„Koloku fu den sma di sabi taki den de na nowtu na yeye fasi”
TE FOWRU e wiki te mamanten, dan den gwenti fu froiti wan pisi ten, èn baka dati den e frei gowe fu go suku nyanyan. Te neti den e drai kon baka na den nesi, den e froiti pikinso moro, èn baka dati den e go sribi. Na ini spesrutu pisi ten fu a yari den e meki eksi, èn den e sorgu den pikin fu den teleki den kon bigi. Tra meti e du den srefi sortu sani disi tu ibri tron baka.
Wi leki libisma de tra fasi. Iya, wi e nyan, wi e sribi, èn wi e meki pikin, ma furu fu wi wani moro leki den sani dati nomo. Wi wani sabi fu san ede wi de na libi. Wi wani sabi san na a marki fu a libi. Boiti dati, wi wani abi wan howpu gi a ten di e kon. Den moro tranga winsi disi e sori taki wi leki libisma abi wan sani di nowan enkri tra libisani abi, èn dati na wan yeye nowtu. Iya, a de fanowdu taki wi e poti prakseri na yeye afersi, èn wi alamala man du dati.
Wi meki akruderi a prenki fu Gado
Bijbel e fruklari fu san ede libisma abi wan yeye nowtu. A e taki: „Gado ben go moro fara fu meki libisma akruderi a prenki fu en, akruderi a prenki fu Gado a ben meki en; leki man èn leki uma a ben meki den” (Genesis 1:27). Iya, wi leki libisma meki „akruderi a prenki fu Gado”, èn dati wani taki dati aladi wi abi sondu nanga fowtu, toku wi man sori wan tu fu den fasi di Gado abi (Romesma 5:12). Fu gi wan eksempre, wi kan kon nanga nyun denki, èn wi kan meki nyun sani sosrefi. Boiti dati, wi abi koni, wi sabi san na retidu, èn wi man sori lobi gi makandra sondro fu prakseri wi eigi bun. Sosrefi, wi kan prakseri fu sani di pasa fositen, èn wi kan seti sani gi a ten di e kon.—Odo 4:7; Preikiman 3:1, 11; Mika 6:8; Yohanes 13:34; 1 Yohanes 4:8.
Wan sani di e sori moro krin taki wi man poti prakseri na yeye afersi, na taki wi alamala gebore nanga na angri fu anbegi Gado. Efu wi no e du ala san de fanowdu fu tapu na angri disi di wi abi, namku fu abi wan moro bun banti nanga wi Mekiman, dan wi no sa man feni trutru koloku di e tan fu ala ten. „Koloku fu den sma di sabi taki den de na nowtu na yeye fasi”, na so Yesus ben taki (Mateyus 5:3). Ma fu man tapu a nowtu dati, dan wi musu sorgu taki wi e kon sabi a waarheid di abi fu du nanga yeye afersi, iya, wi musu kon sabi den tru tori di abi fu du nanga Gado, den markitiki fu en, èn sosrefi san a abi na prakseri gi libisma. Pe wi kan feni a waarheid disi? Na ini Bijbel.
„Yu wortu na waarheid”
Na apostel Paulus ben skrifi: „Na Gado srefi ben meki sma skrifi ala den sani di de na ini Gado Buku; den sani disi bun fu gi leri, fu frumane sma, fu poti sani kon reti” (2 Timoteyus 3:16). Den wortu fu Paulus e kruderi nanga den di fu Yesus, di ben taigi Gado na ini begi: „Yu wortu na waarheid.” Na ini a ten disi wi sabi a Wortu dati leki a Santa Bijbel, èn a ben o bun fu luku efu den sani di wi e bribi èn den markitiki fu wi e kruderi nanga den markitiki fu Bijbel.—Yohanes 17:17.
Te wi e teki a bribi fu wi gersi nanga a Wortu fu Gado, dan wi e du leki a pipel fu owruten Berea, di ben e luku efu den leri fu Paulus ben e kruderi nanga den Buku fu Bijbel. Na presi taki Lukas krutu den Bereasma, a prèise den fu a sani disi di den ben du. Den „ben teki a wortu nanga den heri ati”, na so a ben skrifi, „èn den ben e ondrosuku Gado Buku finifini ibri dei fu si efu den sani disi ben tru” (Tori fu den Apostel 17:11). Na ini a ten disi, bun furu leri de di abi fu du nanga kerki afersi noso nanga a fasi fa sma musu tyari densrefi, ma den sani disi no e kruderi nanga Bijbel. Fu dati ede a de prenspari taki wi e teki na eksempre fu den Bereasma di ben de klariklari fu ondrosuku sani.
Wan tra fasi fa wi kan kon sabi efu den sani di sma e bribi na waarheid, na fu luku sortu krakti den sani disi abi tapu sma libi (Mateyus 7:17). Fu gi wan eksempre, te wan sma e libi akruderi a waarheid fu Bijbel, dan dati musu meki taki a e tron wan moro bun masra, wan moro bun papa, wan moro bun wefi, noso wan moro bun mama. Na so fasi na osofamiri fu a sma dati sa kon moro koloku èn a sma srefi sa firi moro prisiri. Yesus ben taki: „Koloku fu den sma di e yere a wortu fu Gado èn di e du san a wortu e taki.”—Lukas 11:28.
Den wortu fu Yesus e meki wi prakseri den wortu fu en hemel Tata, di ben taigi den Israelsma fu owruten: „Mi, Yehovah, na yu Gado, a Sma di e leri yu fu gi yusrefi wini, a Sma di e meki yu waka na tapu a pasi di yu musu waka. O efu yu trutru ben sa poti prakseri nomo na den komando fu mi! Dan a vrede fu yu ben sa tron leki wan liba, èn a regtfardikifasi fu yu leki den skwala fu se” (Yesaya 48:17, 18). A no de fu taki, dati ala sma di lobi san bun èn san regtfardiki ben o wani du san Yehovah aksi den na so wan lobi-ati fasi!
Son sma lobi te trawan e „switi den yesi fu den”
Gado ben aksi den Israelsma a sani di skrifi na ini Yesaya 48:17, 18, fu di trawan ben e kori den nanga falsi kerkileri (Psalm 106:35-40). Wi sosrefi musu luku bun nanga falsi leri. Paulus ben skrifi disi fu den sma di ben e kari densrefi Kresten: „Wan ten o kon taki den no sa frudrage a bun leri, ma na fu di densrefi wani, meki den o suku leriman gi densrefi fu switi den yesi nanga sani di densrefi wani yere; den no sa wani arki a waarheid, ma den o arki leitori.”—2 Timoteyus 4:3, 4.
Kerki fesiman e switi sma yesi fu di den e tapu ai gi sani di sma e du fu plisi den takru lostu fu den, èn dati na sani soleki seks demakandra dorosei fu a trowlibi, homo-sekslibi, nanga drungufasi. Bijbel e taki krin taki den sma di feni den sortu sani disi bun, èn den sma di e du den sani disi, „no sa kisi a kownukondre fu Gado”.—1 Korentesma 6:9, 10; Romesma 1:24-32.
A no de fu taki dati wan sma abi deki-ati fanowdu fu man libi akruderi den markitiki fu Bijbel, spesrutu te sma e spotu en. Ma toku wan sma man libi na a fasi dati. Furu sma di de Yehovah Kotoigi ben abi a takru gwenti fosi fu gebroiki drugs, den ben de drunguman, huruman, ogriman, fufuruman, nanga leiman. Toku den meki Gado Wortu abi krakti na den tapu, èn nanga yepi fu santa yeye den tyari kenki kon na ini den libi so taki den kan „waka na wan fasi di Yehovah feni bun” (Kolosesma 1:9, 10; 1 Korentesma 6:11). Fu di den meki vrede nanga Gado, meki den kisi wan korostu firi, èn soleki fa wi sa si, den kisi wan trutru howpu sosrefi gi a ten di e kon.
A Kownukondre howpu
Bijbel e gi sma di e gi yesi na Gado a howpu taki vrede sa de fu têgo, èn a howpu dati sa kon tru nanga yepi fu a Kownukondre fu Gado. Yesus ben leri sma fu begi: „Meki yu kownukondre kon. Meki yu wani pasa na grontapu leki fa a e pasa na hemel” (Mateyus 6:10). Iya, Gado Kownukondre wawan kan meki taki Gado en wani e pasa na grontapu trutru. Fu san ede dati de so? Fu di a hemel Kownukondre dati, namku a tirimakti di abi Yesus Krestes leki Kownu, na a seti di Gado sa gebroiki fu sori taki na En abi a reti fu tiri heri grontapu.—Psalm 2:7-12; Danièl 7:13, 14.
Leki Kownu fu a hemel Kownukondre dati, Yesus Krestes sa frulusu libisma di e gi yesi na Gado, fu ibri sortu katibo, iya, a sa frulusu den sosrefi fu a sondu fu Adam di e tai sma hori, èn fu siki nanga dede di a sondu dati tyari kon. Openbaring 21:3, 4 e taki: „Luku! A tenti fu Gado de na den libisma . . . A [Yehovah Gado] o figi ala watra puru na den ai, èn dede no sa de moro; nowan sari, noso krei, noso pen no sa de moro. Den fositen sani pasa gowe.”
Vrede sa de na heri grontapu, èn a vrede dati sa tan fu têgo. Fu san ede wi kan bribi dati? Yesaya 11:9 e sori fu san ede. Drape skrifi: „Sma [den sma di sa saka densrefi ondro a Kownukondre tiri] no sa du nowan enkri ogri èn den no sa pori nowan enkri sani na tapu heri mi santa bergi; bika grontapu sa kon furu trutru nanga a sabi fu Yehovah, soleki fa watra e tapu se.” Iya, ibri libisma na grontapu sa kisi soifri sabi fu Gado èn den sa gi yesi na en. A e meki yu ati prisiri fu sabi taki den sani disi o pasa na ini a ten di e kon? Efu dati de so, dan nownow yu musu bigin teki a warti „sabi fu Yehovah”.
Yu sa arki a Kownukondre boskopu?
Nanga yepi fu a Kownukondre, Gado sa pori ala den wroko fu Satan, èn a sa leri sma den regtfardiki pasi fu En. Fu dati ede a no e fruwondru wi taki a Kownukondre ben de a moro prenspari tori fu den sani di Yesus ben e leri sma. A ben taki: „Mi musu go fruteri a bun nyunsu fu Gado kownukondre . . . , bika na fu disi Gado ben seni mi kon” (Lukas 4:43). Krestes ben gi den disipel fu en a komando fu tyari a srefi boskopu gi tra sma (Mateyus 28:19, 20). A ben taki na fesi san ben o pasa: „A bun nyunsu disi fu a kownukondre o preiki gi sma na heri grontapu, so taki sma fu ala kondre kan yere dati, èn dan a kaba o kon” (Mateyus 24:14). A kaba dati e kon heri esi. Fu dati ede a de tumusi prenspari taki reti-ati sma arki a bun nyunsu di e kibri sma libi!
Albert, di kari na ini na artikel na fesi, ben yere a Kownukondre boskopu di a wefi nanga a boi fu en bigin studeri Bijbel nanga Yehovah Kotoigi. Na ini a bigin, Albert no ben lobi a tori disi. A aksi wan domri fu drape srefi fu go na a wefi èn a boi fu en, fu sori den taki den Kotoigi na falsi leriman. Ma a domri no ben wani bumui. Sobun, Albert bosroiti fu sidon arki wan leisi di den ben e studeri Bijbel, so taki a ben kan taigi den te den ben e leri falsi sani. Baka a fosi leisi di a du dati, a bigin teki prati na a studie, èn a ben de fayafaya fu kon sabi moro. Bakaten a fruteri fu san ede a no ben abi muiti moro nanga a bijbelstudie. A taki: „Na disi mi ben e suku ala ten.”
Now fosi, Albert ben e bigin tapu a yeye nowtu fu en, èn a sani dati noiti no hati en. A waarheid fu Bijbel gi en san a ben e suku en heri libi langa. Iya, a kon sabi fa a kruktudu nanga a krukafasi di de fu si na ini a heri libimakandra o kon na wan kaba, èn a kon abi wan howpu tu gi a ten di e kon. A waarheid fu Bijbel gi en wan korostu firi. A de so taki den sani di yu e leri e tapu a yeye nowtu fu yu? Fu san ede yu no e teki ten fu leisi den aksi na ini a faki na tapu bladzijde 6? Efu yu wani kon sabi moro, dan Yehovah Kotoigi sa prisiri fu yepi yu.
[Faki/Prenki na tapu bladzijde 6]
DEN SANI DI YU E LERI E TAPU A YEYE NOWTU FU YU?
Yu feni taki den sani di yu e leri e tapu a yeye nowtu fu yu? Wi e gi yu deki-ati fu leisi den aksi di e kon now, èn marki den wan di yu kan piki krin.
□ Suma na Gado, èn san na en nen?
□ Suma na Yesus Krestes? Fu san ede a ben musu dede? Fa yu kan kisi wini fu a dede fu en?
□ Wan Didibri de? Efu dati de so, dan fa a du kon taki a de?
□ San e pasa nanga wi te wi dede?
□ San Gado abi na prakseri gi grontapu èn gi libisma?
□ San na a Kownukondre fu Gado?
□ San na den markitiki fu Gado te a abi fu du nanga a fasi fa wi musu tyari wisrefi?
□ Sortu frantwortu Gado gi masra nanga wefi na ini na osofamiri? San na wan tu Bijbel gronprakseri di e yepi wi fu abi wan koloku osofamiri-libi?
Efu yu no man piki iniwan fu den aksi disi krin, dan yu kan aksi fu kisi a brochure di nen San Gado e aksi foe wi? A brochure disi di Yehovah Kotoigi tyari kon na doro de fu kisi na ini moro leki 300 tongo, a e taki fu 16 prenspari Bijbel tori, èn nanga yepi fu Bijbel a e gi piki tapu ala den aksi di skrifi na tapusei fu a bladzijde disi.
[Prenki na tapu bladzijde 4]
Tra fasi leki meti, libisma abi wan yeye nowtu
[Prenki na tapu bladzijde 5]
„Den o suku leriman gi densrefi fu switi den yesi nanga sani di densrefi wani yere.”—2 Timoteyus 4:3
[Prenki na tapu bladzijde 7]
A Mesias Kownukondre fu Gado sa tyari vrede kon di sa tan fu têgo