Aksi fu Leisiman

Fa Yehovah Kotoigi e denki fu a stem di sma e go stem?

Krin gronprakseri skrifi na ini Bijbel di e yepi futuboi fu Gado si a tori disi na a yoisti fasi. Ma a gersi, taki no wan gronprakseri no de di e tapu wan sma fu go stem. Fu eksempre, no wan gronprakseri no de di e taki dati wan grupu driktoro fu wan bisnis no musu stem te bosroiti musu teki di kan abi krakti na tapu a bisnis fu den. Nofotron, den gemeente fu Yehovah Kotoigi e opo den anu fu stem te den musu teki bosroiti di abi fu du nanga a ten di den sa kon makandra èn a fasi fa den sa gebroiki a moni fu a gemeente.

Ma fa a de nanga a stem di wan sma e go stem gi politiek verkiezing? A no de fu taki, dati na son demokrasia kondre, so wan 50 procent fu den sma no e go stem na tapu a dei fu a verkiezing. Yehovah Kotoigi no e gens a reti di tra sma abi fu go stem; a no de so tu, taki den e du sani fu sori taki den no e agri nanga den politiek verkiezing. Den e lespeki den tirimakti di sma ben frukisi na wan fasi di fiti na den verkiezing dati (Romesma 13:1-7). Ibri Kotoigi fu Yehovah sa gebroiki en konsensi di kisi leri fu Bijbel èn a frustan di a e frustan sortu frantwortu a abi na Gado èn na Lanti fu teki wan bosroiti efu a sa go stem gi wan sma di e teki prati na a verkiezing (Mateus 22:21; 1 Petrus 3:16). Te den Kotoigi e teki den eigi bosroiti, dan den e hori wan tu sani na prakseri.

Na a fosi presi, Yesus Krestes ben taki fu den bakaman fu en: „Den no de wan pisi fu grontapu, neleki fa mi no de wan pisi fu grontapu” (Yohanes 17:14). Yehovah Kotoigi e si a gronprakseri disi leki wan seryusu sani. Fu di den „no de wan pisi fu grontapu”, meki den no e teki sei na ini den politiek afersi fu grontapu.—Yohanes 18:36.

Na a di fu tu presi, na apostel Paulus ben kari ensrefi wan „ambasadoro” di ben teki presi gi Krestes na mindri a pipel fu en ten (Efeisesma 6:20; 2 Korentesma 5:20). Yehovah Kotoigi e bribi taki Krestes Yesus poti now leki Kownu fu Gado en Kownukondre na hemel, èn den musu meki disi bekènti na den nâsi, leki ambasadoro (Mateus 24:14; Openbaring 11:15). Sma e fruwakti fu ambasadoro taki den no e teki sei èn taki den no e bumui nanga den sani fu den kondre pe den e seni den go. Yehovah Kotoigi, di de sma di e teki presi gi Gado en Kownukondre na hemel, e firi tu taki den abi a fruplekti fu no bumui nanga a politiek fu den kondre pe den e libi.

Wan di fu dri sani fu hori na prakseri na taki den sma di e stem tapu wan sma, so taki a sma disi e kisi wan posisi, kan kisi a frantwortu fu den sani di a sma e du. (Teki gersi 1 Timoteus 5:22, The New English Bible.) Kresten musu prakseri bun efu den wani teki a frantwortu dati.

Wan di fu fo sani, na taki den Kotoigi fu Yehovah e si a Kresten wánfasi fu den leki wan tumusi warti sani (Kolosesma 3:14). Te relisi e kisi fu du nanga politiek, dan a bakapisi de nofotron taki wan prati e kon na mindri den memre fu den. Yehovah Kotoigi di wani waka baka na eksempre fu Yesus Krestes, e luku bun taki den no e kisi fu du nanga politiek, èn na so fasi den e tan de wán leki Kresten.—Mateus 12:25; Yohanes 6:15; 18:36, 37.

A di fu feifi èn lasti sani, na taki a kisi di Yehovah Kotoigi no e kisi fu du nanga politiek, e meki taki den kan taki fu a prenspari Kownukondre boskopu na wan fri fasi nanga sma di abi ala sortu politiek denki.—Hebrewsma 10:35.

Fu di Yehovah Kotoigi na furu kondre e hori den Bijbel gronprakseri disi di skrifi na tapusei na prakseri, meki den e teki den eigi bosroiti fu no go stem na ini politiek verkiezing, èn a wet fu a kondre e gi den a fri fu teki a bosroiti dati. Ma san efu a wet e aksi fu borgu taki den musu go stem? Te dati de so, dan ibri Kotoigi abi a frantwortu fu teki wan bosroiti nanga yepi fu Bijbel èn nanga yepi fu a konsensi, di sa sori den san den musu du na ini a situwâsi dati. Efu wan sma e bosroiti fu go na a pikin kamra pe sma musu stem, dan dati na en bosroiti. San a e du te a de na ini a pikin kamra pe sma musu stem, dati na gi en nanga a Kriaman fu en.

The Watchtower fu 15 november 1950 ben taki na tapu bladzijde 445 nanga 446: „Pe Caesar e dwengi borgu fu go stem . . . [Kotoigi] kan go na a stembus èn den kan go na ini a pikin kamra pe sma musu stem. Dya na a presi pe den musu poti wan marki na tapu a stem papira noso skrifi sani di e sori gi suma den e stem. Den sma di e stem e du san den wani nanga a stem papira fu den. So bun, na dya na fesi Gado den kotoigi fu en musu handri akruderi den komando fu en èn akruderi a bribi fu den. A no de wi frantwortu fu taigi den san den musu du nanga a stem papira.”

Ma fa a de te wan Kresten uma en masra di no de na bribi e taigi en taki a musu go stem? We, a de na ondro en masra, neleki fa Kresten de na ondro den moro hei tirimakti (Efeisesma 5:22; 1 Petrus 2:13-17). Efu a e gi yesi na en masra èn a e go na a pikin kamra pe sma musu stem, dan dati na en eigi bosroiti. No wan sma musu krutu en.—Teki gersi Romesma 14:4.

Fa a de nanga wan kondre pe a wet no e dwengi sma fu go stem, ma pe sma kan atibron trutru nanga den wan di no e go na a pikin kamra pe sma musu stem — kande sma wani du den ogri? Noso fa a de te sma, ala di den no de fruplekti fu go stem, e kisi hebi strafu efu den no e go na a kamra pe sma musu stem? Na ini den situwâsi disi èn na ini tra situwâsi, wan Kresten musu teki en eigi bosroiti. „Ibriwan sma sa tyari en eigi lai.”—Galasiasma 6:5.

Yu abi sma kande di e naki futu fadon te den e si taki son Kotoigi fu Yehovah e go na a kamra pe sma musu stem na a ten fu wan verkiezing na ini a kondre fu den, èn taki trawan no e du dati. Den kan taki: ’Yehovah Kotoigi no e du a wán sani.’ Ma sma musu si taki ini tori di abi fu du nanga wan sma en eigi konsensi soleki a tori disi, ibri Kresten musu teki en eigi bosroiti na fesi Yehovah Gado.—Romesma 14:12.

Awansi sortu persoonlijk bosroiti Yehovah Kotoigi e teki te den e kisi fu du nanga difrenti situwâsi, toku den e luku bun taki den no e teki sei èn taki den kan tan abi a fri fu taki. Na ini ala sani, den e frutrow na tapu Yehovah Gado fu a gi den krakti, fu a gi den koni èn fu a yepi den fu no drai den baka gi a bribi fu den na no wan fasi. Na so fasi den e sori taki den e frutrow den wortu fu a psalm skrifiman: „Yu na mi klipston di tanapu leti-opu èn mi fortresi; èn fu yu nen ede yu sa tyari mi èn tiri mi.”—Psalm 31:3.