Fa yu kan horidoro na ini a preikiwroko?

A PASA wan leisi kaba taki yu lasi-ati so te, taki yu ben wani tapu nanga a preikiwroko? Te wi e kisi hebi gens, te wi abi broko-ede, te speri e dwengi wi fu du sani soleki fa den wani, noso te sma no wani arki wi na ini a preikiwroko, dan dati kan meki en muilek gi wi fu horidoro. Ma prakseri na eksempre fu Yesus. A ben horidoro na ondro a moro hebi tesi, fu di a ben prakseri „a prisiri di ben e wakti en” (Hebr. 12:2). A ben sabi taki te a sori dati den sani di Satan taki fu Gado no tru kwetikweti, dan na so fasi a e meki Yehovah ati prisiri.​—Odo 27:11.

Te yu e horidoro na ini a preikiwroko, dan yu sosrefi kan meki Yehovah ati prisiri. Ma fa a de efu son sani e meki yu weri so te, taki yu no man du a preikiwroko? Krystyna, di kon owru kaba èn di no de so gosontu, e taki: „Nofo tron mi e weri èn mi e lasi-ati. Fu di mi kon owru, meki mi abi problema, a gosontu fu mi no bun èn mi e broko mi ede nanga na aladei libi. Den sani disi e meki taki son leisi mi no de so fayafaya moro na ini a preikiwroko.” Fa yu kan tan horidoro na ini a preikiwroko aladi yu e kisi den sortu problema disi?

Teki na eksempre fu den profeiti

Fu man horidoro na ini a preikiwroko, Kownukondre preikiman di e gi yesi na Yehovah, kan pruberi fu abi a srefi denki leki den profeiti na ini owruten. Teki fu eksempre Yeremia. Di a kisi a kari fu dini leki wan profeiti, dan na a bigin a no ben wani. Toku Yeremia ben man horidoro na ini a muilek wroko fu en moro leki 40 yari, fu di a ben leri fu poti ala en frutrow tapu Gado.​—Yer. 1:6; 20:7-11.

Henryk kisi deki-ati fu na eksempre fu Yeremia. A e taki: „Na ini den moro leki 70 yari di mi e du a preikiwroko, mi lasi-ati son tron fu a fasi fa sma e handri, fu di son sma abi bita-ati gi wi, noso fu di den no wani arki a boskopu. Na den okasi dati, mi e prakseri na eksempre fu Yeremia. A lobi di a ben abi gi Yehovah, èn a tranga bribi di a ben abi, ben gi en a krakti fu tan taki profeititori” (Yer. 1:17). Rafał kisi deki-ati tu fu na eksempre fu Yeremia. A e taki: „Yeremia ben e frutrow tapu Gado, na presi fu poti prakseri tapu ensrefi èn tapu en eigi firi. A tan du a wroko fu en sondro fu frede, aladi sma na ala sei ben abi bita-ati gi en. Mi e pruberi fu hori dati na prakseri.”

Na eksempre fu Yesaya, wan tra profeiti, yepi furu sma fu horidoro na ini a preikiwroko. Gado ben taigi en taki sma fu en eigi kondre no ben o arki en. Yehovah ben taki: „Meki na ati fu a pipel disi kon tranga, èn meki srefi den yesi fu den no yere sani.” A sani disi wani taki dati a wroko fu Yesaya ben o de fu soso? Nôno, Gado no ben si a wroko na a fasi dati! Di Gado aksi Yeremia fu dini leki profeiti, dan a taki: „Dya mi de! Seni mi” (Yes. 6:8-10). Yesaya tan du a wroko fu en. Na so yu e denki tu fu a komando di yu kisi fu preiki?

Neleki Yesaya, wi kan horidoro na ini a preikiwroko aladi sma no e arki. Wi kan du dati, te wi no e poti tumusi furu prakseri na den okasi te sma no wani arki. Disi na san Rafał e du te a lasi-ati: „Mi e pruberi fu no prakseri den hati sani di sma taigi mi fu di den no wani arki. Den sma na ini mi kontren abi a reti fu arki, noso fu no arki.” Anna e taki: „Mi e du muiti fu no prakseri den takru sani di mi e ondrofeni, noso den sani di kan meki mi lasi-ati. A sani di e yepi mi, na taki mi e begi èn mi e luku a deitekst fosi mi go na ini a preikiwroko. Dati e meki taki heri esi ala takru prakseri gowe.”

A profeiti Esekièl ben dini na mindri den tranga-ede Dyu di ben de na ini katibo na Babilon (Esek. 2:6). Efu a profeiti no ben fruteri a pipel san Gado ben taki, èn efu wan ogri sma ben o dede sondro fu yere a warskow, dan Esekièl ben o de frantwortu gi a dede fu a sma dati. Yehovah ben taigi Esekièl: „En brudu mi sa aksi baka fu yu eigi anu.”​—Esek. 3:17, 18.

Henryk e pruberi fu abi a srefi denki leki Esekièl. A e taki: „Mi no wani abi a brudu fu nowan sma na mi tapu. Furu sma kan lasi den libi” (Tori. 20:26, 27). Zbigniew abi a srefi denki tu. A e taki: „Esekièl ben abi fu tan preiki awinsi san tra sma ben e denki. A sani disi yepi mi fu si a preikiwroko leki fa a Mekiman e si en.”

Yu no de yu wawan

Yu no de yu wawan te yu e du a preikiwroko. Neleki na apostel Paulus, wi kan taki: „Wi e wroko makandra nanga Gado” (1 Kor. 3:9). Krystyna, di e lasi-ati son leisi, e taki: „Fu dati ede mi e tan begi Yehovah fu gi mi krakti. Ala ten a e gi mi krakti, te mi e aksi en.” Iya, wi abi a yeye fu Gado fanowdu fu horibaka gi wi na ini a preikiwroko!​—Sak. 4:6.

Te wi e du a preikiwroko, dan santa yeye e yepi wi tu fu sori den fasi di de wan pisi fu „den froktu fu a yeye” (Gal. 5:22, 23). Te wi abi den fasi dati, dan dati e yepi wi fu horidoro na ini a preikiwroko, awinsi san e pasa. Henryk e taki: „Te mi e du a preikiwroko, dan dati e yepi mi fu wroko na den fasi fu mi. Mi e leri fu abi pasensi, fu hori den firi fu tra sma na prakseri, èn fu no meki pikinpikin sani tapu mi fu du mi diniwroko.” Te yu e horidoro na ini a preikiwroko awinsi yu abi difrenti problema, dan dati kan yepi yu fu sori den froktu fu a yeye moro bun.

Yehovah e gebroiki en engel fu tiri na aparti wroko disi (Openb. 14:6). Bijbel e sori taki ’tin dusun tron tin dusun engel de, èn sosrefi dusun tron dusun’ (Openb. 5:11). Na ondro a tiri fu Yesus, den engel e horibaka gi den futuboi fu Gado na grontapu. Yu e hori disi na prakseri te yu de na ini a preikiwroko?

Anna e taki: „Te mi e denki dipi fu a tori taki den engel de nanga wi na ini a preikiwroko, dan dati e gi mi deki-ati. Mi e warderi a yepi di den engel e gi, na ondro a tiri fu Yehovah nanga Yesus.” A de wan bigi grani fu man wroko makandra nanga den engel di e tan du san Gado wani!

Fa wi kan horidoro te wi e wroko makandra nanga tra Kownukondre preikiman? A de wan blesi taki wi kon sabi wan bigi ipi Kotoigi di e du san Gado wani. A no de fu taki dati yu ondrofeni taki a Bijbel odo disi tru: „Nanga isri, isri srefi e kon srapu. Na so wan man e srapu a fesi fu wan trawan.”​—Odo 27:17.

Te wi e wroko makandra nanga trawan na ini a preikiwroko, dan dati e gi wi a moi okasi fu si fa trawan e preiki na wan bun fasi, èn wi kan leri fu den. Elżbieta e taki: „Te mi e wroko nanga difrenti preikiman, dan dati e gi mi na okasi fu sori lobi gi den, èn gi den sma di wi e miti.” Pruberi fu go na ini a preikiwroko nanga difrenti preikiman. Na so fasi a preikiwroko o moro switi gi yu.

Sorgu bun gi yusrefi

Fu man tan de fayafaya na ini a preikiwroko, dan wi musu seti sani bun, wi musu studeri Bijbel doronomo, èn wi musu rostu bun. Fu taki en leti, wi musu sorgu taki wi abi wan bun matifasi nanga Yehovah, èn wi musu luku a gosontu fu wi tu.

Bijbel e taki: „Te a sma di de fayafaya e seti sani na fesi, dan dati seiker sa tyari wini kon gi en” (Odo 21:5). Zygmunt, di abi 88 yari now, e taki: „Fu di mi e seti sani bun gi mi diniwroko, meki mi man du furu na ini a preikiwroko. Mi e seti ala sani bun, so taki mi kan abi nofo ten gi a preikiwroko.”

Te wi sabi Bijbel bun, dan dati e gi wi deki-ati èn a e meki taki wi man du a preikiwroko bun. Neleki fa wi abi nyanyan fanowdu fu tan na libi, na so wi musu tan teki sabi fu Bijbel fu man du a preikiwroko. Te wi e studeri Gado Wortu ibri dei èn te wi e teki „nyanyan na a reti ten”, dan dati kan gi wi krakti fu du a preikiwroko.​—Mat. 24:45-47.

Elżbieta tyari bigi kenki kon na ini en libi, so taki a kan du en diniwroko moro bun. A e taki: „Mi no e luku telefisi so furu moro, èn dati e meki taki mi abi moro ten fu sreka gi a preikiwroko. Te mi e leisi Bijbel ibri neti, dan mi e denki den sma di mi ben miti na ini a kontren. Mi e suku tekst nanga artikel di kan yepi den.”

Rostu bun, so taki yu kan abi nofo krakti fu man du a preikiwroko so furu leki yu kan. Na a tra sei, tumusi furu prisiriten kan meki taki a diniwroko fu yu go na baka. Andrzej, wan fayafaya preikiman, e taki: „Te yu no e rostu bun, dan yu o weri tumusi, èn dati o meki taki yu bigin lasi-ati. Mi e du ala san mi man fu sorgu taki dati no pasa.”​—Preik. 4:6.

Aladi wi e du tranga muiti, toku furu sma no wani arki a bun nyunsu. Ma Yehovah noiti no sa frigiti a wroko di wi du (Hebr. 6:10). Srefi efu furu sma no wani taki nanga wi, toku a kan de so taki den e taki fu wi baka te wi gowe. A bakapisi kan de a srefi, leki san wi e leisi fu Esekièl. Sma sa „sabi seiker . . . taki wan profeiti ben de na den mindri” (Esek. 2:5). A tru taki a no makriki fu du a preikiwroko, ma wi e kisi wini fu en, èn son sma di arki sa kisi wini tu.

„A preikiwroko e yepi wi fu tron nyun sma èn fu sori lobi gi Gado èn gi tra sma,” na so Zygmunt e taki. Andrzej e taki tu: „A de wan grani fu teki prati na a wroko disi di e kibri sma libi. Noiti moro wi sa du a preikiwroko disi na so furu presi, noso na ini den srefi situwâsi disi.” Yu sosrefi kan kisi furu blesi te yu e horidoro na ini a preikiwroko na ini a ten disi.​—2 Kor. 4:1, 2.

[Prenki na tapu bladzijde 31]

Wi sa man horidoro na ini a preikiwroko, te wi e sorgu taki wi abi wan bun matifasi nanga Yehovah èn te wi e luku a gosontu fu wi