A lusu-paiman e poti krakti tapu a regtfardikifasi fu Gado
BAKA di Adam nanga Eva opo densrefi teige Yehovah, dan Yehovah sori taki a abi na prakseri fu wiki wan Siri di Satan ben o masi na en bakafutu (Genesis 3:15). A sani disi pasa di den feanti fu Gado meki taki Yesus dede na wan pina-postu (Galasiasma 3:13, 16). Yesus no ben abi sondu, fu di a krakti fu a santa yeye meki taki na wan wondru fasi a kon de a na ini a bere fu wan nyunwenke. Fu dati ede, a brudu fu en ben kan dini leki a lusu-paiman fu fri libisma di ben kisi sondu nanga dede fu Adam.—Romesma 5:12, 19.
Noti kan tapu na almakti Gado, Yehovah, fu du san a abi na prakseri. Sobun, baka di libisma fadon na ini sondu, dan gi Yehovah, a ben de neleki a lusu-paiman ben pai kaba, èn a ben kan abi wan banti nanga den wan di ben e bribi taki a pramisi fu en ben o kon tru. A sani disi gi den sondu bakapikin fu Adam, soleki Enok, Noa, nanga Abraham, na okasi fu waka nanga Gado èn fu tron mati fu en, sondro taki a santafasi fu En pori.—Genesis 5:24; 6:9; Yakobus 2:23.
Sonwan fu den sma di ben e bribi na ini Yehovah ben du seryusu sondu. Kownu David na wan fu den sma dati. Kande yu sa aksi yusrefi: ’Fa Yehovah ben kan tan blesi Kownu David baka di David du hurudu nanga Batseiba, èn baka di a sorgu taki Uria, a masra fu en, lasi en libi?’ Wan prenspari reide fu san ede Yehovah du dati, na fu di David ben sori trutru berow nanga trutru bribi (2 Samuel 11:1-17; 12:1-14). Fu di Yesus Krestes ben o dini leki wan srakti-ofrandi na ini a ten di ben o kon, meki Gado gi pardon na David di ben sori berow, sondro taki Ensrefi lasi a retidu noso a regtfardikifasi fu en (Psalm 32:1, 2). Leki buweisi fu dati, Bijbel e fruklari taki a moro moi sani di a lusu-paiman fu Yesus du, na taki a „sori sma taki [Gado] de regtfardiki, bika a gi sma pardon fu den sondu di den du na ini a ten di pasa” èn „na ini a ten disi”.—Romesma 3:25, 26.
Iya, a waarde fu Yesus en brudu e tyari tumusi moi winimarki gi libisma. A lusu-paiman e meki taki sondu libisma di abi berow, kan kisi wan bun banti nanga Gado. Boiti dati, a lusu-paiman e meki taki den dedewan kan kisi wan opobaka na ini a nyun grontapu fu Gado. Na den mindri yu sa abi sosrefi den getrow futuboi fu Gado, di dede fosi Yesus ben pai a lusu-paiman, èn sosrefi furu sma di dede sondro fu sabi san Gado abi na prakseri, èn di no ben e anbegi En. Bijbel e taki: „Gado sa gi wan opobaka na den regtfardikiwan èn na den onregtfardikiwan” (Tori fu den Apostel 24:15). Na a ten dati, Yehovah sa gebroiki a lusu-paiman fu gi têgo libi na ala libisma di e gi yesi na en (Yohanes 3:36). Yesus srefi ben taki: „Gado ben lobi grontapu so te, taki a gi en wan-enkri Manpikin, so taki ala sma di e bribi na ini en no sa dede, ma sa kisi têgo libi” (Yohanes 3:16). Libisma sa kisi ala den winimarki disi fu di Gado seti wan frulusu-ofrandi.
Ma wi no musu si den winimarki di a lusu-paiman e tyari kon gi wi, leki a moro prenspari sani ini a tori disi. San moro prenspari, na san a lusu-paiman fu Yesus e du gi a nen fu Yehovah. A e sori taki Yehovah na wan Gado fu soifri retidu, èn taki a kan handri nanga sondu libisma, sondro fu lasi en krinfasi noso en santafasi. Efu Gado no ben sorgu gi a lusu-paiman, dan nowan enkri bakaman fu Adam ben o man waka nanga Yehovah, noso ben o man de wan mati fu en, iya, srefi Enok, Noa, nanga Abraham no ben o man de mati fu en. A psalm skrifiman ben sabi dati èn a ben skrifi: „Efu na fowtu yu ben musu luku, o Yah, o Yehovah, dan suma ben kan tan tanapu?” (Psalm 130:3) Wi musu de nanga tangi trutru taki Yehovah seni en lobi Manpikin kon na grontapu, èn taki Yesus ben de klariklari fu gi en libi leki wan lusu-paiman gi wi!—Markus 10:45.