’Frulusu Yusrefi Nanga Den Wan Di E Arki Yu’
„Poti prakseri doronomo na yusrefi èn na den sani di yu e leri sma. . . . Bika efu yu e du disi, dan yu sa frulusu yusrefi nanga den wan di e arki yu.”—1 TIMOTEUS 4:16.
1, 2. San e buweigi tru Kresten fu go doro nanga a wroko di den e du fu frulusu sma libi?
NA INI wan dorpu farawe na a noordsei fu Thailand, wan trowpaar di de Kotoigi fu Yehovah e pruberi fu taki a tongo di den leri nyunyun nanga memre fu wan lo di e libi na tapu wan pikin bergi. No so langa pasa, a trowpaar bigin leri a Lahu tongo, so taki den kan prati a bun nyunsu nanga den sma fu a dorpu.
2 „A de wan muilek sani fu taki fu a prisiri nanga satisfaksi di wi abi, fu wroko na mindri den sma disi di e hari wi prakseri”, na so a masra e fruklari. „Wi e firi trutru taki wi abi fu du nanga a kontru fu Openbaring 14:6, 7, fu meki bun nyunsu bekènti ’gi ibri nâsi nanga lo nanga tongo’. Wan tu kontren nomo tan abra pe a bun nyunsu no doro ete, èn fu tru dyaso na wan fu den. Wi abi so furu bijbelstudie taki efu wi no luku bun wi no man hori den alamala.” A de krin, taki a trowpaar disi no e howpu fu frulusu densrefi wawan ma so srefi den sma di e arki den. Wi alamala di de Kresten e howpu fu du dati tu, a no so?
„Poti Prakseri Doronomo na Yusrefi”
3. Efu wi wani frulusu tra sma, san wi fosi musu du?
3 Na apostel Paulus ben gi Timoteus a rai: „Poti prakseri doronomo na yusrefi èn na den sani di yu e leri sma”, èn disi fiti gi ala Kresten (1 Timoteus 4:16). Fu tru, efu wi wani yepi tra sma fu kisi frulusu, dan wi fosi musu poti prakseri na wisrefi. Fa wi kan du disi? Na a fosi presi, wi musu de na ai te wi e luku a ten di wi e libi na ini. Yesus ben gi wan marki di de fu difrenti pisi, so taki den bakaman fu en ben o sabi o ten „a bosroiti fu a seti fu sani” ben doro. Toku, Yesus ben taki tu taki wi no ben o sabi soifri o ten a kaba ben o kon (Mateus 24:3, 36). Fa wi musu handri tapu a tru tori disi?
4. (a) Sortu fasi fu denki wi musu abi na a sei fu a ten di tan abra gi a seti fu sani disi? (b) Sortu fasi fu denki wi musu tan farawe fu en?
4 Ibriwan fu wi ben sa kan aksi, ’Mi e gebroiki ala a ten di tan abra gi a seti fu sani disi fu frulusu misrefi nanga den wan di e arki mi? Noso mi e denki, „Fu di wi no sabi soifri o ten a kaba o kon, dan mi no sa broko mi ede nanga a sani dati”?’ A lasti fasi fu denki kefalek. A de krinkrin kontrari a frumane fu Yesus: „Fu dati ede unu so srefi musu sori taki unu de srekasreka, bika a Manpikin fu libisma e kon na wan yuru di unu no prakseri” (Mateus 24:44). Fu tru, disi a no a ten fu lasi a faya fu wi gi a diniwroko fu Yehovah noso fu go suku seikerfasi noso satisfaksi na a grontapu.—Lukas 21:34-36.
5. Sortu eksempre den kotoigi fu Yehovah di ben libi bifo a pisi ten fu den Kresten, ben de?
5 Wan tra fasi fa wi kan sori tu taki wi e poti prakseri na wisrefi, na te wi e horidoro na wan getrow fasi leki Kresten. Den futuboi fu Gado fu fositen ben tan horidoro, efu den ben e fruwakti frulusu wantewante efu no. Baka di Paulus ben kari den eksempre fu den kotoigi di ben libi bifo a pisi ten fu den Kresten, soleki Abel, Heinok, Noa, Abraham nanga Sara,, a ben taki: „Den no ben kisi a kontru fu den pramisi, ma den ben si den fu farawe èn ben bari den wan switi kon èn den ben meki bekènti na publiki taki den ben de freimdesma nanga sma di ben tan wan pisi ten nomo na ini a kondre.” Den no ben go libi wan makriki libi sondro broko-ede. Den no ben gi densrefi abra tu na a fasi fu libi di den sma di lontu den ben abi. A libi dati ben de na wan fasi di no de akruderi bun gwenti nanga gronprakseri. Ma den tan luku fayafaya na fesi na „a kontru fu den pramisi”.—Hebrewsma 11:13; 12:1.
6. Fa a fasi fa den fosi yarihondro Kresten ben denki fu frulusu ben abi krakti na tapu a fasi fa den ben e libi?
6 Den fosi yarihondro Kresten so srefi ben si densrefi leki „freimdesma” na ini a grontapu disi (1 Petrus 2:11). Srefi baka di den ben kisi kibri pasa a pori fu Yerusalem na ini 70 G.T., dan tru Kresten no ben tapu nanga a preikiwroko noso den no ben go libi leki fa grontapu sma e libi. Den ben sabi taki wan bigi frulusu ben e wakti den sma di ben tan getrow. Fu taki leti, te leki 98 G.T., dan na apostel Yohanes ben skrifi: „Grontapu e pasa gowe èn so srefi a lostu fu en, ma a sma di e du a wani fu Gado, e tan fu têgo.”—1 Yohanes 2:17, 28.
7. Fa Yehovah Kotoigi ben sori taki den e horidoro na ini a ten disi?
7 Na ini a ten disi Yehovah Kotoigi ben horidoro tu na ini a Kresten diniwroko, ala di den ben ondrofeni takru frufolgu. A horidoro di den horidoro ben de fu soso? Kwetikweti, bika Yesus ben gi wi a dyaranti: „Ma a sma di horidoro te na a kaba, na en sa kisi frulusu” efu dati ben sa de na a kaba fu na owru seti fu sani noso a kaba fu a libi di wan sma abi now. Na a ten fu na opobaka, Yehovah sa memre èn gi pai na ala den getrow futuboi fu en di dede.—Mateus 24:13; Hebrewsma 6:10.
8. Fa wi kan sori taki wi e warderi a horidoro di den Kresten fu a ten di pasa ben horidoro?
8 Boiti dati, wi e prisiri taki getrow Kresten fu fositen no ben e broko den ede nomo nanga a frulusu fu densrefi wawan. Wi de nanga tangi trutru taki na a muiti di den ben du, meki wi kisi fu yere fu a Kownukondre fu Gado. Na fu di den horidoro meki den ben kan du a komando fu Yesus: „Go fu dati ede, èn meki disipel fu sma fu ala nâsi, . . . èn leri den fu du ala den sani di mi komanderi unu” (Mateus 28:19, 20). So langa leki na okasi opo ete gi wi, dan wi kan sori taki wi de nanga tangi fu di wi e preiki gi tra sma di no yere a bun nyunsu ete. Ma fu du a preikiwroko de nomo a fosi stap fu go meki disipel.
’Poti Prakseri na Den Sani Di Yu E Leri Sma’
9. Fa wan bun fasi fu denki fu sani kan yepi wi fu bigin nanga bijbelstudie?
9 A no soso preiki wi musu preiki, ma wi musu gi leri tu. Yesus ben gi wi a komando fu leri sma fu du ala sani di en ben komanderi. A tru, taki na ini son kontren, a sori leki pikinso sma nomo wani leri fu Yehovah. Ma te wi e denki taki den sma di e libi na ini a kontren pe wi e preiki no wani arki, dan dati kan meki taki wi no e du muiti fu bigin bijbelstudie. Yvette, wan pionier di e preiki na ini wan kontren pe son sma no wani arki, ben kon si taki fisitiman di e kon drape di no ben denki na a fasi disi, ben bigin nanga oso-bijbelstudie. Baka di Yvette srefi ben kenki a fasi fu denki fu en, dan a ben feni sma di ben wani studeri Bijbel.
10. San na a moro tranga fanowdu sani di wi musu du leki leriman fu Bijbel?
10 Kande son Kresten e draidrai fu pristeri den sma di wani sabi Bijbel, wan bijbelstudie, bika den e firi taki den no man hori wan studie. A tru, taki a wan sma koni moro a trawan. Ma a no de fanowdu taki wi musu abi hei skoroleri fu kan abi bun bakapisi leki leriman fu a Wortu fu Gado. A soifri boskopu fu Bijbel abi krakti, èn Yesus ben taki dati sma di wi kan gersi nanga skapu, sabi a sten fu a tru Skapuman te den e yere en. A wroko di wi abi, dan, na soso fu tyari a boskopu abra fu a heri bun Skapuman, Yesus, so soifri leki wi man du en.—Yohanes 10:4, 14.
11. Fa yu kan yepi wan studenti na wan moro bun fasi?
11 Fa wi kan meki sma kon sabi a boskopu fu Yesus na wan moro bun fasi? Na a fosi presi, kon sabi bun san Bijbel e taki fu a tori èn go prakseri fu en. Yusrefi musu frustan a tori bifo yu kan leri tra sma fu en. Te yu e studeri nanga sma, pruberi so srefi fu sori wartifasi nanga switifasi. Den studenti, den yonguwan tu, e leri moro bun te den no de ini wan span situwâsi èn te yu e sori den lespeki nanga bunfasi.—Odo 16:21.
12. Fa yu kan kon sabi seiker taki a studenti e frustan san yu e leri en?
12 Yu, leki a leriman, no wani taki fu tru tori nomo di a studenti musu taki baka nomo te a e gi piki. Yepi en fu frustan san a e leri. A skoroleri di wan studenti kisi, en ondrofeni na ini a libi nanga o furu sabi a abi fu Bijbel, sa abi krakti tapu a frustan di a e frustan san yu e taki. Fu dati ede, yu ben sa kan aksi yusrefi, ’A e frustan san den Bijbel tekst di, skrifi na ini a publikâsi di a e studeri, wani taki’? Yu ben sa kan meki a taki san ensrefi e denki, fu di yu e poti aksi di a no kan piki nomo nanga iya noso nôno, ma di e meki taki a musu tyari kon na krin san en e frustan fu a tori (Lukas 9:18-20). Na a tra sei, son studenti e draidrai fu poti aksi gi a leriman fu den. So bun, den e go doro sondro fu frustan bun san na den sani di den e leri. Gi a studenti deki-ati fu poti aksi èn fu taigi yu te a no e frustan ala sani bun.—Markus 4:10; 9:32, 33.
13. Fa yu kan yepi a studenti fu tron wan leriman?
13 Wan marki di de tranga fanowdu te yu e hori wan bijbelstudie, na fu yepi a studenti fu kon tron wan leriman (Galasiasma 6:6). Fu doro a marki dati, dan te yu e taki baka fu den sani di yu ben studeri nanga en, yu kan aksi en fu fruklari wan sani gi yu nanga wortu di no muilek, neleki a e fruklari en gi wan sma di e yere a tori a fosi tron. Baka ten, te a doro a marki taki a kan abi prati na a diniwroko, dan yu kan gi en wan kari fu go nanga yu na ini a preikiwroko. Leki fa yu kan fruwakti, dan a ben sa wani wroko nanga yu fosi èn na ondrofeni di a sa kisi sa yepi en fa fu du a preikiwroko te leki a de so fara fu man du dati sondro wan sma yepi en.
Yepi a Studenti fu Tron wan Mati fu Yehovah
14. San na a moro prenspari marki fu yu leki wan leriman, èn san sa yepi yu fu man doro a marki dati?
14 A marki di de tranga fanowdu di ibri Kresten leriman wani doro na fu yepi a studenti fu kisi matifasi nanga Yehovah. Yu kan du disi no wawan nanga den sani di yu e taki, ma so srefi nanga na eksempre di yusrefi e poti. Te yu e gi leri nanga na eksempre di yu e poti dan dati abi krakti tapu na ati fu a studenti. Den sani di wi e du abi moro krakti leki san wi e taki nomo. Dati de tru, spesrutu te wi musu poti bun eigifasi nanga faya na ini na ati fu a studenti. Te a e si taki den sani di yu e taki nanga den sani di yu e du, e kon fu wan bun matifasi di yu abi nanga Yehovah, dan dati sa buweigi en ati tu fu ensrefi kweki so wan matifasi.
15. (a) Fu san ede a de wan tranga fanowdu sani taki a studenti e kweki wan yoisti fasi fu denki fu a dini di a wani dini Yehovah? (b) Fa yu kan yepi a studenti fu tan go na fesi na yeye fasi?
15 Yu wani taki a studenti musu dini Yehovah, no soso fu di a no wani kisi pori na ini Armagedon, ma fu di a lobi en. Te yu e yepi en fu kweki so wan yoisti fasi fu denki fu a tori, dan yu e bow nanga sani di faya no kan bron, di kan pasa den tesi di a bribi fu en sa kisi (1 Korentesma 3:10-15). Te a studenti wani nomonomo fu du ala sani na a fasi fa yu noso wan tra libisma e du en, dan dati no bun. Dati sa meki taki a no sa abi a krakti di a abi fanowdu fu kakafutu gi sani di no bun gi wan Kresten èn di abi krakti na en tapu. Boiti dati, a no e gi en deki-ati fu du san bun. Hori na prakseri taki yu no sa de ala ten a leriman fu en. Ala di yu abi na okasi, yu kan gi en deki-ati fu a kon moro krosibei na Yehovah fu di a e leisi Gado Wortu ibri dei èn e denki fu en. Na so fasi a sa tan teki na ini en „a model fu gosontu wortu” fu Bijbel èn publikâsi di abi den gron na tapu Bijbel, langa ten baka di yu kaba studeri Bijbel nanga en.—2 Timoteus 1:13.
16. Fa yu kan leri a studenti fu begi nanga en heri ati?
16 Yu kan yepi a studenti tu fu kon moro krosibei na Yehovah, fu di yu e leri en fu begi nanga en heri ati. Fa yu kan du disi? Kande yu ben sa kan sori en a begi fu Yesus di a ben gi leki wan eksempre fu begi, èn den furu tra begi di sma ben begi nanga den heri ati di skrifi na ini Bijbel, so leki den wan di de na ini den Psalm (Psalm 17, 86, 143; Mateus 6:9, 10). Na tapu fu dati, te a studenti fu yu e yere te yu e begi fu bigin èn fu tapu nanga a studie, dan a sa frustan fa yu e firi gi Yehovah te yu e begi. Fu dati ede, ala ten den begi fu yu musu sori taki yu de opregti èn taki yu man taki fri èn so srefi den musu sori tu taki yu de lepi na yeye fasi èn taki yu man dwengi den firi na ini yu ati.
Wroko fu Frulusu Yu Pikin
17. Fa papa nanga mama kan yepi den pikin fu den fu tan na tapu a pasi fu frulusu?
17 A no de fu taki, dati den memre fu wi osofamiri de na mindri den sma di wi wani taki den musu kisi frulusu. Wan bigi grupu pikin fu Kresten papa nanga mama de opregti èn „stanfaste na ini a bribi”. Ma a kan taki, trawan no meki a waarheid rutu dipi na ini na ati fu den (1 Petrus 5:9; Efeisesma 3:17; Kolosesma 2:7). Furu fu den yongu sma disi e libi a Kresten fasi fu libi te den e gro kon bigi noso te den tron bigisma. Efu yu na wan papa noso mama, san yu kan du fu no meki taki so wan sani ben sa kan pasa? Na a fosi presi, yu kan sorgu taki yu osofamiri e firi bun te den de na oso. Wan bun osofamiri libi e poti a fondamenti fu wan yoisti fasi fu si sma di abi frantwortu. Den sa frustan tu san na yoisti markitiki èn fa fu abi bun matifasi nanga trawan (Hebrewsma 12:9). So bun, wan krosibei banti di sma abi na ini na osofamiri, kan de leki wan gron pe a matifasi fu wan pikin nanga Yehovah kan gro (Psalm 22:10). Tranga osofamiri e du sani makandra leki wán man — srefi efu papa nanga mama musu teki a ten di ben kan gebroiki fu kisi wini gi densrefi. Na a fasi disi yu kan leri den pikin fu yu nanga yepi fu yu eksempre fa fu teki yoisti bosroiti na ini libi. Papa nanga mama, den sani di den pikin fu unu abi moro furu fanowdu, a no wini na materia sei ma na unu srefi — un ten, un krakti nanga un lobi. Unu e gi un pikin den sani disi?
18. Sortu aksi papa nanga mama musu yepi den pikin fu den fu feni wan piki na tapu?
18 Kresten papa nanga mama noiti musu denki taki a no sa kan de tra fasi dati den pikin fu den o tron Kresten tu. Danièl, wan papa di de wan owruman èn di abi feifi pikin, e taki: „Papa nanga mama musu teki a ten fu yepi puru den tweifri di den pikin fu den seiker e kisi fu yere na skoro èn na tra presi. Nanga pasensi den musu yepi den pikin fu den fu feni piki tapu den aksi soleki: ’Wi e libi trutru na ini a ten fu a kaba? A de so taki na wan tru bribi nomo de? Fu san ede wan skoromati di gersi leki a abi switifasi, no de bun kompe? Ala ten a fowtu fu abi seks bifo sma trow?’” Papa nanga mama, unu kan de seiker taki Yehovah sa blesi den muiti fu unu, bika ensrefi wani taki sani musu waka bun nanga den pikin fu unu.
19. Fu san ede a de a moro bun sani taki papa nanga mama densrefi studeri nanga den pikin fu den?
19 Son papa nanga mama kan firi taki den no koni nofo fu studeri nanga den eigi pikin. Ma unu no musu firi na a fasi dati, bika no wan sma sa man gi leri na den pikin fu unu moro betre leki unu srefi (Efeisesma 6:4). Te unu e studeri nanga un eigi pikin, dan unu e kisi na okasi fu unu srefi kon sabi san de na ini na ati nanga a prakseri fu den. Den wortu fu den opregti noso den e taki sani sondro fu denki? Den e bribi trutru san den e leri? Yehovah na wan trutru sma gi den? Unu kan kisi den piki tapu den aksi disi èn tapu tra aksi di de tranga fanowdu nomo efu unu srefi e studeri nanga den pikin fu unu.—2 Timoteus 1:5.
20. Fa papa nanga mama kan meki na osofamiri studie de wan bun sani di e gi den prisiri?
20 Te yu bigin kaba nanga na osofamiri studie fu yu dan fa yu kan meki a tan go doro? Yosef, wan papa di de wan owruman èn di abi wan yongu manpikin nanga umapikin, e taki: „Neleki ala bijbelstudie, na osofamiri studie musu de wan prisiri sani, wan sani di ibriwan sma breiti te a yuru doro. Fu kan doro a marki dati na ini wi osofamiri, dan wi no musu hori wisrefi nomonomo na a ten. A studie fu wi kan teki wan yuru, ma srefi efu sontron na tin miniti nomo wi abi, toku wi kan studeri. Wan sani di e meki na osofamiri studie de wan heimarki gi den pikin na ini a wiki, na te wi e prei den sani di Mi boekoe nanga bijbel tori e taki.a A naki di a e naki na ati fu den èn a frustan di den e frustan a tori, abi moro warti leki omeni paragraaf wi e studeri wan tron.
21. O ten papa nanga mama kan gi den pikin fu den leri?
21 A no de fu taki, dati yu no e leri den pikin fu yu soso te yu abi na osofamiri studie (Deuteronomium 6:5-7). A Kotoigi na ini Thailand, di wi ben e taki fu en na a bigin fu na artikel disi e taki: „Mi kan memre leki a ben de esrede fa mi ben go nanga Papa na ini a preikiwroko, tapu den baisigri fu wi, te na den moro farawe pisi fu a kontren di a gemeente fu wi ben abi fu wroko. Fu tru, a ben de a heri bun eksempre nanga a leri di wi papa nanga mama ben gi wi na ala sortu okasi di ben yepi wi fu teki a bosroiti fu go na ini a furuten diniwroko. Èn den sani di wi ben leri ben wroko bun. Te nanga now mi e wroko na den moro farawe pisi fu a kontren di wi abi fu wroko!
22. San sa de a bakapisi te yu e „poti prakseri doronomo na yusrefi èn na den sani di yu e leri sma”?
22 Heri esi tapu wan dei, na a yoisti ten, Yesus sa kon fu koti a krutu fu Gado na a seti fu sani disi. A bigi sani dati sa tron historia krinkrin, ma den getrow futuboi fu Yehovah sa go doro fu dini en nanga têgo frulusu na den fesi. Yu abi a howpu fu de na den mindri, makandra nanga den pikin fu yu èn nanga den sma di yu studeri Bijbel nanga den? We memre dan: „Poti prakseri doronomo na yusrefi èn na den sani di yu e leri sma. Hori den sani disi, bika efu yu e du disi, dan yu sa frulusu yusrefi nanga den wan di e arki yu.”—1 Timoteus 4:16.
[Futuwortu]
a Di a Watchtower Bible and Tract Society of New York, Inc., tyari kon na doro.
Yu Kan Tyari Disi Kon na Krin?
• San musu de wi fasi fu denki, fu di wi no sabi a soifri ten fu a krutu fu Gado?
• Na sortu fasi wi kan ’poti prakseri na den sani di wi e leri sma’?
• Fa yu kan yepi wan studenti fu tron wan mati fu Yehovah?
• Fu san ede a de tranga fanowdu taki papa nanga mama e teki ten fu gi leri na den pikin fu den?
[Prenki na tapu bladzijde 15]
Sma sa leri moro bun te leri e gi nanga lespeki ma nanga switifasi
[Prenki na tapu bladzijde 18]
A prei fu den Bijbel tori, soleki di fu Salomo pe a e koti krutu na mindri den tu huru, e meki na osofamiri studie tron wan prisiri sani