Wi kisi kibri, no wawan fu di wi du bun wroko, ma fu di Gado sori wi no-frudini bun-ati
„Unu kisi frulusu bika unu ben abi bribi . . . A no fu di unu ben wroko gi dati; fu dati ede nowan sma sa man meki bigi.”—EFEISESMA 2:8, 9.
1. Fa Kresten e difrenti fu tra sma te a abi fu du nanga den sani di den du, èn fu san ede dati de so?
SMA na ini a ten disi e breiti srefisrefi te den du prenspari sani, èn furu tron den lobi fu meki bigi fu den sani dati. Ma Kresten de tra fasi. Den no e meki bigi fu den sani di den e du, srefi te den sani dati abi fu du nanga a tru anbegi. Aladi den e prisiri nanga den sani di a pipel fu Yehovah e du leki wan grupu, toku den no e meki bigi fu den sani di ibriwan fu den aparti du. Den sabi taki te wan sma e du a diniwroko fu Yehovah, dan a musu du dati nanga a yoisti denki, bika dati de moro prenspari leki den sani di wi e du. Iniwan sma di sa kisi a presenti fu têgo libi te fu kaba, no sa kisi dati fu di a du spesrutu sani, ma fu di a abi bribi èn fu di Gado sori en no-frudini bun-ati.—Lukas 17:10; Yohanes 3:16.
2, 3. Fu san Paulus ben meki bigi, èn fu san ede a ben du dati?
2 Na apostel Paulus ben sabi disi heri bun. Baka di a begi Gado dri leisi fu puru ’wan maka na ini en skin’, dan disi na san Yehovah piki en: „A no-frudini bun-ati fu mi nofo gi yu; bika a krakti fu mi e kon volmaakti te yu swaki.” Nanga sakafasi Paulus lespeki a bosroiti fu Yehovah, èn a taki: „Fu dati ede, nanga trutru prisiri mi sa meki bigi, spesrutu te a abi fu du nanga den swakifasi fu mi, so taki a krakti fu Krestes kan tan leki wan tenti na mi tapu.” Wi musu du muiti fu abi a srefi sakafasi di Paulus ben abi.—2 Korentesma 12:7-9.
3 Paulus ben du bun furu Kresten wroko, ma toku a ben sabi taki a no fu di a ben abi spesrutu koni, meki a ben man du den sani dati. Nanga sakafasi a ben taki: „Gado sori mi a no-frudini bun-ati disi, mi di de a moro pikinwan fu ala den santawan, so taki mi kan fruteri den trakondre sma a bun nyunsu di abi fu du nanga a kefalek bigi gudu fu Krestes” (Efeisesma 3:8). Den wortu disi e sori taki Paulus no ben e meki bigi, èn a no ben e denki taki a bun moro trawan. „Gado no lobi sma di abi heimemre, ma a e sori no-frudini bun-ati na sma di abi sakafasi” (Yakobus 4:6; 1 Petrus 5:5). Wi de leki Paulus? Wi e sori nanga sakafasi taki wi e si wisrefi leki sma di de moro mendri leki a moro pikinwan fu den brada fu wi?
’Si trawan moro hei leki wisrefi’
4. Fu san ede wi kan abi muiti son leisi fu si trawan hei moro wi?
4 Na apostel Paulus ben gi Kresten a rai disi: „No strei nanga makandra èn no prakseri tumusi furu fu unsrefi, ma nanga sakafasi un musu si trawan moro hei leki unsrefi” (Filipisma 2:3). A sani disi kan de wan muilek sani, spesrutu te wi de sma di abi bigi frantwortu. Kande a muilek gi wi fu sori sakafasi fu di furu sma na ini a grontapu fu tide lobi fu strei nanga makandra, èn a kan taki a denki disi bigin abi krakti na wi tapu. A kan taki di wi ben pikin, sma leri wi fu strei nanga trawan, kande nanga wi brada nanga sisa na oso, noso nanga den pikin na skoro. Kande sma gi wi deki-ati doronomo fu feti gi a grani fu de a moro bun sportman na skoro, noso a moro bun studenti. A no de fu taki, dati te wi e du ala san wi man fu du wan bun wroko, dan dati de fu prèise. Ma te Kresten e du bun wroko, dan den no e du dati fu sma prèise den, ma den e du dati fu kisi wini dorodoro fu a wroko, èn kande fu meki trawan srefi kisi wini fu dati tu. Ma te wi wani taki trawan prèise wi ala ten leki a moro bunwan, dan dati kan tyari problema kon. Fa so?
5. Efu wan sma di lobi fu strei nanga trawan no e luku bun, dan san kan pasa?
5 Efu wan sma di lobi strei nanga trawan, noso di e denki tumusi furu fu ensrefi no e luku bun, dan a kan tron wan sma di no e sori lespeki gi trawan, èn a kan kisi heimemre. A kan taki a e bigin dyarusu tapu den koni nanga den grani di trawan abi. Odo 28:22 e taki: „Wan man di abi bigi-ai e feti fu kisi warti sani, ma a no sabi taki pina srefi sa miti en.” Kande a sma dati e prefuru fu suku grani di a no abi reti na tapu. Fu sori taki a abi leti fu handri na so wan fasi, dan a kan taki a e bigin krutukrutu, èn a kan bigin suku fowtu na trawan. Disi na sani di wan Kresten musu wai pasi gi (Yakobus 3:14-16). Awansi fa a no fa, a sma disi musu luku bun, bika a kan tron wan sma di e denki soso ensrefi nomo.
6. Fa Bijbel e warskow sma taki den no musu lobi fu strei nanga trawan?
6 Fu dati ede, Bijbel e gi Kresten a deki-ati disi: „No meki wi tron sma di e meki bigi fu di wi e denki tumusi furu fu wisrefi, noso sma di lobi strei nanga makandra, èn di e dyarusu tapu makandra” (Galasiasma 5:26). Na apostel Yohanes ben taki fu wan Kresten brada di ben bigin tyari ensrefi krinkrin na a fasi dati. „Mi ben skrifi wan tu sani gi a gemeente”, na so Yohanes ben taki, „ma Diotrefes di lobi fu teki a fosi presi na den mindri, no e teki noti fu wi nanga lespeki. Dati meki te mi kon, mi sa taki fu den sani di a e tan du, namku taki a e waka e taki wan lo ogri fu wi.” A no bun srefisrefi taki wan Kresten e tyari ensrefi na a fasi disi!—3 Yohanes 9, 10.
7. Sortu sani wan Kresten musu wai pasi gi na ini a ten disi te a abi wan grontapuwroko pe sma lobi fu strei nanga makandra?
7 A no de fu taki, dati wi no kan fruwakti taki wan Kresten sa man wai pasi ala ten gi iniwan sortu strei. Fu gi wan eksempre, na ini a grontapuwroko fu en, a kan de so taki a sa musu strei nanga tra sma, noso nanga tra bisnis di e meki den srefi sani di a e meki, noso di e du a srefi wroko di a e du. Ma srefi te dati de so, dan wan Kresten musu du a bisnis fu en na wan lespeki fasi, nanga lobi, èn a musu hori trawan na prakseri. A no sa du sani di no e kruderi nanga a wet, èn a no sa handri na wan fasi di no fiti wan Kresten. Boiti dati, a sa luku bun fu no tron wan sma di trawan sabi moro furu leki wan sma di lobi strei nanga trawan, èn di e suku soso en eigi wini. A no sa abi a denki taki a moro prenspari sani na ini a libi, na fu de nomru wán na ini ala san a e du. Iya, efu wan Kresten musu luku bun fa a e tyari ensrefi na ini a grontapuwroko fu en, dan a de moro prenspari srefi taki a e luku bun fa a e tyari ensrefi na ini a tru anbegi!
„No fu di a e teki ensrefi gersi nanga tra sma”
8, 9. (a) Fu san ede Kresten owruman no abi fu strei nanga makandra? (b) Fu san ede 1 Petrus 4:10 abi fu du nanga ala den futuboi fu Gado?
8 A denki di Kresten musu abi na ini na anbegi fu den e kon na krin na ini den wortu disi di skrifi nanga yepi fu santa yeye: „Meki ibri sma ondrosuku san na den sani di a e du, dan dati sa meki taki a e prisiri nanga san ensrefi e du, èn no fu di a e teki ensrefi gersi nanga tra sma” (Galasiasma 6:4). Den owruman na ini a gemeente sabi taki den no musu strei nanga makandra, èn fu dati ede den e yepi makandra èn den e wroko bun nanga makandra leki wán skin. Den e prisiri nanga a yepi di ibriwan fu den kan gi fu meki sani waka bun nanga a gemeente. Na so fasi den no e strei nanga makandra, fu di dati kan tyari problema kon. Èn fu di den de na ini wánfasi, meki den de wan bun eksempre gi den tra sma na ini a gemeente.
9 A kan taki son owruman man du wan tu sani moro bun leki trawan fu di den moro yongu, fu di den abi moro ondrofeni, noso fu di den abi a koni fu du spesrutu sani, noso a kan taki den abi moro koni fu man si sani krin. Dati meki owruman abi difrenti frantwortu na ini Yehovah en organisâsi. Na presi taki den e teki densrefi gersi nanga makandra, den e hori a rai disi na prakseri: „Ibriwan fu unu di kisi wan presenti, musu gebroiki dati fu dini makandra leki bun futuboi fu a no-frudini bun-ati di Gado sori unu na difrenti fasi” (1 Petrus 4:10). Fu taki en leti, a bijbeltekst disi abi fu du nanga ala den futuboi fu Yehovah, bika na wan noso tra fasi, den alamala kisi a presenti fu soifri sabi, èn den alamala abi a grani fu teki prati na a Kresten diniwroko.
10. O ten nomo Yehovah sa feni a santa diniwroko fu wi bun?
10 Yehovah e feni a santa diniwroko fu wi bun, soso te wi e du a wroko dati nanga lobi èn nanga wi heri ati, èn no fu di wi wani du leki wi hei moro trawan. Fu dati ede a de prenspari taki wi abi a yoisti denki fu a wroko di wi e du fu horibaka gi a tru anbegi. A tru taki nowan sma kan sabi soifri fu san ede wan trawan e du sani, ma Yehovah „e tesi den ati” (Odo 24:12; 1 Samuel 16:7). Sobun, a bun te wi e aksi wisrefi ten na ten: ’Fu san ede mi e teki prati na a diniwroko fu Yehovah?’—Psalm 24:3, 4; Mateyus 5:8.
Wi musu abi a yoisti denki fu wi diniwroko
11. Sortu aksi di abi fu du nanga a diniwroko fu wi, na bun aksi fu poti prakseri na den?
11 Efu wan yoisti denki na a moro prenspari sani di sa meki taki Yehovah feni wi bun, dan wi musu broko wi ede ete nanga san wi e du na ini wi diniwroko? Efu wi e du a diniwroko fu wi nanga a yoisti denki, dan a de fanowdu trutru fu skrifi san wi e du, noso omeni yuru a teki fu du den sani dati? Disi na bun aksi, fu di wi no wani taki nomru e kon moro prenspari leki den sani di wi e du na ini a diniwroko fu Yehovah. Wi no wani taki wan bun preikiwroko raportu e tron a moro prenspari sani gi wi na ini wi Kresten diniwroko.
12, 13. (a) Fu san ede wi e meki wan raportu fu a preikiwroko di wi e du? (b) Sortu reide wi abi fu prisiri te wi e si a raportu fu a preikiwroko di wi e du na heri grontapu?
12 Luku san a buku Wi orga fu du a wani fu Yehovah, e taki: „Den fosi yarihondro bakaman fu Yesus Krestes ben e angri fu kon sabi fa a preikiwroko ben e go na fesi (Markus 6:30). A Bijbel buku Tori fu den Apostel, e fruteri wi taki sowan 120 sma ben de makandra na a dei fu a Pinksterfesa, di santa yeye ben kon na tapu den disipel. Heri esi a nomru dati gro go miti 3000 èn baka dati 5000 disipel . . . (Tori fu den Apostel 1:15; 2:5-11, 41, 47; 4:4; 6:7). A no de fu taki dati a ben de wan bigi deki-ati gi den disipel fu yere fa a wroko ben e gro!” Na fu a srefi sani disi ede, meki Yehovah Kotoigi na ini a ten disi e pruberi fu meki soifri raportu fu a wroko di e du na heri grontapu, leki wan kontru fu den wortu fu Yesus: „A bun nyunsu disi fu a kownukondre o preiki gi sma na heri grontapu, so taki sma fu ala kondre kan yere dati, èn dan a kaba o kon” (Mateyus 24:14). Den raportu dati e sori sma krin fa a e waka nanga a wroko na heri grontapu. Den e sori pe yepi de fanowdu, sosrefi sortu publikâsi èn omeni fu den de fanowdu fu meki a preikiwroko go na fesi.
13 Sobun, te wi e meki wan raportu fu wi preikiwroko, dan dati e yepi wi fu du a preikiwroko fu a Kownukondre bun nyunsu na wan moro bun fasi. Boiti dati, a e gi wi deki-ati te wi e yere fu a wroko di wi brada nanga sisa e du na ini tra pisi fu grontapu, a no so? Te wi e yere fa a wroko e go na fesi na heri grontapu, dan dati e gi wi prisiri, a e gi wi deki-ati fu du moro na ini a diniwroko, èn a e gi wi a dyaranti taki Yehovah e blesi wi. Boiti dati, a e gi wi bigi prisiri tu fu sabi taki a wroko di ibriwan fu wi aparti du, na wan pisi sosrefi fu a wroko di du na heri grontapu! A wroko di ibriwan fu wi aparti du, na pikinso nomo te wi e teki en gersi nanga a bigi wroko di du na heri grontapu, ma Yehovah e si san wi e du (Markus 12:42, 43). Hori na prakseri taki efu yu no ben gi yu raportu, dan a raportu fu a wroko na heri grontapu ben o mankeri wan sani.
14. Boiti taki wi e preiki èn e gi sma leri, sortu tra frantwortu wi abi na ini na anbegi fu Yehovah?
14 A no de fu taki, dati furu fu den sani di ibri Kotoigi e du fu tyari en frantwortu leki wan getrow futuboi fu Yehovah, no skrifi na tapu a raportu fu en. Fu gi wan eksempre, a raportu no e taki fu a studeri di a sma e studeri Bijbel doronomo, fu a go di a sma e go na den Kresten konmakandra, èn fu a teki di a e teki prati na den konmakandra disi. Boiti dati, a raportu no e taki tu fu den wroko di a sma e du na ini a gemeente, noso fu a yepi di a e gi tra bribiman te dati de fanowdu, noso a moni di a e gi fu horibaka gi a Kownukondre wroko di e du na heri grontapu, èn so moro fara. Sobun, a preikiwroko raportu fu wi prenspari fu di a e yepi wi fu tan preiki fayafaya, èn fu no go du a wroko moro safri. Ma toku wi no musu si a raportu disi leki a moro prenspari sani. Wi no musu denki taki te wi abi wan bun preikiwroko raportu, dan dati wani taki dati wi bun nofo fu kisi têgo libi.
„De fayafaya fu du bun wroko”
15. Aladi a de so taki bun wroko wawan no man gi wi frulusu, toku den de prenspari. Fu san ede dati de so?
15 A krin fu si taki bun wroko wawan no man frulusu wi, ma toku a de prenspari taki wi e du den wroko dati. Na fu dati ede meki Bijbel e kari Kresten „wan pipel di ben o de spesrutu fu en. A pipel disi de fayafaya fu du bun wroko”, èn na fu dati ede sosrefi meki den e kisi deki-ati fu ’poti prakseri na makandra, so taki den kan gi makandra deki-ati fu abi lobi èn fu du bun wroko’ (Titus 2:14; Hebrewsma 10:24). Yakobus, wan tra Bijbel skrifiman, e taki en moro krin: „Soleki fa a skin dede te wan sma no e bro moro, na so bribi sondro wroko dede tu.”—Yakobus 2:26.
16. San de moro prenspari srefi leki den bun wroko fu wi, ma nanga san wi musu luku bun?
16 A tru taki den bun wroko srefi de prenspari, ma a de moro prenspari fu du den wroko disi nanga a yoisti denki. Fu dati ede a bun te wi e aksi wisrefi ten na ten fu san ede wi e teki prati na a diniwroko. Ma fu di nowan sma kan sabi soifri fu san ede trawan e du sani, meki wi musu luku bun fu no krutu trawan. Bijbel e aksi wi: „Suma na yu taki yu e krutu a futuboi fu wan tra sma”? A piki tapu na aksi dati de krin: „Na en eigi masra sa bosroiti efu a sa tanapu noso efu a sa fadon” (Romesma 14:4). Yehovah, a Masra fu ala sma, èn sosrefi Krestes Yesus, a Krutuman di a poti, sa krutu wi. Den no sa krutu wi fu den bun wroko wawan di wi du, ma den sa luku tu nanga sortu denki wi du den wroko dati, sosrefi efu wi gebroiki den okasi di wi ben abi, efu wi du den wroko nanga lobi, èn efu wi du den na wan getrow fasi. Yehovah nanga Krestes Yesus wawan kan sabi soifri efu wi du san Kresten e kisi leki rai fu du, soleki fa na apostel Paulus ben taki: „Du ala san yu man fu gi yusrefi na Gado leki wan sma di a feni bun, wan wrokoman di no abi fu syen fu noti èn di e gebroiki a wortu fu waarheid na wan reti fasi.”—2 Timoteyus 2:15; 2 Petrus 1:10; 3:14.
17. Aladi wi e du ala san wi man, dan fu san ede a de fanowdu taki wi e hori Yakobus 3:17 na prakseri?
17 Yehovah no e fruwakti tumusi furu fu wi. Soleki fa Yakobus 3:17 e sori, dan „a koni fu Gado” de „klarikari fu fiti ensrefi”. Te wi e teki na eksempre fu Yehovah ini a tori disi, dan wi o sori taki wi abi koni, èn taki wi e du wan trutru bun sani, a no so? Sobun, wi no musu pruberi fu poti tumusi hei marki èn wi no musu fruwakti tumusi furu fu wisrefi, noso fu den brada nanga sisa fu wi.
18. Sortu sani wi kan fruwakti te wi abi wan yoisti denki fu den wroko fu wi èn fu Yehovah en no-frudini bun-ati?
18 Solanga wi abi wan yoisti denki fu den sani di wi e du na ini a diniwroko èn fu a no-frudini bun-ati fu Yehovah, dan wi sa tan abi a prisiri di tru futuboi fu Yehovah abi (Yesaya 65:13, 14). Wi kan prisiri nanga den blesi di Yehovah e gi a heri pipel fu en, awinsi o furu ibriwan fu wi aparti man du. Aladi wi e tan ’begi Gado fayafaya, èn e taigi en tangi tu’, wi sa begi en fu yepi wi fu du ala san wi man. Dan sondro tweifri, ’a vrede fu Gado di bigi moro leki san libisma man frustan, sa kibri wi ati èn wi frustan nanga yepi fu Krestes Yesus’ (Filipisma 4:4-7). Iya, wi kan kisi trowstu nanga deki-ati fu di wi sabi taki wi man kisi frulusu, no wawan fu di wi e du bun wroko, ma fu di Yehovah e sori wi no-frudini bun-ati!
Yu kan fruklari fu san ede Kresten
• no e meki bigi fu den sani di den e du?
• no e strei nanga trawan?
• e meki wan raportu fu den sani di den du na ini a Kresten preikiwroko?
• no e krutu den Kresten brada nanga sisa fu den?
[Prenki na tapu bladzijde 15]
„Mi no-frudini bun-ati nofo gi yu”
[Prenki na tapu bladzijde 16, 17]
Owruman e prisiri nanga a yepi di ibriwan fu den kan gi fu meki sani waka bun nanga a gemeente
[Prenki na tapu bladzijde 18, 19]
Efu yu no ben gi yu raportu, dan a raportu fu a wroko na heri grontapu ben o mankeri wan sani