Na tra sma wawan musu de opregti?
„MI NO lobi lei tori kwetikweti, èn mi no lobi te sma e fruteri mi lei!”, na so wan meisje fu 16 yari ben taki nanga tranga sten. Furu fu wi e agri nanga a sani dati. Wi lobi en te den sani di trawan e fruteri wi noso e skrifi gi wi, na tru tori. Ma wi e taigi trawan san tru?
Di sma du wan ondrosuku na ini Doisrikondre, dan furu fu den sma di ben teki prati na a ondrosuku dati ben feni taki „a no de wan takru sani te sma e lei fu pikinpikin sani fu no kon na ini problema, noso fu sorgu taki ogri no e miti trawan. Iya den sma disi feni srefi taki a de fanowdu fu lei fu man abi wan bun banti nanga trawan.” Èn wan nyunsuman ben skrifi: „A bun te sma abi a gwenti fu fruteri san tru, ma a sani dati e meki a libi kon soi.”
A de so taki wi lobi te tra sma e fruteri wi san tru, aladi wi feni taki wi abi bun reide son leisi fu lei? A de fanowdu taki wi e fruteri san tru? San na den bakapisi te wi no e fruteri san tru?
Den takru bakapisi di e kon te wi e lei
Luku sortu takru bakapisi e kon te sma e lei. Fu di trowpatna nanga famiriman no de opregti, meki den no e frutrow makandra moro. Te sma e fruteri lei fu trawan, dan dati kan pori wan sma en nen. Te wrokoman e bedrigi a basi fu den, dan a basi sa abi fu pai moro kostu èn leki bakapisi fu dati sani e kon moro diri. Fu di sma e lei te den musu pai belasting moni, meki lanti no e kisi a moni di a abi fanowdu fu du bun wroko na ini a libimakandra. Fu di ondrosukuman e bedrigi sma, meki den e lasi na okasi fu abi bun bakapisi na ini a wroko fu den, èn den e pori a bun nen fu a skoro noso na organisâsi pe den e wroko. Fu dati ede, a no e fruwondru wi taki Bijbel e taigi wi taki wan tu fu den sani di Gado e tegu gi, na „wan tongo di e lei” nanga „wan falsi kotoigi di e taki leitori”!—Odo 6:16-19.
Te furu sma e lei, dan dati kan tyari takru bakapisi kon gi trawan èn sosrefi gi a heri libimakandra. Nowan sma kan taki dati a sani disi no tru. We, aladi dati de so, dan fu san ede sma e fruteri lei? Èn te wan sma no e fruteri fa sani de trutru, dan a de so ala ten taki a sma dati lei? Wi sa luku den piki tapu den aksi disi na ini na artikel di e kon.
[Prenki na tapu bladzijde 3]
Fu di trowpatna no de opregti, meki den no e frutrow makandra moro