Yehovah no sa gowe libi den wan di e tai hori na en

„[Yehovah] no sa gowe libi den wan di e tai hori na en. Fu tru den sa kisi kibri te ten di no skotu.”—PS. 37:28.

1, 2. (a) Sortu sani di ben pasa na ini a di fu tin yarihondro bifo Krestes, ben e meki en muilek gi den futuboi fu Gado fu tan dini en nanga den heri ati? (b) San na den dri situwâsi pe Yehovah kibri den wan di ben e tai hori na en?

NA A pisi ten fu a di fu tin yarihondro bifo Krestes, a pipel fu Gado ben musu teki wan prenspari bosroiti. Pikinmoro wan borgufeti ben pasa na mindri a pipel fu Israel, fu di den lo na a noordsei no ben lobi a situwâsi di den ben de na ini. Ma a sani disi no pasa fu di den lo disi kisi na okasi fu abi den eigi kownu. Yerobeam, a nyun kownu fu den, no draidrai fu seti sani fu sorgu taki sma saka densrefi na ondro a makti fu en. Fu dati ede, a fruplekti den sma na ini a kondre fu en fu teki prati na wan nyun fasi fu anbegi. A ben wani den fu tan horibaka gi en. San den futuboi fu Yehovah ben o du? Den ben o tan anbegi Gado nanga den heri ati? Dusundusun fu den du dati, èn Yehovah kibri den aladi den ben e tai hori na en.—1 Kow. 12:1-33; 2 Kron. 11:13, 14.

² Na ini a ten disi, difrenti sani de di e meki en muilek gi den futuboi fu Gado fu tan dini en nanga den heri ati. Bijbel e warskow: „Tan nanga krin frustan, de na ai. Didibri, a feanti fu unu, e waka lontu leki wan lew di e bari, fu di a e suku fu swari wan sma.” Fa wi kan kakafutu gi en? Èn fa wi kan tan abi wan tranga bribi? (1 Petr. 5:8, 9) Meki wi poti prakseri na wan tu sani di ben pasa na a ten di Kownu Yerobeam tron kownu na ini a yari 997 bifo Krestes, èn meki wi luku san wi kan leri fu den sani disi. Na ini a muilek pisi ten dati, den futuboi fu Yehovah ben e kisi kwinsi. Den ben e kisi fu du tu nanga sma di ben fadon komoto na bribi, aladi den ben musu du wroko di no ben makriki fu du. Na a ten dati, Yehovah noiti no gowe libi den wan di ben e tai hori na en, èn a no sa du dati tu na ini a ten disi.—Ps. 37:28.

Te den e kisi kwinsi

3. Fu san ede a pipel no ben e kisi kwinsi di David ben e tiri leki kownu?

³ Meki wi luku fosi san ben de a situwâsi di Yerobeam tron kownu. Odo 29:2 e taki: „Te wan ogrisma e tiri, dan a pipel e soktu.” Di Kownu David ben e tiri leki kownu fu Israel fu owruten, dan a pipel no ben e soktu. Aladi David ben meki fowtu, toku a ben e dini Gado nanga en heri ati, èn a ben e frutrow na en tapu. A tirimakti fu David no ben e kwinsi a pipel. Yehovah ben meki wan frubontu nanga David. A ben taki: „Fu ala ten yu bakapikin o tiri leki kownu èn a kownukondre fu yu o tan. A kownumakti fu yu o tan fu ala ten.”—2 Sam. 7:16.

4. San ben musu pasa so taki Salomo nanga a pipel fu en ben kan tan kisi blesi fu Gado?

⁴ Na ini a bigin di Salomo, a manpikin fu David, ben e tiri leki kownu, dan vrede ben de na ala sei èn sani ben e waka bun nanga a pipel. Dati meki wi kan taki nanga leti taki a pisi ten dati e prenki a Dusun Yari Tiri fu Krestes Yesus (Ps. 72:1, 17). Nowan fu den 12 lo fu Israel ben abi reide fu opo densrefi teige a tirimakti na a ten dati. Ma san ben musu pasa so taki Salomo nanga a pipel fu en ben kan tan kisi blesi fu Gado? Yehovah ben taigi Salomo: „Efu yu gi yesi na den komando nanga den wet fu mi èn yu du ala san mi taigi yu fu du, dan mi o du gi yu san mi pramisi yu papa David. Mi o tan na ini na oso di yu e bow. Mi o tan nanga den bakapikin fu Israel èn mi no o gowe libi mi pipel Israel.”—1 Kow. 6:11-13.

5, 6. San ben de a bakapisi di Salomo no ben e dini Gado nanga en heri ati moro?

⁵ Di Salomo kon owru, dan a no ben e dini Yehovah moro nanga en heri ati, èn a bigin teki prati na falsi anbegi (1 Kow. 11:4-6). Safrisafri, Salomo tapu fu hori ensrefi na den wet fu Yehovah, èn a bigin kwinsi a pipel moro nanga moro. A kwinsi a pipel so te, taki baka di a dede, a pipel go kragi na Rehabeam, a manpikin fu en di ben tron kownu baka en. Den aksi en fu lekti a wroko gi den (1 Kow. 12:4). San Yehovah du di Salomo no ben e dini en nanga en heri ati moro?

⁶ Bijbel e taki: ’Yehovah ati kon bron nanga Salomo, fu di a no ben e dini . . . a Gado fu Israel, moro. Tu leisi a ben sori ensrefi na Salomo.’ Yehovah taigi Salomo: „Fu di yu no hori yusrefi na a frubontu fu mi èn na den wet di mi gi yu, meki mi o puru a kownukondre disi na yu anu, èn mi o gi en na wan futuboi fu yu.”—1 Kow. 11:9-11.

7. Fa Yehovah sorgu gi den wan di ben e tai hori na en, aladi a no ben feni Salomo bun moro?

⁷ Ne Yehovah seni a profeiti Ahia fu go salfu a sma di ben o puru a pipel na ondro a kwinsi fu Salomo. A man di ben o man du dati, ben de Yerobeam. A ben e wroko na ondro Kownu Salomo. Aladi Yehovah tan hori ensrefi na a Kownukondre frubontu di a ben meki nanga David, toku a ben feni en bun taki den 12 lo prati na ini tu kownukondre. Yerobeam ben o tron kownu fu tin lo, èn tu lo ben o tan na ondro a tiri fu den bakapikin fu David. Kownu Rehabeam ben e teki presi gi a famirilin dati now (1 Kow. 11:29-37; 12:16, 17, 21). Yehovah ben taigi Yerobeam: „Du ala san mi taigi yu èn gi yesi na mi. Du san mi feni bun èn hori den wet nanga den komando fu mi, neleki fa mi futuboi David ben du. Te yu du disi, dan mi o de nanga yu, èn mi o meki den bakapikin fu yu tiri fu wan langa ten, neleki den bakapikin fu David. Mi o meki yu tiri Israel” (1 Kow. 11:38). Yehovah yepi a pipel fu en, èn a seti sani na so wan fasi, taki den ben kan kisi frulekti.

8. Sortu tesi a pipel fu Gado e kisi na ini a ten disi?

⁸ Na ini a ten disi, sma lobi kwinsi trawan, èn den e du kruktudu. Preikiman 8:9 e taki: „A wan libisma tiri a trawan na wan fasi di e tyari takru bakapisi kon gi en.” Te bisnisman gridi fu meki moni, èn te tiriman lobi du kruka sani, dan dati kan meki taki a libi e kon hebi gi sma. Nofo tron, tiriman, bisnisman, nanga kerki fesiman no e gi wan bun eksempre. Fu dati ede, neleki a bun man Lot, den wan di e tai hori na Gado na ini a ten disi de nanga ’bigi broko-ede, fu di den sma di e trangayesi a wet, e libi wan yayolibi’ (2 Petr. 2:7). Boiti dati, wi e pruberi fu hori wisrefi na den markitiki fu Gado, sondro fu afrontu trawan, ma nofo tron tiriman di e denki tumusi furu fu densrefi e frufolgu wi.—2 Tim. 3:1-5, 12.

9. (a) San Yehovah du kaba fu frulusu a pipel fu en? (b) Fu san ede wi kan de seiker taki Yesus sa tai hori na Gado?

⁹ Ma wi kan de seiker fu a prenspari tori disi: Yehovah no sa libi den wan di e tai hori na en! Prakseri den sani di a du kaba fu sorgu taki wan tra tirimakti e kon na ini a presi fu den kruka tiriman fu grontapu. A Mesias Kownukondre fu Gado di abi Krestes Yesus leki Kownu, seti kaba. Yesus Krestes e tiri pikinmoro wán hondro yari kaba leki kownu na hemel. Heri esi a sa tyari trutru frulekti kon gi den wan di abi frede gi a nen fu Gado. (Leisi Openbaring 11:15-18.) Yesus sori kaba taki a tai hori na Gado, èn a du dati te na dede. Noiti a sa kwinsi den wan di e saka densrefi na ondro a tiri fu en, soleki fa Salomo ben du dati.—Hebr. 7:26; 1 Petr. 2:6.

10. (a) Fa wi kan sori taki wi abi warderi gi a Kownukondre fu Gado? (b) Te wi e kisi tesi, dan sortu dyaranti wi kan abi?

¹⁰ Gado Kownukondre na wan trutru tirimakti di sa tyari wan kaba kon na iniwan sortu kwinsi. Wi musu tan horibaka gi Yehovah Gado èn gi a Kownukondre fu en. Fu di wi abi ala frutrow na ini a Kownukondre, meki wi no wani abi noti fu du nanga ogridu, èn wi de fayafaya fu du bun wroko (Tit. 2:12-14). Wi e du ala san wi man fu no meki grontapu flaka wi (2 Petr. 3:14). Awansi sortu tesi wi e kisi now, wi kan abi a dyaranti taki Yehovah sa kibri wi so taki a bribi fu wi no e kon swaki. (Leisi Psalm 97:10.) Boiti dati, Psalm 116:15 e gi wi a dyaranti disi: „Yehovah e si a dede fu den wan di e tai hori na en leki wan seryusu sani.” Den futuboi fu Yehovah warti so te gi en taki a no sa gi pasi taki sma pori den leki grupu.

Te den e kisi fu du nanga sma di fadon komoto na bribi

11. Fa a du kon taki Yerobeam no ben e dini Gado moro nanga en heri ati?

¹¹ Fu taki en leti, a tiri fu Kownu Yerobeam ben kan tyari frulekti kon gi a pipel fu Gado. Ma na presi fu dati, den sani di a kownu disi du meki en moro muilek gi den fu tan dini Gado nanga den heri ati. Fu di Yerobeam no ben de tevrede nanga a grani di a ben e kisi leki kownu, meki a bigin suku fasi fu sorgu taki a no ben o lasi a makti fu en. A ben prakseri: „Efu a pipel disi e tan go na Yerusalem fu tyari srakti-ofrandi na a oso fu Yehovah, dan den o go dini Kownu Rehabeam fu Yuda, a masra fu den. Den o kiri mi, èn den o drai go baka na Rehabeam, Kownu fu Yuda.” Fu dati ede, Yerobeam seti wan nyun fasi fu anbegi, èn dati ben de na anbegi fu tu gowtu pikin kaw. „Dan a poti wan fu den pikin kaw na Betel, èn a trawan a poti na Dan. A sani disi meki taki a pipel sondu. Sensi a ten dati, den ben e go te na Dan fu boigi gi a pikin kaw. Baka dati, Yerobeam meki wan oso di ben de na den presi pe sma ben e anbegi falsi gado. A ben teki sma na mindri a pipel fu meki den tron priester. Den sma disi no ben de fu a lo fu Leifi.” Yerobeam ben seti wan dei srefi fu hori wan „fesa gi den Israelsma”, èn a bigin tyari „bron ofrandi na tapu na altari fu meki smoko opo go na loktu”.—1 Kow. 12:26-33.

12. San den wan di ben e tai hori na Gado, èn di ben e tan na ini a noordsei kownukondre, du di Yerobeam seti na anbegi fu den pikin kaw na ini Israel?

¹² San den futuboi fu Gado di ben e tai hori na en, èn di ben e libi na ini a noordsei kownukondre ben o du now? Den Leifisma di ben e libi na ini den foto di den ben kisi na ini a kontren fu a noordsei kownukondre, handri neleki den afo fu den di ben e dini Gado nanga den heri ati. Den no draidrai (Ex. 32:26-28; Num. 35:6-8; Deut. 33:8, 9). Den gowe libi a famirigudu fu den, èn den nanga na osofamiri fu den froisi go na Yuda di ben de na a zuidsei. Drape den ben kan tan dini Yehovah sondro problema (2 Kron. 11:13, 14). Tra Israelsma di ben e tan wan pisi ten na ini Yuda, bosroiti fu no drai go baka, ma den tan drape (2 Kron. 10:17). Yehovah sorgu taki den Israelsma ben tan abi okasi fu teki a tru anbegi baka, so taki den bakapikin fu den di ben e libi na ini a noordsei kownukondre ben kan drai baka gi na anbegi fu den pikin kaw, fu go anbegi Gado baka na Yuda.—2 Kron. 15:9-15.

13. Fa sma di fadon komoto na bribi suku fu kori a pipel fu Gado na ini a ten disi?

¹³ Na ini a ten disi, sma di fadon komoto na bribi e suku fu kori a pipel fu Gado. Son tiriman pruberi fu seti den eigi fasi fu anbegi, èn den dwengi a pipel fu den fu teki na anbegi dati. Den kerki fesiman fu Krestenhèit nanga tra sma di e denki furu fu densrefi, pruberi fu meki sma bribi taki den na den wan di Gado poti leki memre fu a grupu fu priester di o tiri leki kownu. Ma soso na ini a tru Kresten bribi yu abi den trutru salfuwan di de memre fu a „grupu fu priester di o tiri leki kownu”.—1 Petr. 2:9; Openb. 14:1-5.

14. Fa wi musu handri te wi e kisi fu du nanga den denki fu sma di fadon komoto na bribi?

¹⁴ Neleki den Leifisma na ini a di fu tin yarihondro bifo Krestes, den wan di e tai hori na Gado na ini a ten disi, no e meki den sma di fadon komoto na bribi kori den. Den salfuwan nanga den tra Kresten brada nanga sisa fu den no wani abi noti fu du nanga den denki fu den sma disi. (Leisi Romesma 16:17.) Wi de klariklari fu saka wisrefi na ondro den tiriman, ma wi no e teki sei na ini grontapu afersi, èn wi e tan horibaka gi Gado Kownukondre (Yoh. 18:36; Rom. 13:1-8). Wi e weigri fu bribi den falsi leri fu den sma di e taki dati den e dini Gado, aladi den e tyari densrefi na wan fasi di e gi en syen.—Tit. 1:16.

15. Fu san ede wi musu horibaka gi „a getrow èn koni srafu”?

¹⁵ Prakseri tu taki Yehovah sorgu taki sma di wani dini en kan komoto na ini na ogri grontapu fu kon na ini a tru anbegi di a seti, pe vrede nanga wánfasi de (2 Kor. 12:1-4). Fu di wi abi bigi warderi gi a sani disi, meki wi e tan krosibei na „a getrow èn koni srafu di en masra poti fu luku den futuboi fu en, fu kan gi den nyanyan na a reti ten”. Krestes poti en srafu fu „luku ala den sani di a abi” (Mat. 24:45-47). Sobun, a kan taki wi no e frustan krin fu san ede a srafu-grupu teki wan spesrutu bosroiti. Awansi dati de so, toku wi no sa weigri fu horibaka gi a bosroiti dati, èn wi no sa drai go baka na a grontapu fu Satan. Ma fu di wi e dini Yehovah nanga wi heri ati, meki wi sa wakti nanga sakafasi teleki a tyari sani kon na krin.

Te den e du a wroko di Gado gi den

16. Sortu wroko wan profeiti fu Yuda ben kisi?

¹⁶ Yehovah krutu Yerobeam fu di a ben e teki prati na falsi anbegi. A meki wan profeiti fu Yuda go na a noordsei, na Betel, fu tyari wan boskopu gi Yerobeam. Di a profeiti doro drape, Yerobeam ben e tyari bron ofrandi na a altari fu en. A profeiti ben musu gi Yerobeam wan krakti boskopu. A no de fu taki dati a sani disi no ben makriki fu du.—1 Kow. 13:1-3.

17. Fa Yehovah kibri a boskopuman fu en?

¹⁷ Yerobeam kisi bigi atibron di a yere a krutuboskopu fu Yehovah. A sori go na a profeiti fu Gado, èn a bari gi den man di ben de drape: „Un grabu a man!” Ma fosi den ben man du wan sani, na „anu fu Yerobeam di ben e sori go na a man, kon kruwa. A no ben man hari na anu kon baka. Na altari priti na tu, so taki a fatu asisi fadon na gron”. Yerobeam ben abi fu aksi a profeiti fu begi Yehovah fu no atibron moro nanga en, èn fu meki na kruwa anu fu en kon betre baka. A profeiti du dati, èn na anu fu Yerobeam kon betre baka. Na so Yehovah kibri a boskopuman fu en so taki ogri no miti en.—1 Kow. 13:4-6.

18. Fa Yehovah e kibri wi te wi e du santa diniwroko gi en sondro fu frede?

¹⁸ Te wi e teki prati doronomo na a Kownukondre preikiwroko èn na a wroko di wi abi fu meki disipel, dan a kan pasa son leisi taki sma no e sori switifasi gi wi, noso taki den wani du ogri srefi nanga wi (Mat. 24:14; 28:19, 20). Ma noiti wi musu gi pasi taki a faya di wi abi gi a preikiwroko e kon kowru, soso fu di wi frede taki sma no o wani arki wi. Wi no sabi a nen fu a profeiti di ben e libi na ini a ten fu Yerobeam, ma neleki a profeiti dati, wi abi „a grani fu dini [Yehovah] sondro fu frede na wan loyaal fasi” (Luk. 1:74, 75).a Aladi wi no e fruwakti taki Yehovah sa frulusu wi nanga yepi fu wan wondru na ini a ten disi, toku A e tan kibri wi leki den Kotoigi fu en, èn a e du dati nanga yepi fu en santa yeye èn nanga yepi fu den engel. (Leisi Yohanes 14:15-17; Openbaring 14:6.) Noiti Gado sa gowe libi den wan di e tan preiki a wortu fu en sondro frede.—Fil. 1:14, 28.

Yehovah sa kibri den wan di e tai hori na en

19, 20. (a) Fu san ede wi kan de seiker taki Yehovah noiti no sa gowe libi wi? (b) Na sortu aksi wi sa poti prakseri na ini a tra artikel?

¹⁹ Yehovah, wi Gado, na wan Gado di ala ten e yepi den futuboi fu en (Openb. 15:4; 16:5). A de „loyaal na ini ala san a e du” (Ps. 145:17). Èn Bijbel e gi wi a dyaranti disi: „A sa kibri srefi a pasi fu den wan di e tai hori na en” (Odo 2:8). Son leisi den wan di e tai hori na Gado e kisi fu du nanga tesi, nanga den denki fu den wan di fadon komoto na bribi, noso den kisi wan wroko di no makriki fu du. Te den e ondrofeni den sani disi, dan den kan abi a dyaranti taki Yehovah sa tiri den èn taki a sa yepi den.

²⁰ A sani di ibriwan fu wi musu aksi wisrefi now, na disi: Fa mi kan tan dini Yehovah nanga mi heri ati, awansi sortu tesi noso problema e miti mi? Sobun, fa mi kan kon abi a fasti bosroiti fu tai hori na Gado, awansi san e pasa?

[Futuwortu]

San yu ben sa piki?

• Fa Yehovah sori taki a no e gowe libi den wan di e tai hori na en te den e kisi kwinsi?

• Fa wi musu handri te wi e kisi fu du nanga den denki fu sma di fadon komoto na bribi?

• Fa Yehovah e kibri den wan di e tai hori na en te den e teki prati na a Kresten diniwroko?

[Karta/​Prenki na tapu bladzijde 5]

(Efu yu wani si pe den sani disi skrifi, luku a tijdschrift)

NOORDSEI KOWNUKONDRE (Yerobeam)

Dan

SIKEM

Betel

ZUIDSEI KOWNUKONDRE (Rehabeam)

YERUSALEM

[Prenki]

Yehovah no gowe libi den wan di ben e tai hori na en di Yerobeam seti na anbegi fu den pikin kaw

[Prenki na tapu bladzijde 3]

San ben musu pasa so taki Salomo nanga a pipel fu en ben kan tan kisi blesi fu Gado?