Sabidensi nanga Bijbel​—Den de kontrari fu makandra trutru?

DEN sani di meki taki te fu kaba Galilei kon na ini wan strei nanga a Lomsu Kerki, ben de kaba langa ten bifo Copernicus nanga Galilei gebore. A denki taki grontapu de na mindrisei fu a stari sistema fu wi, ben bigin na den Grikisma fu owruten, èn den man di panya a denki disi na ala sei, ben de a filosofiaman Aristoteles (di libi fu 384 b.G.T. te go miti 322 b.G.T.) nanga na astronomiaman Ptolomeus di ben de wan astrologiaman sosrefi (a ben e libi na ini a di fu tu yarihondro G.T.).a

Aristoteles ben denki taki grontapu de na mindrisei fu a hemel, fu di a ben e teki den leri fu Pythagoras abra, wan Griki filosofiaman èn sabiman fu wiskunde (a ben e libi na ini a di fu siksi yarihondro b.G.T.). Fu di Aristoteles ben teki a denki fu Pythagoras, meki a ben e bribi taki hemel meki fu difrenti sani di lontu leki wan bal èn di de na ini makandra, neleki den difrenti pisi fu wan ayun. A ben e bribi taki ibriwan fu den bal disi ben meki fu kristal èn taki grontapu ben de na mindrisei. Den stari ben e drai lontu èn a krakti di ben e meki den drai lontu ben e komoto fu a moro bigi wan fu den bal disi, pe wan kefalek bigi krakti de neleki a di fu Gado. Aristoteles ben e bribi tu taki a son nanga den planeiti na sani di no ben abi nowan fowtu èn di no man kenki noiti.

A kefalek denki disi fu Aristoteles ben abi fu du nanga filosofia; a no ben abi noti fu du nanga sabidensi. A ben feni en wan don sani fu bribi taki grontapu e buweigi. A ben weigri fu bribi tu taki grontapu nanga den planeiti de na ini wan kefalek bigi opo presi, fu di a ben e denki taki efu dati ben de so, dan den planeiti ben o tuka nanga makandra son leisi èn te fu kaba den ben o tapu fu drai efu nowan sani ben e gi den krakti fu tan drai lontu. Den sani di sabidensiman ben sabi na a ten dati, ben meki a gersi leki Aristoteles abi leti, èn sma ben tan bribi a sani disi sowan 2000 yari langa. Srefi na ini a di fu 16 yarihondro, a Fransi filosofiaman Jean Bodin ben teki a pôpi denki disi abra, bika a taki dati ’nowan sma di de nanga en bunbun frustan, noso di sabi natuurkunde pikinso, o denki oiti taki so wan bigi èn hebi sani leki grontapu, di no man skoifi noiti, e degedege èn e drai lontu en eigi as èn lontu a son; bika a dei di grontapu ben o seki pikinso nomo, wi ben o si someni bigi foto, fortresi, nanga bergi e broko fadon.’

A kerki e teki a denki fu Aristoteles abra

Wan tra sani di meki taki wan strei kon de na mindri Galilei nanga a kerki, na wan sani di pasa na ini a di fu 13 yarihondro èn a ben abi fu du nanga wan heihei man fu a Lomsu Kerki, namku Thomas van Aquino (di libi fu 1225 te go miti 1274). Aquino ben abi bigi lespeki gi Aristoteles èn a ben kari en A Gran Filosofiaman. Feifi yari langa Aquino meki muiti fu moksi a filosofia fu Aristoteles nanga den leri fu Lomsu Kerki. Wade Rowland e taki na ini en buku Galileo’s Mistake (A fowtu di Galilei meki) taki na ini a ten fu Galilei „a denki fu Aristoteles di Aquino ben moksi nanga kerkileri, ben tron wan fu den moro prenspari leri fu a Kerki fu Rome”. Hori na prakseri tu taki na ini a ten dati, wan tu sabiman nomo ben de. Moro furu na kerki ben e gi sma skoroleri. Nofo tron den sma di ben abi makti na ini kerki, ben de den srefi sma di ben e gi leri fu sabidensi.

Disi na wan tu fu den prenspari sani di ben meki taki wan strei kon na mindri a kerki nanga Galilei. Srefi bifo Galilei bigin poti prakseri na astronomia, a ben skrifi kaba fu a fasi fa sani e buweigi. Den sani di a ben skrifi ben e sori taki a e tweifri na furu sani di Aristoteles ben taki. Ma na fu di Galilei tan horibaka gi a denki taki a son de na mindrisei fu a stari sistema èn taki a denki disi e kruderi nanga san Bijbel e taki, meki a ben musu go na fesi a Krutubangi na ini 1633.

Di Galilei kisi na okasi fu opo taki gi ensrefi, dan a sori krin taki a e bribi trutru taki Bijbel na a Wortu fu Gado di a meki sma skrifi. A ben sori tu taki den Buku fu Bijbel ben skrifi na so wan fasi taki ala sma man frustan den, èn taki a no abi fu de so trutru, taki a son e buweigi, awinsi son bijbeltekst e meki sma prakseri taki a son buweigi. Ma na fu soso Galilei ben taki disi. Fu di a ben weigri fu bribi na ini a fasi fa sma ben moksi den leri fu Bijbel nanga Griki filosofia, meki den strafu en! A ben de na ini 1992 fosi, taki a Lomsu Kerki meki bekènti taki den ben fowtu di den krutu Galilei.

San wi kan leri fu disi

San wi kan leri fu den sani disi? Wan sani, na taki Galilei no ben e tweifri na Bijbel. Na presi fu dati, a ben e tweifri na san a kerki ben e leri sma. Wan skrifiman fu kerki afersi ben skrifi: „Soleki fa a sori, dan a sani di wi kan leri fu Galilei, a no taki a Kerki ben tan hori steifi na den tru tori fu Bijbel, ma na presi fu dati, a Kerki no ben e broko en ede nofo nanga dati.” A kerki gi pasi taki den leri fu den di abi fu du nanga Gado, kon moksi nanga Griki filosofia, èn na so den go hori densrefi na gwenti fu sma, na presi fu du san Bijbel e leri.

Ala den sani disi e meki wi prakseri a warskow fu Bijbel: „Luku bun! Kande wan sma de, di sa kisi unu fu tyari unu gowe nanga yepi fu filosofia nanga soso bedrigifasi, akruderi den gwenti fu libisma, akruderi den fondamenti sani fu grontapu èn no akruderi Krestes.”​—Kolosesma 2:8.

Srefi na ini a ten disi, furu sma na ini Krestenhèit e tan hori densrefi na difrenti denki nanga filosofia di de teige Bijbel. Wan eksempre fu disi na a evolutieleri fu Darwin, di furu sma e bribi, na presi fu bribi den tori di skrifi na ini a Bijbel buku Genesis, namku taki na wan sma meki ala sani. Te yu luku en bun, dan fu di den kerki teki a denki fu Darwin abra, na presi fu san Bijbel e taki, meki Darwin kon tron wan sortu disiten Aristoteles èn na evolutieleri kon tron wan fu den moro prenspari kerkileri.b

Den tru tori di sabidensi tyari kon na krin e kruderi nanga Bijbel

Den sani di wi luku didyonsro, no musu meki taki wi no wani sabi noti fu sabidensi. Iya, Bijbel srefi e taigi wi fu ondrosuku den sani di Gado meki èn fu si den moi fasi fu Gado na ini den sani di a meki (Yesaya 40:26; Romesma 1:20). A no de fu taki dati Bijbel no ben skrifi fu leri sma sabidensi. Na presi fu dati, a e tyari kon na krin san na den markitiki fu Gado. A e sori wi sosrefi sortu tra fasi Gado abi, fasi di wi no man si te wi e luku den sani nomo di a meki; Bijbel e sori wi tu san Gado abi na prakseri gi libisma (Psalm 19:7-11; 2 Timoteyus 3:16). Ma te Bijbel e taki fu wan fu den sani na ini a naturu, dan ibri tron baka a e taki soifri fa a sani dati de. Galilei srefi ben taki: „Den Santa Buku èn a naturu sosrefi, na sani di Gado meki . . . A no kan taki tu tru tori de di no e kruderi nanga makandra.” Luku den eksempre di e kon now.

Wan sani di de moro prenspari leki a fasi fa stari nanga planeiti e buweigi, na taki ala sani na hemel èn na grontapu e wroko akruderi wet, soleki a wet fu zwaartekracht di e hari ala sani kon na gron. A fosi pisi tori di sma sabi dati e taki fu den wet disi èn di no skrifi na ini Bijbel, na a tori di Pythagoras ben skrifi, pe a sori taki yu kan gebroiki nomru fu bereken a fasi fa ala sani e buweigi na hemel èn na grontapu. Tu dusun yari baka dati, Galilei, Kepler, nanga Newton sori te fu kaba taki ala sani na hemel èn na grontapu e wroko nanga wet di yu kan fruklari.

A fosi sani di skrifi na ini Bijbel fu den wet fu a naturu, de fu feni na ini a buku Yob. Na a ten fu 1600 b.G.T., Gado ben aksi Yob: „Yu kon sabi den wet fu hemel?” (Yob 38:33) A buku Yeremia, di skrifi na ini a di fu seibi yarihondro b.G.T., e taki dati Yehovah na a Mekiman fu „den wet fu a munkenki nanga den stari” èn „den wet fu hemel nanga grontapu” (Yeremia 31:35; 33:25). G. Rawlinson, wan man di e fruklari sani fu Bijbel, e taki fu den tekst disi: „A de krin fu si taki den sani na grontapu e wroko nanga wet. Disi na wan sani di den Bijbel skrifiman, nanga a disiten sabidensi sori krin.”

Den sani di skrifi na ini a Bijbel buku Yob, ben skrifi pikinmoro wán dusun yari bifo Pythagoras kon nanga a denki taki grontapu nanga hemel e wroko nanga wet. Hori na prakseri taki Bijbel no skrifi nomo fu fruteri wi fu den wet fu hemel nanga grontapu, ma a skrifi fu leri wi taki Yehovah na a Mekiman fu ala sani, iya, en na a sma di man meki ala den wet fu hemel nanga grontapu.​—Yob 38:4, 12; 42:1, 2.

Wan tra eksempre di wi kan luku, na a fasi fa watra e drai kon ibri tron baka na grontapu. Fu taki en syatu, a watra fu a se e tron dampu di e go na loktu, pe a e kon tron wolku. Baka wan pisi ten a e fadon kon na grontapu baka leki alen noso snew, èn te fu kaba a e drai go baka na a se. A moro owru pisi tori di e taki fu a sani disi èn di no skrifi na ini Bijbel, ben skrifi na ini a di fu fo yarihondro b.G.T. Ma someni hondrohondro yari na fesi, Bijbel ben taki fu disi kaba. Fu eksempre, na ini a di fu 11 yarihondro b.G.T., Kownu Salomo fu Israel ben skrifi: „Ala dem liba lon go na ini da zee; tokoe da zee no de kom foeroe; pe dem liba de lon komopo, na drape dem lon go baka.”​—Preikiman 1:7, Da Bijbel na ini Sranantongo.

Na so a ben de tu na a pisi ten fu 800 b.G.T., taki a profeiti Amos, di ben de wan sakafasi skapuman èn wan gronman, ben skrifi taki Yehovah na „a Sma di e kari den watra fu a se, so taki a kan kanti den trowe na tapu a doti fu grontapu” (Amos 5:8). Na wan fasi di makriki fu frustan, Salomo, èn Amos sosrefi ben skrifi finifini fa watra e drai kon ibri tron baka na grontapu, aladi den ben skrifi en pikinso difrenti fu makandra.

Bijbel e taki sosrefi dati Gado e „anga grontapu na noti” (Yob 26:7). Te wi e hori na prakseri taki na ini 1600 b.G.T. sma no ben sabi so furu ete fu den sani di de na loktu, dan na soso wan bun koni sma ben o man frustan taki so wan hebi sani leki grontapu man anga sondro taki wan sani e hori en. Soleki fa wi ben taki na fesi kaba, dan Aristoteles srefi no ben wani bribi taki den planeiti de na ini wan kefalek bigi opo presi, aladi en ben libi moro leki 1200 yari baka di a tekst disi skrifi!

Yu no feni en wan kefalek sani taki Bijbel ben taki soifri fu den sortu sani disi, aladi sma di ben e libi na ini Bijbel ten ben e bribi wan lo falsi sani di den ben e si leki tru tori? Gi sma di e denki dipi fu sani, disi na ete wan buweisi taki na Gado meki sma skrifi Bijbel. Fu dati ede, a de wan koni sani te wi no e meki nowan leri noso denki di de teige a Wortu fu Gado, abi krakti na wi tapu. Soleki fa a historia fu libisma sori ibri tron baka, dan den denki fu libisma, srefi den denki fu sabiman di kisi hei skoroleri, e kenki doronomo, ma „san Yehovah taki e tan fu têgo”.​—1 Petrus 1:25.

[Futuwortu]

[Faki/​Prenki na tapu bladzijde 6]

A fasi fa den Protestantsma ben e si a tori

Den fesiman fu a Reformatie fu den Protestantsma ben de teige a denki tu taki a son de na mindrisei fu a stari sistema fu wi. Wan tu fu den fesiman disi ben de Maarten Luther (di libi fu 1483 te go miti 1546), Philipp Melanchthon (di libi fu 1497 te go miti 1560), nanga Johannes Calvijn (di libi fu 1509 te go miti 1564). Luther ben taki fu Copernicus: „A lawman disi wani kenki ala sani na ini a sabidensi di abi fu du nanga astronomia.”

Den fesiman fu den Protestantsma ben de teige a denki fu Copernicus fu di den ben e teki son Bijbel tori soifri leki fa den skrifi, soleki a tori na ini Yosua kapitel 10, pe skrifi taki a son nanga a mun „tan tanapu sondro fu buweigi”.c Fu san ede den Protestantsma ben e hori nomo taki den ben abi leti? A buku Galileo’s Mistake (A fowtu di Galilei meki) e sori taki den Protestantsma ben man komoto ondro a makti fu a Lomsu Kerki, ma toku den no ben man poti den prenspari leri fu Aristoteles nanga Thomas van Aquino na wan sei, fu di den „Lomsu nanga den Protestantsma ben tan hori densrefi na den leri” fu den man disi.

[Futuwortu]

[Prenki na tapu bladzijde 6]

Luther

Calvijn

[Sma di abi a reti fu a prenki]

From the book Servetus and Calvin, 1877

[Prenki na tapu bladzijde 4]

Aristoteles

[Sma di abi a reti fu a prenki]

From the book A General History for Colleges and High Schools, 1900

[Prenki na tapu bladzijde 5]

Thomas van Aquino

[Sma di abi a reti fu a prenki]

From the book Encyclopedia of Religious Knowledge, 1855

[Prenki na tapu bladzijde 6]

Isaac Newton

[Prenki na tapu bladzijde 7]

Moro leki 3000 yari pasa, Bijbel ben taki kaba fa watra e drai kon ibri tron baka