Sreka tini fu tron bigisma di man tyari frantwortu

YU ABI wan pikin di de wan tini? Efu dati de so, dan yu e ondrofeni wan fu den moro moi pisi ten na ini a libi fu yu pikin, di e kon moro bigi. Ma a pisi ten disi kan gi yu furu broko-ede tu. Yu e ondrofeni den sani di skrifi na ondrosei?

• Di a boi fu yu ben de moro yongu, a ben de leki wan boto di tai na lanpe, iya, a ben lobi fu de krosibei fu yu. Now di a kon tron wan tini, a e hari na a titei, èn a de nomonomo fu lusu gowe, fu di a wani du sani ensrefi èn a gersi leki a no wani de krosibei fu yu moro.

• Di a meisje fu yu ben pikin ete, a ben e fruteri yu ala sani. Now di a kon tron wan tini, a e taki soso nanga den mati fu en èn yu e kisi a firi taki a no wani yu leki en mati moro.

Efu so wan sortu sani e pasa na ini yu osofamiri, no de gaw fu denki taki a pikin fu yu e tron wan tranga-ede sma di no man kenki. San e pasa nanga en dan? Fu man piki na aksi dati, meki wi go luku fu san ede den tini yari de so prenspari na ini a libi fu yu pikin.

Den tini yari na prenspari yari

Sensi di a pikin fu yu gebore, difrenti sani ben de di a bigin du fu a fosi leisi. Fu kari wan tu eksempre, a bigin waka fu a fosi leisi, a bigin taki en fosi wortu, èn a go na skoro fu a fosi leisi. Papa nanga mama e prisiri te a pikin fu den e du den sortu sani dati fu a fosi leisi. Disi na sani di ala papa nanga mama e angri fu si, fu di dati e sori taki a pikin fu den e kon bigi.

Te wan pikin tron wan tini, dan dati na wan prenspari sani tu, aladi son papa nanga mama e feni disi wan muilek sani. Wi kan frustan taki papa nanga mama e broko den ede te a pikin fu den di ben e gi yesi fosi, e tron wan trangayesi tini di e tyari ensrefi heri tra fasi. Ma toku, te wan pikin tron wan tini, dan dati na wan tumusi prenspari pisi ten na ini en libi. Fu san ede?

Bijbel e taki dati te fu kaba „wan man o gowe libi en papa nanga en mama” (Genesis 2:24). Wan prenspari reide fu san ede yu pikin e tron wan tini, na fu sreka en gi a dei te a o gowe fu oso. Yu o prisiri taki yu pikin kon bigi, ma yu o sari tu taki a o gowe fu oso. Na a ten dati, yu pikin o man taki a sani disi neleki na apostel Paulus: „Di mi ben de wan pikin-nengre, mi ben e taki leki wan pikin-nengre, mi ben e denki leki wan pikin-nengre, èn mi ben e prakseri leki wan pikin-nengre; ma now di mi tron wan man, mi no e du moro leki wan pikin-nengre.”​—1 Korentesma 13:11.

Fu taki en leti, na a sani disi yu manpikin noso umapikin e du na ini den tini yari fu en. A e libi den pikin-nengre fasi fu en na baka èn a e leri fu tron wan bigisma di man tyari frantwortu, di man teki en eigi bosroiti èn di lepi nofo fu gowe libi oso. Iya, wan buku e taki dati den tini yari na te den pikin e sreka densrefi fu gowe libi den papa nanga mama.

A tru taki te yu e prakseri now taki a pikin boi fu yu, noso a pikin meisje fu yu o tron wan bigisma di man teki en eigi bosroiti, dan kande yu e tweifri efu a o man du dati trutru. Kande yu e aksi yusrefi:

• „Efu a boi fu mi no man hori a kamra fu en krin, dan fa o man sorgu ensrefi te a abi en eigi oso?”

• „Efu a meisje fu mi no man hori ensrefi na a yuru di a musu de na oso, dan fa a o man hori ensrefi na a yuru te a musu wroko?”

Efu yu e broko yu ede nanga den sortu sani disi, dan hori disi na prakseri: A no e pasa wantronso taki a pikin fu yu o sabi fa fu teki en eigi bosroiti, ma a sani disi o teki wan pisi ten. A tru taki yu si now taki „donfasi tai na a ati fu wan boi”, noso wan meisje.​—Odo 22:15.

Ma te yu e gi yu pikin leri na a yoisti fasi, dan a kan tron wan bigisma di man teki en eigi bosroiti, fu di a o ’gebroiki en frustan fu man si sani krin, so taki a kan sabi san bun èn san no bun’.​—Hebrewsma 5:14.

San kan yepi yu?

Fu man sreka a tini fu yu fu tron wan bigisma di man tyari frantwortu, yu musu leri en fu gebroiki en „frustan”, so taki ensrefi o man teki bun bosroiti (Romesma 12:1, 2). Den Bijbel rai di e kon now sa yepi yu fu du dati.

Filipisma 4:5: „Meki ala sma kon sabi taki unu de klariklari fu fiti unsrefi.” Kon meki wi taki dati a tini fu yu e aksi yu wan sani, kande a wani kon moro lati na oso. Wantewante yu e taigi en taki yu no wani. Dan a e bigin kragi: „Yu e du leki mi na wan pikin-nengre ete!” Kande yu o taigi en: „We, yu e tyari yusrefi leki wan pikin-nengre.” Ma fosi yu taki dati, poti prakseri na a sani disi: Nofo tron tini wani du sani di densrefi no man tyari a frantwortu gi dati. Ma nofo tron papa nanga mama no e gi den tini so furu okasi fu du sani densrefi. Kande wanwan leisi yu kan gi en na okasi fu du wan sani ensrefi. Fu san ede yu no e hori na prakseri fa a tini fu yu e denki fu wan tori?

Kolosesma 3:21: „Un papa, no tanteri den pikin fu unu, so taki den no lasi-ati.” Son papa nanga mama e pruberi fu basi ibri pikinpikin sani na ini a libi fu a tini fu den. Fu dati ede, den e luku ibri sani di a pikin e du. Den e taigi en suma a musu teki leki mati èn kibrikibri den e go arki te den pikin e taki na telefon. Ma nofo tron te papa nanga mama e du dati, dan dati kan abi takru bakapisi. Te yu e tapu a pikin fu du son sani, dan a o wani komoto na ini a situwâsi dati. Te yu e tan krutu den mati fu en, dan na now a o wani fu go suku den sortu mati dati. Te yu e arki kibrikibri san a e taki na telefon, dan a o go suku fasi fu taki nanga en mati sondro taki yu sabi dati. O moro yu e pruberi fu basi a libi fu en, o moro a o du sani di yu no sabi. Denki a tori disi: Efu a tini fu yu noiti e leri fu teki en eigi bosroiti te a de na oso ete, dan fa a o du dati te a gowe libi oso?

Efeisesma 6:4: „No tanteri den pikin fu unu, ma tan kweki den nanga a leri fu Yehovah èn frumane den, so taki den kan kisi a denki fu en.” Fu man meki a pikin kisi „a denki” fu Yehovah, wani taki moro leki fu taigi en nomo san a musu du. A wani taki dati yu musu abi krakti tapu a pikin na wan bun fasi, so taki a e frustan san a wani taki fu tyari ensrefi bun, èn fu du dati trutru. A sani disi de tumusi prenspari, spesrutu te a pikin fu yu e tron wan tini. Wan papa di nen Andre e taki: „O moro yu pikin e kon owru, o moro yu musu kenki a fasi fa yu e handri èn e taki nanga en.”—2 Timoteyus 3:14.

Galasiasma 6:7: „San wan sma e sai, na dati a sa koti tu.” Yu kan gi wan pikin leri te yu e strafu en, kande fu di yu e seni en go na en kamra noso yu e taigi en taki a no mag du wan sani di a lobi du. Ma te yu abi wan tini, a ben o moro bun fu meki ensrefi firi den bakapisi fu san a du.—Odo 6:27.

Yu leki papa noso mama, kande e winsi taki den tini yari fu yu pikin e pasa esi-esi sondro wan problema, teleki a tron wan bigisma. Ma nofo tron dati no e pasa. Toku, den tini yari fu yu pikin e gi yu wan heri moi okasi fu „leri wan boi [noso meisje] fu waka na tapu a yoisti pasi” (Odo 22:6). Den Bijbel gronprakseri na wan heri bun yepi di kan meki taki yu abi wan koloku osofamiri libi.