Na engel fu Yehovah e kibri den wan di e frede en

Soleki fa Christabel Connell fruteri

Wi ben poti ala wi prakseri fu piki den aksi di Christopher ben abi fu Bijbel, taki wi no si dati na so lati a ben de. Wi no ben si tu taki Christopher ben e tan luku go na dorosei. Te fu kaba, a luku wi èn a taki: „Noti no o pasa nanga unu efu unu gowe now.” Na so a waka nanga wi go na den baisigri fu wi èn a taki wi odi. San a ben si? San ben kan pasa nanga wi?

MI GEBORE leki Christabel Earl na ini a foto Sheffield, na Ingrisikondre, na ini 1927. Na a ten fu a Di Fu Tu Grontapufeti, den sutu bom na tapu wi oso, èn fu dati ede mi ben go tan nanga mi granmama teleki mi klari a skoro fu mi. Na wan fu den Lomsu skoro pe mi ben go, mi ben tan aksi den non fu san ede so furu ogridu de. Den non disi èn sosrefi tra kerkisma, no ben man gi mi wan bun piki tapu na aksi dati.

Baka di a Di Fu Tu Grontapufeti kon na wan kaba, mi teki leri fu tron wan ati-oso zuster. Mi froisi go na Londen fu wroko na a lanti ati-oso Paddington, ma na ini a foto drape, mi ben e si moro ogridu. Syatu baka di mi bigi brada gowe fu go feti na ini Korea, mi ben si leti na dorosei fu na ati-oso fa sma fon wan man so te, taki a kon breni. Nowan sma ben yepi a man. Na a ten dati, mi mama ben kon nanga mi na wan konmakandra èn drape sma ben pruberi fu taki nanga den dedewan. Ma toku dati no ben yepi, fu di mi no ben man frustan ete fu san ede so furu ogridu ben de.

Mi kisi a deki-ati fu studeri Bijbel

Wan dei, John, a moro bigi brada fu mi, di ben tron wan Yehovah Kotoigi, kon luku wi. „Yu sabi fu san ede ala den ogri sani disi e pasa?”, na so a aksi. Mi taigi en taki mi no sabi. Ne a opo en Bijbel èn a leisi Openbaring 12:7-12. Now mi ben kan si taki na Satan nanga den ogri yeye e meki furu fu den ogri sani pasa na ini a grontapu disi. Sobun, mi teki a rai fu en, èn syatu baka dati mi bigin studeri Bijbel. Ma na a ten dati, mi no ben teki dopu fu di mi ben e frede sma.​—Odo 29:25.

Mi sisa, Dorothy, ben tron wan Kotoigi tu. Di a drai kon baka fu wan internationaal kongres na ini New York (1953) makandra nanga Bill Roberts, a man di ben o trow nanga en, dan mi taigi den taki mi ben studeri Bijbel. Bill aksi mi: „Yu ben leisi ala den bijbeltekst? Yu ben hari strepi na ondro den piki na ini a buku?” Di mi taigi en taki mi no du dati, dan a taki: „Dan yu no kan taki dati yu studeri! Pruberi fu miti a sisa baka èn bigin baka nanga a bijbelstudie!” Na a ten dati, ogri yeye bigin trobi mi. Mi kan memre ete taki mi aksi Yehovah fu kibri mi èn fu fri mi fu den ogri yeye.

Mi go pionier na ini Skotland nanga Ierland

Mi teki dopu tapu 16 yanuari 1954, èn na ini mei fu a yari dati a kontrakti di mi ben meki nanga na ati-oso ben kon na wan kaba. Èn mi bigin pionier na ini yuni. Aiti mun baka dati, den seni mi go leki spesrutu pionier na a foto Grangemouth, na ini Skotland. Drape mi firi taki den engel fu Yehovah ben kibri, noso ’seti densrefi lontu’ mi, di mi ben e wroko na so wan farawe kontren.​—Ps. 34:7.

Na ini 1956, mi kisi a kari fu go dini na ini Ierland. Makandra nanga tu tra sisa, mi ben musu go wroko na ini a foto Galway. Tapu a fosi dei di mi go preiki, mi doro na a oso fu wan priester. Baka wan tu miniti wan skowtu doro èn a tyari mi nanga a sisa di ben wroko nanga mi, go na skowtu-oso. Di a skrifi wi nen nanga a presi pe wi e tan, dan a go wantewante na a telefon. Wi ben yere a taki: „Iya, Pater, mi sabi soifri pe den e libi.” Na a priester ben seni en fu grabu wi! Den ben dwengi a sma di ben yuru na oso gi wi, fu puru wi na ini na oso, èn fu dati ede a bijkantoro taigi wi fu gowe libi a kontren dati. Wi ben lati tin miniti gi a loko di wi ben musu teki fu gowe. Ma di wi doro, a loko ben de drape ete, èn wan man ben e wakti drape fu sorgu taki wi ben gowe nanga a loko. Na dri wiki nomo wi ben de na ini Galway!

Baka dati den seni wi go na Limerick, wan tra foto pe a Lomsu Kerki ben abi bun furu krakti tapu sma. Doronomo bigi grupu sma ben e bari sani gi wi. Furu sma ben e frede fu opo den doro gi wi. Wán yari na fesi, sma ben fon wan brada na ini a pikin foto Cloonlara, di de krosibei. Sobun, wi ben breiti fu miti Christopher, di mi ben taki fu en na a bigin. A man disi ben aksi wi fu drai kon baka na en, fu taki fu den aksi di a ben abi fu Bijbel. Di wi ben de drape na en, dan wan priester waka kon na inisei èn a taigi Christopher fu seni wi gowe. Fu di a no ben wani du san a priester taigi en, meki a taki: „Mi kari den uma disi kon na ini mi oso èn den naki na tapu a doro fosi den kon na inisei. Mi no kari yu kon na ini mi oso, èn yu no naki na tapu a doro.” Nanga atibron a priester gowe.

Wi no ben sabi taki a priester ben kon nanga wan bigi grupu mansma, di ben e wakti wi na dorosei fu Christopher en oso. Fu di Christopher ben sabi taki den man disi ben atibron èn taki den ben wani du ogri nanga wi, meki a handri soleki fa skrifi na a bigin. A meki wi tan drape teleki den man ben gowe. Bakaten, wi ben yere taki sma ben dwengi en nanga en osofamiri fu froisi komoto drape, èn den ben go tan na Ingrisikondre.

Mi kisi a kari fu go na a Gileadskoro

Mi ben seti sani kaba fu go na „A wani fu Gado” Internationaal Kongres na ini New York, na ini 1958. Ma dan mi kisi a kari fu go na a di fu 33 klas fu a Gileadskoro. Na presi fu go na oso baka a kongres, mi go dini na Collingwood, Ontario, na ini Kanada, teleki a Gileadskoro bigin na ini 1959. Ma na a kongres dati mi miti Eric Connell. A brada disi kon sabi a waarheid na ini 1957 èn a bigin pionier na ini 1958. Baka a kongres, a ben e tan skrifi brifi gi mi ibri dei, di mi ben e tan na ini Kanada èn sosrefi di mi ben de na a Gileadskoro. Mi ben aksi misrefi san wi ben o du te mi klari a Gileadskoro.

A Gileadskoro ben de wan prenspari sani na ini mi libi. Mi sisa Dorothy nanga en masra ben de na ini a srefi klas fu mi. Den ben musu go dini na ini Potogisikondre leki zendeling. Mi ben fruwondru fu yere taki mi ben o go na Ierland. Mi ben sari taki mi no ben o go nanga mi sisa! Mi aksi wan fu den leriman fu a skoro efu mi du wan fowtu sani. A piki mi: „Nôno, yu nanga yu patna Eileen Mahoney, agri fu go na iniwan presi na grontapu”, èn a no de fu taki dati Ierland ben de wan fu den presi dati.

Mi e drai go baka na Ierland

Na ini augustus 1959 mi doro baka na ini Ierland, èn mi ben musu go dini na ini a Dun Laoghaire Gemeente. Na a ten dati, Eric ben drai go baka na Ingrisikondre, èn a ben breiti taki mi ben de so krosibei. A ben wani tron wan zendeling tu. A ben denki fu go pionier na ini Ierland, fu di na a ten dati den ben e seni zendeling fu go wroko drape. Eric froisi kon na Dun Laoghaire, èn wi trow na ini 1961.

Siksi mun baka dati, Eric kisi wan seryusu ongoloku nanga bromfiets. En ede ben priti, èn den datra no ben sabi efu den ben o man hori en na libi. Baka di a tan dri wiki na ati-oso, mi sorgu gi en na oso feifi mun langa teleki a kon betre. Mi ben tan du ala san mi man na ini a preikiwroko.

Na ini 1965, den seni wi go na wan gemeente pe aiti preikiman ben de na ini Sligo, wan lanpe na a noord-westsei fu a sesyoro. Dri yari baka dati, wi ben go na wan tra pikin gemeente na ini Londonderry, di de moro fara na a noordsei. Wan dei di wi komoto na preikiwroko, sma ben poti makamaka isri draad na tapu a pasi pe wi ben libi. A borgufeti na a noordsei fu Ierland ben bigin. Grupu ogri-ati yonguwan ben bron sma wagi. A foto ben prati kaba na ini kontren gi den Protestantsma nanga den Lomsusma. Ogri ben kan miti wi efu wi ben o go fu a wan sei fu a foto na a tra sei.

Wi ben e libi èn preiki na a ten fu a feti

A preikiwroko fu wi ben meki taki wi ben e go na difrenti presi. Na a ten disi sosrefi wi ben firi taki den engel ben seti densrefi lontu wi. Te wi ben de na ini kontren pe sma ben meki opruru, wi ben gowe esi-esi èn wi ben drai kon baka te a presi ben kon kowru. Wan leisi sma ben meki opruru krosibei fu wi oso, èn wan tu sani fu wan ferfi wenkri di ben e bron, ben fadon na wi fensrebangi. Wi ben tan na ai fu di wi ben frede taki na oso fu wi ben kan teki faya. Baka di wi froisi go na Belfast na ini 1970, wi yere taki di sma ben trowe wan bom di meki fu gasoline, na tapu a ferfi wenkri, dan na oso pe wi ben tan fosi, bron plata.

Wan tra leisi, mi nanga wan sisa ben de na ini a preikiwroko, èn wi ben fruwondru fu si wan pisi peipi na wan fensrebangi. Ma wi ben waka go doro. Wan tu miniti baka dati, a peipi sutu. Den sma fu a kontren drape ben kon luku èn den ben denki taki na wi sutu a bom. Leti na a momenti dati wan sisa di ben libi na ini a kontren drape, kari wi kon na ini en oso. Disi meki taki den birtisma ben bribi taki wi no du noti.

Na ini 1971, wi drai go baka na Londonderry fu go luku wan sisa. Di wi fruteri en sortu pasi wi teki èn na sortu presi wi ben musu stop fosi wi go doro, dan a aksi: „Nowan sma ben de drape fu tapu unu?” Wi taigi en: „Iya, sma ben de drape, ma den no ben poti prakseri na wi.” A sisa ben fruwondru fu a sani dati. Fu san ede? Fu di wan tu dei na fesi, sma ben teki èn bron a wagi fu wan datra èn fu wan skowtu.

Na ini 1972 wi froisi go na Cork. Bakaten, wi go dini na ini Naas, èn baka dati na ini Arklow. Te fu kaba na ini 1987, wi ben musu go na Castlebar, èn te now ete wi de drape. Dyaso wi ben abi a bigi grani fu yepi bow wan Kownukondre zaal. Na ini 1999, Eric kon siki seryusu. Ma toku, Yehovah yepi wi èn a gemeente horibaka gi wi na wan lobi-ati fasi. Na so mi ben man horidoro na ini a situwâsi disi èn mi ben man sorgu en teleki a kon betre.

Mi nanga Eric go tu leisi na a Pionierskoro. Te now ete Eric e dini leki wan owruman. Now mi abi a siki rheuma èn mi e abi furu pen. Mi du wan bigi oparâsi na mi dyonku nanga den tu kindi fu mi. Mi ben kisi furu gens fu kerkisma èn mi ben libi na ini ten pe furu dyugudyugu ben de na ini politiek èn na ini a libimakandra. Ma a sani di ben de a moro bigi problema gi mi, na taki mi no man rèi wagi moro. Dati ben de wan tesi gi mi fu di mi no man go pe mi wani èn o ten mi wani dati. A gemeente yepi mi trutru, fu di den horibaka gi mi. Now mi e waka nanga wan wakatiki, èn te mi musu go na fara presi, mi e go nanga wan baisigri di abi dri wiel èn di abi wan motor.

Ala nanga ala, mi nanga Eric dini moro leki 100 yari leki spesrutu pionier, èn fu den yari dati, wi dini 98 yari na ini Ierland. Wi no abi na prakseri fu go nanga pensyun fu a pionierwroko. Wi no e fruwakti taki wondru pasa, ma wi e bribi taki den tranga engel fu Yehovah ’e seti densrefi lontu’ ala den sma di e frede en èn di e tan dini en awansi san e pasa.