Samuel ben tan du san bun

YU SI wan leisi kaba taki trawan du ogri sani?—a Samuel ben si dati. A ben e libi na wan presi pe yu no ben o fruwakti taki sma du ogri sani. A presi dati ben de a tabernakel fu Gado, noso a presi fu anbegi, di ben de na ini a foto Silo. Meki wi go luku fa a du kon taki, sowan 3000 yari pasa, Samuel ben go libi na a tabernakel.

Bifo Samuel gebore, en mama Hana ben wani wan beibi trutru. Wan leisi di Hana go na a tabernakel, a ben begi Gado fu a sani disi. A ben e begi nanga so wan faya na ini en ati, taki en mofo ben e buweigi. Di a granpriester Eli si a sani disi, dan a denki taki Hana ben drungu. Ma di Eli kon frustan taki Hana ben de nanga bigi broko-ede, dan Eli blesi en èn a taki: „Meki a de so taki a Gado fu Israel gi yu san yu aksi en na ini begi.”—1 Samuel 1:17.

Bakaten Samuel gebore, èn Hana ben de so koloku taki a taigi en masra Elkana: ’So esi leki mi puru a boi na bobi, mi o tyari en go na a tabernakel, so taki a kan dini Gado drape.’ Èn na dati Hana du! Na a ten dati, a kan de so taki Samuel ben abi fo, noso feifi yari.

Eli ben kon owru èn den manpikin fu en, Hofni nanga Pinehas, no ben anbegi Yehovah na a yoisti fasi. Den ben e du hurudu srefi nanga den uma di ben e kon na a tabernakel! San yu denki taki den papa ben musu du?— Iya, a ben musu gi den trangaleri èn a no ben musu gi pasi taki den du den ogri sani dati.

Na a ten dati, Samuel ben yongu èn a ben e gro kon bigi na ini a tabernakel. A kan de so taki Samuel ben sabi dati den manpikin fu Eli ben e tyari densrefi na wan fasi di no fiti. Samuel ben go du den ogri sani dati di Hofni nanga Pinehas ben e du?— Nôno, Samuel ben tan du san bun, soifri soleki fa en papa nanga mama ben leri en. A no e fruwondru wi taki Yehovah en ati ben bron nanga Eli. Yehovah ben seni srefi wan profeiti fu taigi Eli fa a ben o strafu na osofamiri fu en, spesrutu den ogri manpikin fu en.—1 Samuel 2:22-36.

Samuel ben tan dini makandra nanga Eli na a tabernakel. Wan neti di Samuel ben e sribi, a yere wan sten kari en. Sobun, Samuel lon go na Eli, ma Eli taki dati a no ben kari en. Ne a sten kari en baka. We, di a sani disi pasa na a di fu dri leisi, dan Eli taigi Samuel fu taki disi: „Taki Yehovah, bika yu futuboi e arki.” Di Samuel taki dati, dan Yehovah bigin taki nanga en. Yu sabi san Yehovah taigi Samuel?—

Soleki fa Gado ben taigi wan profeiti kaba, na so a e taigi Samuel now, taki a o strafu Eli en osofamiri. Na a tra mamanten, Samuel ben frede fu taigi Eli san Yehovah ben taki. Ma Eli ben begi en: „Grantangi, no kibri noti gi mi.” Te fu kaba, Samuel fruteri Eli ala sani di Yehovah ben taki dati A ben o du. Iya, ala sani di a taki ben de soifri soleki fa a profeiti fu Yehovah ben taigi Eli na fesi kaba. Eli ben taki: „Meki a [Yehovah] du san a feni bun.” Te fu kaba, sma kiri Hofni nanga Pinehas, èn baka dati Eli dede tu.—1 Samuel 3:1-18.

Na a srefi ten, ’Samuel ben e gro kon bigi, èn a ben de krin fu si taki Yehovah ben de nanga en’. A kan de so taki Samuel ben de wan tini na a ten dati, èn dati na wan prenspari pisi ten na ini a libi fu yonguwan. Yu denki taki a ben makriki gi Samuel fu tan du san bun, srefi te trawan no ben e du dati?— Aladi a no ben makriki gi Samuel, toku a ben tan gi yesi na Yehovah en heri libi langa.—1 Samuel 3:19-21.

Fa a de nanga yu? Yu o de leki Samuel te yu kon bigi? Yu o tan du san bun? Yu o tan du den sani di yu leri fu Bijbel? Yu o tan du den sani di yu papa nanga mama leri yu? Efu yu du dati, dan yu sa meki Yehovah èn yu papa nanga mama prisiri.