San na „den lasti dei”?

YU E aksi yusrefi san a dei fu tamara sa tyari kon gi yu nanga den lobiwan fu yu? Furu sma e leisi koranti èn e arki a nyunsu doronomo fu kon sabi fa den sani di e pasa na grontapu kan abi krakti tapu den libi. Ma te wi e poti prakseri na a Wortu fu Gado, dan wi e kon sabi san o pasa trutru. Disi de so fu di langa ten na fesi, Bijbel no ben taki wawan fa a situwâsi ben o de now, ma a ben taki sosrefi san ben o pasa na ini a ten di e kon.

Fu eksempre, di Yesus Krestes ben de na grontapu, dan a fruteri sma furu sani fu a Kownukondre fu Gado (Lukas 4:43). A no de fu taki, dati den sma di ben arki en ben wani sabi o ten a tumusi moi Kownukondre dati ben o kon. Iya, dri dei bifo sma kiri Yesus, sondro taki a ben du wan ogri, dan den disipel aksi en: „San o de a marki fu yu denoya [leki tiriman fu a Kownukondre] èn fu a kaba fu a grontapu sistema disi?” (Mateyus 24:3) Yesus taigi den taki na Yehovah Gado wawan ben sabi soifri o ten a Kownukondre sa tiri heri grontapu (Mateyus 24:36; Markus 13:32). Ma toku, Yesus nanga tra sma ben taki na fesi sortu sani o pasa na grontapu, di ben o sori taki Krestes e tiri na ini a Kownukondre dati.

Fosi wi o go luku den sani di e sori taki wi e libi na ini den lasti dei fu a sistema disi, meki wi poti prakseri syatu na wan prenspari sani di pasa na ini hemel (2 Timoteyus 3:1). Yesus Krestes tron Kownu na hemel na ini 1914 (Danièl 7:13, 14).a Wantewante baka di Yesus tron Kownu, a du wan sani. Bijbel e fruteri wi: „Wan feti bigin na ini hemel: Mikael nanga den engel fu en ben feti nanga a bigi kaiman, èn a bigi kaiman nanga den engel fu en ben feti nanga den” (Openbaring 12:7). „A gran engel Mikael” na Yesus Krestes di e tiri leki Kownu na hemel (Yudas 9; 1 Tesalonikasma 4:16).b A bigi kaiman na Satan Didibri. Fa sani ben waka gi Satan nanga den ogri yeye di ben e hori baka gi en? Den lasi a feti èn Mikael nanga den tra engel „fringi” den komoto fu hemel go na grontapu (Openbaring 12:9). Fu dati ede, den ’hemel nanga den wan di e libi drape’, namku den getrow yeye manpikin fu Gado, e prisiri. Ma libisma no e prisiri. Bijbel ben taki na fesi: „Helu fu grontapu . . . , bika Didibri saka kon na unu èn a abi bigi atibron fu di a sabi taki en ten syatu.”—Openbaring 12:12.

Fu di Satan e atibron, meki a tyari helu noso pina nanga problema kon tapu den wan di e libi na grontapu. Ma dati sa de gi ’wan syatu pisi ten’ nomo. Bijbel e kari a ten disi „den lasti dei”. Wi kan breiti taki heri esi Didibri no sa abi krakti moro tapu grontapu. Ma sortu sani e sori taki wi e libi na ini den lasti dei?

[Futuwortu]

[Sma di abi a reti fu a prenki na tapu a kafti]

COVER: Foreground: © Chris Stowers/Panos Pictures; background: FAROOQ NAEEM/AFP/Getty Images