Wi Kan Leri wan Sani fu a Fosi Libisma Trowpaar
GADO ben ondrosuku a planeiti Grontapu finifini. A ben e sreka en fu libisma kan libi na en tapu. Gado ben si taki iniwan sani di a ben meki, ben bun. Fu taki en leti, di a ben kaba nanga a wroko disi, dan a ben taki dati a ben de „heri bun” (Genesis 1:12, 18, 21, 25, 31). Ma bifo Gado ben taki dati den sani di a ben meki ben de heri bun, a ben taki fu wan sani di ’no ben bun’. A no de fu taki dati ala sani di Gado ben meki, ben de volmaakti. Ma a ben wani taki nomo, dati a no ben kaba meki sani ete. Yehovah ben taki: „A no bun taki a libisma e tan en wawan. Mi e go meki wan yepiman gi en, leki wan fitipisi fu en.”—Genesis 2:18.
A ben de a prakseri fu Yehovah taki a libimakandra fu libisma ben o abi têgo libi na wan paradijs na grontapu, pe den ben o de gosontu, koloku, èn den no ben o mankeri noti. A tata fu a heri libisma famiri ben de Adam. En wefi Efa, ben kon tron „a mama fu ala sma di e libi” (Genesis 3:20). Ala di grontapu lai now nanga milyardmilyard bakapikin fu den, toku libisma no volmaakti srefisrefi.
Furu sma sabi a tori fu Adam nanga Efa heri bun. Fa a tori disi kan abi bun winimarki gi wi? San wi kan leri fu den sani di pasa nanga a fosi libisma trowpaar?
„Leki Man èn Leki Uma a Ben Meki Den”
Di Adam ben e gi den meti wan nen, dan a ben si taki den ben abi wan patna, ma ensrefi no ben abi wan. So bun, di a ben si a moi sma di Yehovah ben meki nanga Adam lebriki, dan a ben prisiri. Di a ben frustan taki, Efa ben de wan pisi fu en na wan aparti fasi, dan Adam ben bari taki: „Disi na te fu kaba, bonyo fu mi bonyo èn skin fu mi skin. A wan disi den sa kari Uma, bika na fu a man den ben teki a wan disi.”—Genesis 2:18-23.
A man ben abi „wan yepiman” fanowdu. Now a ben abi wan di ben fiti en soifri. Efa ben de wan heri bun fitipisi gi Adam. Na uma ben o yepi en fu sorgu den meti nanga a dyari pe den ben e libi na ini, èn makandra den ben o meki pikin. A ben o yepi en tu fu di den ben o kenki prakseri nanga makandra èn a ben o horibaka gi en leki wan tru mati.—Genesis 1:26-30.
Yehovah ben gi a trowpaar ala sani di den ben o wani abi kande. Gado ben tyari Efa go na Adam èn nanga dati a ben feni en bun taki den ben o de wán. Na a fasi disi Gado ben seti a trowlibi èn na osofamiri libi di ben musu orga a libimakandra. A tori fu Genesis e taki: „Wan man sa gowe libi en papa nanga en mama èn a musu tai hori na en wefi èn den musu tron wán skin.” Di Yehovah ben blesi a fosi trowpaar èn ben taigi den fu meki pikin, dan a ben abi krinkrin na prakseri taki ibri pikin ben musu gebore na ini wan lobi osofamiri di abi wan papa nanga mama fu sorgu a pikin.—Genesis 1:28; 2:24.
„Na a Prenki fu Gado”
Adam ben de wan volmaakti manpikin fu Gado, di ben meki ’na a prenki fu En, soleki fa A de’. Ma fu di „Gado na wan Yeye”, meki a no kan, taki Adam abi wan skin di gersi di fu Gado (Genesis 1:26; Yohanes 4:24). Libisma ben o de soleki fa Gado de, fu di den ben o abi den srefi sortu eigifasi leki Gado. Disi e meki taki libisma hei moro meti. Iya, sensi a bigin, Gado ben poti eigifasi soleki lobi, koni, makti nanga retidu na ini libisma. A ben kisi wan friwani èn a ben man frustan yeye afersi. Gado meki en nanga wan konsensi di ben o yepi en fu man si krin san bun èn san ogri. Yehovah ben gi Adam frustan fu man denki, so taki a ben kan denki dipi fu san ede meki libisma de. A ben kan gebroiki en frustan so srefi fu kon sabi moro fu a Sma di meki en èn fu kon tron wan bun mati fu En. Nanga ala den sani disi di Gado ben poti na ini Adam, a ben abi ala sani di a ben abi fanowdu fu sorgu den sani na grontapu di Gado meki.
Efa E Sondu
Sondro tweifri, Adam ben taigi Efa heri esi, san na a wan-enkri sani di Yehovah ben taigi den taki den no mag du: Den ben mag nyan den froktu fu ala den bon na ini a dyari pe den ben libi, boiti wan — a bon fu sabi bun nanga ogri. Den no ben mag nyan den froktu fu a bon. Efu den ben nyan fu en, dan den ben o dede na a dei dati.—Genesis 2:16, 17.
No langa baka dati, wan problema ben opo kon di abi fu du nanga a froktu di den no ben mag nyan. Wan yeye di wi no man si, ben gebroiki wan sneki fu taki nanga Efa. A sneki ben du neleki a no ben sabi sani, èn ben aksi Efa: „A de trutru so, taki Gado ben taki dati unu no musu nyan fu ibri bon fu a dyari?” Efa ben piki taki a ben mag nyan den froktu fu ibri bon, boiti wan. Ma tra fasi leki san Gado taki, a sneki ben taigi na uma: „Unu no sa dede kwetikweti. Bika Gado sabi taki na a srefi dei di unu e nyan fu en, un ai sa kon opo seiker èn seiker unu sa de leki Gado, unu sa sabi bun nanga ogri.” Na uma ben bigin denki tra fasi fu a bon di den no ben mag nyan fu en. „A bon ben bun fu nyan èn . . . a ben de wan sani di den ai ben angri fu si.” Efa ben pasa a wet fu Gado, fu di a sneki ben bedrigi en trutru.—Genesis 3:1-6; 1 Timoteus 2:14.
Efa ben musu fu sondu nomonomo? Kwetikweti! Poti yusrefi na ini en presi. Den wortu di a sneki taki, ben de wan heri tra sani leki san Gado nanga Adam ben taki. Fa yu ben o firi efu wan freimde sma ben fruteri yu taki wan sma di yu lobi èn di yu e frutrow, e lei? Efa ben musu handri tra fasi. A ben musu sori taki a e tegu èn taki a e atibron, èn a ben musu weigri fu arki srefi. Te yu e luku en bun, dan sortu reti a sneki ben abi fu krutu a regtfardikifasi fu Gado èn a sani di a masra fu Efa ben taki? Lespeki gi en masra leki edeman, ben musu meki Efa go suku rai bifo a ben teki iniwan bosroiti. Wi musu du a srefi sani efu oiti wan sma e taigi wi sani di no e kruderi nanga den tirilin di Gado gi wi. Ma Efa ben bribi den wortu fu a Bedrigiman, fu di a ben wani fu bosroiti gi ensrefi san bun èn san ogri. O moro a ben tan denki a sani disi, o moro a ben lobi en. Dati na wan bigi fowtu di a ben meki fu di a ben tan denki wan takru lostu! A ben du disi na presi fu puru a prakseri na en ede noso fu go taki fu a sani disi nanga na edeman fu en osofamiri.—1 Korentesma 11:3; Yakobus 1:14, 15.
Adam E Arki En Wefi
Syatu baka dati, Efa ben meki Adam sondu tu. Fa wi musu fruklari a makriki fasi disi fa Adam ben du san Efa wani? (Genesis 3:6, 17) Adam ben musu sori now na suma a ben o tan loyaal. A ben o arki en Mekiman, di ben gi en ala sani, so srefi en lobi patna, Efa? Adam ben o suku a tiri fu Gado fu kon sabi san a ben musu du now? Noso a man ben o teki a bosroiti fu sondu makandra nanga en wefi? Adam ben sabi heri bun taki a sani di Efa ben howpu fu kisi te a ben o nyan a froktu, ben de wan sani di no man srefisrefi. Na apostel Paulus ben skrifi nanga yepi fu Santa yeye: „Satan no ben bedrigi Adam, ma a ben kori na uma trutru èn na uma ben sondu” (1 Timoteus 2:14). So bun, Adam ben sabi heri bun san a ben du, di a teki a bosroiti fu trangayesi Yehovah. Soleki fa a sori, dan a frede di Adam ben frede fu prati nanga en wefi ben tranga moro leki a bribi di a ben abi taki Gado ben man meki a situwâsi kon bun baka.
A sani di Adam du, ben meki taki a ben kiri ensrefi. Disi ben meki tu taki a ben kiri ala den pikin fu en di a ben man meki fu di Yehovah na wan Gado fu sari-ati. Den e dede fu di den alamala gebore nanga sondu di abi dede leki bakapisi (Romesma 5:12). Fu tru, a strafu di e kon te sma e trangayesi en te den e prakseri densrefi nomo, bigi srefisrefi!
Den Bakapisi fu Sondu
Wantewante sondu ben tyari syen kon. Na presi fu lon go taki nanga Yehovah fu di den ben e prisiri, den tu sma ben go kibri (Genesis 3:8). A matifasi fu den nanga Gado ben pori. Di Gado ben aksi den san den ben du, dan den no ben sori taki den e sari, ala di den ala tu ben sabi taki den ben pasa Gado wet. Di den ben nyan a froktu di den no ben mag nyan, den ben sori taki den no ben wani a bun-ati fu Gado.
Leki bakapisi, Gado ben taki dati Efa ben o meki pikin nanga moro pen. Efa ben o abi tranga lostu gi en masra, èn a masra ben o basi en. A pruberi di a ben pruberi fu kon tron en eigi basi ben tyari soifri kon san a no ben wani. Now Adam ben o nyan a nyanyan di a gron ben gi nanga pen. Na presi taki a ben o feni nyanyan sondro taki a ben abi fu wroko tranga na ini Eden, a ben o abi fu meki furu muiti fu kisi den sani di a ben abi fanowdu na ini a libi. Disi ben o tan so te leki a ben o drai go baka na a doti fu san a ben meki.—Genesis 3:16-19.
Te fu kaba, Gado ben yagi Adam nanga Efa komoto na a dyari fu Eden. Yehovah ben taki: „Luku, libisma tron leki wan fu wi na ini a sabi di a sabi bun nanga ogri, èn now, taki a no ben sa langa en anu èn trutru teki froktu tu fu a bon fu libi èn nyan èn libi te ten di no skotu . . . ” „Dyaso Gado no ben kaba taki ete”, na so a sabiman Gordon Wenham e taki, èn wisrefi musu taki moro fara san Gado ben abi na prakseri. Kande a ben prakseri: „Meki mi yagi den puru fu a dyari.” Moro furu a de so, taki wan Bijbel skrifiman e skrifi a heri prakseri fu Gado. Ma dyaso, na so Wenham e taki moro fara „a skrifi di den no skrifi san ben pasa moro fara, e sori o esi Gado ben handri. En mofo no ben kowru ete di a seni den komoto na a dyari” (Genesis 3:22, 23). Soleki fa a sori, dan no wan komunikâsi ben de moro na mindri Yehovah nanga den tu fosi sma.
Adam nanga Efa no dede trutru na a srefi dei dati di abi 24 yuru. Ma den dede na yeye fasi. Adam nanga Efa ben drifi komoto fu a Sma di e gi libi, èn a banti di den ben abi no ben man kon bun baka. Disi ben meki taki safrisafri den bigin go na baka, te leki den dede. Prakseri sortu kefalek sari sani ben miti den di den ben si a fosi leisi san na dede di Kain, a fosi geborewan ben kiri Abel, a di fu tu manpikin fu den!—Genesis 4:1-16.
Baka dati, wi no sabi furu moro fu a fosi libisma paar. A di fu dri manpikin fu den, Sèt, ben gebore di Adam ben abi 130 yari. Adam dede 800 yari baka dati, di a ben abi 930 yari, baka di a ben kisi „manpikin nanga umapikin”.—Genesis 4:25; 5:3-5.
Wan Sani Di Wi Kan Leri
Boiti taki a tori fu a fosi trowpaar e fruteri wi fu san ede a situwâsi fu a libisma libimakandra de so takru na ini a ten disi, a e leri wi wan prenspari sani tu. Ibri fruberde di sma abi taki den no abi Yehovah Gado fanowdu na wan kefalek don denki. Den wan di koni trutru, e sori bribi na ini Yehovah nanga en Wortu, èn den no e denki taki a sabi di densrefi abi de nofo fu frutrow na tapu. Na Yehovah e taki san bun èn san ogri èn efu wi wani du san bun, dan wi musu gi yesi na en. Ogridu wani taki dati wi e pasa den wet fu en èn taki wi no e broko wi ede nanga den gronprakseri fu en.
Gado ben gi èn e tan gi a libisma famiri ala san den ben kan wani — namku têgo libi, fri, prisiri, koloku, gosontu, vrede, gudu, èn taki den kan kon sabi nyun sani. Ma efu wi wani prisiri nanga ala den sani disi, dan wi musu erken taki wi abi wi hemel Tata, Yehovah, fanowdu trutru na ini ala sani.—Preikiman 3:10-13; Yesaya 55:6-13.
[Faki/Prenki na tapu bladzijde 26]
Adam Nanga Efa—Na Soso Wan Anansitori?
A bribi di sma e bribi taki wan fosi paradijs ben lasi gowe fu di sma sondu, ben panya na mindri Babilonsma, Asiriasma, Egiptisma nanga trawan fu owruten. Soleki fa furu tori e sori dan wan bon fu libi ben de. Den sma di ben o nyan a froktu fu en ben o kisi têgo libi. So bun, a libisma famiri e memre taki wan kefalek sari sani ben pasa na ini Eden.
Na ini a ten disi, furu sma e taki dati a Bijbel tori fu Adam nanga Efa na soso wan anansitori. Ma toku, furu sabidensiman e erken taki a libisma famiri na wán-enkri famiri nomo di komoto fu den srefi tu sma. Furu sabiman fu kerki tori no man tra fasi leki fu erken taki den bakapisi fu a fosi sondu fu wi fositata ben kon na tapu a libisma famiri. Efu den sabiman fu kerki tori e bribi taki libisma ben kon fu moro leki wan presi nomo, dan den de fruplekti fu taki dati difrenti fositata ben du a fosi sondu. A sani dati ben o fruplekti den fu taki dati a no tru taki Krestes, di de „a lasti Adam”, ben frulusu a libisma famiri. Ma Yesus nanga den disipel fu en, no ben abi fu du nanga so wan muilek problema. Den ben erken taki a tori fu Genesis na wan tru tori.—1 Korentesma 15:22, 45; Genesis 1:27; 2:24; Mateus 19:4, 5; Romesma 5:12-19.