Ondrofenitori

Mi poti mi howpu tapu wan Kownukondre di „no de fu a grontapu disi”

Soleki fa Nikolai Gutsulyak fruteri

Mi ben de na ini wan strafu-oso pe den strafuman opo densrefi teige a tirimakti. Fotenti na wan dei langa, mi ben de na ini a situwâsi disi. Wantronso mi skreki opo fu mi bedi di mi yere kanu e sutu. Den srudati broko kon na ini a strafuman-kampu nanga den pantserwagi fu den, fu kon feti nanga den strafuman. Mi ben frede taki mi ben o dede.

FA MI kon de na ini a situwâsi disi? Meki mi fruteri unu. A sani disi pasa na ini 1954. Na a ten dati, mi ben abi 30 yari. Mi nanga furu tra Yehovah Kotoigi di ben e libi na ondro a tiri fu Rosiakondre, ben musu koti strafu. Den poti wi na ini strafu-oso fu di wi no ben wani abi noti fu du nanga politiek èn fu di wi ben e fruteri trawan fu a Kownukondre fu Gado. Na ini a strafu-oso wi ben de nanga 46 brada nanga 34 sisa. Wi ben de na ini wan strafu-oso na ini a birti fu a dorpu Kengir, na ini a kondre Kasakstan. Drape wi ben de nanga dusundusun tra strafuman.

A yari na fesi, Josif Stalin, a fesiman fu Rosiakondre, kon dede. Furu fu den strafuman ben e howpu taki a nyun tirimakti fu Moskow ben o yepi den nanga den bigi problema di den ben abi na ini a strafu-oso. Den strafuman no ben breiti nanga a situwâsi fu den, èn te fu kaba den bigin opo densrefi teige a tirimakti. Na a pisi ten di den strafuman ben e opo densrefi teige a tirimakti, dan den Kotoigi ben musu sori den strafuman di ben atibron, èn sosrefi den srudati di ben e hori wakti, taki den no e teki sei ini a tori disi. Wi ben musu abi bribi na ini Gado fu no teki sei na ini a feti dati.

Den strafuman bigin opo densrefi teige a tirimakti!

Tapu 16 mei, den strafuman bigin opo densrefi teige a tirimakti. Tu dei baka dati, moro leki 3200 strafuman ben weigri fu wroko. Den ben wani taki sani musu waka moro bun na ini a strafu-oso èn taki den tiriman ben musu lekti a strafu gi den politiekman di ben de na strafu. A situwâsi kenki esi-esi. Na a fosi presi, den strafuman yagi den waktiman komoto na ini a strafu-oso. Baka dati, den koti wan tu presi opo na ini a skotu di ben de lontu a strafuman-kampu. A kampu ben prati na ini tu pisi. Wan sei ben de gi den mansma, èn a tra sei ben de gi den umasma. Den strafuman ben broko den skotu di ben prati den tu pisi disi, so taki ala strafuman ben kan libi nanga makandra. Den strafuman ben breiti nanga dati, èn bakaten son strafuman trow srefi. Na ini a strafu-oso yu ben abi priester tu èn den priester disi ben trow den strafuman. Furu fu den 14.000 strafuman di ben de na ini den dri strafu-oso kampu, ben opo densrefi teige a tirimakti.

Den strafuman na ini a kampu, seti wan komte di ben o taki nanga a legre. Ma heri esi, den memre fu a komte bigin meki trobi nanga makandra. Te fu kaba den strafuman di ben de fayafaya, teki a kampu abra. A situwâsi ben kon moro takru srefi. Den strafuman di ben e teki fesi, ben seti difrenti grupu fu sorgu taki sani waka soleki fa den ben wani. Wán grupu ben musu sorgu taki ala sani waka bun, wán grupu ben de leki srudati, èn a tra grupu ben e prati boskopu. Na ala sei fu a kampu, postu ben de di ben abi boksu na tapu. Den strafuman ben e gebroiki den boksu disi fu prati boskopu di ben e gi den tra strafuman deki-ati fu tan opo densrefi teige a tirimakti. Den strafuman ben e sorgu taki nowan sma lowe gowe. Den ben strafu iniwan sma di ben gens den, èn den ben taki srefi dati den ben o kiri iniwan sma di no ben o du san den e taki. Wi ben yere srefi taki den ben kiri wan tu strafuman kaba.

Fu di den strafuman ben fruwakti taki a legre ben o kon feti nanga den, meki den sreka sani bun fu kibri densrefi. Den strafuman di ben e teki fesi, ben wani taki furu fu den tra strafuman ben musu abi fetisani fu kan feti gi a kampu. Dati meki den gi ala strafuman a komando fu suku fetisani gi densrefi. Fu dati ede, den strafuman ben e hari den isri puru fu den fensre, èn nanga dati den ben meki nefi nanga tra fetisani. Den ben man feni wan tu gon nanga bom srefi.

Den ben e dwengi den Kotoigi fu feti tu

Na a ten dati, tu strafuman kon na mi. Wan fu den ben abi wan bun srapu nefi na ini en anu. A taki: „Teki a nefi disi! Yu o abi en fanowdu fu kibri yusrefi.” Mi begi Yehovah safri fu yepi mi fu no bruya. Mi piki en: „Mi na wan Kresten, wan Kotoigi fu Yehovah. Mi nanga tra Kresten de na ini strafu-oso fu di wi no e feti teige libisma, ma teige yeye. Den fetisani di wi e gebroiki na wi bribi èn a howpu di wi abi na ini Gado Kownukondre.”—Efeisesma 6:12.

Mi ben fruwondru taki a man ben frustan san mi taki. Ma a tra man naki mi bun tranga. Baka dati den gowe. Den strafuman di ben opo densrefi teige a tirimakti, ben go na ibri strafu-oso kamra fu dwengi den Kotoigi fu feti tu. Ma ala den Kresten brada nanga sisa fu wi weigri fu feti.

Di den strafuman ben hori wan konmakandra, dan den ben taki fu a fasi fa den Kotoigi fu Yehovah no e teki sei na ini a feti. Den ben taki: „Memre fu ibri kerki e feti gi wi; sma fu a Pinkster gemeente, Adventist gemeente, nanga a Baptist gemeente. Den Yehovah Kotoigi wawan ben weigri. San wi o du nanga den?” Wan sma ben taki dati den kan trowe wan Kotoigi na ini a onfu fu a strafu-oso fu tapu skreki gi den tra Kotoigi. Ma wan strafuman di ben de wan legre ofsiri fosi èn di furu strafuman ben e lespeki, opo tanapu èn a taki: „Dati na wan don sani fu du. Wi musu poti den alamala na ini wan strafu-oso kamra leti na a lanki fu a kampu, krosibei fu a portu. Efu a legre o kon feti nanga wi nanga den pantserwagi fu den, dan den Kotoigi na den fosiwan di den o naki kiri. Dan a no wi kiri den.” Den tra strafuman ben lobi san a taki.

Den poti wi na wan presi pe wi ben kan lasi wi libi

Syatu baka dati, strafuman ben e waka na ini a kampu e bari: „Un Yehovah Kotoigi, kon na doro!” Dan den tyari ala den 80 Kotoigi go na ini wan strafu-oso kamra na a lanki fu a kampu. Den puru den bedi na ini a kamra fu meki moro presi èn den seni wi go na inisei. A kamra dati ben tron wi strafu-oso na ini wan strafu-oso.

Den Kresten sisa na ini a grupu fu wi ben nai bedikrosi kon na wan fu prati a kamra na ini tu pisi. Wan sei ben de gi den brada èn a tra sei gi den sisa. Na so fasi umasma nanga mansma ben kan de aparti. (Bakaten, wan Kotoigi na ini Rosiakondre ben meki wan prenki fu a kamra disi. Yu kan si dati dyaso na ondrosei.) Di wi ben e libi na ini a pikin kamra dati, dan furu tron wi ben e begi makandra. Wi ben e aksi Yehovah fayafaya fu gi wi koni èn fu gi wi „a krakti di bigi pasa marki”.—2 Korentesma 4:7.

A heri pisi ten dati, wi ben abi den strafuman na a wan sei fu wi èn a legre fu Rosiakondre na a tra sei. Nowan fu wi ben sabi san den tu grupu disi ben o du. Wan owru Kresten brada ben taki: „No tan prakseri san den man disi kan du. Yehovah no sa libi wi.”

Den lobi-ati Kresten sisa fu wi, yonguwan nanga owruwan, ben e horidoro trutru. Wan fu den sisa ben abi pikinmoro 80 yari èn a ben abi yepi fanowdu. Trawan ben siki èn den ben abi datrayepi fanowdu. Na ini a pisi ten dati, den doro fu a kamra fu unu ben musu tan opo so taki den strafuman ben kan si ala ten san wi e du. Te neti, strafuman ben kon nanga den fetisani na ini a kamra fu wi. Son leisi wi ben e yere den e taki: „A Kownukondre fu Gado e sribi.” Te deiten, te wi ben kisi primisi fu go na a nyanyan-kamra, dan ala ten wi ben tan makandra èn wi ben e begi Yehovah fu kibri wi gi den ogriman.

Te wi ben de na ini a kamra fu wi, wi ben e pruberi fu gi makandra deki-ati fu tan abi wan tranga bribi. Fu eksempre, furu tron wan brada ben e fruteri wan Bijbel tori. A ben e taki tranga nofo, so taki wi alamala ben kan yere. Baka dati, a brada ben e sori san a tori abi fu du nanga a situwâsi fu wi. Wan owru brada ben lobi fu taki fu a legre fu Gideon. A ben taigi wi: „Na ini a nen fu Yehovah, 300 mansma di ben abi sani fu prei poku na ini den anu, ben go feti nanga 135.000 srudati di ben abi fetisani na ini den anu. Nowan fu den 300 man kisi mankeri” (Krutuman 7:16, 22; 8:10). A tori disi èn tra Bijbel tori, tranga a bribi fu wi. Di mi go na strafu, mi no ben dopu so langa ete. Ma di mi si a tranga bribi fu tra brada nanga sisa di abi moro ondrofeni, dan dati gi mi furu deki-ati. Mi ben firi taki Yehovah ben de nanga wi trutru.

A feti e bigin

Wan tu wiki ben pasa, èn sani ben span srefisrefi na ini a kampu. O moro den strafuman nanga den tiriman ben e taki, o moro a trobi ben kon bigi. Den strafuman di ben e teki fesi, ben wani nomonomo taki a tirimakti na ini Moskow ben musu seni wan sma fu kon taki nanga den. Den tiriman fu den sei, ben hori nomo taki den strafuman ben musu gi densrefi abra, den ben musu gi den fetisani na a legre, èn den ben musu go wroko baka. Ala tu grupu ben hori nomo na san den ben wani. Na a ten dati, den srudati ben lontu a kampu kaba. Den ben de klariklari fu broko kon na ini a kampu, te den ben o kisi a komando fu du dati. Den strafuman ben de srekasreka tu fu feti. Den ben poti ipi-ipi sani tapu makandra fu meki taki den srudati no kon na inisei, èn den ben abi bun furu fetisani. Wi alamala ben e fruwakti taki heri esi den strafuman nanga a legre ben o feti.

Tapu 26 yuni, a babari fu den kanu wiki wi. Den pantserwagi broko a skotu èn den kon na ini a kampu. Wan grupu srudati ben de leti na den baka e sutu nanga gon. Den strafuman, mansma nanga umasma, lon go miti den pantserwagi aladi den ben e bari nanga atibron. Den ben e trowe ston, bom di densrefi ben meki, èn iniwan tra sani di den ben kan feni. A feti ben hebi, èn wi ben de leti na mindri den tu grupu disi. Wi begi Yehovah fu yepi wi. Fa a ben o du dati?

Wantronso, srudati broko kon na ini a kamra fu wi. Den bari: „Kon na doro, un santawan! Du esi, un lon komoto na ini a kampu, go na a tra sei fu a skotu!” Na ofsiri di ben teki fesi, gi den srudati a komando fu no sutu wi, ma den ben musu tan nanga wi fu sorgu taki noti no pasa nanga wi. Aladi a feti ben e go nanga langa, wi ben sidon na gron, dorosei fu a kampu. Fo yuru langa wi ben arki fa bom e sutu, fa gon e sutu, èn fa sma ben bari na ini a kampu. Baka wan pisi ten, ala sani ben tiri. Moro lati, na mamanten, wi si den srudati e tyari den dedewan komoto na ini a kampu. Wi kon yere taki hondrohondro sma ben kisi mankeri, noso dede.

Moro lati, wan ofsiri di mi ben sabi, kon na wi. A aksi mi: „Taigi mi Nikolai, suma yepi yu? Wi noso Yehovah?” Wi taigi en tangi nanga wi heri ati fu di a kibri wi. Ma wi ben taigi en tu: „Wi e bribi taki na a almakti Gado fu wi, Yehovah, gebroiki yu fu kibri wi, neleki fa a ben gebroiki trawan fu frulusu den futuboi fu en na ini Bijbel ten.”—Esra 1:1, 2.

A srefi ofsiri ben fruteri wi tu fa den srudati ben sabi suma na wi èn pe wi ben de. A ben taki dati a legre ben taki nanga den strafuman wan leisi. Den srudati ben taigi den strafuman taki den yere taki den ben kiri tra strafuman di no ben wani wroko makandra nanga den. Fu sori taki dati no tru, dan den strafuman piki den taki den Yehovah Kotoigi no ben e horibaka gi den, ma den no ben kiri den. Na presi fu dati, leki strafu den poti ala den Kotoigi na ini wan fu den strafu-oso kamra na ini a kampu. Den legre ofsiri no ben frigiti a sani dati.

Wi tan horibaka gi a Kownukondre

A pôpi skrifiman, Aleksandr Solzhenitsyn, skrifi wan buku di nen The Gulag Archipelago, pe a e taki fu den sani di wi ondrofeni na a ten dati. A ben taki fu san ede den strafuman ben opo densrefi: „A no de fu taki dati wi ben wani kon fri, . . . ma suma ben kan fri wi?” Leki Kotoigi fu Yehovah na ini a srefi strafuman-kampu, wi ben wani kon fri tu. Ma wi no ben wani komoto na strafu wawan, wi ben wani tu taki a Kownukondre fu Gado musu meki wi kon fri. Di wi ben de na ini strafu-oso, wi ben sabi taki wi ben abi krakti fu Gado fanowdu fu tan horibaka gi a Kownukondre fu en. Èn Yehovah gi wi ala san wi ben abi fanowdu. A meki wi tron winiman sondro taki wi ben abi fu gebroiki nefi nanga bom.—2 Korentesma 10:3.

Yesus Krestes ben taigi Pilatus: „Mi kownukondre no de fu a grontapu disi. Efu mi kownukondre ben de fu a grontapu disi, dan den dinari fu mi ben o feti” (Yohanes 18:36). Fu dati ede, leki bakaman fu Krestes wi no ben teki prati na politiek afersi. Wi tan loyaal na Gado Kownukondre na a ten di den strafuman opo densrefi teige a tirimakti èn baka a pisi ten dati srefi, èn wi ben breiti taki trawan ben kan si dati. Solzhenitsyn ben skrifi fu a fasi fa wi ben e tyari wisrefi na a ten dati: „Den Yehovah Kotoigi no ben frede fu hori densrefi finifini na a bribi fu den, èn den weigri fu meki sani fu kibri a kampu, noso fu hori wakti.”

Moro leki 50 yari pasa sensi den muilek ten dati. Ma furu tron te mi e prakseri a ten dati, dan mi de nanga tangi fu di mi leri someni sani di mi no sa frigiti noiti. Fu eksempre, mi leri fu wakti Yehovah èn fu frutrow dorodoro tapu a krakti fu en. Iya, neleki furu tra Kotoigi di ben e libi na ondro a tiri fu Rosiakondre na a ten dati, na so mi ondrofeni taki Yehovah e frulusu den wan di e wakti a Kownukondre fu en di „no de fu a grontapu disi”. Fu tru, a e kibri den èn a e meki den kon fri.

[Prenki na tapu bladzijde 8, 9]

A strafuman-kampu na ini Kasakstan pe wi ben de

[Prenki na tapu bladzijde 10]

Wan prenki fu a strafu-oso kamra fu den Kotoigi; a pisi fu den umasma

[Prenki na tapu bladzijde 11]

Mi nanga tra Kresten brada, baka di wi komoto na strafu