Aksi fu leisiman
Omeni fu den meti di krin Noa ben tyari go na ini na ark? Na seibi fu ibri meti di krin, noso seibi manwan nanga seibi umawan fu ibri meti?
Baka di Noa kaba bow na ark, dan Yehovah taigi en: „Go na ini na ark, yu, makandra nanga yu heri osofamiri, bika fu ala libisma di e libi na grontapu, mi si taki yu wawan de regtfardiki. Fu ibri meti di krin yu musu teki seibi nanga yu, manwan nanga umawan. Fu ibri meti di no krin yu musu teki soso tu nanga yu, wan manwan nanga wan umawan” (Genesis 7:1, 2). Son Bijbel e taki fu seibi paar.
Na ini Hebrewtongo, a wortu di wani taki seibi paar, trutru skrifi leki „seibi seibi” (Genesis 7:2). Ma a no fu di wan nomru skrifi tu leisi baka makandra, meki dati wani taki dati den nomru disi musu teri kon na wan. Fu eksempre, 2 Samuel 21:20 e taki dati „wan bun bigi man ben de di ben abi siksi finga na ibri anu èn siksi futufinga na ibri futu”. Na ini Hebrewtongo, a nomru „siksi” skrifi tu leisi baka makandra. Ma disi no wani taki dati a bun bigi man ben abi twarfu finga na ibri anu èn twarfu futufinga na ibri futu. Na ini Hebrewtongo a nomru siksi di skrifi tu leisi baka makandra, wani taki nomo dati a man ben abi siksi finga na ibri anu èn siksi futufinga na ibri futu.
Sobun, „seibi seibi” na ini Genesis 7:2 no wani taki seibi paar, noso 14, neleki fa „tu tu” no wani taki tu paar, noso fo, na ini Genesis 7:9, 15. Fu dati ede, aladi Noa ben musu tyari seibi fu ibri meti di krin go na ini na ark, a ben musu tyari „soso tu” fu den wan di no krin.
Ma san den wortu di skrifi leti baka a wortu „seibi” na Genesis 7:2 wani taki, namku „manwan nanga umawan”? Den wortu disi gi son sma a denki taki Gado ben taigi Noa fu teki seibi paar fu ibri sortu meti di krin. Ma den meti di krin no ben musu go na ini na ark soso fu meki pikin bakaten. Genesis 8:20 e taki dati baka di Noa komoto na ini na ark, dan a „bow wan altari gi Yehovah, a teki wan tu fu den meti nanga fowru di krin, èn a bron den leki wan bron-ofrandi na tapu na altari”. Fu di seibi meti di krin ben de, meki Noa ben kan tyari wán fu den leki ofrandi, èn na so siksi meti ben tan abra di ben kan meki pikin nanga makandra.