„Sorgu taki yu e du a diniwroko fu Masra di yu ben teki na yu tapu”
„Sorgu taki yu e du a diniwroko fu Masra di yu ben teki na yu tapu.”—KOL. 4:17.
1, 2. Sortu frantwortu Kresten abi?
WI ABI a bigi frantwortu fu yepi den sma na wi lontu. Den bosroiti di den sma disi e teki now kan tyari libi noso dede kon gi den na a ten fu „a bigi banawtu” (Openb. 7:14). A sma di skrifi a buku Odo nanga yepi fu santa yeye ben taki: „Frulusu den wan di den e tyari go dede; èn den wan di e slinger go fu meki sma srakti den, grantangi, tapu pasi gi den.” Den wortu disi e naki wi ati trutru! Te wi no e warskow den sma taki den musu teki wan bosroiti, dan dati kan meki wi kisi brudu-paiman. Fu taki en leti, a srefi skrifiman disi e taki moro fara: „Efu yu ben sa taki: ’Luku! Wi no ben sabi disi’, dan a no a sma di e ondrosuku na ati sa sabi efu dati tru, èn a no a sma di e luku yu finifini sa sabi dati, èn a no sa pai libisma gi den sani di den du?” A de krin fu si taki den futuboi fu Yehovah no kan taki dati den ’no sabi’ sortu ogri sa miti sma.—Odo 24:11, 12.
2 Yehovah e si a libi leki wan warti sani. A e gi den futuboi fu en deki-ati fu du ala muiti fu yepi so furu sma leki den man fu kisi libi. Ibri futuboi fu Gado musu meki a boskopu bekènti di e gi sma libi èn di de fu feni na ini Gado Wortu. A wroko di wi musu du, na a srefi leki a di fu wan waktiman di e gi wan warskow te a e si taki problema e kon. Wi no wani kisi brudu-paiman, soso fu di wi no warskow den sma di kan lasi den libi (Esek. 33:1-7). Dati meki a de prenspari trutru taki wi e tan „preiki a wortu”!—Leisi 2 Timoteyus 4:1, 2, 5.
3. Sortu tori wi sa luku na ini na artikel disi èn na ini den tu tra artikel?
3 Na artikel disi sa sori yu san yu kan du te sani e tapu yu fu teki prati na a diniwroko di e kibri a libi fu sma, èn fa yu kan yepi moro sma. A tra artikel sa sori yu fa yu kan kisi a koni fu leri sma den tumusi prenspari tru tori fu Bijbel. A di fu dri studie-artikel sa taki fu wan tu fu den moi bakapisi di Kownukondre preikiman na heri grontapu e kisi. Ma fosi wi poti prakseri na den tori dati, dan a bun fu luku wan tu reide fu san ede a ten disi prenspari so.
Fu san ede furu sma no abi howpu
4, 5. Sortu sani e miti libisma, èn sortu krakti den sani dati abi na den tapu?
4 Den sani di e pasa na grontapu e sori taki wi e libi na „a kaba fu a grontapu sistema disi”, èn taki a kaba de heri krosibei. Libisma e ondrofeni den sani di ben o pasa na ini „den lasti dei”, soleki fa Yesus nanga den disipel fu en ben taki. Sma e kisi fu du nanga orloku, angriten, gronseki, nanga tra rampu, èn den sani disi de leki „a hebi pen fu wan uma di de fu kisi en pikin”. Sma na ala sei e libi soleki fa densrefi wani, den e denki densrefi nomo, èn den e du sani di Gado no feni bun. A ten disi na wan ’muilek ten di tranga fu pasa’ srefi gi sma di e hori densrefi na den gronprakseri fu Bijbel.—Mat. 24:3, 6-8, 12; 2 Tim. 3:1-5.
5 Ma bun furu sma no sabi trutru fu san ede den sani disi e pasa na grontapu. Dati meki furu fu den e frede taki ogri sa miti den nanga den osofamiri. Furu sma e sari te lobiwan fu den e lasi libi, noso te tra rampu e miti den. Fu di den sma disi no sabi soifri fu san ede den sani disi e pasa èn fa den problema disi o lusu, meki den no abi howpu.—Ef. 2:12.
6. Fu san ede „Babilon a Bigiwan” no man yepi den bakaman fu en?
6 „Babilon a Bigiwan”, a grontapumakti fu falsi bribi, no man trowstu den ipi-ipi sma disi. Na presi fu dati, a bruya bun furu sma fu di den dringi „a win fu a hurudu fu en”. Dati meki furu fu den sma disi no sabi fa den musu anbegi Gado. Fu di falsi bribi e tyari ensrefi leki wan huru-uma, meki a kori „den kownu fu grontapu” èn a tiri den. Boiti dati, a gebroiki falsi leri nanga afkodreiwroko fu hori bun furu sma na ondro a makti fu den politiek tiriman fu den. Na so falsi bribi kisi makti, ma na a srefi ten a drai baka dorodoro gi den tru leri fu Bijbel.—Openb. 17:1, 2, 5; 18:23.
7. San o miti furu libisma, ma fa sonwan fu den kan kisi yepi?
7 Yesus ben leri den disipel fu en taki furu libisma e waka na tapu a bradi pasi di e tyari sma go dede (Mat. 7:13, 14). Son sma de na tapu a pasi dati fu di densrefi teki a bosroiti fu no bribi den leri fu Bijbel. Ma furu trawan de na tapu a pasi disi fu di den kerki fesiman kori den, noso fu di den kerki fesiman disi no meki den kon sabi san Yehovah e aksi fu den trutru. Kande sonwan fu den sma disi sa kenki den libi efu den kon frustan krin san Bijbel e leri. Ma den sma di e tan na ini Babilon a Bigiwan èn di e tan weigri fu hori densrefi na den markitiki fu Bijbel, no sa kisi kibri na a ten fu „a bigi banawtu”.—Openb. 7:14.
Tan preiki
8, 9. San den fosi Kresten du di sma ben e frufolgu den, èn fu san ede den du dati?
8 Yesus ben taki dati den disipel fu en ben o preiki a bun nyunsu fu a Kownukondre, èn taki den ben o meki disipel (Mat. 28:19, 20). Dati meki ala ten tru Kresten si en leki wan prenspari sani fu teki prati na a preikiwroko, fu di dati e sori taki den de getrow na Gado. Boiti dati, den e si a wroko disi leki wan sani di ibri Kresten musu du. Fu dati ede, den fosi bakaman fu Yesus ben e horidoro srefi te sma ben e gens den. Fu di den ben abi a frutrow taki Yehovah ben o gi den a krakti fu horidoro, meki den ben e begi en fu yepi den fu tan „taki a wortu fu [en] sondro frede”. Leki bakapisi fu dati, Yehovah gi den en santa yeye, èn den ben e taki a wortu fu Gado sondro frede.—Tori. 4:18, 29, 31.
9 Den bakaman fu Yesus ben e tapu fu preiki a bun nyunsu te sma ben e du ogri-ati sani nanga den? Kwetikweti. Fu di den Dyu kerki fesiman ben e atibron nanga a preikiwroko fu den apostel, meki den grabu den apostel disi, den tapu skreki gi den, èn den wipi den. Ma toku den apostel ’tan gi sma leri èn den tan fruteri sma a bun nyunsu fu Yesus, a Krestes’. Den ben e frustan heri bun taki den ben musu „gi yesi na [Gado] na presi fu libisma”.—Tori. 5:28, 29, 40-42.
10. Sortu problema e miti Kresten na ini a ten disi, ma san sa de a bakapisi te den e tyari densrefi na wan fasi di fiti?
10 Na ini a ten disi, furu futuboi fu Gado no ondrofeni taki sma fon den, noso taki sma poti den na strafu-oso fu di den e preiki a bun nyunsu. Ma ala tru Kresten e kisi tesi na difrenti fasi. Fu di yu kisi leri fu Bijbel, meki yu konsensi kan taigi yu taki yu musu tyari yusrefi na wan spesrutu fasi. Kande sma no lobi a fasi dati fa yu e tyari yusrefi, noso kande a fasi dati e meki taki yu e difrenti fu trawan. Kande sma na yu wrokope, skoromati, noso birtisma no lobi fa yu de, fu di yu e hori yusrefi na Bijbel gronprakseri. Ma awansi sma no e denki bun fu yu, toku yu musu tan du san Gado e aksi fu yu. Den sma fu grontapu de na dungru fu di den no sabi Gado, ma Kresten musu „skèin leti” (Fil. 2:15). Kande son sma di e si den bun sani di yu e du, sa abi warderi gi den sani dati, èn den sa gi glori na Yehovah.—Leisi Mateyus 5:16.
11. (a) San son sma kan du nanga wi fu di wi e preiki a bun nyunsu? (b) Na sortu fasi sma frufolgu na apostel Paulus, èn san a du?
11 Wi musu abi deki-ati fu man tan preiki a Kownukondre boskopu. Kande son sma, srefi famiriman, sa spotu yu, noso den sa du tra sani fu meki yu lasi-ati (Mat. 10:36). Sma ben fon na apostel Paulus moro leki wán leisi, fu di a ben e du a preikiwroko na wan getrow fasi. Luku san a taki baka di a sani dati miti en. A ben skrifi: ’Baka di den sma pina wi fosi èn di den du sani nanga wi na wan syen fasi, dan wi Gado gi wi deki-ati fu fruteri unu a bun nyunsu fu Gado, aladi a ben muilek srefisrefi gi wi’ (1 Tes. 2:2). Fu tru, a no ben makriki gi Paulus fu tan preiki a bun nyunsu baka di sma grabu en, baka di den puru en krosi na en skin, fon en nanga tiki, èn poti en na strafu-oso (Tori. 16:19-24). Fa a du kon taki a ben abi a deki-ati fu tan preiki go doro? Na fu di a ben angri fu du a preikiwroko di Gado ben gi en fu du.—1 Kor. 9:16.
12, 13. Sortu problema son preikiman abi, èn fa den preikiman disi e horidoro?
12 A kan de wan tyalensi tu fu tan preiki fayafaya na ini kontren pe nofo tron sma no de na oso, noso pe furu sma no wani arki a Kownukondre boskopu. San wi kan du na ini den sortu situwâsi dati? Kande wi sa si taki wi musu teki moro deki-ati fu taki nanga sma di wi e miti te wi no de na ini a preikiwroko. Kande wi musu preiki tu na difrenti ten na ini a wiki, noso kande wi musu preiki moro na ini kontren pe wi kan miti moro sma.—Luku Yohanes 4:7-15; Tori. 16:13; 17:17.
13 Tra problema di furu preikiman abi, na taki den kon owru èn taki den siki, èn den sani dati kan meki taki den no man du so furu moro na ini a preikiwroko. Efu na so a de nanga yu, dan no lasi-ati. Yehovah sabi heri bun san na a situwâsi fu yu, èn a e warderi san yu kan du. (Leisi 2 Korentesma 8:12.) Awansi a de so taki sma e gens yu, awansi den no wani arki a boskopu, noso awansi yu e siki, du ala san yu man fu prati a bun nyunsu nanga trawan.—Odo 3:27; luku Markus 12:41-44.
’Sorgu taki yu e du a diniwroko fu yu dorodoro’
14. Fa Paulus ben de wan eksempre gi den Kresten brada nanga sisa fu en, èn sortu rai a gi den?
14 Na apostel Paulus ben e du a preikiwroko fu en fayafaya, èn a ben e gi den Kresten brada nanga sisa fu en deki-ati fu du a srefi (Tori. 20:20, 21; 1 Kor. 11:1). Wan preikiman di Paulus ben gi furu deki-ati, na wan Kresten fu a fosi yarihondro, èn a Kresten dati ben nen Arkepus. Na ini a brifi di Paulus ben skrifi gi den Kolosesma, a ben taki: „Taigi Arkepus: ’Sorgu taki yu e du a diniwroko fu Masra di yu ben teki na yu tapu’” (Kol. 4:17). Wi no sabi suma Arkepus ben de noso san ben de a situwâsi fu en, ma a de krin taki a ben teki a diniwroko na en tapu. Efu yu na wan Kresten di gi en libi abra na Gado, dan yu teki wan diniwroko na yu tapu tu. Yu e tan meki muiti fu du a diniwroko fu yu dorodoro?
15. Te wi gi wisrefi abra na Gado, dan san dati wani taki, èn sortu sani wi sa musu aksi wisrefi?
15 Fosi wi teki dopu, wi begi Yehovah nanga wi heri ati fu taigi en taki wi wani gi wi libi abra na en. Disi wani taki dati wi teki a bosroiti fu du a wani fu en. Dati meki a bun fu aksi wisrefi a sani disi: ’A de so trutru taki mi e si a wani fu Gado leki a moro prenspari sani na ini mi libi?’ Kande wi abi difrenti frantwortu, soleki a sorgu di wi musu sorgu gi wi osofamiri. Yehovah e fruwakti taki wi e tyari den sortu frantwortu disi (1 Tim. 5:8). Ma fa wi e gebroiki wi ten nanga wi krakti moro fara? San na a moro prenspari sani gi wi?—Leisi 2 Korentesma 5:14, 15.
16, 17. San yongu Kresten, noso den wan di no abi furu frantwortu kan bosroiti fu du?
16 Yu na wan yongu dopu Kresten di klari skoro kaba, noso yu o klari skoro heri esi? Kande yu no abi a hebi frantwortu ete fu sorgu gi wan osofamiri. Sobun, san yu o du nanga yu libi? Sortu bosroiti yu musu teki fu man du ala san yu pramisi Yehovah? Furu sma seti den libi na so wan fasi taki den man pionier. Leki bakapisi fu dati, den kisi furu prisiri èn den de koloku tu.—Ps. 110:3; Preik. 12:1.
17 Kande yu kon bigi kaba. Kande yu e wroko heri wiki na wan wrokope noso na wan tra presi, èn boiti taki yu musu sorgu gi yusrefi, yu no abi furu tra frantwortu. A no de fu taki dati yu e prisiri fu teki prati so furu leki yu man na a wroko di de fu du na ini a gemeente. Ma yu kan kisi moro prisiri srefi. Yu prakseri fu du moro na ini a diniwroko? (Ps. 34:8; Odo 10:22) Na ini son kontren, furu sma musu yere a bun nyunsu ete di kan meki den kisi têgo libi. Yu denki taki yu kan tyari wan tu kenki kon na ini yu libi? Kande yu kan go dini na ini wan kontren pe moro Kownukondre preikiman de fanowdu.—Leisi 1 Timoteyus 6:6-8.
18. Sortu kenki wan yongu trowpaar tyari kon na ini den libi, èn san na a bakapisi?
18 Luku na eksempre fu Kevin nanga Elena di e libi na Amerkankondre.a Neleki furu trowpaar na ini a kontren pe den e tan, Kevin nanga Elena ben feni taki den ben musu bai wan oso. Den ala tu ben e wroko heri wiki, èn den ben abi wan switi libi. Ma a wroko fu den èn den sani di den ben musu du na oso, ben e meki taki den no ben man teki prati doronomo na a preikiwroko. Den kon si taki den ben e gebroiki furu fu den ten nanga krakti fu sorgu gi den gudu fu den. Ma di Kevin nanga Elena si fa wan pionier trowpaar ben abi wan koloku libi aladi den no abi furu gudu, dan den bosroiti fu tyari kenki kon na ini den libi. Den begi Yehovah fu yepi den, èn baka dati den seri na oso fu den èn den froisi go tan na ini wan moro pikinwan. Elena bigin wroko wan tu dei nomo na ini a wiki, èn a tron wan pionier. Fu di Kevin kisi deki-ati fu den sani di en wefi ben e ondrofeni na ini a preikiwroko, meki a tapu nanga a grontapuwroko fu en, èn a bigin pionier. Wan pisi ten baka dati, den froisi go na wan kondre na ini Zuid-Amerika pe moro Kownukondre preikiman de fanowdu. Kevin e taki: „Wi ben abi wan koloku trowlibi kaba, ma di wi go du moro na ini a diniwroko fu Gado, dan wi kon de moro koloku.”—Leisi Mateyus 6:19-22.
19, 20. Fu san ede a wroko di wi e du fu preiki a bun nyunsu, na a moro prenspari wroko di e du na ini a ten disi?
19 A wroko di wi e du fu preiki a bun nyunsu, na a moro prenspari wroko di e du na grontapu na ini a ten disi (Openb. 14:6, 7). A wroko disi e yepi fu santa a nen fu Yehovah (Mat. 6:9). A boskopu fu Bijbel e meki taki dusundusun sma di e gi yesi na a boskopu disi ibri yari, e kon abi wan moro bun libi, èn a sani disi kan tyari frulusu kon gi den. Ma „fa . . . den o yere efu wan sma no e preiki gi den?”, na so na apostel Paulus ben aksi (Rom. 10:14, 15). Iya, efu nowan sma e preiki, dan sma no o man yere a boskopu. Fu san ede yu no e teki a fasti bosroiti fu du a diniwroko fu yu dorodoro?
20 Wan tra sani de di yu kan du fu yepi sma fu kon frustan taki den e libi na ini wan prenspari pisi ten, èn taki den bosroiti di den e teki kan tyari dede noso libi kon gi den. Yu musu pruberi fu tron wan moro bun leriman. A di fu tu artikel sa sori yu fa yu kan du dati.
[Futuwortu]
a Wi kenki den nen.
San yu ben sa piki?
• Sortu frantwortu Kresten abi?
• San wi musu du te sani e tapu wi fu teki prati doronomo na a preikiwroko?
• Fa wi kan sorgu taki wi e du a diniwroko fu wi dorodoro?
[Prenki na tapu bladzijde 5]
Wi musu abi deki-ati fu man tan preiki te sma e gens wi
[Prenki na tapu bladzijde 7]
San yu kan du te yu e preiki na ini kontren pe nofo tron sma no de na oso?