Yu E Memre Disi Ete?
Yu warderi en fu leisi den nyun Waktitoren di kon na doro? We, luku efu yu kan gi wan piki tapu den aksi di e kon now:
• San na den moro prenspari sani di wi musu du fu lusu wan kesekese di wi abi nanga wan tra sma?
A fosi sani di wi musu du, na fu erken taki wi alamala kan kisi takru prakseri nanga fowtu fasi fu denki. Moro fara, wi musu prakseri bun efu a no de so taki wisrefi, na presi fu a tra sma, tyari a problema kon.—15/8 bladzijde 23.
• O ten „den ten te ala den sani kon bun baka” di Tori fu den Apostel 3:21 e taki fu en, sa kon?
A kon di sani ben o kon bun baka, ben o feni presi na ini tu pisi. Na fosi presi, sensi 1919 sani e meki kon bun baka, fu di wan paradijs na yeye fasi de kaba. Sani sa meki kon bun baka moro fara, te a grontapu fu wi kon tron wan trutru paradijs.—1/9, bladzijde 17, 18.
• Fa a de taki a mira no abi wan tyariman, soleki fa a sori na Odo 6:6-8, èn toku a de wan bun eksempre gi wi?
Na ini wan koloni fu mira wan koningin de, ma a de wan koningin soso fu di a e meki eksi èn fu di a de a mama fu a koloni. Mira e wroko tranga, èn wi musu du dati tu, wi musu du muiti fu du wi wroko moro bun, srefi te no wan sma e hori ai na wi tapu.—15/9, bladzijde 26.
• A profeititori fu Hulda, soleki fa a skrifi na 2 Kownu 22:20, ben soifri? A profeititori disi ben taki dati Yosia ben o dede „na ini vrede”, fu di a ben kisi takru mankeri na ini wan feti.
Iya, a dede na ini vrede, fu di a dede bifo a rampu fu 609-607 B.G.T., di den Babilonsma ben lontu èn ben pori Yerusalem.—15/9, bladzijde 30.
• Fu san ede wi kan taki dati Salomo ben prèise wan wefi di a ben kari en „wan moi dia nanga wan stonbokoboko di e plisi na ai”? (Odo 5:18, 19)
Na uma-stonbokoboko na wan tiri meti èn a abi wan moi skin. Toku, a kan tan na libi èn meki pikin na ini presi na mindri stonbergi, di de muilek fu doro, èn pe nofo nyanyan no de fu feni.—1/10, bladzijde 30, 31.
• Suma ben de Henry Grew nanga George Storrs?
Den tu man disi ben libi na ini den yari baka 1800 èn den ben de fayafaya Bijbelstudenti. Grew ben leri taki a Dri-wánfasi no de wan leri di e komoto fu Bijbel, neleki a leri di e taki dati a sili no man dede, èn nanga a leri di abi fu du nanga a helfaya. Storrs ben kon frustan taki son sma o kisi têgo libi na grontapu. Den ala tu ben kon bifo Charles Taze Russell, di bigin fu tyari a tijdschrift disi kon na doro na ini 1879.—15/10, bladzijde 26-30.
• Fa Kotoigi fu Yehovah e prakseri fu datra wroko pe den datra e gebroiki a brudu fu a siki sma srefi?
Fu di a bribi fu den komoto fu Bijbel, dati meki den no e gi den eigi brudu so taki datra kan kibri en fu gebroiki en baka ten leki brudutransfusie efu dati de fanowdu. Ibri Kresten musu bosroiti gi ensrefi fa a sa gebroiki en eigi brudu te a musu kisi wan oparâsi, te datra musu ondrosuku en, noso te datra musu dresi en na wan fasi fa den e du dati nownow. A musu poti prakseri na san Bijbel e taki fu brudu, èn a musu memre taki a gi ensrefi abra dorodoro na Gado.—15/10, bladzijde 30, 31.
• Sortu bigi fanowdu na mindri Kotoigi fu Yehovah na heri grontapu tyari kon na krin nanga yepi fu wan ondrosuku di du na a bigin fu a yari disi?
Moro leki 11.000 Kownukondre zaal de fanowdu na ini pôti kondre, pe sma no abi furu moni. Na organisâsi e gebroiki bijdrage fu Kresten fu furu kondre, fu yepi bow bun konmakandra presi na ini tra kondre.—1/11, bladzijde 30.
• San na wan tu fu den Griki wortu di skrifi na ini Bijbel di abi fu du nanga anbegi?
Wan fu den na lei·tour·giʹa, di vertaal leki „publiki diniwroko”. Wan trawan na la·treiʹa, di vertaal leki „santa diniwroko”(Hebrewsma 10:11; Lukas 2:36, 37).—11/15, bladzijde 11, 12.
• San na wan prenspari sani di wi kan leri fu a Bijbel tori fu Adam nanga Efa?
Iniwan denki di wi abi taki wi kan libi sondro a tiri fu Yehovah Gado, na trutru wan don denki.—15/11, bladzijde 24-27.
• Sortu Bijbel buweisi de taki Gado e gi den futuboi fu en krakti?
David, Habakuk, nanga na apostel Paulus, densrefi ben fruklari taki Yehovah ben tranga den, noso gi den krakti (Psalm 60:12; Habakuk 3:19; Filipisma 4:13). Fu dati ede, wi kan frutrow na tapu taki Gado wani gi wi krakti, èn a man du dati tu.—1/12, bladzijde 10, 11.