Bribi meki Barak figi wan makti legre puru
PRAKSERI taki yu de fesi nanga fesi nanga wan legre fu srudati di de fayafaya fu feti nanga yu. Den abi den moro nyun fetisani èn den de klariklari fu gebroiki den. Te yu tanapu na fesi den fetiman disi, dan yu nanga den sma di de nanga yu pikinmoro no man du notinoti.
Na a ten fu den krutuman fu Israel, Barak, Debora, nanga 10.000 Israelsma ben ondrofeni so wan sani. Den feanti legre ben de Kanansma di ben de na ondro a tiri fu a srudati komandanti Sisera. Den ben abi fetiwagi nanga srapu isri nefi na den banti di ben kan kiri sma. A presi pe a feti ben e feti, ben de a Taborbergi nanga a lagipresi fu Kison pe wan liba ben e lon. Den sani di pasa drape, e sori taki Barak na wan moi eksempre fu wan sma di abi bribi. Luku den sani di pasa, di meki taki feti broko kon.
Israel e bari kari Yehovah
A buku Krutuman e fruteri fa Israel ben e gowe libi a tru anbegi ibri tron baka èn fa den ben kisi takru bakapisi te den ben e du disi. Ibri tron te den ben aksi Gado tangitangi fu sori den sari-ati, Gado ben e gebroiki wan sma fu frulusu den, ma toku den ben e opo densrefi teige En baka. Soleki fa den ben gwenti, dan „baka di Ehud [wan krutuman di ben frulusu den fu den Moabsma di ben e kwinsi den] dede, dan den manpikin fu Israel bigin du baka san ogri na ini Yehovah ai”. Fu taki en leti, „den ben go teki nyun gado”. San ben de a bakapisi? „Yehovah seri den go na ini na anu fu Yabin, a kownu fu Kanan di ben e tiri na Hasor; èn a legre edeman fu en ben de Sisera . . . Èn den manpikin fu Israel bigin bari kari Yehovah fu di [Sisera] ben abi neigi hondro fetiwagi di abi isri nefi, èn na wan ogri-ati fasi ensrefi ben kwinsi den manpikin fu Israel, tutenti yari langa.”—Krutuman 4:1-3; 5:8.
Den Buku fu Bijbel e taki disi fu a libi na ini Israel: „[Na ini den dei dati] nowan sma ben e waka na den pasi, èn den sma di ben de na pasi e waka, ben e lontu teki tra pasi. Den sma di ben e tan na den opo presi, no ben de moro” (Krutuman 5:6, 7). Sma ben e frede den ogri-ati fufuruman di ben e rei asiwagi. „Heri Israel ben e frede”, na so wan sabiman e taki, „a gersi leki ala sma drape ben lan èn no ben man yepi densrefi.” Sobun, den Israelsma di ben lasi-ati, du soleki fa den ben gwenti fu du furu leisi kaba; den bari kari Yehovah fu yepi den.
Yehovah e poti wan fesiman
A heri kondre Israel ben kon de na ini bigi bruya fu di den Kanansma ben e kwinsi den. Gado ben gebroiki na uma-profeiti Debora fu krutu den èn fu fruteri den san den ben musu du. Na so Yehovah ben gi en a grani fu handri neleki wan mama na ini Israel.—Krutuman 4:4; 5:7.
Debora seni kari Barak èn a taigi en: „Yehovah, a Gado fu Israel no gi yu wan komando? ’Go, èn yu musu panya yusrefi na a Taborbergi, èn yu musu teki nanga yu tin dusun man fu den manpikin fu Naftali èn fu den manpikin fu Seibulon. Èn fu tru, na a lagipresi fu Kison pe a liba de, mi sa tyari Sisera, a legre edeman fu Yabin, nanga en fetiwagi nanga en legre kon gi yu, èn a no abi misi taki mi sa gi en na ini yu anu’” (Krutuman 4:6, 7). Nanga den wortu, ’Yehovah no gi yu wan komando?’, Debora ben e sori krinkrin taki a no ben wani du leki en na Barak basi, noso taki en na a sma di taigi Barak san fu du. A ben de a sma nomo di Gado ben gebroiki fu gi komando. Fa Barak teki a sani disi?
„Efu yu o go nanga mi”, na so Barak taki, „dan seiker mi sa go tu; ma efu yu no o go nanga mi, dan mi no sa go tu” (Krutuman 4:8). Fu san ede Barak ben e draidrai fu teki a frantwortu di Gado ben gi en? A ben e frede? A no ben e bribi san Gado pramisi en? Nôno. Barak no ben weigri fu du san Yehovah taigi en, èn a no ben e trangayesi En tu. Na presi fu dati, a fasi fa a ben handri e sori taki a ben e tweifri efu en wawan ben o man du san Gado ben taigi en. Efu a takiman fu Gado ben de drape nanga en, dan a ben de seiker taki Gado ben o tiri en, èn en nanga den man fu en ben o kisi deki-ati. Fu dati ede, a sani di Barak ben taki no e sori taki a ben e frede, ma a e sori taki a ben abi wan tranga bribi.
A fasi fa Barak ben handri, na a srefi fasi fa Moses, Gideon nanga Yeremia ben handri. Den man disi sosrefi, no ben de seiker efu den ben o man du a wroko di Gado ben gi den. Ma toku, Gado no ben si den leki sma di no ben de getrow (Exodus 3:11–4:17; 33:12-17; Krutuman 6:11-22, 36-40; Yeremia 1:4-10). Èn san wi kan taki fu a fasi fa Debora tyari ensrefi? A no ben pruberi fu teki a makti fu Barak abra. Na presi fu dati, a tan dini Yehovah nanga sakafasi. „Seiker mi sa go nanga yu”, na so a taigi Barak (Krutuman 4:9). A ben de klariklari fu gowe libi en oso, wan presi pe a ben kan feni kibri, èn a go nanga Barak na a feti di ben de fu kon. Debora sosrefi, na wan moi eksempre fu wan sma di abi bribi nanga deki-ati.
Bribi meki den e waka baka Barak
A presi pe den srudati fu a legre fu Israel bosroiti fu kon makandra, ben de wan prenspari bergi di ben nen Tabor. A ben de wan bun bosroiti. A bergi ben de wan heri bun presi pe den lo fu Naftali nanga Seibulon ben kan miti makandra fu di den lo disi ben e libi na ini a birti dati. Sobun, leki fa Gado ben gi a komando, dan tin dusun man di ben de klariklari fu go feti, nanga Debora waka baka Barak go na tapu a bergi disi.
Den wan di ben go nanga Barak ben musu abi bribi trutru. Yehovah ben pramisi Barak taki a ben o wini a feti teige den Kanansma. Ma sortu fetisani den Israelsma ben abi? Krutuman 5:8 e taki: „Wan skelt no ben de fu si, èn wan lansri sosrefi, no ben de fu si na mindri den fotenti dusun sma na ini Israel.” Sobun, den Israelsma no ben abi furu fetisani. Èn awinsi den ben abi lansri nanga skelt, toku den no ben o man wini den fetiwagi di abi isri nefi. Di Sisera yere taki Barak kren a Taborbergi, dan wantewante a gi a komando taki a legre nanga ala fetiwagi fu en musu go na a lagipresi fu Kison pe wan liba e lon (Krutuman 4:12, 13). Ma san Sisera no ben e frustan, na taki a ben o go feti nanga na Almakti Gado.
Barak e figi a legre fu Sisera puru
Di den ben de fu feti, Debora taigi Barak: „Opo, bika a no abi misi taki tide na a dei di Yehovah sa gi yu Sisera na ini yu anu. A no Yehovah ben go na yu fesi?” Barak nanga den man fu en ben musu saka a Taborbergi go na a lagipresi, ma dati ben wani taki dati a ben o moro makriki gi Sisera fu feti nanga en fetiwagi. Fa yu ben o firi efu yu ben de na ini a legre fu Barak? Yu ben o de klariklari fu gi yesi fu di yu sabi taki na Yehovah ben gi a komando dati? Barak nanga den tin dusun man fu en gi yesi. „Ne Yehovah bigin bruya Sisera nanga ala en fetiwagi nanga a heri kampu, nanga a srapusei fu a feti-owru, leti fesi Barak.”—Krutuman 4:14, 15.
Nanga a yepi fu Yehovah, Barak figi a legre fu Sisera puru. A tori fu a feti no e taki finifini fa ala sani ben waka. Ma wan pisi fu a singi di Barak nanga Debora ben singi baka di den wini a feti, e taki dati ’den hemel nanga den wolku ben e dropu watra’. Soleki fa a sori, dan wan bigi alen meki den fetiwagi fu Sisera fasi na ini a tokotoko, èn na so Barak ben man feti a feti moro bun. A moro prenspari fetisani fu den Kanansma no ben man wroko moro. A singi e taki fu den dedeskin fu den man fu Sisera: „A Kisonliba wasi den gowe.”—Krutuman 5:4, 21.
Disi na wan tru tori? Den presi leki a lagipresi fu Kison, sma e kari wan wadi; dati na wan presi pe nofo tron pikinso watra nomo e lon. Ma baka te bigi alen kon, noso baka te alen kon fu wan langa pisi ten, dan a pikinso watra dati kan tron bigi liba di e lon esi-esi èn sma kan lasi den libi efu den de drape. Soleki fa sma fruteri, dan na a ten fu a Fosi Grontapufeti wan tra legre ben abi muiti fu feti na a srefi presi tu fu di alen ben fadon soso 15 miniti tapu a kleidoti drape. Den tori fu a feti di Napoleon ben feti nanga den Torku tapu 16 april 1799, e sori taki „furu Torku ben lasi libi di den ben e suku fu lowe pasa na wan pisi fu a lagipresi pe a Kisonliba ben e lon”.
A Dyu historia skrifiman Flavius Josephus e taki dati di den legre fu Sisera nanga Barak ben de fu miti densrefi, dan „wan bigi alen saka kon fu hemel, nanga furu alen nanga pisipisi ijs, èn wan bigi winti ben e wai na alen na ini a fesi fu den Kanansma; den no ben man si moro, èn den no ben man gebroiki den peiri nanga den slenger fu den”.
„Komoto fu hemel, den stari ben e feti”, na so Krutuman 5:20 e taki, „komoto fu a presi fu den, den ben e feti teige Sisera.” Fa den stari ben e feti teige Sisera? Son sma e taki dati disi e sori taki Barak ben e kisi yepi fu Gado. Trawan e taki dati na engel ben e yepi den, noso taki bigi ston ben e fadon komoto fu hemel, noso taki den lukuman fu Sisera di ben e luku stari ben taki sani di no kon tru. Fu di Bijbel no e fruteri fa den stari ben e feti na ini a feti disi, meki a fiti fu taki dati a feti di den stari ben e feti e sori taki Gado ben e yepi a legre fu Israel. Ma awinsi fa no fa, den Israelsma ben man gebroiki a yepi dati heri bun. „Barak lon baka den fetiwagi . . . èn a kiri a heri kampu fu Sisera nanga a srapusei fu a feti-owru. Nowan fu den ben tan na libi” (Krutuman 4:16). San ben pasa nanga a legre edeman Sisera?
A man di ben e kwinsi den e fadon „na ini na anu fu wan uma”
„Ma Sisera”, na so Bijbel e taki, „[ben gowe libi a feti èn a] ben lowe nanga futu go na a tenti fu Yael, a wefi fu a Kenietsma Heber, bika vrede ben de na mindri Yabin, a kownu fu Hasor, nanga na osofamiri fu Heber, a Kenietsma.” Yael kari Sisera, di ben weri srefisrefi, fu kon na ini a tenti fu en. A gi en merki fu dringi, èn a tapu en nanga wan krosi, so taki a ben fadon na sribi. Baka dati, Yael „teki wan pen fu a tenti nanga wan amra na ini en anu”. Sma di ben e libi na ini tenti ben e gebroiki den sani disi doronomo. „Ne a waka safrisafri go na en èn a naki a pen na ini en sei-ede teleki a pasa go na ini a gron, bika [Sisera] ben e sribi dipi fu di a ben weri. Na so a dede.”—Krutuman 4:17-21.
Baka dati, Yael go na doro fu miti Barak èn a taigi en: „Kon, èn mi sa sori yu a man di yu e suku.” A tori e taki moro fara: „Sobun, a go na en, èn luku! Sisera didon drape dededede nanga a pen na ini en sei-ede.” Na ondrofeni dati musu fu ben tranga a bribi fu Barak! Wan ten na fesi, na uma-profeiti Debora ben taigi en: „Yu no sa kisi bigi nen, tapu a pasi di yu teki, bika Yehovah sa gi Sisera na ini na anu fu wan uma.”—Krutuman 4:9, 22.
Yael ben tori Sisera? Yehovah no ben e si en na a fasi dati. „Na mindri den uma na ini a tenti, na en sa kisi moro furu blesi”, na so a singi fu Barak nanga Debora e taki. A singi dati e sori a yoisti fasi fa wi musu si a dede fu Sisera. Bijbel e taki dati a mama fu Sisera ben e wakti fayafaya o ten a o drai kon baka fu a feti. „Fu san ede a fetiwagi fu en no kon ete?”, na so a e aksi. „Den koniwan fu den heihei uma” e du muiti fu meki en firi korostu fu di den e taigi en taki a musu prati den sani di den fufuru baka a feti, namku krosi pe den nai moimoi sani na tapu, nanga uma gi den man. Den heihei uma e aksi: „Den no musu . . . prati den gudu dan, wan muru, tu muru [na so srudati ben e kari den uma di den ben fufuru tyari gowe] gi ibri tranga man, krosi nanga moi kloru di den teki gi Sisera . . . Wan krosi pe den nai moimoi sani na tapu, krosi nanga moi kloru, tu krosi pe den nai moimoi sani na tapu, gi a neki fu den man di teki den gudu?”—Krutuman 5:24, 28-30.
San wi e leri
A tori fu Barak e leri wi wan tu prenspari sani. Iniwan sma di no wani Yehovah na ini en libi, seiker sa bruya èn sa kisi problema. Den wan di abi berow, di e suku Gado, èn di e sori bribi na ini en, kan kon fri fu iniwan sortu kwinsi di den e ondrofeni. Èn wi musu du muiti tu fu tan gi yesi na Gado, a no so? Awinsi Gado e taigi wi wan sani di wi leki libisma denki taki wi no man du, toku wi kan abi a dyaranti taki wi sa kisi wini te wi e du san a taki (Yesaya 48:17, 18). Na soso fu di Barak ben e bribi na ini Yehovah èn fu di a ben du san Yehovah taigi en, meki a ben man ’figi den legre fu dorosei sma puru’.—Hebrewsma 11:32-34.
A singi fu Barak nanga Debora e kaba heri moi: „Meki ala yu feanti kisi pori, o Yehovah, èn meki den wan di lobi yu de neleki te a son e kon na ini ala en glori” (Krutuman 5:31). Na so a sa de tu te Yehovah o tyari wan kaba kon na a ogri grontapu fu Satan!
[Prenki na tapu bladzijde 29]
Yehovah ben gebroiki Debora fu gi Barak wan komando
[Prenki na tapu bladzijde 31]
A watra fu a Kisonliba e pasa a syoro
[Sma di abi a reti fu a prenki]
Pictorial Archive (Near Eastern History) Est.
[Prenki na tapu bladzijde 31]
A Taborbergi