Te wi abi frede gi Gado dan dati ’sa leri wi fu handri nanga koni’

TRUTRU koni orga wan bigi fesa. A „seni den misi fu en go, so taki den kan bari kari na tapu den heipresi fu a foto: ’Iniwan sma di no abi ondrofeni, meki a kon dyaso.’ A e taigi iniwan sma di abi wan ati di e mankeri koni: ’Kon nyan mi brede èn kon dringi sosrefi a win di mi moksi. Libi den wan di no abi ondrofeni èn tan na libi, èn waka soifri na tapu a pasi fu frustan.’”—Odo 9:1-6.

Te wi e nyan na a tafra fu koni, dan noiti wi sa abi takru bakapisi. Te wi e arki den koni wortu di e komoto fu Gado, èn te wi e teki a trangaleri di A e gi wi, dan dati sa tyari soso wini kon gi wi. Den koni wortu di skrifi na Odo 15:16-33, sa tyari wini kon gi wi tu.a Te wi e du san den wortu disi e taki, dan dati kan yepi wi fu de tevrede awansi wi no abi furu gudu. A kan yepi wi tu fu go na fesi, èn fu abi prisiri na ini a libi. Boiti dati, wi sa man teki koni bosroiti, èn wi sa man tan na tapu a pasi fu libi.

Te a moro bun fu no abi furu gudu

„A moro bun fu abi pikinso nomo aladi yu abi frede gi Yehovah, leki fu abi bun furu aladi yu e bruya”, na so Kownu Salomo fu owruten Israel e taki (Odo 15:16). A de wan don sani te wi e feti nomo fu kon gudu, aladi wi no e arki wi Mekiman. Te wi e du dati, dan noiti wi sa de tevrede èn wi sa abi bun furu broko-ede. A ben o de wan syen trutru fu kon si tapu wi owrudei taki ala ten wi ben e libi fu soso! A no de wan koni sani srefisrefi fu abi furu gudu, aladi wi e „bruya”. A moro bun fu kon leri sabi fa wi kan kon de tevrede trutru, èn fu libi na wan fasi di e sori taki wi de tevrede! A no gudu sa meki taki wi de tevrede trutru, ma na te wi abi frede gi Yehovah, iya, te wi abi wan banti nanga en.—1 Timoteyus 6:6-8.

Salomo e sori taki a moro prenspari fu abi wan bun banti nanga trawan, leki fu abi furu gudu. A e taki: „A moro bun fu abi wan preti nanga gruntu aladi lobi de, leki fu abi wan fatu mankaw aladi bita-ati de” (Odo 15:17). Iya, te den sma na ini wan osofamiri lobi makandra, dan dati moro bun leki te den abi furu switi nyanyan. Wan papa noso wan mama di e kweki en pikin en wawan, kande abi pikinso moni nomo. Na ini son kondre sma no gudu nofo fu man nyan wan lo switi nyanyan. Ma te den memre fu wan osofamiri abi lobi gi makandra, dan den sa de koloku.

Srefi na ini osofamiri pe sma lobi makandra, problema kan opo kon. Kande wan memre fu na osofamiri e taki noso e du wan sani di e hati den firi fu wan trawan. San a sma di a afrontu musu du? Odo 15:18 e taki: „Wan man di e atibron e tyari trobi kon, ma wan man di no e atibron esi-esi e kowru wan trobi.” Te wan sma no e piki nanga atibron, ma na wan safri-ati fasi, dan a sa tyari vrede kon. Wi kan gebroiki a rai fu na odo disi bun tu na ini tra afersi fu a libi, sosrefi na ini a gemeente èn na ini a preikiwroko.

Te ’wan pasi grati’

Na odo di e kon now e sori a difrenti na mindri wan sma di poti prakseri na koni, èn wan sma di no du dati. „A pasi fu wan lesiman de leki wan makamaka skotu”, na so a koni kownu e taki, „ma a pasi fu den opregtiwan grati.”—Odo 15:19.

Wan makamaka skotu e tapu pasi gi sma. Fu di wan lesiman no wani du a wroko di a musu du, meki a e si ala sortu sani na tapu en pasi di e tapu en fu wroko. Na a tra sei, den opregtiwan no e broko den ede nanga sani di kan tapu pasi gi den. Den e wroko fayafaya èn den e poti prakseri na a wroko di den musu du. Fu di den e teki a wroko fu den leki wan seryusu sani, meki den e wai pasi gi furu problema di de leki maka. A pasi fu den „grati”, èn dati wani taki dati sani e waka bun gi den. Den abi bun bakapisi na ini a wroko fu den, èn a sani dati e gi den prisiri.

Fu eksempre, wi sabi taki wi musu kisi soifri sabi fu Gado Wortu, èn taki wi musu tron lepi sma. Wi musu meki muiti efu wi wani doro a marki dati. Wan sma ben kan taki makriki dati a no e teki ten fu studeri Bijbel, fu di a no kisi nofo skoro, fu di a no man leisi bun, noso fu di a no man hori sani na ede. Wi no musu denki kwetikweti taki den sani dati e tapu wi fu kisi soifri sabi! Awansi wi no koni nofo, toku wi kan meki muiti fu leri leisi moro bun èn fu kon frustan san wi e leisi, èn kande wi kan gebroiki wan wortubuku te dati de fanowdu. Te wi abi wan bun denki fu sani, dan wi sa kisi sabi èn wi sa go na fesi na yeye fasi.

Te ’wan papa e prisiri’

„Wan koni manpikin e gi wan papa prisiri”, na so a kownu fu Israel e taki, „ma wan don sma e teige en mama” (Odo 15:20). Papa nanga mama e prisiri te den pikin fu den e handri nanga koni, a no so? A no de fu taki dati efu papa nanga mama wani dati fu pasa, dan den musu kweki den pikin fu den bun, èn den musu gi den trangaleri (Odo 22:6). Wan koni manpikin e gi en papa nanga mama prisiri trutru! Ma wan don pikin e gi den bun furu sari.

A koni kownu e gebroiki a wortu „prisiri” fu taki fu wan tra sani. A e taki: „Wan sma di abi wan ati di e mankeri koni, lobi fu du don, ma a sma di abi a koni fu si sani krin e waka wan reti pasi” (Odo 15:21). Den wan di abi wan ati di e mankeri koni e meki prisiri na wan don fasi, èn fu dati ede den no de koloku trutru. Ma a sma di abi a koni fu si sani krin e frustan taki a de wan don sani fu tron ’wan sma di lobi prisiri na presi fu lobi Gado’ (2 Timoteyus 3:1, 4). Te a sma dati e hori ensrefi na den gronprakseri fu Gado, dan dati e yepi en fu tan wan opregti sma èn fu tan na tapu a reti pasi.

Te ’sani e waka bun’

Te wi e libi akruderi den gronprakseri fu Gado, dan dati e tyari wini kon na ini tra afersi fu wi libi. Odo 15:22 e taki: „Sani no sa waka bun te sma no e taki krin nanga makandra, ma te furu raiman de, dan sani sa waka bun.”

Te sma e taki krin nanga makandra, dan dati wani taki dati den e frutrow makandra. A Hebrew wortu di vertaal nanga „taki krin nanga makandra”, vertaal leki ’grupu di a e frutrow’ na Psalm 89:7. A sani disi e sori taki den sma dati e frutrow makandra te den e taki nanga makandra. Te sma e taki krin nanga makandra, dan dati no wani taki dati den e taki frafra fu sani, ma na presi fu dati den e taigi makandra krin fa den e denki èn fa den e firi. Te masra nanga wefi e taki fri nanga makandra na a fasi disi, èn te papa nanga mama e du dati nanga den pikin fu den, dan vrede nanga wánfasi sa de na den mindri. Ma te famiriman no e taki krin nanga makandra, dan den sa atibron nanga makandra, èn problema sa kon na ini na osofamiri.

Te wi e teki prenspari bosroiti, dan a bun fu hori a rai disi na prakseri: „Sani no sa waka bun te sma no e taki krin nanga makandra, ma te furu raiman de, dan sani sa waka bun.” Fu gi wan eksempre, te wi e bosroiti sortu datrayepi wi sa teki, dan a bun fu suku rai na moro leki wán datra, a no so? Wi musu du dati spesrutu te wi musu teki bosroiti na ini seryusu afersi.

Te a abi fu du nanga yeye afersi, dan a de tumusi prenspari tu fu abi furu raiman. Te owruman e suku rai na makandra èn e poti ede kon na wán, dan „sani sa waka bun”. Boiti dati, nyun owruman no musu tweifri fu suku rai na owruman di abi moro ondrofeni èn di owru moro leki den, spesrutu te den e kisi fu du nanga wan muilek afersi.

Te wan sma „e prisiri nanga a piki fu en mofo”

Sortu bun bakapisi a abi te wan sma e taki nanga koni? „Wan man e prisiri nanga a piki fu en mofo”, na so a kownu fu Israel e taki, „èn wan wortu di taki na a yoisti ten bun srefisrefi!” (Odo 15:23) Wi e prisiri te sma abi bun bakapisi fu di den handri akruderi a piki noso a rai di wi gi, a no so? Ma efu wi wani gi bun rai, dan wi musu hori tu sani na prakseri.

A fosi sani, na taki a rai dati musu komoto fu Gado Wortu, Bijbel (Psalm 119:105; 2 Timoteyus 3:16, 17). Boiti dati, wi musu gi a rai dati na a yoisti ten. Te wi no e taki sani na a yoisti ten, dan den kan hati den firi fu sma, awansi den sani di wi taki de tru. Fu gi wan eksempre, a no de wan koni sani fu gi wan sma rai fosi wi arki san a sma dati abi fu taki, èn na so wan fasi wi no e yepi a sma dati tu. A de tumusi prenspari taki wi de ’gaw fu yere, ma wi no musu gaw fu taki’!—Yakobus 1:19.

„A pasi fu libi e go na tapusei”

Odo 15:24 e taki: „A pasi fu libi e go na tapusei gi a sma di e handri nanga koni, so taki a no e saka go na Syeol.” Wan sma di e handri nanga koni de na tapu a pasi di e tyari en gowe fu Syeol, a grebi pe ala libisma e go. A e wai pasi gi takru sani soleki hurudu, a no e gebroiki drugs, èn a no e kon drungu. Disi sa meki taki a no dede tumusi fruku. A pasi fu en e tyari en go na libi.

Luku fa sani de heri tra fasi nanga a pasi fu den wan di no abi koni: „Yehovah sa broko na oso puru fu den wan di e hei densrefi, ma a sa meki a skotu fu na uma di lasi a masra fu en na ini dede. Yehovah e tegu gi den triki fu na ogri sma, ma opregti wortu switi fu yere. A sma di e kisi wini na wan bedrigi fasi e tyari wan fluku kon na tapu en eigi oso, ma a sma di no lobi presenti sa tan na libi.”—Odo 15:25-27.

A kownu fu Israel e sori wi fa wi kan wai pasi gi trapu, èn fu dati ede a e taki: „Na ati fu a regtfardikiwan e prakseri dipi fu sani, so taki a kan gi piki, ma a mofo fu den ogriwan e meki takru sani kuku kon na tapu” (Odo 15:28). A rai fu na odo disi bun srefisrefi! Te wi e taki don sani sondro fu prakseri fosi san wi o taki, dan nofo tron dati no e tyari nowan bun kon. Te wi e prakseri wan tu sani di kan abi fu du nanga a tori, namku den situwâsi nanga den firi fu trawan, dan wi no sa taki sani di wi no ben musu taki.

Ma sortu wini wi sa kisi te wi abi frede gi Gado èn te wi e teki a trangaleri fu en? A koni man e piki: „Yehovah de fara fu den ogriwan, ma a e yere den begi fu den regtfardikiwan” (Odo 15:29). A tru Gado no de krosibei fu den ogriwan. „A sma di e drai en yesi puru fu a wet”, na so Bijbel e taki, „srefi a begi fu en de wan tegu sani” (Odo 28:9). Den wan di abi frede gi Gado èn di e pruberi fu du san a feni bun, no abi fu frede fu kon krosibei na en èn den kan abi a dyaranti taki a sa arki den.

A sani di e ’gi na ati prisiri’

Salomo e poti wi na prakseri broki fu di a e teki tu sani gersi nanga makandra. A e taki: „Te den ai e brenki, dan na ati e prisiri; bun nyunsu e meki den bonyo kon fatu” (Odo 15:30) A „fatu” di de na ini den bonyo e gi a heri skin krakti, èn a e meki na ati prisiri. Èn te wan sma en ai e brenki, dan dati na wan buweisi taki en ati e prisiri. Na a krakti dati bun nyunsu abi tapu sma!

Wi e kisi deki-ati trutru te wi e yere fa na anbegi fu Yehovah e go na fesi na heri grontapu, a no so? Te wi e kon sabi san den brada nanga sisa fu wi e du na ini a Kownukondre preikiwroko èn na ini a wroko di den e du fu meki disipel, dan a no de fu taki dati disi e gi wi deki-ati fu abi wan moro bigi prati na ini a diniwroko (Mateyus 24:14; 28:19, 20). Te wi e yere ondrofenitori fu den sma di e teki Yehovah leki a Gado fu den èn den e bigin teki prati na a tru anbegi, dan dati e meki wi ati prisiri. Fu di „wan bun nyunsu fu wan farawe kondre” abi so wan bigi krakti na sma tapu, meki a de prenspari trutru taki wi e si en leki wan seryusu sani fu skrifi soifri san wi du na ini a diniwroko!—Odo 25:25.

„Sakafasi e kon fosi glori”

A koni kownu e sori krin taki a de prenspari fu teki trangaleri ibri leisi te wi e kisi dati. A e taki: „A yesi di e arki a piri-ai di e gi libi, e tan leti na mindri koni sma. Iniwan sma di no wani teki trangaleri e tegu gi en eigi sili, ma a sma di e arki piri-ai e kisi ati” (Odo 15:31, 32). Te wan sma e meki a piri-ai noso a trangaleri di a kisi abi krakti tapu en ati, dan a sma dati sa gebroiki en frustan. Fu dati ede a no e fruwondru wi taki na ’a tiki fu trangaleri’ e puru ’a donfasi di tai na a ati fu wan boi’! (Odo 22:15). Boiti dati, a sma di e teki trangaleri sa gebroiki en frustan tu. Na a tra sei, a de so taki te wi no wani teki trangaleri, dan dati wani taki dati wi no wani libi.

Iya, te wi de klariklari fu teki a trangaleri di koni e gi wi, dan dati sa tyari wini kon gi wi. Wi sa de koloku, wi sa go na fesi, wi sa de nanga prisiri, èn wi sa abi bun bakapisi na ini a libi. Ma boiti den sani dati, wi sa kisi glori nanga libi tu. Odo 15:33 e taki te fu kaba: „A frede di wi abi gi Yehovah e leri wi fu handri nanga koni, èn sakafasi e kon fosi glori.”

[Futuwortu]

[Prenki na tapu bladzijde 17]

Te den sma na ini wan osofamiri lobi makandra, dan dati moro bun leki te den abi wan lo switi nyanyan

[Prenki na tapu bladzijde 18]

Srefi efu wi no man du so furu, toku wi kan kisi sabi te wi abi wan bun denki fu sani

[Prenki na tapu bladzijde 19]

Te sma e taki krin nanga makandra, dan dati wani taki dati den e taigi makandra krin fa den e denki èn fa den e firi

[Prenki na tapu bladzijde 20]

Yu sabi fa „wan bun nyunsu e meki den bonyo kon fatu”?