Bita-atifasi E Panya Go na Ala Sei
„Sma noiti no e frustan den wan di den no wani si na ai.”—JAMES RUSSEL LOWELL, WAN SKRIFIMAN NANGA DIPLOMAAT.
A GERSI taki bita-atifasi e panya go na ala sei na ini a ten disi. Den nen soleki Kosofo, Liberia, Littleton, Oost-Timor, nanga Sarayefo — nanga so srefi nyun-Nazi grupu, skinhead (grupu fu yongu weti sma di e du ogri nanga sma fu tra ras) — na sani di wi no man frigiti makriki. Den nen dati e meki wi prakseri fu presi pe sma bron ala sani, presi pe den kiri ipi-ipi sma trowe na ini wán bigi grebi-olo, èn so srefi dede skin.
A dren di sma e dren fu wan ten pe sma no sa abi bita-ati moro, pe feti no sa de moro, pe ogridu no e du moro, na wan sani di sma e bribi taki a no sa kon kwetikweti. Danielle Mitterand, a wefi fu a presidenti fu Fransikondre di dede kaba, ben memre wan sani fu a ten di a ben yongu ete: „Den sma ben dren fu wan fri libi na ini wan libimakandra pe ala sma e libi nanga makandra leki brada nanga sisa. Den ben dren fu a de di den de sondro broko-ede te den e libi na mindri trawan èn nanga trawan. Den ben dren fu libi wan gosontu, kefalek bun libi pe sma e handri nanga trawan na wan warti fasi èn pe vrede de na ini wan tranga grontapu di ben sorgu sma bun.” San ben pasa nanga den denki dati? Danielle Mitterand e kragi: „Feifitenti yari moro fara, a tru taki den dren disi no man tanapu steifi moro.”
Wi no kan taki dati wi no e ke nanga a si di sma no wani si makandra na ai nownowde. Bita-atifasi e panya go na ala sei moro nanga moro now èn a e kon moro seryusu. A seikerfasi di milyunmilyun sma e kisi sondro fu de nanga tangi gi dati, go na baka fu na ogri di sma e du fu di den no wani si trawan na ai, èn ibri ogri sani di den e du gersi moro ogri leki a sani di den ben du na fesi. Srefi efu na wi oso noso na ini wi kondre a no de so, taki sma no wani si wi na ai, toku a bita-atifasi dati e wakti wi wan tra presi. Kande ala dei wi e si a bita-ati fu sma na tapu telefisi na ini a nyunsu èn na ini sani di den e sori nownowde. Now son wan fu a bita-ati dati, de fu feni srefi na tapu na Internet. Luku wan tu eksempre.
Na ini den lasti tin yari di pasa, a lobi di sma abi gi den eigi kondre, gro na wan fasi di noiti bifo ben feni presi ete. „A lobi di den sma abi gi den eigi kondre,” na so Joseph S. Nye, Jr., driktoro fu a Harvard Center for International Affairs e taki, „e kon moro tranga na furu presi fu grontapu, a no e kon moro swaki. Na presi fu grontapu tron wán bigi grupu sma, yu abi difrenti aparti grupu na heri grontapu di lobi densrefi tumusi. Dati fu en sei, e meki taki moro okasi de fu meki trobi.”
Tra fasi fa sma e sori bita-atifasi de moro takru, èn den fasi disi kibri na ini den kondre srefi noso so srefi na ini wan birti fu a kondre. Di feifi skinhead ben kiri wan owru Sikh sma na ini Kanada, dan disi „ben poti krakti tapu san wan tu sma e si leki a bigin fu ogri di sma e du fu bita-ati ede, na ini wan kondre di furutron sma ben prèise fu a fasi fa sma fu ala ras ben libi bun nanga makandra”. Na ini Doisrikondre, baka di safrisafri sma no ben feti so furu moro fu ras ede, dan na ini 1997 a feti di sma ben feti nanga makandra fu di den feni taki a ras fu den moro bun moro tra ras, ben gro nanga 27 procent. „A de wan sani di e meki wi lasi-ati,” na so a minister fu afersi fu Doisrikondre, Manfred Kanther e taki.
Na a noordsei fu Albania, nyunsu e sori taki moro leki 6000 pikin-nengre tron strafuman na ini den eigi oso fu taki en so, bika den frede taki feanti fu den famiri sa sutu den kiri. Den pikin disi e kisi den ogri bakapisi fu wan bita-ati feti fu den famiri, „di meki taki dusundusun famiri no man libi wan bun aladei osofamiri libi moro”. Na ini Amerkankondre, den skowtu di e ondrosuku ogri san e pasa (FBI) e taki dati moro leki afu fu ala den 7755 ogri di ben du na ini 1998, ben kon fu „a desko di sma e desko sma fu tra ras”. Wan tu fu den tra sani di ben buweigi sma fu du ogri fu di den no wani si trawan na ai, na fu bribi ede, fu kondre ede, èn fu a firi di sma e firi taki den no man du san den wani na ini a libi fu di den abi mankeri na skin sei.
Boiti dati, ibri dei a prenspari nyunsu fu den koranti e sori taki na ala presi sma no lobi sma fu tra kondre kwetikweti. A bita-atifasi disi den e sori na a fosi presi gi sma di lowe komoto fu wan tra kondre, èn moro leki 21 milyun sma na loweman now. A de wan sari sani fu taki dati moro furu na yonguwan e sori bita-ati fasi gi sma fu tra kondre, èn politiek man nanga tra sma di e suku fu gi trawan a fowtu fu san e pasa, e sutu faya gi den yonguwan disi sondro fu prakseri fu den takru bakapisi. Tra sani di abi fu du nanga dati, ma di no de so krin fu si, na a frutrow di sma no e frutrow trawan, a frudrage di sma no e frudrage trawan, èn a krutu di sma e krutu trawan fu di den de tra fasi.
Fu san ede a si di sma no wani si trawan na ai e panya go na ala sei? Èn san wi kan du fu puru so wan bita-atifasi? A tra artikel sa gi piki tapu den aksi disi.
[Sma di abi a reti fu a prenki na tapu bladzijde 2]
Kafti, tapusei: UN PHOTO 186705/J. Isaac
[Sma di abi a reti fu a prenki na tapu bladzijde 3]
Daud/Sipa Press