ben meki taki mi ben drai mi baka gi Yehovah Kotoigi. Ma toku a getrow mama fu mi ben pruberi bun tranga fu yepi mi, èn a ben krei furu te a ben du a muiti dati.
Pôtifasi nanga a takru libi fu mi ben meki taki mi ben kon siki hebi èn mi ben abi fu tan na ini bedi moro leki dri mun. A ben de na a ten dati di wan brada di ben abi furu sakafasi, èn di ben yepi mi mama fu leri a waarheid, ben si taki mi ben lobi Gado na wan opregti fasi. En ben denki taki mi ben kan kisi yepi fu kon betre baka na yeye fasi. Trawan ben taigi en: „Yu e lasi yu ten te yu e pruberi fu yepi John; noiti moro a no sa kisi belangstelling gi yeye sani.” Ma a pasensi fu a brada disi èn a hori di a ben horidoro fu yepi mi ben abi bun bakapisi. Tapu 15 augustus 1952 di mi ben abi 21 yari, mi ben teki dopu na ini watra fu sori taki mi ben gi misrefi abra na Yehovah.
Mi No Ben Trow Langa Ete Di Mi Ben De na Strafu-oso
Dri yari baka dati mi ben leri sabi Martha, wan sisa di ben abi yeye fasi nanga moi eigifasi, èn syatu baka dati wi ben meki mofo fu trow. Wan dei mi ben fruwondru srefisrefi di Martha ben taigi mi: „Tide mi denki taki mi o go preiki oso fu oso. ¿Yu wani kon nanga mi?” Noiti ete mi ben teki prati na a fasi disi fu wroko, fu di mi ben preiki moro furu te mi ben kisi okasi. Na a ten dati lanti ben tapu a preikiwroko na Grikikondre, èn wi ben musu du a preikiwroko fu wi na wan kibri fasi. A bakapisi ben de taki den ben teki bun furu sma go sroto, den ben tyari den go na fesi krutu, èn den ben gi den hebi strafu. ¡Toku mi no ben kan taigi na uma di mi ben o trow, taki mi no ben o go!
Martha ben tron mi wefi na ini 1956. A ben de na a ten dati, neigi dei baka di wi trow, taki a hei krutu dati na ini Komotiní ben gi mi a strafu fu siksi mun na ini strafu-oso. Disi ben meki mi prakseri wan sani di mi ben aksi wan Kresten sisa, wan mati fu mi mama, wan pisi ten na fesi: „Fa mi kan sori taki mi na wan tru Kotoigi fu Yehovah? Noiti ete mi kisi na okasi fu sori a bribi fu mi.” Di a sisa disi ben kon luku mi na strafu-oso, dan a ben memre mi baka na a aksi dati èn a ben taki: „Now yu kan sori Yehovah omeni yu lobi en. Disi na a wroko di yu kisi.”
Di mi ben yere taki na afkati fu mi ben pruberi fu tyari moni kon na wan fu puru mi na strafu-oso, dan mi ben taigi en taki mi ben wani koti a strafu di mi ben kisi. ¡Mi ben prisiri trutru di mi ben si na a kaba fu a siksi mun strafu taki tu fu den sma di ben koti strafu nanga mi na strafu-oso ben teki a waarheid! Na ini den yari di ben kon baka dati, mi ben kisi fu du nanga wan heri ipi krutu-afersi gi a bun fu a bun nyunsu.
Noiti Wi Sari fu den Bosroiti Di Wi Teki
Na ini 1959, wan tu yari baka di mi ben komoto na strafu-oso, mi ben dini leki wan gemeente dinari, noso fesiman opziener, èn mi ben kisi wan kari fu go na a Kownukondre Diniwroko-skoro, wan skoro gi gemeente owruman. Ma na a srefi ten den ben aksi mi fu kon wroko furuten na wan lanti ati-oso, wan wroko di ben o gi mi nanga mi osofamiri seikerfasi na moni sei mi heri libi langa. San mi ben o du? Dri mun kaba mi ben du pisi ten wroko na a ati-oso, èn a driktoro ben lobi fa mi ben wroko, ma di mi ben kisi a kari fu go na a skoro dan a no ben wani gi mi primisi fu go, srefi efu mi ben o gowe wan pisi ten sondro fu a pai mi. Baka di mi ben begi fu a problema, mi ben bosroiti fu poti den afersi fu a Kownukondre na a fosi presi èn mi no ben teki a wroko di den ben aksi mi fu du.—Mateus 6:33.
Na a srefi ten, a distrikt opziener nanga a kringopziener ben kon dini na ini a gemeente fu wi. Wi ben musu hori den konmakandra fu wi na wan kibri fasi na ini den oso fu sma, fu di den Griki Orthodox kerki fesiman nanga lanti ben gens wi hebi. Baka wan fu den konmakandra, a distrikt opziener ben kon na mi èn a ben aksi mi efu mi ben prakseri kaba fu bigin nanga a furuten diniwroko. San a ben aksi mi ben naki mi ati, fu di mi ben wani a sani disi sensi di mi ben dopu. Mi ben piki: „Mi ben sa wani dati seiker.” Ma mi ben abi kaba wan frantwortu taki mi ben musu kweki wan umapikin. A brada ben taigi mi: „Frutrow tapu Yehovah, èn a sa yepi yu fu du san yu abi na prakseri.” So bun, sondro fu skoifi mi osofamiri frantwortu na wan sei, mi nanga mi wefi ben man kenki a situwâsi fu wi kon so, taki na ini december 1960 mi ben bigin dini na ini owstusei Masedonia leki wan spesrutu pionier — wan fu den feifi spesrutu pionier di ben de nomo na ini a kondre.
Baka di mi ben wroko wan yari leki wan spesrutu pionier, a bijkantoro na Ateine ben aksi mi fu dini leki wan opziener di e reis. Di mi ben drai kon na oso baka, baka di mi ben kisi leri wan mun langa fu du a wroko disi, èn di mi ben e fruteri Martha ete fu den sani di mi ben ondrofeni, dan a driktoro fu wan bigi mijn pe den e diki gron fu suku mangaan, ben kon na mi èn a ben aksi mi fu tron a fesiman fu wan fu den smelterij. A ben wani gi mi wan moi kontrakti fu feifi yari, wan moi oso, nanga wan oto. A ben gi mi tu dei fu gi wan piki. Sondro draidrai mi ben begi Yehovah baka: „¡Dya mi de! Seni mi” (Yesaya 6:8). Mi wefi ben agri nanga disi krinkrin. Fu di wi ben frutrow na ini Gado, meki wi ben bigin du a kringwroko, èn ala ten Yehovah ben horibaka gi wi fu di a ben abi lobi bun-ati gi wi.
Wi E Dini Awansi San E Pasa
Ala di ekonomia problema ben de, toku wi ben go doro èn Yehovah ben gi wi san wi ben abi fanowdu. Na ini a bigin mi ben gwenti fu go na den gemeente na tapu wan pikin motro, èn nanga dati mi ben rèi so wan 500 kilometer. Furu leisi mi ben kisi problema, èn mi ben kisi wan tu mankeri tu. Di mi ben komoto na wan gemeente wan leisi na ini a winter, dan mi ben koti wan liba abra pe a watra ben de moro hei leki san a ben gwenti, èn a motro ben dede èn mi ben kon nati te na mi kindi. Baka dati a motrobanti ben saka. Wan sma di ben pasa ben abi wan pompu èn a ben yepi mi, èn na so fasi mi ben man doro wan dorpu di ben de krosibei èn drape mi ben meki a banti. Te fu kaba mi ben doro oso dri yuru mamanten, ala di mi ben kowru srefisrefi èn mi ben weri trutru.
Wan tra leisi di mi ben go fu a wan gemeente na a trawan, dan a motro ben grati èn a ben fadon na tapu mi kindi. A bakapisi ben de taki mi langa bruku ben priti èn a ben lai nanga brudu. Mi no ben abi wan tra langa bruku, dati meki mi ben hori a lezing a neti dati na ini wan tra brada en langa bruku di ben bigi tumusi gi mi. Ma toku no wan problema ben kan meki mi lasi-ati fu dini Yehovah èn den lobi brada.
Wan tra ongoloku ben gi mi furu mankeri, di mi anu nanga mi fesisei tifi ben broko. Na a ten dati mi sisa di no de wan Kotoigi èn di ben libi na Amerkankondre, ben kon luku mi. ¡Mi ben breiti trutru di a ben yepi mi fu bai wan oto! Di den brada fu a bijkantoro na Ateine ben yere taki mi ben kisi mankeri, dan den ben seni wan brifi kon gi mi di ben gi mi deki-ati, èn wan fu den sani di den ben taki ben de den wortu fu Romesma 8:28, di wan pisi fu en e taki: „Gado e meki ala den wroko fu en e wroko makandra gi a bun fu den wan di lobi Gado.” ¡Ibri leisi baka, a kon na krin o tru a dyaranti disi de na ini mi libi!
Wan Tumusi Prisiri Sani E Miti Mi
Na ini 1963 mi ben wroko nanga wan spesrutu pionier na ini wan dorpu pe den sma no ben wani arki. Wi ben bosroiti fu no wroko nanga makandra, ma taki ibriwan fu wi ben o teki wán sei fu a strati. Na wan oso, wantewante baka di mi ben klopu kaba na tapu a doro, wan uma ben hari mi kon na inisei esi-esi èn a ben tapu a doro na mi baka. Mi ben bruya èn ben aksi misrefi san ben e pasa. Syatu baka dati, a ben hasti ensrefi fu kari a spesrutu pionier tu kon na ini na oso. Baka dati na uma ben taigi wi: „¡Tan pî! ¡No buweigi srefi!” Baka wan pisi ten, wi ben yere den sten fu sma na dorosei di ben atibron. Sma ben e suku wi. Di ala sani ben kon tiri baka, dan na uma ben taigi wi: „Mi ben du disi fu ogri no miti unu.” Mi e lespeki unu fu di mi e bribi taki unu na tru Kresten.” Wi ben taigi en tangi trutru èn wi ben gowe ala di wi ben libi furu buku gi en.
Fotenti yari baka dati, di mi ben de na wan distrikt kongres na ini Grikikondre, wan uma ben kon na mi èn a ben taki: „¿Brada, yu kan memre mi ete? Mi na a uma di ben kibri unu gi den gensman di unu ben kon na a dorpu fu wi fu gi kotoigi.” A ben froisi go libi na Doisrikondre, a ben studeri Bijbel, èn a ben abi demakandra nanga a pipel fu Yehovah. Now en nanga en heri osofamiri ben de na ini waarheid.
Iya, na ini ala den yari disi, wi kisi blesi nanga furu ’brifi di e rikomanderi wi’ (2 Korentesma 3:1). Furu fu den wan di wi ben abi a grani fu yepi kisi sabi fu Bijbel waarheid, e dini now leki owruman, dinari ini a diniwroko, nanga pionier. ¡A de trutru wan prisiri sani fu si taki den wan tu preikiman na ini den kring pe mi ben dini na ini den yari baka 1960, gro kon tron moro leki 10.000 anbegiman fu Yehovah! Na wi Gado fu lobi bun-ati e kisi ala grani, ala di a e gebroiki wi na en fasi.
„Na Tapu wan Kanape fu Siki”
Na ini ala den yari di wi ben du a kringwroko, Martha ben sori taki a de wan tumusi bun yepiman, di de ala ten nanga prisiri. Ma na ini oktober 1976 a ben kon siki hebi èn a ben musu du wan oparâsi di e hati srefisrefi. A ben kon malengri na en tu futu èn a ben musu sidon na ini wan rolsturu. Fa wi ben kan kakafutu gi den paiman nanga den broko-ede na emotioneel sei? Fu di wi ben frutrow na tapu Yehovah baka, meki wi ben firi en lobi anu di ben yepi wi furu. Te mi ben gowe fu dini na ini Masedonia, dan Martha ben tan na a oso fu wan brada na Ateine fu leri fa fu buweigi en skin baka nanga datrayepi. A ben gwenti naki wan konkrutitei fu taigi mi den wortu di ben gi mi deki-ati: „A e go bun nanga mi. Yu kan go doro èn te mi man buweigi misrefi baka, dan mi sa kon nanga yu na ini mi rolsturu.” Èn na dati a ben du tu. Den lobi brada fu wi na Bethel ben seni furu brifi kon gi wi di ben gi wi deki-ati. Den ben memre Martha ala ten baka na den wortu na Psalm 41:3: „Yehovah srefi sa yepi en na tapu wan kanape fu siki; yu sa kenki en heri bedi trutru na ini a ten di a siki.”
Den seryusu problema disi nanga a gosontu, ben meki taki wi ben bosroiti na ini 1986 taki a ben o de moro betre te mi ben o dini leki spesrutu pionier na ini Kaválla, pe mi e libi krosibei fu na osofamiri fu wi lobi umapikin. Na ini maart di pasa, mi lobi Martha dede, ala di a ben tan getrow te na a kaba. Bifo a dede èn te den brada ben aksi en: „Fa yu tan?”, dan a ben gwenti piki: „¡Fu di mi de so krosibei na Yehovah, dan a e go heri bun nanga mi!” Te wi ben sreka wisrefi gi den konmakandra noso te wi ben kisi wan kari di ben kori wi fu go dini na ini kontren pe furu wroko de fu du, dan Martha ben gwenti taki: „John, kon wi go dini pe a nowtu moro bigi.” Noiti a ben lasi a faya di a ben abi.
Wan tu yari pasa, mi srefi ben abi fu kakafutu nanga hebi problema nanga mi gosontu. Na ini maart 1994 datra ben kon si taki mi ben abi wan problema na mi ati di ben kan meki mi lasi mi libi, èn wan oparâsi ben de fanowdu. Agen mi ben firi Yehovah en lobi anu di ben yepi mi fu pasa wan tumusi muilek ten. Noiti mi sa frigiti a begi di wan kringopziener ben begi na mi bedi di mi ben komoto na ini intensive care (wan presi na ini ati-oso pe sma di siki tranga e kisi spesrutu datra yepi) èn mi no sa frigiti a Memrefesa tu di mi ben hori leti drape na ini mi ati-oso kamra makandra nanga fo sikisma di ben abi pikinso belangstelling gi a waarheid.
Yehovah Ben De Wi Yepiman
A ten e lon, èn a skin fu wi e kon swaki, ma a studie nanga a diniwroko e meki a yeye fu wi kon nyun baka (2 Korentesma 4:16). Dritenti na neigi yari pasa sensi di mi ben taki: „¡Dya mi de! Seni mi.” Mi ben abi wan koloku èn prisiri libi pe mi ben du furu. Iya, son leisi mi e firi taki „mi mofina èn mi pôti”, ma dan mi kan taigi Yehovah nanga ala overtoigi: „Yu na mi yepiman èn a Sma di gi mi frulusu (Psalm 40:17). Trutru a ben de wan Gado fu lobi bun-ati gi mi.
[Prenki na tapu bladzijde 25]
Nanga Martha na ini 1956
[Prenki na tapu bladzijde 26]
A lanpresi na Kaválla
[Prenki na tapu bladzijde 26]
Nanga Martha na ini 1997