Aksi fu leisiman
San wi kan leri fu a wet di skrifi na Exodus 23:19, di e taki: „Un no musu bori wan pikin krabita na ini a merki fu en mama”?
A komando disi di skrifi dri leisi na ini a Wet fu Moses, e yepi wi fu frustan san fiti na ini Yehovah ai, èn a e sori sosrefi a sari-ati nanga a safu-ati fu en. A e tyari kon na krin tu fa a e tegu gi falsi anbegi.—Exodus 34:26; Deuteronomium 14:21.
Te wan sma ben o bori wan yongu krabita, noso wan tra meti na ini a merki fu en mama, dan dati no ben o kruderi nanga a fasi fa Yehovah wani sma fu handri. Gado meki a mama merki leki nyanyan gi a pikin, èn fu yepi en fu gro. Efu wan sma ben o bori a pikin krabita na ini en eigi mama merki, dan soleki fa wan sabiman taki, a sma dati e sori taki a „no e lespeki a banti di Gado seti na mindri a mama krabita nanga a pikin krabita, èn a banti disi santa sosrefi”.
Boiti dati, son sma feni taki a ben de wan heiden gwenti fu bori wan pikin krabita na ini a merki fu en eigi mama, fu di den sma dati ben e bribi taki disi ben o meki alen fadon. Efu a sani dati ben de wan heiden gwenti trutru, dan a wet fu Gado ben de fu tapu den Israelsma fu no du den don èn ogri-ati sani di den nâsi na den lontu ben gwenti fu du. A Wet fu Moses ben e sori den Israelsma krinkrin taki den no ben musu libi akruderi den wet fu den nâsi dati.—Lefitikus 20:23.
Te fu kaba, a spesrutu wet disi e sori a safu-ati di Yehovah abi gi den mekisani fu en. Te yu e luku en bun, dan a Wet ben abi wan tu komando di ben warskow sma tu fu no handri na wan ogri-ati fasi nanga meti, èn fu no du sani di no e kruderi nanga a fasi fa Gado wani sma fu handri. Fu eksempre, a Wet ben abi komando di ben e sori sma taki te wan meti gebore, dan a ben musu tan seibi dei nanga en mama, bifo sma gi en leki srakti-ofrandi. Sosrefi, sma no ben mag srakti wan meti nanga en pikin tapu a srefi dei, èn sma no ben mag puru wan mama fowru makandra nanga den eksi, noso den pikin fu en, fu en nesi.—Lefitikus 22:27, 28; Deuteronomium 22:6, 7.
A de krin fu si taki a Wet no ben de soso wan tu frekti komando nanga tirilin di ben e sori sma san den no ben mag du. Wan fu den wini di a Wet ben e tyari kon, na taki den gronprakseri na ini e yepi wi fu kon sabi moro krin san fiti èn san no fiti, so taki trutru wi e sori den tumusi moi fasi fu Yehovah.—Psalm 19:7-11.
[Sma di abi a reti fu a prenki na tapu bladzijde 31]
© Timothy O’Keefe/Index Stock Imagery