Wan Fasi fu Suku Yepi

„GADO frigiti mi!” na so wan Brasyon uma ben bari krei. Baka di en masra dede wantronso, dan na uma ben firi taki a libi fu en no ben warti notinoti moro. Oiti yu pruberi fu trowstu wan sma di lasi-ati na so wan fasi, noso oiti yu pruberi fu trowstu wan sma di e suku yepi?

Son sma e lasi-ati so kefalek taki den e kiri densrefi — wan lo fu den sma dati na yonguwan. Soleki fa a koranti Folha de S. Paulo e fruteri, dan wan ondrosuku na ini Brasyonkondre e sori taki „a kiri di yonguwan e kiri densrefi, gro nanga 26 procent”. Fu eksempre, prakseri san ben pasa nanga Walter,a wan yonkuman na São Paulo. Walter no ben abi papa nanga mama, a no ben abi tanpresi, a no ben man de en wawan te a ben wani dati, èn a no ben abi bun mati. Fu tyari wan kaba kon na a pina di a ben pina, meki Walter ben teki a bosroiti fu dyompo fu wan broki.

Edna, di ben de en wawan leki mama, ben abi tu pikin kaba, ne a ben miti wan tra man. Baka soso wán mun, den ben bigin libi nanga makandra na a oso fu a mama fu a man. A mama fu a man ben du afkodrei, èn a ben de wan uma di ben lobi dringi sopi pasa marki. Edna ben kisi ete wan pikin, a bigin dringi furu sopi, èn a ben lasi-ati so kefalek taki a ben pruberi fu kiri ensrefi. Te fu kaba, a ben lasi a reti di a ben abi fu sorgu den pikin fu en.

Fa a de nanga moro owru sma? Maria ben de wan umasma di ben lobi meki prisiri, èn a ben lobi taki. Ma di a ben kon moro owru, dan a ben bigin hati en ede nanga a wroko fu en leki verpleegster, fu di a ben frede taki a ben o meki fowtu. A sani disi ben meki a lasi-ati. Baka di a ben pruberi fu dresi ensrefi, dan a ben go suku yepi na datra, èn a gersi taki dati ben yepi en. Ma di nanga en 57 yari a ben lasi en wroko, dan a ben brokosaka krinkrin so taki tra fasi no ben de gi en. Maria ben bigin prakseri fu kiri ensrefi.

„So wan 10 procent fu den sma di e lasi-ati, e pruberi fu kiri densrefi”, na so Professor José Alberto Del Porto fu na Universiteit fu São Paulo e taki. „A tranga fu bribi taki den sma di dede fu di den kiri densrefi, furu moro leki den sma di dede fu di trawan kiri den, ma dati na a sari tru tori”, na so Dr. David Satcher, a bigi driktoro fu Gosontu Afersi fu Amerkankondre e taki.

Sontron, te wan sma pruberi fu kiri ensrefi, dan, te yu luku en bun, dati na wan fasi fa a e suku yepi. Èn a no de fu taki dati sma na ini na osofamiri nanga mati, wani du san bun gi a sma di lasi howpu. A no de fu taki dati wan tu sani di yu e taki no sa yepi den kwetikweti. Sani soleki: „Yu no musu sari nanga yusrefi”, „Wan lo sma abi en moro takru leki yu”, noso „Wi alamala abi wan dei te sani no e waka so bun nanga wi”. Na presi fu taki den sortu sani dati, dan fu san ede yu no e pruberi fu de wan trutru mati èn fu san ede yu no e pruberi fu de wan sma di e arki bun? Iya, pruberi fu yepi a sma di lasi-ati fu si taki a libi warti fu libi.

Voltaire, wan skrifiman fu Fransikondre, ben skrifi: „A man di na ini wán momenti te a lasi-ati hebihebi, e kiri ensrefi tide, ben o wani tan na libi efu a ben wakti wan wiki moro langa nomo.” We dan, fa den sma di de na ini bruya kan kon si taki a libi na wan warti sani?

[Futuwortu]

[Prenki na tapu bladzijde 3]

Furu yonguwan nanga bigisma e kiri densrefi, èn dati e pasa moro nanga moro

[Prenki na tapu bladzijde 4]

Fa yu kan yepi wan sma di lasi howpu?